O AI lou Atua? Aiseā e tāua ai lenei fesili?— Auā e tele atua o loo tapuaʻi i ai tagata. (1 Korinito 8:5) Ina ua maua e Paulo le mana mai iā Ieova e faamālōlō ai se tagata pipili, na alalaga atu tagata e faapea: ʻUa ō mai atua iā i tatou, ua pei ni tagata.’ Na mananaʻo tagata e tapuaʻi iā Paulo ma lana uō o Panapa. Na latou faaigoaina Paulo o Hereme, a o Panapa o Seu, o igoa o atua sesē.

Peitaʻi, e leʻi faatagaina e Paulo ma Panapa tagata ina ia tapuaʻi atu iā i laʻua. Na la faalatalata atu i le mea o tumu ai tagata ma faapea atu: “Ia outou lafoaʻi nei mea lē aogā, ma liliu mai i le Atua soifua.” (Galuega 14:8-15) O ai “le Atua soifua” na faia mea uma lava?— Ioe, o Ieova, “o lē Silisili ese i le lalolagi uma.” Na taʻua e Iesu e faapea o Ieova o “le Atua moni e toʻatasi.” O ai la e toʻatasi e tatau ona tatou tapuaʻi i ai?— E na o Ieova!​—Salamo 83:18; Ioane 17:3; Faaaliga 4:11.

E toʻatele tagata e tapuaʻi i isi atua e ese mai i “le Atua moni e toʻatasi.” E masani ona latou tapuaʻi i mea latou te faia mai i laau, maa po o uʻamea. (Esoto 32:4-7; Levitiko 26:1; Isaia 44:14-17) E oo lava i tamāloloa ma fafine taʻutaʻua, e masani ona taʻua i latou o atua po o ē e matuā viiviia e tagata. Faamata e saʻo le avatu o le viiga i tagata faapena?—

Ina ua avea Saulo ma aposetolo lea na igoa o Paulo, na ia tusia e faapea: “Ua faatauasoina manatu o i latou o ē lē faatuatua e le atua o le lalolagi nei.” (2 Korinito 4:4) O ai lenei atua?— Ioe, o Satani le Tiapolo! Ua mafai ona uunaʻia e Satani tagata e tapuaʻi atu i tagata ma mea eseese.

 Ina ua taumafai Satani e faamalosia Iesu e ifo atu ma tapuaʻi iā te ia, o le ā le tala a Iesu na fai iā Satani?— “E te ifo atu [“iā Ieova,” NW] lou Atua, ua na o ia lava e te auauna i ai.” (Mataio 4:10) O lea la, na taʻu saʻo e Iesu e faapea, ua na o Ieova e tatau ona auauna i ai. Seʻi tatou faitau la e faatatau i ni talavou o ē na malamalama i le mea lenei. O o latou igoa o Sataraka, Mesako ma Apeteniko.

O nei talavou Eperu, e ō mai mai le nuu o le Atua, o Isaraelu, ma na ave faapagota i le nuu o Papelonia. O i inā na fai ai e Nepukanesa le tupu o Papelonia, se tupua auro telē lava. I se tasi aso, na faatonuina e le tupu tagata uma e ifo atu i le tupua pe a tā le musika. Na lapataʻi atu le tupu: “Ai se tasi e lē faapaʻū ma ifo e lafoina o ia i lea lava itu aso i totonu o le ogaumu e mū ai le afi.” Ana o oe, o le ā le mea e te faia?—

 Sa masani ona usiusitai Sataraka, Mesako ma Apeteniko i faatonuga uma lava e fai mai ai le tupu. Peitaʻi, latou te leʻi usitai i le faatonuga lenei. E te iloa le māfuaaga?— Auā o loo faapea mai le tulafono a le Atua: ʻAua neʻi e fai mo oe ni atua e ese mai iā te aʻu. Aua e te fai mo oe se tupua ua tā, ma e ifo i ai.’ (Esoto 20:3-5) O le māfuaaga lenā na usitai ai Sataraka, Mesako ma Apeteniko i le tulafono a Ieova na i lo le faatonuga a le tupu.

