WHY nao disfala kwestin, Hu nao God bilong iu? hem important?— Bikos pipol worshipim staka god. (1 Corinthians 8:5) Taem aposol Paul kasem paoa from Jehovah for healim man wea no wakabaot start kam long taem hem born, pipol singaot big olsem: “Olketa god kamap olsem olketa man and olketa kam daon long iumi!” Pipol laek worshipim Paul and fren bilong hem Barnabas. Olketa nemem Paul Hermes, and Barnabas Zeus, wea hem nem bilong olketa giaman god.

Bat Paul and Barnabas no letem pipol worshipim olketa. Tufala go midolwan olketa pipol and sei: “Tanawe from olketa iusles samting hia and worshipim datfala God wea laef.” (Acts 14:8-15) Hu nao “God wea laef,” wea creatim evri samting?— Ia, hem Jehovah wea hem “Most Hae ovarem full earth.” Jesus kolem Jehovah “datfala only tru God.” So, hu nomoa iumi shud worshipim?— Jehovah!—Psalm 83:18; John 17:3; Revelation 4:11.

Plande pipol worshipim olketa nara god and no “datfala only tru God.” Plande taem olketa worshipim samting wea olketa wakem from tree, ston, or metal. (Exodus 32:4-7; Leviticus 26:1; Isaiah 44:14-17) Nomata olketa soccer star, actor, and man for singsing, samfala taem pipol tinghae long olketa olsem olketa god. Waswe, hem stret for mekhae long olketa?—

Bihaen Saul kamap aposol Paul, hem raet olsem: “[Datfala] god bilong disfala world hem blindim mind bilong olketa wea no biliv.” (2 Corinthians 4:4) Hu nao disfala god?— Ia, hem Satan! Satan win for mekem pipol worshipim olketa man and olketa nara samting.

 Taem Satan trae for mekem Jesus baodaon and worshipim hem, wanem nao Jesus talem Satan?— “Iu mas worshipim God bilong iu, Jehovah, and iu mas duim holy service long hem nomoa.” (Matthew 4:10) So Jesus talem klia, worship hem for Jehovah nomoa. Distaem iumi read abaotem samfala young man wea savve long diswan. Nem bilong olketa hem Shadrach, Meshach, and Abednego.

Thrifala young Hebrew hia bilong datfala nation bilong God, Israel, and olketa kamap olketa prisoner long Babylon. Long there King Nebuchadnezzar wakem wanfala maeti image from gold. Wanday hem talem komand for taem olketa pleim music, evriwan shud baodaon long datfala image. Hem talem warning hao sapos ‘eniwan no baodaon and worshipim datfala image olketa bae torowem olketa insaed bigfala fire.’ Sapos iu stap long there, wanem nao bae iu duim?—

 Shadrach, Meshach, and Abednego evritaem duim evri samting wea king komandim. Bat olketa les for baodaon long image. Waswe, iu savve why?— Hem bikos law bilong God sei: ‘Iu mas no garem eni nara god. Iu mas no wakem for iuseleva wanfala karving and baodaon long hem.’ (Exodus 20:3-5) So Shadrach, Meshach, and Abednego obeyim law bilong Jehovah and no komand bilong king.

King barava kros tumas, so stretawe hem talem olketa for tekem kam thrifala young Hebrew hia long hem. Hem askem olketa: ‘Waswe, hem tru hao iufala no servem olketa god bilong mi? Mi bae givim iufala nara chance moa. Taem iu herem music, foldaon and worshipim image wea mi wakem. Sapos nomoa, olketa bae torowem iufala insaed bigfala fire. And hu nao datfala god wea savve sevem iufala?’

Wanem nao olketa young man hia bae duim? Sapos iu nao wanfala Hebrew hia, wanem nao bae iu duim?— Olketa sei long king: ‘God wea mifala servem fit for sevem mifala. Bat nomata sapos hem no duim, mifala bae no servem olketa god bilong iu. Mifala bae no baodaon long image wea iu wakem from gold.’

 King hem kros fogud. Hem givim komand for olketa mas ‘mekem fire kamap hot sevenfala taem winim bifor!’ Then hem orderim olketa strong man bilong hem for taemapem Shadrach, Meshach, and Abednego and torowem olketa insaed bigfala fire hia! From datfala big fire hot tumas hem killim dae olketa man bilong king! Waswe long thrifala Hebrew?

Shadrach, Meshach, and Abednego foldaon barava insaed fire nao. Bat then olketa standap! Olketa no bone. And rope wea olketa taemap long olketa nomoa tu. Hao nao diswan happen?— King luk go insaed long fire, and hem fraetem samting hem lukim. Hem ask: ‘Waswe, thrifala man nao iumi torowem insaed long fire?’ Olketa servant sei: “Ia, O king.”

Then king sei: ‘Lukim! Mi lukim fofala man wakabaot long there, and fire no bonem olketa.’ Waswe, iu savve hu nao mek-foa man hia?— Hem angel bilong Jehovah. Hem protectim thrifala Hebrew from fire.

Taem king lukim diswan, hem go klosap long fire and singaot: “Shadrach, Meshach and Abednego, iufala servant bilong Most Hae God, kam long hia!” Taem  olketa kamaot evriwan lukim olketa no bone. Olketa no smel olsem smoke bilong fire tu. Then king hem sei: ‘Blessim God bilong Shadrach, Meshach and Abednego, wea sendem wanfala angel for sevem olketa servant bilong hem bikos olketa no worshipim eni nara god bat God bilong olketa nomoa olketa worshipim.’—Daniel, chapter 3.

Iumi savve lanem wanfala leson from samting wea happen long datfala taem. Nomata distaem tu olketa man worshipim olketa image, wea minim idol, piksa, and nara samting. The Encyclopedia Americana hem sei: “Flag, olsem cross, hem holy.” Olketa savve wakem image from wood, ston, metal, or kaleko. Olketa firsfala disaepol bilong Jesus no willing for worshipim bigman bilong Rome, wea man for raetem history Daniel P. Mannix sei hem semsem witim wei for “no willing for salutim flag or mekem promis for sapotim gavman.”

So waswe, iu tingse hem important long God sapos olketa wakem wanfala image bilong religion from kaleko, wood, ston, or metal?— Waswe, hem bae stret for wanfala servant bilong Jehovah worshipim image olsem?— Shadrach, Meshach, and Abednego no duim, and Jehovah hapi long olketa. Hao nao iu savve followim example bilong olketa?—