NGBANGA ti nyen hundango tënë so atene “Nzapa ti mo ayeke zo wa”, ayeke kota ye mingi?— Ngbanga ti so azo ayeke voro gbâ ti anzapa (1 aCorinthien 8:5). Tongana Jéhovah amû lani ngangu na bazengele Paul ti sava mbeni koli so atambela kozoni lâ oko pëpe, azo adekongo: ‘Anzapa amû tele ti zo ala ga na popo ti e.’ Azo ni aye lani ti voro Paul na kamarade ti lo Barnabas. Ala hiri Paul Hercule, na ala hiri Barnabas Jupiter. A-iri so ayeke ti anzapa ti wataka.

Me Paul na Barnabas ake lani ti tene azo avoro ala. Ala kpe ala lï na popo ti azo ni na ala tene: ‘I zia asenge ye so na i ga na Nzapa so ayeke na fini.’ (Kusala 14:8-15). “Nzapa so ayeke na fini” so ayeke zo wa?— Biani, a yeke Jéhovah, “Lo Ti Nduzu Ahon Kue na ndo sese kue.” Jésus ahiri Jéhovah oko “tâ Nzapa”. Tongaso, a lingbi a voro gi zo wa?— Gi Jéhovah oko!​—Psaume 83:19; Jean 17:3; Apocalypse 4:11.

Mingi ti azo ayeke voro anzapa so ayeke nde na oko “tâ Nzapa”. Ala yeke voro ka aye so ala sala na keke, na tênë wala na wen (Exode 32:4-7; Lévitique 26:1; Esaïe 44:14-17). Même akoli na awali so azo ahinga ala mingi, a yeke hiri ala ngoi na ngoi anzapa wala ayanda. A yeke na lege ni ti mû gloire na ala?—

Na peko ti so Saul aga bazengele Paul, lo tene: ‘Azo so ake ti mä na bê, nzapa ti sese so akanga lege ti hingango ndo ti ala.’ (2 aCorinthien 4:4). Nzapa so ayeke zo wa?— Tâ gi Satan Zabolo! Satan awara lege ti pusu azo ti voro amba ti ala azo nga na aye mingi.

 Tongana Satan agi lani lege ti sala si Jésus akuku avoro lo, Jésus atene nyen na lo?— ‘A lingbi mo sambela Seigneur Nzapa ti mo, na mo sala gi na Lo oko.’ (Matthieu 4:10). Tongaso Jésus afa polele so a lingbi a voro gi Jéhovah oko. Zia e bâ tapande ti ambeni maseka-koli so ahinga ye so. A yeke ti Sadrac, Mésac na Abed-Nego.

Amaseka-koli so ayeke aHébreu. Ala yeke ti mara ti Israël so a gue na ala na ngbâa na sese ti Babylone. Kâ, Nebucadnetsar, gbia ti Babylone, aleke mbeni kota yanda ti lor. Mbeni lâ, lo mû yanga ti tene na ngoi so a yeke pika mozoko, a lingbi azo kue akuku na gbele yanda so. Lo tene: ‘Zo so akuku pëpe si avoro yanda ni pëpe, fade a yeke bi lo na yâ four ti wâ so agbi ngangu.’ Tongana a yeke mo fade, mo yeke sala nyen?—

 Mingi ni, Sadrac, Mésac na Abed-Nego ayeke sala ye kue so gbia ni akomande ala ti sala. Me ti so, ala ke. Mo hinga ngbanga ti nyen?— A yeke ngbanga ti so ndia ti Nzapa atene: ‘A lingbi mo duti na mbeni nzapa nde na gbele mbi pëpe. A lingbi mo sala mbeni yanda so a leke na kode teti mo mveni pëpe na mo kuku na gbele lo pëpe.’ (Exode 20:3-5). Ni la, Sadrac, Mésac na Abed-Nego asala ye so ndia ti Jéhovah ahunda ahon ti sala ye so gbia ni akomande.

