¿BAʼAXTEN maʼalob ka k-tukult máax k-Dios?... Tumen le máakoʼoboʼ ku adorartikoʼob yaʼab diosoʼob (1 Corintoiloʼob 8:5). Le ka tsʼaʼab páajtalil tiʼ apóstol Pablo tumen Jéeoba utiaʼal u tsʼakik juntúul máak maʼ tu páajtal u xíimbal desde ka síijeʼ, le máakoʼoboʼ tu yaawtoʼob: «¡Le diosoʼoboʼ tsʼoʼok u sutkubaʼob wíinikil yéetel tsʼoʼok u yéemloʼob t-iknal!». Bey túunoʼ taakchaj u adorartikoʼob Pablo yéetel Bernabé, u amigo. Joʼopʼ tak u tsʼáaikoʼobtiʼob u kʼaabaʼ maʼ jaajil diosoʼobiʼ: Tiʼ Pabloeʼ tu yaʼaloʼob Hermes, yéetel tiʼ Bernabeeʼ, Zeus.

² Baʼaleʼ Pablo yéetel Bernabeeʼ maʼ tu chaʼajoʼob u adorartaʼaloʼobiʼ. Tu jupubaʼob ichil le yaʼabkach máakoʼoboʼ ka joʼopʼ u yaʼalikoʼob: ‹Xuʼuluk a beetkeʼex chéen kunel baʼaloʼob utiaʼal ka a adorarteʼex le kuxaʼan Diosoʼ› (Baʼaxoʼob 14:8-15). ¿Máax le «kuxaʼan Dios» beet tuláakal le baʼaloʼoboʼ?... Jéeoba, «u Sen Kaʼanlil yóokʼol tuláakal le luʼumaʼ». Jesuseʼ tu yaʼaleʼ Jéeobaeʼ letiʼ u «jaajil Dios». Bey túunoʼ, ¿máax ku náajmatik u adorartaʼal?... Chéen Jéeoba (Salmo 83:18, NM; Juan 17:3; Apocalipsis 4:11).

³ U maas yaʼabil le máakoʼoboʼ maʼatech u adorartikoʼob le «jaajil Diosoʼ». Ku adorartikoʼob diosoʼob beetaʼan de cheʼ, tuunich wa hierro (Éxodo 32:4-7; Levítico 26:1; Isaías 44:14-17). Yaan tak máaxoʼob jach kʼaj óolaʼanoʼob wa artistaʼobeʼ, ku yaʼalaʼaltiʼob diosoʼob wa idoloʼob. Baʼaleʼ ¿unaj wa u adorartaʼaloʼob?...

⁴ Le ka tsʼoʼok u kʼáaj óoltaʼal Saulo, bey apóstol Pabloeʼ, tu tsʼíibtaj: «Le máakoʼob maʼatech u creertikoʼob Diosaʼ pixaʼan u tuukuloʼob tumen u diosil le yóokʼol kaabaʼ» (2 Corintoiloʼob 4:4).  ¿Máax le dios tu chʼaʼchiʼitoʼ?... Satanás, le Kʼaasilbaʼaloʼ. Letiʼeʼ tsʼoʼok u beetik u adorartaʼal yaʼab máakoʼob yéetel yaʼab baʼaloʼob.

⁵ Le ka tu yaʼalaj Satanás tiʼ Jesús ka xolak u adorarteʼ, ¿baʼax aʼalaʼabtiʼ tumen Jesús?... «Jéeoba a Dios unaj a adorartik, yéetel chéen letiʼ kʼaʼabéet a meyajtik.» (Mateo 4:10.) Bey úuchik u yeʼesik Jesús chéen Jéeoba unaj u adorartaʼaloʼ. Koʼox ilik baʼax úuch tiʼ óoxtúul xiʼipalaloʼob u yojloʼob chéen Jéeoba unaj u adorartaʼal. U kʼaabaʼobeʼ Sadrac, Mesac yéetel Abednego.

⁶ Letiʼobeʼ hebreoʼob tumen tu kaajil Israel síijoʼob, le kaaj yéeyaʼan kaʼach tumen Diosoʼ, baʼaleʼ bisaʼaboʼob palitsiltbil tu kaajil Babilonia. Teʼeloʼ juntúul rey ku kʼaabaʼtik Nabucodonosoreʼ, tu beetaj junpʼéel nojoch imagen de oro yéetel tu yaʼaleʼ le ken uʼuyaʼak le paaxoʼ ku láaj xoltaloʼob tu táan. Yéetel tu yaʼalaj: ‹Le máax maʼ tu xoltaleʼ  yaan u puʼulul ichil le choko hornooʼ›. ¿Baʼax jeʼel a beetik wa tiaʼanecheʼ?...

⁷ U suukileʼ Sadrac, Mesac yéetel Abednegoeʼ ku beetkoʼob baʼax ku yaʼalik le reyoʼ. Baʼaleʼ teʼ kʼiin jeʼeloʼ maʼ tu beetoʼobiʼ; maʼ xolajoʼob tu táan le imagenoʼ. ¿A wojel wa baʼaxten?... Tumen u ley Dioseʼ ku yaʼalik: ‹Maʼ u yantaltech yaanal diosoʼob wa maʼ teeniʼ, maʼ a beetik mix juntúul patbil dios utiaʼal ka chinlakech tu táan› (Éxodo 20:3-5). Le oʼolaleʼ Sadrac, Mesac yéetel Abednegoeʼ tu beetoʼob baʼax tu yaʼalaj Jéeoba, maʼ le baʼax tu yaʼalaj le reyoʼ.

