AHABW’ENKI ekibuuzo, Ruhanga waawe n’oha? kiri kikuru?— N’ahabw’okugira ngu abantu nibaramya baaruhanga baingi. (1 Abakorinso 8:5) Entumwa Paulo ku yaatungire amaani kuruga ahari Yehova kukiza omushaija owaabaire atarikubaasa kugyenda, abantu baagamba n’eiraka rihango bati: “Baaruhanga baatushuumamu omu nshusha y’abantu!” Abantu bakaba nibenda kuramya Paulo na munywani we Barunaba. Paulo baamweta Herume kandi Barunaba baamweta Zeu, agaabaire gari amaziina ga baaruhanga b’ebishuba.

Kwonka Paulo na Barunaba tibaraikiriize abantu kubaramya. Batyo baayeshuka omu bantu, nibagamba bati: “Murekye ebi ebitaine mugasho, muhindukire Ruhanga ohuriire.” (Ebyakozirwe 14:8-15) “Ruhanga ohuriire,” owaahangire ebintu byona n’oha?— Eego, ni Yehova, “okira boona, kandi otegyeka ensi yoona.” Yesu akeeta Yehova “Ruhanga omwe ow’amazima.” Mbwenu shi, n’oha oshemereire kuramibwa?— Ni Yehova wenka!​—Zaaburi 83:18; Yohaana 17:3; Okushuuruurwa 4:11.

Abantu abaingi nibaramya baaruhanga abandi omu mwanya gw’okuramya “Ruhanga omwe ow’amazima.” Nibakira kuramya ebintu ebi barikukora omu biti, omu mabaare, nari omu byoma. (Okuruga 32:4-7; Abaleevi 26:1; Isaaya 44:14-17) Obumwe abashaija n’abakazi abarikumanywa munonga nibatwarwa nka baaruhanga. Kihikire okubatwara tutyo?—

Saulo ku yaabaire entumwa Paulo, akahandiika ati: “Nibo batarikwikiriza abu ruhanga w’ensi egi yaahumize emitima.” (2 Abakorinso 4:4) Ruhanga ogwo n’oha?— Ni Sitaane Omuregi! Sitaane abaasize kureetera abantu kuramya ebintu n’abantu baingi.

 Sitaane obu yaateeraho kwenda ngu Yesu amwinamire kandi amuramye, Yesu akamugira ati: ‘Kikahandiikwa ngu oramye Yehova Ruhanga waawe; obe niwe waaheereza wenka.’ (Matayo 4:10) N’ahabw’ekyo, Yesu akakyoreka butunu ngu okuramya kwona kushemereire kuheebwa Yehova wenka. Ka tushome aha batsigazi abaabaire nibamanya eki. Amaziina gaabo ni, Seduraaka, Mesaaki, na Abedeneego.

Abatsigazi abo Abaheburaayo bakaba bari bamwe aha b’eihanga rya Ruhanga erya Israeli, kandi bakaba batwirwe nk’enkwatwa omu nsi ya Babulooni. Omugabe orikwetwa Nebukadeneeza akombeka ekishushani kihango ky’ezaabu. Eizooba rimwe akaragiira ngu abantu ku barahurire enzamba, boona bajuumare ahansi baramye ekishushani ekyo. Kandi yaarabura ngu: ‘Omuntu weena oraayangye kujuumara ahansi kukiramya, naija kunagwa omu kikoomi ky’omuriro ogurikubuguma.’ Kuri waabaire oriiwe okaba noija kukora ki?—

 Butoosha, Seduraaka, Mesaaki, na Abedeneego bakaba bakora byona ebi omugabe yaabaire abaragiira. Kwonka bakanga kujuumara ahansi kuramya ekishushani. Noomanya ahabw’enki?— N’ahabw’okugira ngu ekiragiro kya Ruhanga nikigira kiti: ‘Otarigira baaruhanga abandi nyowe ndiho. Otaryekorera ekishushani ekibaizire kandi otarikiinamira.’ (Okuruga 20:3-5) N’ahabw’ekyo, Seduraaka, Mesaaki, na Abedeneego bakoorobera ekiragiro kya Yehova kukira kworobera ekiragiro ky’omugabe.

