NCIFUKWA wuli fumbo lakuti, Kasi Ciuta ni njani? ndakuzirwa?— Ndakuzirwa cifukwa cakuti ŵantu ŵakusopa ŵaciuta ŵanandi. (1 Ŵakorinte 8:5) Peneapo Yehova wakamupa mpostole Paulos nkongono ya kucizga mwanarumi uyo wakaŵa wakulemara marundi ndipo wakendanga yayi, ŵantu ŵakacemerezga kuti: ‘Ŵaciuta ŵakhilira kwa ise mu cikozgo ca ŵantu!’ Ŵantu ŵakakhumbanga kuŵasopa Paulos na Barnaba. Mwanteura ŵakamupa Paulos zina lakuti Herme ndipo Barnaba ŵakamupa zina lakuti Zeu, mazina gha ŵaciuta ŵatesi.

Kweni Paulos na Baraba ŵakakhumbanga yayi kuti ŵantu ŵaŵasope. Ŵakaphalira wumba wura Kuti: ‘Fumaniko ku vintu ivi vyawaka, mwize kwa Ciuta wamoyo.’ (Milimo 14:8-15) Kasi “Ciuta wamoyo” ni njani, uyo wakalenga vintu vyose?— Ni Yehova, ‘Wapacanya-nkanira mu caru cose.’ Yesu wakamucema kuti ni ‘Ciuta waunenesko yekha.’ Anteura, kasi ni njani pera uyo tikwenera kumusopa?— Yehova yekha!—Salmo 83:18; Yohane 17:3; Civumbuzi 4:11.

Ŵantu ŵanandi ŵakusopa ŵaciuta mu malo mwa ‘Ciuta waunenesko yekha.’ Kanandi ŵakusopa vintu ivyo ŵakupanga kufuma ku khuni, libwe, panji visulo. (Exodus 32:4-7; Leviticus 26:1; Yesaya 44:14-17) Nanga ni ŵantu awo mbakumanyikwa comene cifukwa cakucita vintu vinyake, nyengo zinyake ŵakuŵacema kuti ŵaciuta, nanga kungaŵa kuŵasopa. Kasi ncakwenerera kupereka ucindami kwa iwo?—

Pamanyuma pakuti Saulos wang’anamuka na kuŵa mpostole Paulos, wakalemba kuti: ‘Ciuta wa caru cino wali kuburumutizga mahara gha ŵantu ŵambura cipulikano.’ (2 Ŵakorinte 4:4) Kasi ciuta uyu ni njani?— Ni Satana Dyabulosi! Satana wapangiska kuti ŵantu ŵanandi ŵasopenge ŵantu ŵanyawo na vintu.

 Peneapo Satana wakamuyezganga Yesu kuti wamugwadire na kumusopa, kasi Yesu wakamuphaliraci Satana?— “Wukapo, Satana: cifukwa kuli kulembeka, ulambirenge Fumu Ciuta wako, ndipo umuteŵeterenge Iyo yekha.” (Mateyu 4:10) Apa Yesu wakayowoya mwakupulikikwa makora kuti Yehova yekha ndiyo tikwenera kumusopa. Tiye tiŵazge za ŵanyamata ŵanyake awo ŵakamanyanga fundo iyi. Mazina ghawo ghakaŵa Shadireki, Misheki, na Abedinego.

Ŵanyamata Ŵacihebere aŵa ŵakaŵa ŵa mtundu wa Ciuta wa Israyeli, ndipo ŵakatorekera ku wuzga ku caru ca Babulone. Themba la caru ca Babulone, Nebukadinezara, likazenga cikozgo cikuru ca golide. Zuŵa linyake likalangura kuti para sumu zikwimbika, waliyose wagwadire cikozgo. ‘Uyo wakureka kuwa pasi waponyekenge mu ng’anjo ya moto wakunyeka,’ likacenjezga nteura. Kasi iwe nga ukacitaci?—

Nyengo zose, Shadireki, Misheki na Abedinego ŵakacitanga vintu  ivyo ŵatumikanga na themba. Kweni ŵakakana kugwadira cikozgo ico. Kasi ukumanya cifukwa cake?— Cikaŵa cifukwa cakuti dango la Ciuta likuyowoya kuti: ‘Ungakhalanga cara na ŵaciuta ŵanyake padera pa ine. Ungajiŵajiranga cara cikozgo na kucilambira.’ (Exodus 20:3-5) Ici ndico cikapangiska Shadireki, Misheki na Abedinego kupulikira dango la Yehova kuruska ivyo themba likalangura.