⁸ Le reyoʼ jach pʼuʼuji, ka tu yaʼalaj ka bisaʼak le óoxtúul hebreoʼob tu táanoʼ. Ka tu yaʼalajtiʼob: ‹¿Jaaj wa maʼ ta adorartikeʼex in diosoʼob? Utiaʼal a wilkeʼex maʼ kʼasaʼaneneʼ kin saʼatsikteʼex. Baʼaleʼ le ken a kaʼa uʼuyeʼex le paaxoʼ chinleneʼex tu táan le dios in beetmoʼ. Wa maʼ ta beetkeʼexeʼ yaan a puʼululeʼex ichil le choko hornooʼ. ¿Yaan wa dios jeʼel u páajtal u salvartikeʼex tin kʼabeʼ?›.

⁹ ¿Baʼax tu beetaj ta tʼaan le xiʼipalaloʼoboʼ? ¿Baʼax jeʼel a beetik teech kaʼacheʼ?... Letiʼobeʼ tu yaʼaloʼob tiʼ le reyoʼ: ‹K-Dioseʼ jeʼel u páajtal u salvartikoʼoneʼ. Baʼaleʼ tak maʼ u beetkeʼ, maʼ ken k-adorart a diosoʼob. Mix bíin chinlakoʼon tu táan le imagen de oro a beetmoʼ›.

¹⁰ Le reyoʼ maas pʼuʼujeʼ ka tu yaʼalaj: ‹¡Chokokíintaʼak le horno, siete u téenel tiʼ le bukaʼaj suukiloʼ!›. Ka tu túuxtaj jujuntúul u  soldadoʼob jach yaan u muukʼoʼob utiaʼal ka u kʼaxoʼob yéetel ka u puloʼob ichil le horno Sadrac, Mesac yéetel Abednegooʼ. ¡Tumen jach choko le hornooʼ, le soldadoʼob puʼuloʼoboʼ kíimoʼob! Baʼaleʼ ¿baʼax úuch tiʼ le óoxtúul hebreoʼoboʼ?

¹¹ Sadrac, Mesac yéetel Abednegoeʼ lúuboʼob tu chúumuk le kʼáakʼoʼ, baʼaleʼ chéen ka téek líikʼoʼob. Maʼ úuch mix baʼal tiʼobiʼ yéetel maʼ kʼaxaʼanoʼobiʼ. ¿Bix úuchil lelaʼ?... Le reyoʼ tu chʼeneʼtaj le hornooʼ ka jaʼakʼ u yóol yoʼolal baʼax tu yilaj. Letiʼeʼ tu yaʼalaj: ‹¿Maʼ wa óoxtúul máakoʼob t-pulaj ichil le kʼáakʼoʼ?›. U palitsiloʼobeʼ tu yaʼaloʼob: ‹Beyoʼ›.

¹² Letiʼ túuneʼ tu yaʼalaj: ‹¡Ileʼex! Teneʼ kantúul máakoʼob kin wilik táan u máanoʼob ichil le kʼáakʼoʼ yéetel maʼ táan u yeleloʼobiʼ›. ¿A wojel wa máax le uláakʼ juntúul yaan ichiloʼoboʼ?... U ángel Jéeoba, letiʼ kanáant le óoxtúul hebreoʼob utiaʼal maʼ u yúuchul mix baʼal tiʼoboʼ.

¹³ Le rey túunoʼ náatsʼ tu jool le hornooʼ, ka tu yaʼalaj: «¡Sadrac, Mesac yéetel Abednego, u palitsileʼex u  Diosil kaʼan, jóokʼeneʼex, koʼoteneʼex wayeʼ!». Le ka jóokʼoʼobeʼ tuláakal le máaxoʼob yanoʼoboʼ tu yiloʼobeʼ mix baʼal úuchtiʼob. Mix bóok buutsʼchajoʼobiʼ. Le rey túunoʼ tu yaʼalaj: ‹¡Kiʼikiʼtʼantaʼak u Dios Sadrac, Mesac yéetel Abednego, tumen tu túuxtaj u ángel utiaʼal u salvartik u palitsiloʼob tumen maʼ tu adorartoʼob yaanal diosoʼobiʼ!› (Daniel, capítulo 3).

¹⁴ Le baʼax úuchaʼ yaan baʼax ku kaʼansiktoʼon. Bejlaʼa xaneʼ le máakoʼoboʼ ku beetkoʼob imagenoʼob utiaʼal u adorartoʼob. Ku beetaʼal de cheʼ, tuunich, hierro wa de nookʼ. Junpʼéel enciclopediaeʼ ku yaʼalik: «Le bandera yéetel le cruzoʼ, kiliʼichoʼob» (The Encyclopedia Americana). U yáax disipuloʼob Jesuseʼ maʼatech u adorartikoʼob kaʼach u emperadoril Roma. Daniel P. Mannix, juntúul historiadoreʼ, tu yaʼaleʼ le baʼax ku beetkoʼob kaʼachoʼ jeʼel u páajtal u keʼetel yéetel «u saludartaʼal le banderaoʼ wa u yaʼalik máak u tsʼáaik u kuxtal tu yoʼolal».

¹⁵ A tuklikeʼ, ¿máakalmáak tiʼ le imagenoʼob ku kʼaʼamal tumen Diosoʼ? ¿Letiʼ wa le de nookʼoʼ, le de cheʼoʼ, le de tuunichoʼ wa le de hierrooʼ?... ¿Maʼalob wa ka xolak juntúul máax meyajtik Dios tu táan junpʼéel imagen beyoʼ?... Sadrac, Mesac yéetel Abednegoeʼ maʼ tu beetoʼobiʼ, le oʼolal lúuboʼob utsil tiʼ Jéeoba. ¿Bix jeʼel u páajtal a beetik jeʼex úuchik u beetkoʼoboʼ?...