UBALULEKE ngani lombuto lotsi: Ngubani Nkulunkulu wakho?— Kungenca yekutsi bantfu bakhonta bonkulunkulu labanyenti. (1 Khorinte 8:5) Ngalesikhatsi umphostoli Pawula atfola emandla lavela kuJehova ekwelapha indvodza lesishosha, bantfu bamemeta batsi: “Bonkulunkulu sebanjengebantfu futsi sebehlele kitsi!” Labantfu bebafuna kukhonta Pawula kanye nemngani wakhe Bhanabasi. Pawula bambita ngekutsi nguHemesi kantsi Bhanabasi bambita ngekutsi nguZeyusi, lebekumabito abonkulunkulu bemanga.

Pawula naBhanabasi abazange bavumele labantfu kutsi babakhonte. Bagijima baya kulesicumbi batsi: ‘Shiyani letintfo letingenamsebenti niye kuNkulunkulu lophilako.’ (Imisebenti 14:8-15) Ngubani ‘loNkulunkulu lophilako’ lodale tonkhe tintfo?— NguJehova, ‘Losetikwako Konkhe, lophakeme lobusa umhlaba wonkhe.’ Jesu wabita Jehova ngekutsi nguye “lokuphela kwaNkulunkulu weliciniso.” Ngako-ke, ngubani lokuphela kwakhe lofanelwe kukhontwa?— NguJehova yedvwana!​—Tihlabelelo 83:18; Johane 17:3; Sembulo 4:11.

Bantfu labanyenti bakhonta bonkulunkulu esikhundleni sekutsi bakhonte ‘Nkulunkulu weliciniso lokuphela kwakhe.’ Ngalokuvamile, bakhonta tintfo letentiwe ngesigodvo, ngelitje nome ngensimbi. (Eksodusi 32:4-7; Levithikhusi 26:1; Isaya 44:14-17) Ngisho nemadvodza nabomake labadvumile ngaletinye tikhatsi babitwa ngekutsi bonkulunkulu, tihlabani nobe tithico. Kukahle yini kutsi sibakhatimulise bantfu labanjalo?—

Ngemuva kwekutsi Sawula asabe ngumphostoli Pawula, wabhala watsi: ‘Nkulunkulu walelive uvale tingcondvo talabangakholwa.’ (2 Khorinte 4:4) Ungubani lonkulunkulu?— NguSathane Develi! Sathane  ukhonile kwenta bantfu kutsi bakhonte bantfu kanye netintfo letinyenti.

Ngalesikhatsi Sathane etama kwenta Jesu kutsi amkhotsamele futsi amkhonte, yini Jesu layitjela Sathane?— Watsi: “Kufanele ukhotsamele Jehova Nkulunkulu wakho, futsi nguye yedvwa lokufanele umkhonte.” (Matewu 4:10) Ngako-ke, Jesu watsi kufanele kukhontwe Jehova kuphela. Ake sifundze ngalamanye emajaha lebekakwati loko. Emabito awo bekuboShadraki, Meshaki, na-Abednego.

LamaHebheru lasemasha bekayincenye yesive saNkulunkulu sema-Israyeli futsi bewatfunjelwe eveni laseBhabhulona. Lapho, inkhosi lokutsiwa nguNebukhadnezari beyakhe sitfombe lesikhulu lesentiwe ngeligolide. Ngalelinye lilanga, yatjela bantfu kutsi lapho kudlalwa umculo, wonkhe umuntfu bekufanele awe phansi, akhotsamele lesitfombe. Wecwayisa watsi: “Longawi phansi asikhotsamele, utawujikijelwa  masinyane ekhatsi elangabini lemlilo lowesabekako nalohhumako.” Wena bowungenta njani?—

BoShadraki, Meshaki, na-Abednego bebavame kwenta konkhe inkhosi lebeyibatjela kona. Kepha abazange bavume kukhotsamela lesitfombe. Uyati yini kutsi babangelwa yini kwenta loko?— Kungenca yekutsi umtsetfo waNkulunkulu bewutsi: ‘Ungabi nalomunye nkulunkulu ngaphandle kwami. Ungatenteli sithico futsi usikhotsamele.’ (Eksodusi 20:3-5) Ngako-ke, boShadraki, Meshaki, na-Abednego bahlonipha umtsetfo waJehova ngetulu kwemyalo wenkhosi.

