KAIA e tāua ei te fesili tenei, Ko oi tou Atua?— Ona ko te mea e tapuaki a tino ki atua e uke. (1 Kolinito 8:5) I te taimi ne maua ei ne te apositolo ko Paulo a te ‵mana mai i a Ieova ke faka‵lei ei se tagata telā ne seki sasale aka eiloa muamua, ne paka‵laga atu a tino, penei: “Ko liu tino a atua kae ko oti ne olo ifo ki a tatou!” Ne ma‵nako a tino o tapuaki atu ki a Paulo mo tena taugasoa ko Panapa. Ne fakaigoa ne latou a Paulo ki a Heleme kae ko Panapa ki a Seu, kolā ko igoa o atua ‵se.

Kae ne seki talia ne Paulo mo Panapa ke tapuaki atu a tino ki a lāua. Ne ‵tele atu lāua ki loto i te vaitino kae fai atu, penei: “Ke fulitua koutou ki mea sē aoga konei kae ke ‵fuli atu ki te Atua ola.” (Galuega 14:8-15) Ko oi “te Atua ola,” ko oi ne faite ne ia a mea katoa?— Ao, ko Ieova, “te pule tafasili i te lalolagi kātoa.” Ne taku ne Iesu a Ieova ki “te Atua tonu e tokotasi.” Tela la, ko oi e ‵tau fua o tapuaki atu ki ei?— Ko Ieova!— Salamo 83:18; Ioane 17:3; Fakaasiga 4:11.

 

E tapuaki atu a te tokoukega o tino ki nisi atua i lō “te Atua tonu e tokotasi.” E masani o tapuaki atu latou ki mea kolā ne faite mai i lakau, fatu, io me ko fiti. (Esoto 32:4-7; Levitiko 26:1; Isaia 44:14-17) Ke oko foki eiloa ki tāgata mo fāfine takutakua e fakaigoa sāle ki atua, tino lauiloa, io me ne tupua. E mata, se mea ‵lei ke tuku atu a tavaega ki a latou?—

Mai tua o te faiga o Saulo mo fai te apositolo ko Paulo, ne tusi mai a ia: “Ko tino sē tali‵tonu kolā ko oti ne fakapouli olotou mafaufau ne te atua o te olaga masani tenei.” (2 Kolinito 4:4) Ko oi te atua tenei?— Ao, ko Satani te Tiapolo! Ko oti ne fai ne Satani a tino ke tapuaki atu ki tino mo mea e uke.

 I te taimi ne taumafai ei a Satani o fai a Iesu ke ifo o tapuaki atu ki a ia, ne a pati ne fai atu ne Iesu ki a Satani?— “E ‵tau o tapuaki koe ki a Ieova tou Atua kae ko ia fua e ‵tau o tavini koe ki ei.” (Mataio 4:10) Tela la, ne fakaasi manino mai ne Iesu me e ‵tau o tapuaki atu fua ki a Ieova. Ke fai‵tau tatou e uiga ki nisi tamataene kolā ne iloa ne latou te mea tenei. A igoa o latou ko Satalaka, Mesako, mo Apeteniko.

A tamataene Epelu konei ne tino o te fenua o te Atua ko Isalaelu kae ne ave fakapagota latou ki te fenua o Papelonia. I konā, ne faite ei ne te tupu e igoa ki a Nepukanesa se tupua aulo lasi. I te aso e tasi ne fakatonu atu a ia me kafai ko fakatagi te pese, e ‵tau o ifo atu a tino katoa ki te tupua. Ne faka‵pula atu penei a ia, ‘So se tino e se ifo o tapuaki ka ‵pei atu ki te afi.’ Ne a au mea ka fai moi ne nofo atu koe i konā?—

 Ne masani o fai sāle ne Satalaka, Mesako, mo Apeteniko a mea katoa ne fakatonu atu ne te tupu ke fai. Kae ne ita fitifiti latou ma fai a te mea tenei. E iloa ne koe me kaia?— Me ne fai mai te tulafono a te Atua: ‘E se ‵tau o tapuaki atu koutou ki so se isi atua kae na ko au. E se ‵tau o faite ne koutou se fakatusa kae ifo atu ki ei.’ (Esoto 20:3-5) Tela la, ne faka‵logo a Satalaka, Mesako, mo Apeteniko ki te tulafono a Ieova i lō te fakatonuga a te tupu.

