KAY ano nga importante ini nga pakiana, Hin-o an imo Dios?— Tungod kay an mga tawo nagsisingba ha damu nga mga dios. (1 Korinto 8:5) Han nakarawat ni apostol Pablo an gahum tikang kan Jehova ha pagtambal ha usa nga lalaki nga waray pa gud makalakat, an katawohan nagsinggit: “An mga dios linusad nganhi ha aton ha dagway han mga tawo!” Karuyag han mga tawo nga singbahon hi Pablo ngan an iya sangkay nga hi Bernabe. Ira gintawag hi Pablo nga Hermes ngan hi Bernabe nga Zeus, nga mga ngaran han palso nga mga dios.

Kondi waray tuguti ni Pablo ngan Bernabe an mga tawo nga magsingba ha ira. Linukso hira ngadto ha butnga han mga tawo ngan nagsiring: ‘Bumaya kamo tikang hini nga waray pulos nga mga butang ngadto ha buhi nga Dios.’ (Buhat 14:8-15) Hin-o ‘an buhi nga Dios,’ nga naghimo han ngatanan nga mga butang?— Oo, hiya hi Jehova, “an Gihitaasi ha bawbaw han bug-os nga tuna.” Tinawag ni Jesus hi Jehova nga “an amo la nga matuod nga Dios.” Salit, hin-o la an takos singbahon?— Hi Jehova la!​—Salmo 83:18; Juan 17:3; Pahayag 4:11.

Kadam-an nga mga tawo an nagsisingba ha mga dios nga iba kay ha “amo la nga matuod nga Dios.” Agsob nga ginsisingba nira an mga butang nga ira ginhimo tikang ha kahoy, bato, o metal. (Eksodo 32:4-7; Lebitiko 26:1; Isaias 44:14-17) Bisan an kalalakin-an ngan kababayin-an nga nagigin bantogan usahay tinatawag nga mga dios, mga bitoon, o mga idolo. Husto ba an paghimaya ha ira?—

Han hi Saulo nagin hi apostol Pablo, hiya nagsurat: ‘Ginbuta han dios hini nga sistema han mga butang an mga hunahuna han mga diri-tumuroo.’ (2 Korinto 4:4) Hin-o ini nga dios?— Oo, hi Satanas nga Yawa! Nakombinse  ni Satanas an mga tawo nga magsingba ha damu nga mga tawo ngan mga butang.

Han nagsari hi Satanas ha pagkombinse kan Jesus nga yumukbo ngan magsingba ha iya, ano an ginsiring ni Jesus kan Satanas?— ‘Hi Jehova nga imo Dios an imo pagsingbahon, ngan ha iya la ikaw mag-alagad.’ (Mateo 4:10) Salit iginpatin-aw ni Jesus nga hi Jehova gud la an angay pagsingbahon. Aton basahon an mahitungod han pipira nga mga batan-on nga kalalakin-an nga maaram hini. An ira mga ngaran amo hi Sadrak, Mesak, ngan Abednego.

Inin Hebreohanon nga mga batan-on kaupod han nasud han Dios nga Israel ngan gindara nga bihag ngadto ha tuna han Babilonya. Didto an hadi nga hi Nabukodonosor nagtukod hin daku nga imahen nga bulawan. Usa ka adlaw nagsugo hiya nga kon magtokar na an musika, an  ngatanan sadang yumukbo ha imahen. ‘Bisan hin-o nga diri yumukbo ngan magsingba ilalabog ngadto ha naglalaga nga hudno,’ nagpahamangno hiya. Kon ikaw, ano an imo bubuhaton?—

Kasagaran nga ginbubuhat ni Sadrak, Mesak, ngan Abednego an ngatanan nga iginsugo han hadi. Kondi nagdumiri hira ha pagyukbo ha imahen. Maaram ka ba kon kay ano?— Tungod kay an balaud han Dios nagsiring: ‘Diri ka magkaada hin lain nga mga dios ha atubangan ko. Diri ka magbuhat hin tinigib nga imahen ngan magyukbo hito.’ (Eksodo 20:3-5) Salit hi Sadrak, Mesak, ngan Abednego sinugot ha balaud ni Jehova ngan waray sumugot ha sugo han hadi.

