PAKIKO ta importante pa bo sa ken ta bo Dios?— Dor ku hende ta adorá hopi dios. (1 Korintionan 8:5) Ora apòstel Pablo a haña poder serka Yehova pa kura un hòmber ku no a yega di kana nunka, e hendenan a grita: “E diosnan a haña forma di hende i a baha bin serka nos!” E hendenan kier a adorá Pablo i su amigu Barnabas. Nan a bisa ku Pablo ta Merkurio, anto ku Barnabas ta Yupiter, dos dios falsu.

Pero Pablo ku Barnabas no a laga e hendenan adorá nan. Nan a kore drenta meimei di nan i bisa nan: “Laga e kosnan bano aki i kombertí na e Dios bibu.” (Echonan 14:8-15) Ken ta “e Dios bibu” ku a traha tur kos?— Sí, ta Yehova, “e Haltísimo riba henter tera.” Hesus a bisa ku Yehova ta “e úniko Dios berdadero.” P’esei, ta ken so meresé pa hende ador’é?— Yehova so!—Salmo 83:18; Juan 17:3; Revelashon 4:11.

Mayoria hende ta adorá otro dios na lugá di “e úniko Dios berdadero.” Hopi bes nan ta adorá kos ku hende a traha di palu, piedra òf metal. (Eksodo 32:4-7; Levítiko 26:1; Isaias 44:14-17) Tin bes nan ta bisa ku asta hende ku a bira famoso ta dios, strea òf ídolo. Ta bon pa duna hende famoso gloria?—

Despues ku Saulo a bira apòstel Pablo, el a skirbi: “E dios di e mundu aki a siega mente di esnan ku no ta kere.” (2 Korintionan 4:4) Ta ken e dios ei ta?— Sí, Satanas e Diabel! Satanas a logra pone hende adorá yen di hende i kos.

Ora Satanas a purba laga Hesus bùig pa ador’é, kiko Hesus a  bisa Satanas?— ‘Adorá Yehova bo Dios, i sirbi e so.’ (Mateo 4:10) Pues, Hesus a mustra bon kla ku ta Yehova so meresé pa nos ador’é. Tabatin tres hóben ku tabata sa esei. Nan nòmber ta Sadrak, Mesak i Abed-nego. Laga nos lesa tokante nan.

E mucha hòmbernan hebreo aki tabata di Israel, e nashon di Dios. Sòldá a hiba nan komo katibu na un pais ku yama Babilonia. Na Babilonia un rei ku yama Nabukodonosor a traha un imágen di oro masha grandi mes. Un dia el a duna òrdu pa ora muzik kuminsá toka, tur hende bùig pa e imágen. El a spièrta nan: ‘Ken ku no bùig i adorá e imágen, nos lo tira den e fòrnu di kandela kayente-kayente.’ Kiko abo lo a hasi?—

Otro ora, Sadrak, Mesak ku Abed-nego tabata hasi tur kos ku e rei manda nan. Pero e kos aki sí nan a nenga di hasi. Bo sa  dikon?— Dor ku e lei di Dios ta bisa: ‘Bo no mag tin niun otro dios ku no ta ami. Bo no mag traha pa bo mes niun imágen grabá, anto bùig p’e.’ (Eksodo 20:3-5) P’esei, Sadrak, Mesak ku Abed-nego a hasi loke e lei di Yehova a bisa i no e kos ku e rei a manda nan hasi.

E rei a rabia hopi. El a manda nan trese e tres mucha hòmbernan hebreo mesora su dilanti anto el a puntra nan: ‘Ta bèrdat ku boso no ta sirbi mi diosnan? Mi ta duna boso un chèns mas. Awor, ora boso tende e muzik, bùig i adorá e imágen ku mi a traha. Si boso no hasié, nan ta tira boso den e fòrnu di kandela. Anto ta kua dios por skapa boso for di mi man?’

Kiko e hóbennan a hasi e ora ei? Kiko abo lo a hasi?— Nan a bisa e rei: ‘Nos Dios ku nos ta sirbi por skapa nos. Pero asta si e no skapa nos, nos no ta bai sirbi bo diosnan. Nos no ta bai bùig pa bo imágen di oro.’

Awor e rei a rabia bira loko. El a bisa su hendenan: ‘Hasi e fòrnu shete biaha mas kayente ku normal!’ E ora ei el a manda su hòmbernan fuerte pa nan mara Sadrak, Mesak ku Abed-nego, anto tira nan den e fòrnu! E fòrnu tabata asina kayente ku  e vlamnan a mata e hòmbernan di e rei mes! Kiko a pasa ku e tres hebreonan?

Sadrak, Mesak ku Abed-nego a kai nèt meimei dje kandela. Pero, e ora ei, nan a lanta para! Nada no a pasa nan. Anto nan no tabata mará mas tampoko. Kon e kos ei por ta posibel?— E rei a tira bista den e kandela, i el a mira un kos ku a dun’é miedu. El a puntra su sirbidónan: ‘No ta tres hòmber nos a tira den kandela?’ Nan a kontestá: “Sigur ku sí, o Rei.”

E ora ei e rei a bisa: ‘Wak! Ta kuater persona mi ta mira ta kana rònt ei den, anto e kandela no ta hasi niun di nan nada.’ Bo sa ta ken e di kuater persona ei tabata?— Un angel di Yehova. El a protehá e tres hebreonan pa nada no pasa nan.

Wèl, ora e rei a mira e kos ei, el a bai na porta di e fòrnu anto grita: “Sadrak, Mesak i Abed-nego, boso, sirbidónan di e Dios Haltísimo, sali bin akí!” Ora nan a sali, tur hende por a mira ku nan no a kima. Nan no  tabata ni hole kandela. E ora ei e rei a bisa: ‘Bendishoná sea e Dios di Sadrak, Mesak ku Abed-nego, kende a manda su angel pa skapa su sirbidónan pasobra nan no kier a adorá niun dios ku no ta nan mes Dios.’—Daniel, kapítulo 3.

E kos ei ku a pasa ta siña nos un lès. Awendia ainda hende sa traha imágen, prenchi òf kos asina pa nan adorá. Encyclopedia Americana ta bisa: “Bandera ta sagrado, meskos ku krus.” Hende sa traha imágen di palu, piedra, metal i di paña. E promé disipelnan di Hesus tabata nenga di hasi akto di adorashon na e emperador romano, esta, hasi kos ku lo a mustra ku nan ta ador’é. Daniel P. Mannix, un hende ku ta skirbi tokante historia, ta bisa ku loke e disipelnan tabata hasi ta manera ora hende “nenga di saludá bandera òf hura lealtat na nan pais.”

Awor, bo ta kere ku Dios ta wòri si ta di paña, di palu, di piedra òf di metal un imágen religioso ta trahá?— Un sirbidó di Yehova tin mag di hasi un akto di adorashon dilanti un imágen asina?— Sadrak, Mesak ku Abed-nego a nenga di hasié, i Yehova a keda kontentu ku nan. Kon abo por sigui nan ehèmpel?—