¿IMARAYKÚ tapukuna tiyan pichus Diosninchej kasqanta?... Imaraykuchus runasqa ashkha dioskunata yupaychanku (1 Corintios 8:5). Apóstol Pablo Jehovaj atiyninwan uj suchu runata sanoyachejtin, runasqa qhaparerqanku: “Runaman rijchʼakoj dioskuna uraykʼamusqanku”, nispa. Chantá Pablota, Bernabetawan yupaychayta munarqanku. Llulla dioskunaj sutisnintataj churarqanku: Pablotaqa Mercurio (Hermes) nerqanku, Bernabetataj Júpiter (Zeus).

Paykunataj mana yupaychachikorqankuchu. Runas ukhuman yaykuspataj nerqanku: ‘Kay qhasi manakaj imasta saqespa, kausashaj Diosman kutirikuychej’, nispa (Hechos 14:8-15). ¿Pitaj ‘kausashaj Dios’? ¿Pitaj tukuy imata ruwarqa?... Jehová. Paylla “Patapi Kaj Dios tukuy kay pachapi”. Jesusqa Jehová “kʼata cheqa Dios” kasqanta nerqa. Chayrayku, ¿pillatá yupaychana?... Jehovallata (Salmo 83:18, NM; Juan 17:3; Apocalipsis 4:11).

May chhika runasqa “kʼata cheqa Diosta” yupaychanankumanta, waj dioskunata yupaychanku. Chay dioskunankoqa kʼullumanta, rumimanta, qorimanta, waj imasmantawan (Éxodo 32:3-7; Levítico 26:1; Isaías 44:14-17). Wakintaj may rejsisqa runastapis diosta jina qhawanku. Chay ruwasqanku, ¿allinchu?...

Saulo apóstol Pabloña kaspa, qhelqarqa: “Kay pachaj diosnenqa mana creejkunaj yuyayninkuta laqhayachin”, nispa (2 Corintios 4:3, 4). ¿Pitaj chay dios?... Satanás. Chayraykutaj ashkha runas, runasllata chayri waj imasta yupaychanku.

 Uj kuti, Satanás Jesusman nerqa: ‘Qonqorikuspa yupaychaway’, nispa. ¿Imatá Jesús kuticherqa?... Pay nerqa: “[Jehová] Diosniykita yupaychanki, pay sapallantataj sirvinki”, nispa (Mateo 4:10). Chayta nispa, Jesusqa sutʼita rikucherqa Jehovallata yupaychana kasqanta. Kinsa jovenesqa chayta sumajta yacharqanku. Sutikorqanku Sadrac, Mesac, Abed-nego ima.

Chay jovenesqa hebreos karqanku, Diospa llajtan Israelpitaj nacekorqanku. Jinapis Babiloniapi esclavos kasharqanku. Uj kuti, rey Nabucodonosorqa uj jatun santota qorimanta ruwacherqa. Tukuy runasmantaj nerqa: ‘Tocanasta chʼajwarejta uyariytawan pampakama kʼumuykukunkichej chay santoj ñaupaqenpi. Pikunachá mana kʼumuykukonqankuchu, nitaj yupaychanqankuchu chaykunaqa, laurashaj hornoman wijchʼuykusqa  kanqanku’, nispa. Qan, ¿imanawajtaj karqa?...

Sadrac, Mesac, Abed-nego imaqa, reyta kasojpuni kanku. Chay kutipitaj mana kasorqankuchu. ¿Yachankichu imaraykuchus?... Diospa leynenqa nej: ‘Noqamanta jawaqa waj diosniyki ama kachunchu. Ama ni ima santota ruwakunkichu. Ama qonqorikunkichu chaykunaman’, nispa (Éxodo 20:3-5). Chayrayku chay kinsa hebreosqa Diosta kasukorqanku, nitaj reytachu.