Nasina hinduro an hadi, salit iginpatawag dayon niya an tulo nga batan-on nga Hebreohanon ha iya atubangan. Hiya nagpakiana: ‘Totoo gud ba nga diri kamo nag-aalagad ha akon mga dios? Tatagan ko kamo hin usa pa nga higayon. Yana, kon mabatian niyo an musika, yumukbo kamo ngan magsingba ha imahen nga akon ginhimo. Kon diri niyo buhaton, ilalabog kamo ngadto ha naglalaga nga hudno. Ngan hin-o iton nga dios nga makakagluwas ha iyo tikang ha akon mga kamot?’

Ano an bubuhaton yana han batan-on nga kalalakin-an? Kon ikaw, ano an imo bubuhaton?— Hira nagsiring ha hadi: ‘An amon Dios nga amon gin-aalagad magluluwas ha amon. Kondi bisan kon diri hiya magluwas  ha amon, diri kami mag-aalagad ha imo mga dios. Diri kami mayukbo ha imo imahen nga bulawan.’

An hadi nasina hinduro. Hiya nagsugo: ‘Pasoa an hudno hin pito ka beses nga mas mapaso kay ha kasagaran!’ Katapos, iya ginsugo an iya magkusog nga kalalakin-an nga gapuson hi Sadrak, Mesak, ngan Abednego ngan ilabog hira ngadto ha hudno! Mapaso hinduro an hudno salit namatay an kalalakin-an han hadi tungod han mga laga! Kumusta man an tulo nga Hebreohanon?

Hi Sadrak, Mesak, ngan Abednego nahulog ngadto ha butnga han kalayo. Kondi binangon hira! Waray hira madaot. Ngan diri na hira nakagapos. Paonan-o ini nahitabo?— An hadi nagkita ha hudno, ngan nahadlok hiya ha iya nakita. ‘Diri ba tulo nga lalaki an aton iginlabog ha kalayo?’ nagpakiana hiya. An iya mga surugoon binaton: “Oo, O hadi.”

Katapos, an hadi nagsiring: ‘Kitaa! Nakikita ko an upat nga tawo nga naglilinakatlakat didto, ngan an kalayo diri nakakasunog ha bisan hin-o ha ira.’ Maaram ka ba kon hin-o an ikaupat nga tawo?— Anghel adto ni Jehova. Iya ginpanalipdan an tulo nga Hebreohanon basi diri hira masunog.

 Aw, ha pakakita hini, an hadi hinirani ha purtahan han hudno ngan nagsinggit: “Sadrak, Mesak, ngan Abednego, kamo nga mga surugoon han Gihitaasi nga Dios, gawas kamo, ngan kadi!” Han ginawas hira, nakita han ngatanan nga hira waray masunog. Waray ngani hira mangamyon hin kasunog. Salit an hadi nagsiring: ‘Bulahan an Dios ni Sadrak, Mesak ngan Abednego, nga nagpadara han iya anghel ha pagluwas ha iya mga surugoon tungod kay diri hira magsisingba ha bisan ano nga dios gawas han ira kalugaringon nga Dios.’—Daniel, kapitulo 3.

Mahibabaro kita hin leksyon tikang ha nahitabo hadto. Bisan yana nga panahon an mga tawo naghihimo hin mga imahen, o mga idolo, basi pagsingbahon. An The Encyclopedia Americana nasiring: “An bandera, pariho han krus, sagrado.” An mga imahen mahimo himoon tikang ha kahoy, bato, metal, o tela. An siyahan nga mga disipulo ni Jesus waray magsingba ha Romano nga emperador, nga ginsiring han historyador nga hi Daniel P. Mannix nga mahimo igpariho ha “pagdumiri ha pagsaludo ha bandera o pagpahayag han sumpa han pagkamaunungon.”

Salit ha hunahuna mo, importante ba ha Dios kon an relihiyoso nga imahen hinimo ha tela, kahoy, bato, o metal?— Husto ba para ha usa nga surugoon ni Jehova nga magsingba ha atubangan han sugad nga imahen?— Waray ito buhata ni Sadrak, Mesak, ngan Abednego, ngan nalipay hi Jehova ha ira. Paonan-o mo masusubad an ira susbaranan?—