Na matuā ita le tupu, ma faatonu atu e aumai vave talavou Eperu toʻatolu i ona luma. Ua fesili atu: ʻPe saʻo ea tou te lē auauna i oʻu atua? O le a toe tuu atu se isi avanoa. O lenei, pe a outou lagona le musika, ia tou faapaʻūʻū ma ifo i le tupua ua ou faia. Afai tou te lē ifo i ai, e lafoina outou i le ogaumu aasa. O ai le atua lenā e na te laveaʻiina outou ai laʻu pule?’

O le ā nei le mea o le a fai e talavou? O le ā le mea e te ono faia?— Na latou fai atu i le tupu: ʻE mafai e lo matou Atua o loo matou auauna i ai, ona laveaʻi iā i matou. Ae e tusa lava pe lē laveaʻia i matou e lo matou Atua, e matou te lē auauna i ou atua. O le tupua auro foʻi ua e faia, matou te lē ifo i ai.’

Ua matuā ita lava le tupu. Na ia faatonu atu: ʻIa faaʻaʻasa le ogaumu, ia faafitu ona sili atu i le mea e masani ai’! Ona faatonu lea e  le tupu ana auauna malolosi e saisai Sataraka, Mesako ma Apeteniko ma lafo i totonu o le ogaumu! Ona o le aasa tele o le ogaumu, na iʻu ina feoti ai auauna a le tupu! Ae faapefea talavou Eperu e toʻatolu?

Na lafoina Sataraka, Mesako ma Apeteniko i totonu o le ogaumu. Peitaʻi, na tutū i luga! E leai ma se mea o i latou na mū. Ua matala foʻi mea na saisai ai i latou. E faapefea ona tupu lenā mea?— Ua tilotilo atu le tupu i totonu o le ogaumu, ma ua fefe i le mea na vaai i ai. Na fesili le tupu: ʻPe tatou te leʻi lafoina ea tagata e toʻatolu i totonu o le afi?’ Na tali atu ana auauna: ʻE moni lava oe le tupu e.’

Ona fai atu lea o le tupu: ʻFaauta, ua ou iloa atu tagata e toʻafā o loo feoaʻi i totonu o le afi, e lē o afaina lava i latou.’ E te iloa o ai lē na toʻafā ai?— O le agelu a Ieova. Na puipuia e le agelu ia talavou Eperu e toʻatolu ina neʻi mū i le afi.

Ina ua tau le vaai a le tupu i lenei mea, na alu atu i le faitotoʻa o le ogaumu ma valaau atu: “Sataraka e, Mesako, ma Apeteniko, o auauna a le Atua silisili, ō mai ia,  inā ō mai.” Ina ua ō mai i fafo, na iloa uma atu e tagata, e leai ma se mea o i latou na mū i le afi. E oo lava i o latou ofu, e leʻi namu afi. Ona faapea atu lea o le tupu: ʻIa faafetaia le Atua o Sataraka, Mesako, ma Apeteniko, o lē na auina mai lana agelu e laveaʻi i ana auauna, auā latou te leʻi auauna i se tasi atua, ae tau lava o lo latou lava Atua.’​—Tanielu, mataupu 3.

E mafai ona tatou aʻoaʻoina se lesona mai le mea na tupu. E oo lava i aso nei, ua fai ai e tagata tupua, po o faatusa ina ia tapuaʻi i ai. Ua faapea mai se tasi tusi: “E paia le fuʻa, e pei o le koluse.” (The Encyclopedia Americana) E mafai ona faaaogā se laau, maa, uʻamea po o se fasi ʻie e fai ai se faatusa. E leʻi mafai lava e uluaʻi soo o Iesu ona tapuaʻi atu i le pule o Roma i so o se auala, ma e pei ona taʻua e se polofesa i talafaasolopito e igoa iā Daniel P. Mannix, e mafai ona faatusaina lenā mea i le “lē fāʻalo i le fuʻa po o le lē faia o se tautōga i lou atunuu.”

O le ā sou manatu, faamata o se mea lelei i le Atua pe a faaaogā se fasi ʻie, laau, maa po o se uʻamea e fai ai se faatusa faalotu?— Faamata e saʻo mo se auauna a Ieova ona tapuaʻi pe ifo atu i se faatusa faapena?— E leʻi ifo atu Sataraka, Mesako ma Apeteniko i le tupua, ma na fiafia Ieova iā i latou. E mafai faapefea ona e faataʻitaʻi i la latou faaaʻoaʻoga?—