Ibuot 28

Nte Ọkpọfiokde Owo Emi Okpokopde Uyo Ọnọ

NDUSỤK ini esisọn̄ ndifiọk owo emi nnyịn ikpokopde uyo inọ. Eka m̀mê ete fo ekeme ndidọhọ fi anam n̄kpọ kiet. Edi ekem andikpep m̀mê bodisi ọdọhọ fi anam n̄kpọ efen. Edieke oro etịbede, anie ke otu mmọ ke afo edikop uyo ọnọ?—

Ke ntọn̄ọ ntọn̄ọ n̄wed emi, ke Ibuot 7, nnyịn ima ikot Ephesus 6:1-3 ke Bible. Do enye ọdọhọ ke nditọ ẹkpenyene ndikop uyo nnọ mme ete ye eka mmọ. Itie N̄wed Abasi oro ọdọhọ ete: ‘Ẹkop uyo mme ete mbufo ye mme eka mbufo ke Ọbọn̄.’ Nte afo ọmọfiọk se ọwọrọde nditọ ndikop uyo mme ete ye eka mmọ “ke Ọbọn̄”?— Enye ọwọrọ ke nditọ ẹkpenyene ndikop item ke ini mme ete ye eka mmọ ẹkpepde mmọ ẹte ẹnịm mme ibet Abasi.

Edi ndusụk ikpọ owo inịmke ite ke Jehovah odu. Ntre, nso edieke kiet ke otu mmọ ọdọhọde ke enen ndiyịp udomo ke ufọkn̄wed m̀mê ndimen n̄kpọ ke ufọkurua ye unana edikpe okụk? Do, nte ọfọn eyenọwọn̄ ndibian̄a abian̄a m̀mê ndiyịp n̄kpọ?—

Ti, ini kiet ko Edidem Nebuchadnezzar ama ọdọhọ kpukpru owo ẹnụhọ ẹnọ mbiet o-gold oro enye okowụkde. Edi Shadrach, Meshach, ye Abednego ikonụhọke. Nte afo ọmọfiọk ntak?— Koro Bible ọdọhọ ke mme owo ẹkpenyene ndituak ibuot nnọ Jehovah kpọt.—Exodus 20:3; Matthew 4:10.

Ke Jesus ama akakpa, ẹma ẹda mme apostle esie ẹdi ke iso Sanhedrin, kpa akwa esop ido ukpono mme Jew. Akwa Oku Caiaphas  ama ọdọhọ ete: “Nnyịn ima isọn̄ uyo ikpan mbufo, ite ẹkûkpep aba n̄kpọ ke enyịn̄ [Jesus]: ndien sese, ẹmeyọhọ Jerusalem ye ukpep-n̄kpọ mbufo.” Ntak emi mme apostle mîkokopke uyo inọ Sanhedrin?— Ke etịn̄de ikọ ke ibuot kpukpru mme apostle, Peter ama ọbọrọ Caiaphas ete: “Nnyịn inyene ndikop uyo Abasi n̄kan uyo owo.”—Utom 5:27-29.

Ke ini oro, mme adaiso ido ukpono mme Jew ẹma ẹnyene akwa odudu. Nte ededi, idụt mmọ okodu ke idak ukara Rome. Adaibuot ukara oro ekekere Caesar. Idem okposụkedi mme Jew mîkoyomke Caesar akara mmimọ, ukara Rome ama anam ediwak nti n̄kpọ ọnọ mme owo. Ndien mme ukara mfịn n̄ko ẹsinam nti n̄kpọ ẹnọ nditọisọn̄ mmọ. Nte afo ọmọfiọk ndusụk n̄kpọ emi mmọ ẹnamde?—

Mme ukara ẹsisiak mme usụn̄ man ẹka isan̄ ẹnyụn̄ ẹkpe mme bodisi ye mme enịme ikan̄ man ẹkpeme nnyịn. Mmọ n̄ko ẹkeme ndinam ufọkn̄wed odu ọnọ mme uyen ẹnyụn̄ ẹse ẹban̄a mbonusọn̄. Ukara esida okụk anam mme n̄kpọ emi. Nte afo ọmọfiọk ebiet emi ukara esinyenede okụk oto?— Esinyene oto mme owo. Ẹkot okụk emi mme owo ẹsikpede ẹnọ ukara, tax.

 Ke ini Akwa Andikpep okodude ke isọn̄, ediwak mme Jew ikenyịmeke ndikpe tax nnọ ukara Rome. Ntre usen kiet mme oku ẹma ẹkpe ndusụk owo ẹdibụp Jesus mbụme kiet man ẹdomo ndisịn enye ke mfịna. Mbụme oro ekedi, ‘Nte akpana nnyịn ikpe tax inọ Caesar m̀mê ikpanaha ikpe?’ Emi ekedi n̄kari n̄kari mbụme. Edieke Jesus ọkpọbọrọde, ‘Ih, akpana ẹkpe tax,’ ediwak mme Jew ikpamaha se enye etịn̄de. Edi Jesus ikpekemeke ndidọhọ, ‘Baba, inaha mbufo ẹkpe tax.’ Ikpọfọnke ndidọhọ ntre.