Ngonzo ahon ndo ti gbia ni, na lo hunda ti tene a ga na amaseka Hébreu ota so na lo. Lo hunda: ‘A yeke tâ tënë so i yeke voro anzapa ti mbi pëpe? Ti so, mbi kiri mbi hunda na i, tongana i mä toto ti mozoko, i tï na sese na i voro yanda so mbi sala. Tongana i sala ni pëpe, mbi yeke bi i na yâ four ti wâ so agbi ngangu. Na nzapa wa si alingbi ti zi i na tïtî mbi?’

Amaseka-koli ni ayeke sala ande nyen? Tongana a yeke mo fade, mo yeke sala nyen?— Ala tene na gbia ni: ‘Nzapa so e yeke voro lo so alingbi ti zi e. Même tongana lo zi e pëpe, a yeke pëpe anzapa ti mo so la si e yeke sambela ni. E yeke kuku na gbele yanda ti lor ti mo pëpe.’

 Lê ti gbia ni abe na ngonzo. Lo tene: ‘I kiri i zia wâ dä ahon ti kozoni lege mbasambala!’ Na pekoni, lo komande angangu zo ti lo ti gbe Sadrac, Mésac na Abed-Nego na kamba na ti bi ala na yâ four ti wâ ni! Me wâ ti four ni agbi ngangu mingi si a fâ tâ gi azo ti gbia ni. Ka ti aHébreu ota so?

Sadrac, Mésac na Abed-Nego atï tâ gi na yâ ti wâ ni. Me ala londo! Sioni oko asi na ala pëpe. Na kamba so a gbe na ala angbâ na tïtî ti ala mbeni pëpe. Ye ni alingbi ti si tongaso tongana nyen?— Gbia ni abâ ndo na yâ ti four ti wâ ni, na ye so lo bâ kâ azia mbito na bê ti lo. Lo hunda: ‘E bi azo ota na yâ wâ ni pëpe?’ Awakua ti lo akiri tënë: ‘A yeke tongaso, O gbia.’

Na pekoni, gbia ni atene: ‘Bâ! Mbi yeke bâ azo osio ayeke tambela na yâ wâ ni, na wâ ni asala sioni na ala pëpe.’ Osio zo ni so ayeke zo wa?— A yeke mbeni ange ti Jéhovah. Lo bata aHébreu ota so si sioni asi na ala pëpe.

Na bango ye so, gbia ni ague ndulu na yanga ti four ti wâ ni, na lo dekongo: ‘Sadrac, Mésac na Abed-Nego,  i awakua ti Nzapa Ti Nduzu Ahon Kue, i ga na ndo so!’ Tongana ala sigigi, azo kue alingbi ti bâ so wâ agbi ala pëpe. Même kete fion ti guru ti wâ ayeke na tele ti ala pëpe. Gbia ni atene: ‘Gloire na Nzapa ti Sadrac, Mésac na Abed-Nego, so atokua ange ti lo ti zi awakua ti lo, ngbanga ti so ala yeke voro mbeni nzapa nde pëpe gi Nzapa ti ala oko.’​—Daniel, chapitre 3.

E lingbi ti manda mbeni ye na lege ti ye so asi kâ. Laso nga azo ayeke leke a-image wala ayanda ti voro ni. Mbeni mbeti (The Encyclopedia Americana) atene: “Drapeau, legeoko na croix, ayeke nzoni-kue.” A lingbi ti leke ayanda na keke, na tênë, na wen wala na bongo. Akozo disciple ti Jésus ayeke voro lani gbia ti Rome pëpe. Na ndo tënë so, Daniel P. Mannix atene so a lingbi ti haka ye so na “kengo ti bala drapeau wala ti deba yanga ti mû gi mbage ti kodoro ti zo ni.”

Ti mo, tongana a leke mbeni yanda na bongo, na keke, na tênë wala na wen, a yeke ye oko na lê ti Nzapa pëpe?— Ti tene mbeni wakua ti Jéhovah avoro mara ti ayanda so, a yeke na lege ni?— Sadrac, Mésac na Abed-Nego avoro ni pëpe, na ala nzere na bê ti Jéhovah. Mo lingbi ti sala ye tongana ala tongana nyen?—