Ko oko eiloa i te kaitaua o te tupu, telā ne fai fakavave atu a ia ke olo atu a tamataene Epelu e tokotolu konei ki ana mua. Ne fesili atu a ia: ‘E tonu eiloa me e se tavini atu koutou ki oku atua? Ka toe tuku atu ne au te suā avanoaga. Nei la, kafai e fakatagi te pese, ke ifo koutou ki lalo o tapuaki atu ki te tupua telā ne faite ne au. Kafai e se fai ne koutou, ka ‵pei atu koutou ki loto i te afi ‵ka ulaula. Kae ko oi la te atua tenā e mafai o faka‵sao ne ia koutou mai i oku lima?’

Ne a la a mea ka fai ne tamataene konei? Ne a au mea ka fai moi ko koe tenā?— Ne fai atu latou ki te tupu: ‘E mafai o faka‵sao matou ne te motou Atua telā e tavini matou ki ei. Kae kafai foki loa e se faka‵sao ne ia matou, ka se tavini atu eiloa matou ki ou atua. Ka se ifo atu foki matou ki tau tupua aulo.’

Ne kaitaua malosi te tupu. Ne fakatonu atu a ia: ‘Ke momea aka  fakafitu taimi te ‵vela o te afi i lō te ‵vela masani!’ Ne fakatonu atu ei a ia ki ana tāgata ma‵losi ke saisai a Satalaka, Mesako, mo Apeteniko kae ‵pei atu ki loto i te ogaumu ‵vela! Ko se faka‵tau eiloa i te ‵vela o te ogaumu telā ne ‵mate foki eiloa i ei a tāgata a te tupu! Kae e a te tokotolu tamataene Epelu?

Ne ‵to atu eiloa a Satalaka, Mesako, mo Apeteniko ki te kogaloto o te afi. Kae ne toe ‵tu aka latou ki luga! Ne seki ‵paku latou. Kae ko ‵to foki olotou saisaiga. Ne mafai pefea o tupu te mea tenei?— Ne kilo atu a te tupu ki te ogaumu, kae ne mataku a ia i te mea ne lavea ne ia. Ne fesili atu a ia: ‘E a, e se tokotolu a tāgata ne ‵pei atu ne tatou ki te afi?’ Ne tali atu ana tavini: “Tou ‵Malu, ao, e tokotolu.”

Ne fai atu ei te tupu: ‘Kiloke! E lavea ne au a tino e tokofa e sa‵sale i loto, kae e seai se tino o latou e ‵paku i te afi.’ E iloa ne koe me ko oi a te suā tino?— Ko te agelu a Ieova. Ne puipui ne ia a te tokotolu tamataene Epelu konei ke mo a ma logo‵mae.

Ia, i te laveaga ne ia te mea tenei, ne fanatu a te tupu ki  te mataloa o te ogaumu kae pakalaga atu: “Satalaka! Mesako! Apeteniko! Tavini a te Atua Maluga! ‵Mai ki tua!” I te taimi ne o‵mai ei latou ki tua, ne mafai o lavea ne tino katoa me e seki ‵paku latou. E seai foki eiloa se manogi ‵paku i a latou. Ne fai atu ei te tupu: ‘Ke tavae atu ki te Atua o Satalaka, Mesako, mo Apeteniko, telā ne uga mai ne ia se agelu ke faka‵sao ana tavini me ne seki tapuaki atu latou ki so se atua kae na ko te lotou Atua eiloa.’—Tanielu, mataupu e 3.

E mafai o tauloto ne tatou se akoakoga tāua mai i te mea ne tupu i te taimi tenā. Ke oko foki eiloa ki aso nei, e fakaaoga ne tāgata a fakatusa, io me ko tupua ke tapuaki atu ki ei. E fai mai The Encyclopedia Americana: “E ‵malu a te fuka, e pelā eiloa mo te koluse.” E mafai o faite a fakatusa mai i lakau, fatu, fiti, io me ko laugatu. E seki ifo atu eiloa a soko mua o Iesu ki te tupu o Loma, telā ne fai mai se tino tusitala ko Daniel P. Mannix me e tai ‵pau eiloa mo te “ita fitifiti ma saluti ki te fuka io me ko te usuga o te vii o te malo.”

Tela la, e mata, e masei ki te Atua māfai e faite se fakatusa fakalotu mai i se laugatu, lakau, fatu, io me se fiti?— E mata, se mea ‵lei ke ifo kae tapuaki atu se tavini a Ieova ki se vaegā fakatusa penā?— Ne seki fai eiloa penā a Satalaka, Mesako, mo Apeteniko, kae ne fiafia a Ieova ki a latou. E mafai pefea o tautali atu koe ki te lotou fakaakoakoga?—