Themba likakwiya comene, nyengo yeneyiyo likacema Ŵahebere ŵatatu ŵara kuti ŵize kwa iye. Likaŵafumba kuti: ‘Kasi mbunenesko, imwe Shadireki, Misheki na Abedinego, kuti mukukana kusopa ŵaciuta ŵane? Nimupaninge mwaŵi unyake. Sono, para mwapulika kulira kwa zimbata, muwe pasi na kulambira cikozgo ico ndacimika. Kweni usange mukureka kucilambira, mwaluŵiro muponyekenge mu ng’anjo ya moto. Kasi ni ciuta nju uyo wangamuthaskani mu mawoko ghane?’

Kasi ŵanarumi aŵa ŵakenera kucitaci? Kasi uŵenge iwe nga ukacitaci?— Ŵakaliphalira nteura themba: ‘Ciuta withu uyo tikumusopa wali na mazaza gha kutithaska. Kweni nangauli wangareka kutithaska, kuti titeŵeterenge ŵaciuta ŵinu cara nesi kulambira cikozgo ca golide ico mwacimika.’

Themba likakwiya comene. Likalangura kuti: ‘Sonkani moto kankondi na kaŵiri kwakuruska umo ukuŵira mazuŵa ghose!’ Likaphalira ŵanarumi ŵake ŵankongono kuti ŵakake Shadireki, Misheki,  na Abedinego ndipo ŵakaŵaponya mu ng’anjo ya moto wakunyeka! Moto ukagoleranga comene mu ng’anjo mwakuti ŵanarumi ŵa themba ŵakakomeka na dimi la moto! Ncivici ico cikaŵacitikira Ŵahebere ŵatatu ŵara?

Shadireki, Misheki, na Abedinego ŵakawira pakatikati pa moto. Kweni ŵakawuka na kwimilira! Ŵakapwetekeka yayi. Ndipo ŵakaŵa ŵakukakikaso yayi. Kasi ici cikacitika wuli?— Themba likalaŵiska mu ng’anjo, ndipo likazizikika na ivyo likawona. ‘Kasi tanguponyamo cara ŵanarumi ŵatatu mu moto?’ likafumba. Ŵateŵeti ŵake ŵakazgora ŵakati: ‘Mukuneneska, themba.’

Ndipo themba likati: ‘Awonani! nkuwona ŵanarumi ŵanayi ŵakwenda mukati mu moto, ndipo palije uyo wakupwetekeka.’ Kasi ukumanya uyo wakaŵa mwanarumi wacinayi?— Wakaŵa mungelo wa Yehova. Ndipo wakaŵavikilira Ŵahebere ŵatatu kuti ŵareke kupwetekeka.

Anteura, likati lawona ici, themba likaruta pa muryango wa ng’anjo na kucemerezga kuti: ‘Shadireki, Misheki na Abedinego, imwe ŵateŵeti ŵa Ciuta Wapacanya-pa-Vyose,  fumani!’ Ŵakati ŵafuma, waliyose wakawona kuti ŵakapya yayi. Ndipo ŵakaŵevye nanga ni sungu la moto. Sono themba likati: ‘Watumbikike Ciuta wa Shadireki, Misheki, na Abedinego, uyo watuma mungelo wake na kuthaska ŵateŵeti ŵake cifukwa ŵakana kusopa ciuta munyake, kweni Ciuta waŵo ndipera.’—Daniel, cipaturo 3.

Tingasambirapo sambiro pa vintu ivyo vikacitika mu nyengo zakale. Nanga ni lero ŵantu ŵakupanga na kusopa vikozgo. Buku linyake la The Encyclopedia Americana likuyowoya kuti: “Ndembera, yikuŵa yakupatulika nga ni mphinjika.” Ndipo vikozgo vingapangika kufuma ku khuni, libwe, visulo panji salu. Ŵasambiri ŵakudanga ŵa Yesu wakasopanga cara themba la Ŵaroma mu ntowa yiliyose, ceneico muntu uyo wakumanya za vintu ivyo vikacitikanga mu nyengo zakale Daneil P. Mannix wakati cikuyana waka na “kukana kugwadira ndembera panji kucita cirapo ca kujilambika ku boma.”

Kasi ukughanaghana kuti Ciuta wakuwonapo suzgo yiliyose yayi para ŵantu ŵakusopa cikozgo ico ncakupangika na salu, khuni, libwe, panji cisulo?— Kasi ncakwenerera kuti muteŵeti wa Yehova wasopenge cikozgo cakupangika na vintu ivi?— Shadireki, Misheki, na Abedinego ŵakacita ici yayi, ndipo Yehova wakakondwa nawo comene. Kasi ungarondezga wuli ciyerezgero cawo?—