Ntre, nso ke Jesus akanam? Ọfọn, enye ama ọdọhọ ete: “Ẹwụt mi okụk kiet.” Ke ini mmọ ẹma ẹkeda okụk kiet ẹsọk enye, Jesus ama obụp mmọ ete: ‘Ndise ye enyịn̄ anie edi emi?’ Mmọ ẹma ẹbọrọ ẹte: “Caesar.” Ntre Jesus ama ọdọhọ ete: “Ẹnọ Caesar ndien se inyenede Caesar, ẹnyụn̄ ẹnọ Abasi se inyenede Abasi.”—Luke 20:19-26.

Nte ededi, baba owo kiet ikekemeke ndikụt ndudue ndomokiet ke ibọrọ oro. Edieke Caesar anamde mme n̄kpọ ọnọ mme owo, odot ndida okụk oro Caesar anamde n̄kpe enye ke mme n̄kpọ emi. Ntre ke usụn̄ emi, Jesus ama owụt ke enen ndikpe tax nnọ ukara kaban̄a mme ufọn oro nnyịn ibọde.

 Idahaemi, ekeme ndidi afo ukponke ukem ndikpe tax. Edi n̄kpọ odu emi afo ọkpọnọde ukara. Nte afo ọmọfiọk se enye edide?— Ndinịm mme ibet ukara. Bible ọdọhọ ete: “Ẹsụk idem ẹnọ mme enyene-odudu emi ẹkarade.” Mme enyene-odudu emi ẹdi mme owo oro ẹnọde odudu ndikara. Ntre Abasi edi enye emi ọdọhọde ke nnyịn ikpenyene ndinịm mme ibet ukara.—Rome 13:1, 2.

Ibet ekeme ndidu emi ọdọhọde owo okûtop babru m̀mê mme n̄kpọ efen ọduọn̄ọ ke efak. Nte afo ekpenyene ndinịm ibet oro?— Ih, Abasi oyom afo enịm. Nte afo ekpenyene ndikop uyo nnọ mme bodisi n̄ko?— Ukara esikpe mme bodisi okụk man ẹkpeme mme owo. Ndikop uyo nnọ mmọ edi ukem nte edikop uyo nnọ ukara.

Ntre edieke afo oyomde ndibe ke efak ndien bodisi ọdọhọ ete “Bet!” nso ke afo akpanam?— Nte ededi, edieke mbon en̄wen ẹfehede ẹbe, nte afo ekpetiene mmọ?— Afo ekpenyene ndibet, idem ọkpọkọm afo edi n̄kukụre owo emi ebetde. Abasi ọdọhọ fi okop uyo.

Mfịna ekeme ndidu ke n̄kann̄kụk, ndien bodisi ekeme ndidọhọ: “Ẹkûdụk efak. Ẹkûwọrọ an̄wa.” Edi afo emekeme ndikop mfiori onyụn̄ ekere m̀mê nso itịbe. Nte afo ekpenyene ndiwọrọ n̄kese?— Ndi emi ekpedi edikop uyo nnọ “mme ẹnyene-odudu emi ẹkarade”?—

Ke ediwak itie, ukara n̄ko esibọp mme ufọkn̄wed, ndien enye esikpe mme andikpep okụk. Ntre nte afo emekere nte ke Abasi oyom fi okop uyo ọnọ andikpep?— Kere ban̄a emi. Ukara esikpe andikpep okụk man ekpep n̄kpọ, kpa nte enye ekpede bodisi ndikpeme mme owo. Ntre ndikop uyo nnọ bodisi m̀mê andikpep etie nte ndikop uyo nnọ ukara.

 Edi nso edieke andikpep ọdọhọde afo atuak ibuot ọnọ mbiet? Nso ke afo akpanam?— Nditọ Hebrew ita ikonụhọke inọ mbiet oro, idem ke ini Edidem Nebuchadnezzar ọkọdọhọde mmọ ẹnụhọ ẹnọ. Nte afo emeti ntak?— Koro mmọ ikoyomke ndisọn̄ ibuot ye Abasi.

Ewetmbụk kiet emi ekerede Will Durant ama ewet aban̄a akpa mme Christian onyụn̄ ọdọhọ ete ke ‘mmọ ikọnọhọ Caesar n̄kon̄n̄kan nsụkibuot [m̀mê, edinam akpanikọ].’ Baba, mmọ ẹkenọ Jehovah! Ntre ti nte ke Abasi ekpenyene ndidi akpa ke uwem nnyịn.

Nnyịn ikop uyo inọ ukara koro emi edi se Abasi oyomde nnyịn inam. Edi edieke ẹdọhọde nnyịn inam n̄kpọ oro Abasi ọdọhọde nnyịn ikûnam, nso ke nnyịn ikpetịn̄?— Nnyịn ikpenyene nditịn̄ se mme apostle ẹketịn̄de ye akwa oku ẹte: “Nnyịn inyene ndikop uyo Abasi n̄kan uyo owo.”—Utom 5:29.

Bible ekpep edisụk ibuot nnọ ibet. Kot se ẹwetde ke Matthew 5:41; Titus 3:1; ye 1 Peter 2:12-14.

[Ndise ke page 148]

Nso ke Peter ọdọhọ Caiaphas?

[Ndise ke page 149]

Didie ke Jesus ọkọbọrọ n̄kari n̄kari mbụme mme owo emi?

[Ndise ke page 151]

Ntak emi nnyịn ikpokopde uyo inọ bodisi?