GĦALA hija importanti l-​mistoqsija, Min hu Alla tiegħek?— Għax in-​nies iqimu ħafna allat. (1 Korintin 8:5) Meta l-​appostlu Pawlu rċieva l-​qawwa mingħand Ġeħova biex ifejjaq raġel li qatt ma kien mexa qabel, in-​nies bdew jgħajtu: “L-​allat saru bħal bnedmin u niżlu għandna!” In-​nies riedu jqimu lil Pawlu u lill-​ħabib tiegħu Barnaba. Lil Pawlu bdew jgħidulu Erme u lil Barnaba Żews, li kienu ismijiet t’allat foloz.

Imma Pawlu u Barnaba ma ħallewx lin-​nies iqimuhom. Huma qabżu f’nofs il-​folla tan-​nies u qalu: ‘Ħallu dawn l-​affarijiet bla sens u duru lejn Alla l-​ħaj.’ (Atti 14:​8-15) Min hu “Alla l-​ħaj,” dak li ħalaq l-​affarijiet kollha?— Iva, dan hu Ġeħova, ‘waħdu l-​Għoli fuq l-​art kollha.’ Ġesù sejjaħ lil Ġeħova “l-​uniku Alla veru.” Mela, allura, min biss jistħoqqlu li jingħata qima?— Ġeħova biss!—Salm 83:19 (83:​18, NW); Ġwanni 17:3; Rivelazzjoni 4:11.

Ħafna nies iqimu lil allat oħra minbarra lill-​“uniku Alla veru.” Ħafna drabi jqimu affarijiet li jagħmluhom mill-​injam, mill-​ġebel, jew mill-​metall. (Eżodu 32:​4-7; Levitiku 26:1; Isaija 44:​14-17) Kultant, anki rġiel u nisa li jsiru famużi jissejħu allat, stilel, jew idoli. Huwa sew li nagħtu glorja lilhom?—

Wara li Sawlu sar l-​appostlu Pawlu, hu kiteb: “L-​alla taʼ din is-​sistema għema l-​imħuħ taʼ dawk li ma jemmnux.” (2 Korintin 4:4) Min hu dan l-​alla?— Iva, Satana x-​Xitan! Satana rnexxielu jġiegħel lin-​nies iqimu lil ħafna bnedmin u affarijiet.

 Meta Satana pprova jikkonvinċi lil Ġesù biex jinżel fl-​art u jqimu, Ġesù x’qallu lil Satana?— “Qim lil Ġeħova Alla tiegħek, u lilu biss agħti servizz sagru.” (Mattew 4:10) Mela Ġesù wera ċar li l-​qima trid tingħata biss lil Ġeħova. Ejja naqraw dwar xi żgħażagħ li kienu jafu b’dan. Dawn kien jisimhom Sidrak, Mesak u Għabednegu.

Dawn iż-​żgħażagħ Ebrej kienu parti mill-​ġens t’Alla taʼ Iżrael u kienu ttieħdu bħala lsiera fl-​art taʼ Babilonja. Hemmhekk, sultan jismu Nabukodonosor għamel statwa kbira ħafna tad-​deheb. Darba waħda hu kkmanda li meta tindaqq il-​mużika, kulħadd kellu jinżel fl-​art quddiem l-​istatwa. ‘Jekk xi ħadd ma jinżilx fl-​art u jagħti qima jkun mixħut f’nofs forn taʼ nar jaħraq ħafna,’ hu wissa. Int x’kont tagħmel?—

 Is-​soltu, Sidrak, Mesak, u Għabednegu kienu jagħmlu dak kollu li jikkmanda s-​sultan. Imma huma ma ridux jobdu dan il-​kmand. Taf għala?— Għax il-​liġi t’Alla kienet tgħid: ‘Ma jkollokx allat oħra ħliefi. La tagħmilx għalik xbieha minquxa u tinżel quddiemha.’ (Eżodu 20:​3-5) Għalhekk, Sidrak, Mesak, u Għabednegu obdew il-​liġi taʼ Ġeħova u mhux il-​kmand tas-​sultan.