Lenkhosi yatfukutsela kakhulu, futsi ngaso leso sikhatsi yavele yatsi lamaHebheru lamatsatfu lasemasha akaletfwe embikwayo. Yabuta: ‘Kuliciniso yini kutsi anibakhonti labonkulunkulu bami? Ngitaninika lelinye litfuba. Manje, naniva umsindvo wemculo, nibokuwa nikhotsamele lesithico segolide lengisimisile. Kodvwa naningasikhotsameli, nitawujikijelwa ngekushesha lokukhulu ekhatsi kulamalangabi emlilo lowesabekako nalohhumako. Ngumuphi-ke lowo nkulunkulu lotaba nemandla ekunephula esandleni sami?’

Yini lamajaha labetayenta? Wena bewutawenta njani?— Atsi enkhosini: ‘Nkulunkulu wetfu lesimkhontako unemandla ekusisindzisa. Kodvwa-ke nome angakakwenti loko, singeke sibakhonte labonkulunkulu bakho, futsi singeke sikhotsame kulesithico sakho segolide.’

 Lenkhosi beyitfukutsele kakhulu. Yatsi: ‘Basani lamalangabi emlilo lowesabekako nalohhumako kutsi ushise ngalokuphindvwe kasikhombisa.’ Yabese itfuma lamanye emadvodza labenemandla kakhulu kutsi abophe boShadraki, Meshaki, na-Abednego bese abajikijela ekhatsi kulamalangabi emlilo lohhumako! Lamalangabi emlilo lowesabekako nalohhumako abesashisa kangangekutsi adzimate abulala wona lamadvodza enkhosi. Kwentekani kulamaHebheru lamatsatfu?

BoShadraki, Meshaki, na-Abednego bajikijelwa ekhatsi emlilweni. Kodvwa khona lapho, basukuma. Bebangakashi. Futsi bese kungekho lebebaboshwe ngako. Bekungenteka njani loko?— Inkhosi yabuka kulomlilo lohhumako futsi loko leyakubona kwayetfusa. Yabuta: ‘Abengematsatfu yini lamadvodza lesiwajikijele lapha ekhatsi emlilweni?’ Tisebenti tayo taphendvula tatsi: ‘Yebo, nkhosi, kunjalo.’

Ngako-ke lenkhosi yatsi: “Ase nibuke! Ngibona emadvodza lamane ahambahamba lapha ekhatsi emlilweni, futsi akalimali ndzawo.” Uyati yini kutsi bekungubani lomuntfu wesine lebekalapha ekhatsi emlilweni?— Bekuyingilosi yaJehova. Lengilosi yawavikela lamaHebheru lamatsatfu kutsi angalimali.

Ngalesikhatsi ibona loko, lenkhosi yasondzela kulomnyango walomlilo lohhumako yamemeta yatsi: ‘Shadraki,  Meshaki, nawe Abednego, nine tinceku taNkulunkulu Longetulu Kwako Konkhe, phumani! Wotani lapha!’ Ngalesikhatsi aphuma lamajaha, wonkhe umuntfu wabona kutsi bekangakashi. Ngisho neliphunga lentfutfu belingevakali kuwo. Ngako lenkhosi yatsi: ‘Akadvunyiswe Nkulunkulu waboShadraki, Meshaki, na-Abednego lotfume ingilosi yakhe kutsi itewulamlela tinceku takhe futsi abazange bakhotsamele lomunye nkulunkulu ngaphandle kwaNkulunkulu wabo.’​—Danyela, sehluko 3.

Natsi singafundza sifundvo kuloko lokwenteka ngaleso sikhatsi. Ngisho nalamuhla bantfu babeka titfombe nome tithico kuze batikhonte. I-The Encyclopedia Americana itsi: “Ifulegi njengesiphambano ingcwele.” Titfombe tingentiwa ngelugodvo, ngelitje, ngensimbi nobe tentiwe ngendvwangu. Balandzeli baJesu bakadzeni bebangasenti sento sekukhonta babusi bemaRoma, loko sati semlandvo Daniel P. Mannix lesatsi kungase kufananiswe “nekwala kushayela ifulegi indesheni nome kwenta sifungo kuyo.”

Ngako-ke ucabanga kutsi Nkulunkulu usitsatsa njengalesibalulekile yini sitfombe senkholo nangabe sentiwe ngendvwangu, lugodvo, litje nobe insimbi?— Kungaba yintfo lenhle yini ngenceku yaJehova kutsi ikhonte sitfombe lesinjalo?— Jehova kwamjabulisa kakhulu kutsi boShadraki, Meshaki, na-Abednego abazange bakwente loko. Wena ungasilingisa njani sibonelo sabo?—