Omugabe akagira ekiniga kingi, yaaragiira ngu bamureetere abatsigazi abo bashatu. Yaababuuza ati: ‘N’eky’amazima, mwangire kuheereza baaruhanga bangye? Ninza kubaha omugisha ogundi. Aha murundi ogu, ku muraahurire enzamba, mujuumare ahansi kandi muramye ekishushani eki nkozire. Kwonka ku muraayangye, nimwija kunagwa omu kikoomi ky’omuriro ogurikubuguma. Mbwenu ni ruhanga ki oraabaihe omu mikono yangye?’

Abatsigazi abo bakaba baine kukora ki? Iwe okaba noija kukora ki?— Bakagambira omugabe bati: ‘Ruhanga waitu, ou tuheereza, naabaasa kutwiha omu kikoomi ky’omuriro ogurikubuguma. Kandi n’obu kiraabe kitabaaire kityo, okimanyire kimwe ku tutarikwija kuheereza baaruhanga baawe. Titurikwija kwinamira ekishushani ky’ezaabu eki oyemereize.’

 Omugabe akagira ekiniga kingi. Yaaragiira ‘kuheemba omuriro okukira oku gutakabaga emirundi mushanju!’ Bwanyima yaatoorana abashaija b’amaani, yaabaragiira kuboha Seduraaka, Mesaaki na Abedeneego n’okubanaga omu kikoomi ky’omuriro gurikubuguma. Omuriro gukabugumira kimwe, endimi z’omuriro zaita abashaija b’omugabe. Kandi shi Abaheburaayo abashatu?

Seduraaka, Mesaaki, na Abedeneego bakagwa ahagati y’omuriro. Kwonka baimuka bataine oku babaire. Kandi bakaba batakibohirwe. Ekyo kikabaasika kita?— Omugabe akareeba omu muriro, kandi eki yaareebire kikamutiinisa. Yaabuuza ati: ‘Hari abashaija abu twanaga omu muriro baaba batari bashatu?’ Abaheereza be bamugarukamu bati: ‘Nikwo, Nyakusinga omugabe.’

Omugabe yaabagira ati: ‘Mbwenu nindeeba abashaija bana nibagyendagyenda omu muriro bataine ku babaire.’ Omuntu wa kana ogwo akaba ari oha?— Akaba ari Maraika wa Yehova. Akarinda Abaheburaayo abo bashatu ngu batagira oku baaba.

Kwonka, ku yaareebire ekyo, yairira aha muryango gw’ekikoomi ky’omuriro ogurikubuguma kandi yaagira ati: ‘Seduraaka, Mesaaki, na Abedeneego, Imwe abairu ba Ruhanga  ow’Obushoboorozi Bwona, nimushohore mwije aha.’ Ku baarugiremu, buri omwe akareeba ngu tihaine oku baaba. N’omuriro gukaba gutarikubanuukaho. Bwanyima omugabe yaagira ati: ‘Ruhanga wa Seduraaka, Mesaaki, na Abedeneego asiimwe; niwe yaayohereza maraika we, akajuna abairu be abaamwesiga ahakuba tibabaasize kuheereza ruhanga ondiijo otari Ruhanga waabo buzima.’​—Danieli, eshuura 3.

Ebyabaireho omu bunaku obwo haine eki turikubaasa kubyegaho. Na hati abantu nibataho ebishushani by’okuramibwa. Ekitabo Encyclopedia Americana nikigira kiti: “Ebendera, nk’omusharaba, eine akakwate n’okuramya.” Ebishushani ebirikukoresibwa omu kuramya nibibaasa kukorwa omu biti, amabaare, ebyoma nari emyenda. Abeegi ba Yesu aba ira bakaba bataramya omugabe w’Abarooma eki omunyabyafaayo Danieli P. Mannix yaagizire ngu nikibaasa kugyeragyeranisibwa “n’okwanga kuteerera ebendera entamaamu nari okugarukamu endahiro ngu nooza kuba omwesigwa aha ihanga ryawe.”

Nooteekateeka ngu ahari Ruhanga, ekishushani kyaba kikozirwe omu mwenda, ekiti, eibaare nari ekyoma hariho entaaniso?— Mbwenu shi nikiba kihikire omuheereza wa Yehova kuramya ebishushani nk’ebyo?— Seduraaka, Mesaaki, na Abedeneego bakaba batarikubaasa kukora ekyo, kandi bakashemeza Yehova. Nitubaasa kutooreza tuta eky’okureeberaho kyabo?—