Is-sultan irrabja ħafna, u mill-​ewwel ordna biex it-​tliet żgħażagħ Ebrej jiġu quddiemu. Hu staqsiehom: ‘Jaqaw għamiltu l-​ħsieb li ma taqdux lill-​allat tiegħi? Se nagħtikom ċans ieħor. Issa, malli tisimgħu l-​mużika, inżlu fl-​art u qimu l-​istatwa li jien għamilt. Jekk ma tagħmlux hekk, tkunu mixħutin f’nofs forn taʼ nar jaħraq ħafna. U liema hu dak l-​alla li se jeħliskom minn idejja?’

Issa x’kienu se jagħmlu dawn iż-​żgħażagħ? Int x’kont tagħmel?— Huma qalu lis-​sultan: ‘Alla tagħna li aħna nqimu jistaʼ jeħlisna. U anki jekk le, lill-​allat tiegħek m’aħniex se naqduhom. M’aħniex se ninżlu quddiem l-​istatwa tad-​deheb tiegħek.’

Is-sultan imtela bir-​rabja. Hu kkmanda: ‘Saħħnu l-​forn sebaʼ  darbiet iktar mis-​soltu!’ Imbagħad ordna lill-​irġiel b’saħħithom tiegħu biex jorbtu lil Sidrak, Mesak, u Għabednegu u jitfgħuhom fil-​forn! Il-​forn tant kien jaħraq li l-​irġiel stess tas-​sultan mietu bil-​fjammi tan-​nar! U t-​tliet Ebrej xi ġralhom?

Sidrak, Mesak, u Għabednegu waqgħu f’nofs in-​nar. Imma mbagħad qamu bil-​wieqfa! La kienu weġġgħu u lanqas kienu għadhom marbutin. Dan kif setaʼ ġara?— Is-​sultan ħares fil-​forn, u beżaʼ b’dak li ra. ‘Mhux tlett irġiel tfajna fin-​nar?’ staqsa hu. Il-​qaddejja tiegħu wieġbu: “U żgur, sultan!”

Imbagħad is-​sultan qal: ‘Jien qiegħed nara erbat irġiel mexjin hemm ġew, u n-​nar ma qed jagħmlilhom xejn.’ Taf min kien ir-​rabaʼ raġel?— Kien l-​anġlu taʼ Ġeħova. Hu pproteġa lit-​tliet Ebrej biex ma jweġġgħux.

Malli ra hekk, is-​sultan resaq lejn il-​bieb tal-​forn u għajjat: “Sidrak, Mesak u Għabednegu, qaddejja taʼ Alla l-​Għoli, oħorġu u ejjew hawn!” Meta ħarġu, kulħadd setaʼ jara kif dawn ma kinux inħarqu bin-​nar. Lanqas riħa taʼ ħruq ma kellhom fuqhom. Imbagħad is-​sultan  qal: ‘Imbierek Alla taʼ Sidrak, Mesak, u Għabednegu, li bagħat l-​anġlu tiegħu u ħeles lill-​qaddejja tiegħu għax ma ridux iqimu alla ieħor ħlief lill-​Alla tagħhom.’—Danjel 3:​1-23, 91-97 (kapitlu 3, NW).

Aħna nistgħu nitgħallmu lezzjoni minn dak li ġara dakinhar. Anki llum in-​nies jużaw xbihat, jew idoli, fil-​qima tagħhom. Enċiklopedija waħda tgħid: “Il-​bandiera, bħas-​salib, hija sagra.” (The Encyclopedia Americana) Ix-​xbihat jistgħu jkunu taʼ l-​injam, tal-​ġebel, tal-​metall, jew tad-​drapp. L-​ewwel dixxipli taʼ Ġesù ma ridux jagħmlu att taʼ qima quddiem il-​mexxej Ruman. Daniel P. Mannix, wieħed li jistudja l-​istorja tad-​dinja, qal li dawn kienu qishom qed jirrifjutaw li jsellmu lill-​bandiera jew jagħmlu wegħda li se jibqgħu leali lejn il-​pajjiż tagħhom.

Mela taħseb li tagħmel differenza għal Alla jekk xbieha reliġjuża tkunx tad-​drapp, taʼ l-​injam, tal-​ġebel, jew tal-​metall?— Huwa tajjeb li qaddej taʼ Ġeħova jagħmel att taʼ qima quddiem ħaġa bħal din?— Sidrak, Mesak, u Għabednegu ma ridux jagħmlu hekk, u Ġeħova kien ferħan bihom. Int kif tistaʼ tagħmel bħalhom?—