Reyqa mayta phiñarikorqa. Chay hebreosta chay rato wajyachispataj nerqa: ‘¿Cheqachu qankuna mana yupaychankichejchu dioskunayta? Ujtawan nisqaykichej. Tocanasta chʼajwarejta uyariytawan, kay santo ruwachisqayman kʼumuykukuychej. Manachus yupaychankichej chayqa, laurashaj hornoman wijchʼuykusqas kankichej. Chantá, ¿ima diostaj qankunata makisniymanta salvayta atisonqachejri?’, nispa.

¿Imatá chay jóvenes ruwarqanku? ¿Imatá qan ruwawaj karqa?... Chay jovenesqa reyman nerqanku: ‘Diosniykumá salvayta atiwasqayku. Mana salvawaykuman chaypis, manapuni dioskunaykitaqa yupaychasqaykuchu. Nitaj kʼumuykukusqaykuchu qori santoykimanpis’, nispa.

 Reyqa mayta phiñarikorqa, nerqataj “hornota parichej kanku, chaymantapis qanchis kutitawan aswan ruphata parichinankuta”. Chantá aswan kallpasapa soldadosninman nerqa: ‘Sadracta, Mesacta, Abed-negotawan wataykuspa, hornoman wijchʼuykuychej’, nispa. Horno may parisqa kasqanrayku, chay soldados wañorqanku. Chay kinsa joveneswanrí, ¿imataj karqa?

Hornoman wijchʼuykusqa kasqankutawan, sayariporqanku. Mana imanasqas, phaskarasqastaj kasharqanku. Chayqa tʼukunapaj, ¿icharí?... Reyqa hornota qhawaykorqa, mancharikuspataj kamachisninta taporqa: “Manachu kinsa runasllata ninaman wijchʼuykorqanku?”, nispa. Paykunataj kuticherqanku: “Arí, ajina karqa”, nispa.

Chantá rey nerqa: ‘Noqa rikuni tawa runasta. Mana imanasqas nina chaupipi purikushanku’, nispa. ¿Pitaj chay ujnin karqarí?... Jehovaj angelnin karqa. Pay chay kinsa hebreosta jarkʼarqa mana imanakunankupaj.

Chantá reyqa horno punkumanta, qhaparerqa: “Sadrac, Mesac, Abed-nego, janaj pachapi kaj Diospa  kamachisnin, llojsimpuychej, jampuychejtaj kayman”, nispa. Chay kinsa jóvenes llojsimojtinku, runasqa ni imanku ruphasqa kasqanta rikorqanku. Nitaj qʼosñikipasqasllapischu kasharqanku. Chantá rey nerqa: ‘Yupaychasqa kachun Sadracpata, Mesacpata, Abed-negojpatawan Diosninkoqa, pichus angelninta kachamorqa paykunata librananpaj. Diosninkumanta jawa mana waj diosta yupaycharqankuchu’, nispa (Daniel 3 capítulo).

¿Imatá chaymanta yachakusunman? Kunanpis runasqa yupaychanankupaj santosta ruwakunku: Kʼullumanta, rumimanta, qorimanta, telamanta, yesomanta, waj imasmantawan. Uj libro nin: “Banderaqa cruz jinallataj jatunpaj qhawasqa”, nispa (The Encyclopedia Americana). Ñaupa cristianosqa Romapi kamachejta ni imaynamanta yupaychajchu kanku. Unay tiempomanta qhelqaj Daniel P. Mannix nerqa: ‘Paykunaj ruwasqankoqa ninakunman, banderata jatunchayta qhesachaywan, chayri banderapaj juramentota mana ruwaywan’, nispa.

Uj santo imamantapis ruwasqa kachun, ¿Dios chayta allinpajchu qhawan?... ¿Allinchu kanman Jehovata sirvej chaykunata imaynallamantapis yupaychanan?... Chay kinsa hebreosqa reypa santonta mana yupaycharqankuchu, Jehovataj kusikorqa. ¿Imaynatá paykuna jina ruwawaj?...