FU SAN EDE a de prenspari fu aksi: ’Suma na yu Gado?’— Fu di sma e anbegi furu gado (1 Korentesma 8:5). Di na apostel Paulus ben kisi makti fu Yehovah fu meki wan man di noiti ben waka bifo kon betre baka, dan den sma bari: „Den gado kon tron libisma èn den saka kon na grontapu!” Den sma ben wani anbegi Paulus nanga en mati Barnabas. Den kari Paulus Hermes èn Barnabas Zeus, èn disi ben de nen fu falsi gado.

Ma Paulus nanga Barnabas no ben wani taki sma anbegi den. Den dyompo go na mindri den sma èn den taki: ’Un drai baka gi den soso sani disi èn anbegi a libi Gado’ (Tori fu den Apostel 14:8-15). Suma na „a libi Gado”, di meki ala sani?— Iya, dati na Yehovah, ’a Moro Heiwan fu heri grontapu’. Yesus ben kari Yehovah „a wan-enkri tru Gado”. Sobun, suma wawan wi musu anbegi?— Yehovah wawan!​—Psalm 83:18; Yohanes 17:3; Openbaring 4:11.

Furu sma no e anbegi „a wan-enkri tru Gado”, ma den e anbegi tra gado. Furu tron den sma disi e anbegi sani di den meki fu udu, ston, noso isri (Exodus 32:4-7; Lefitikus 26:1; Yesaya 44:14-17). Srefi te man nanga uma e kon pôpi, dan sma e anbegi den neleki den na gado. A bun fu gi den sma disi glori?—

Baka di Saulus tron na apostel Paulus, dan a skrifi: „A gado fu a sistema disi tapu a frustan fu den sma di no e bribi” (2 Korentesma 4:4). Suma na a gado disi?— Iya, Satan Didibri! Satan ben man meki taki libisma e anbegi furu sma nanga sani.

 Di Satan pruberi fu meki Yesus boigi gi en èn anbegi en, dan san Yesus taigi Satan?— „Na Yehovah yu Gado yu musu anbegi èn en wawan yu musu dini” (Mateyus 4:10). Sobun, Yesus sori krin taki sma musu anbegi Yehovah wawan. Meki wi leisi fu wan tu yonkuman di ben sabi disi. Den ben nen Sadrak, Meisak, nanga Abedneikow.

Den yongu Hebrewsma disi ben de fu Gado en pipel Israel èn sma ben tyari den go na ini katibo na a kondre Babilon. Drape wan kownu di ben nen Nebukadnesar, ben meki wan bun bigi popki fu gowtu. Wan dei, a ben gi a komando taki te poku ben e prei, dan ala sma ben musu boigi gi a popki. A ben warskow den sma: ’Efu iniwan fu unu no e boigi fu anbegi a popki, dan den sa fringi un go na ini wan faya onfu.’ San yu ben o du?—

 Sadrak, Meisak, nanga Abedneikow, ben gwenti fu du iniwan sani di a kownu ben taigi den fu du. Ma den weigri fu boigi gi a popki. Yu sabi fu san ede?— Na fu di a wet fu Gado ben taki: ’Boiti mi, un no musu abi nowan tra gado. Un no musu meki wan popki gi unsrefi fu boigi gi en’ (Exodus 20:3-5). Fu dati ede, Sadrak, Meisak, nanga Abedneikow no gi yesi na a komando fu a kownu, ma den gi yesi na a wet fu Yehovah.

A kownu ben mandi srefisrefi, sobun wantewante a meki sma tyari den dri yongu Hebrewsma kon na en. A aksi den: ’A de so trutru taki unu no e dini den gado fu mi? Mi no o strafu unu disi leisi. Ma dyonsro te unu e yere a poku, dan un musu fadon na gron èn anbegi a popki di mi meki. Efu unu no e du dati, dan mi sa meki sma fringi unu go na ini a faya onfu. Èn suma na a gado di kan frulusu unu komoto na ini mi anu?’

San den yonkuman ben o du now? San yu ben o du?— Den taigi a kownu: ’A Gado fu wi di wi e dini man frulusu wi. Srefi efu a no e du dati, toku wi no sa dini den gado fu yu. Wi no sa boigi gi a gowtu popki fu yu.’

A kownu ben kisi hebi atibron. A gi a komando: ’Faya na onfu  seibi tron moro leki fa unu gwenti fu faya en!’ Baka dati, a taigi den trangaman fu en fu tai Sadrak, Meisak, nanga Abedneikow èn fu fringi den go na ini na onfu! Na onfu ben faya so te taki a faya kiri den man fu a kownu! San ben pasa nanga den dri Hebrewsma?

Sadrak, Meisak, nanga Abedneikow ben fadon go leti na ini a faya. Ma den opo tanapu! Noti no ben pasa nanga den. Èn den no ben tai moro. Fa dati kan?— A kownu luku go na ini na onfu, èn san a si ben e frede en. A aksi: ’A no dri man wi ben fringi go na ini a faya?’ Den futuboi fu en piki: „Iya, o kownu.”

Ne a kownu taki: ’Luku! Mi e si fo sma e waka lontu na inisei, èn a faya no e bron nowan enkriwan fu den.’ Yu sabi suma ben de a di fu fo sma?— A ben de na engel fu Yehovah. A ben kibri den dri Hebrewsma so taki noti no pasa nanga den.

We, di a kownu si disi, dan a kon na a doro fu na onfu èn a bari: ’Sadrak, Meisak, nanga Abedneikow, un futuboi fu a Moro Hei Gado, komoto na ini na onfu  èn kon dyaso!’ Di den kon na dorosei, dan ala sma ben kan si taki den no bron. Den no ben e smeri srefi leki den ben de na ini wan faya. Ne a kownu taki: ’Blesi fu a Gado fu Sadrak, Meisak nanga Abedneikow, di seni wan engel fu frulusu den futuboi fu en fu di den no ben wani anbegi nowan enkri gado, boiti den eigi Gado.’ —Danièl, kapitel 3.

Wi kan leri wan sani fu san ben pasa na a ten dati. Srefi na ini a ten disi sma e meki popki, noso falsi gado, fu anbegi den. Wan buku e taki: „A fraga na wan santa sani, neleki a kroisi” (The Encyclopedia Americana). Sma kan anbegi sani di meki fu udu, ston, isri, noso krosi. Den fosi disipel fu Yesus no ben wani anbegi a kèiser fu Rome. Soleki fa a historia skrifiman Daniel P. Mannix ben taki, a sani dati ben de a srefi leki te wan sma na ini a ten disi „e weigri fu taki a fraga odi noso fu sweri taki a sa tan horibaka gi a kondre”.

Sobun, yu denki taki a de prenspari gi Gado efu a sani di sma e anbegi, meki fu krosi, udu, ston, noso isri?— A ben o bun te wan futuboi fu Yehovah e anbegi so wan popki?— Sadrak, Meisak, nanga Abedneikow no ben du dati, èn Yehovah ben prisiri nanga den. Fa yu kan teki na eksempre fu den?—