SAPYʼÁNTE ndajaikuaái máva heʼívapa jajapóta. Por ehémplo, ikatu nde sy térã nde túva heʼi ndéve rejapo hag̃ua peteĩ mbaʼe, péro upéi nde profesór térã peteĩ polisía heʼi ndéve ótra kosaite. Péicha oikóramo, ¿máva heʼívapa rejapo vaʼerã?...

Kapítulo 7-pe jalee kuri Efesios 6:1-3. Upépe heʼi mitãnguéra ojapo vaʼerãha ituvakuéra heʼíva. Pe téxto heʼi: “Taʼyrakuéra, peneñeʼẽrendúkena pende tuvakuérape ñande Ruvicha oipotaháicha”. ¿Ndépa reikuaa mbaʼépa heʼise “ñande Ruvicha oipotaháicha”?... Umi tuvakuéra oikóva ñande Ruvicha oipotaháicha omboʼe ifamiliakuérape ojapo hag̃ua Ñandejára Léi heʼíva.

Péro oĩ heta kakuaa ndojeroviáiva Jehová rehe. Sapyʼánte koʼãichagua tapicha heʼikuaa peteĩ mitãme ikatuha omonda térã okopia ótrogui orrendi jave eskuélape. ¿Ovalépa upéicharõ peteĩ mitã omonda térã okopia iñexámenpe?...

Oiméne nemanduʼa rréi Nabucodonosor heʼi hague umi héntepe oñesũ hag̃ua pe taʼanga renondépe. Péro Sadrac, Mesac ha Abednego ndojapói upéva. ¿Reikuaápa mbaʼérepa?... La Biblia heʼi rupi Jehovápe añoite jaadora vaʼerãha (Éxodo 20:3; Mateo 4:10).

Jesús omano rire, umi apóstolpe ojegueraha Sanedrínpe, pe trivunál iñimportantevéva oreko vaʼekue umi hudío. Pe saserdóte  guasu Caifás heʼi chupekuéra: ‘Roʼe porã kuri peẽme anivéma hag̃ua pemboʼe avavépe Jesús rérape, ha ¡péina!, pemyenyhẽma Jerusalén koʼã mbaʼe pemboʼévagui’. ¿Mbaʼérepa umi apóstol ndojapói la ojeʼéva chupekuéra?... Pedro heʼi Caifáspe: “Ore oreñeʼẽrendu vaʼerã Ñandejárape ore ruvicháramo, yvyporakuérape rangue” (Hechos 5:27-29).

Umi omoakãva hudiokuéra rrelihión tuicha omanda vaʼekue upe tiémpope. Péro hetãnguéra oĩ pe mburuvicha rrománo poguýpe ohenóivape hikuái César. Umi hudío ndoipotáiramo jepe Roma omanda hesekuéra, pe goviérno rrománo ojapo heta mbaʼe porã hesehapekuéra. Koʼág̃a avei umi governánte ojapo heta mbaʼe porã ñanderehehápe. ¿Mbaʼe mbaʼépa ojapo hikuái?...

Umi goviérno ojapoka tape, ospitál ha eskuéla mitãnguérape g̃uarã. Avei opaga umi polisía ha vombérope oñatende hag̃ua ñanderehe. Pe goviérno oikotevẽ pláta ojapo hag̃ua koʼã mbaʼe. ¿Reikuaápa moõguipa okonsegi?... Oiporu pe pláta omeʼẽva umi hénte opaga jave umi impuésto.

 Jesús tiémpope, heta hudío ndopagaséi impuésto pe goviérno rrománope. Peteĩ jey umi saserdóte omoprovlemase jeýma Jesúspe. Omondo hikuái únos kuánto kuimbaʼépe Jesús rendápe oporandu hag̃ua chupe: “¿Ovale piko japaga pe impuésto Césarpe, térãpa nahániri?”. Haʼekuéra omoĩ vaisénte chupe. Haʼe heʼírõ: “Pepaga vaʼerã impuésto”, heta hudío ipochýta. Péro Jesús heʼírire: “Ndovaléi pepaga umi impuésto”, upéva oĩ vaíta.

¿Mbaʼépa ojapo Jesús upémarõ? Heʼi chupekuéra: ‘Pehechauka chéve peteĩ monéda’. Jesús ohecha rire pe monéda osẽ heʼi: “¿Máva raʼanga ha máva rérapa oĩ hese?”. Haʼekuéra ombohovái: “César”. Upéi Jesús heʼi chupekuéra: “Upéicharõ katuete pemeʼẽ vaʼerã Césarpe imbaʼéva, péro pemeʼẽ vaʼerã Ñandejárape imbaʼéva” (Lucas 20:19-26).

Avave ndaikatúi ipochy Jesús heʼívare. Pe governánte térã César ojapoka pe pláta ha ojapove heta mbaʼe porã umi hénte rehehápe, ha upévare ojepaga vaʼerã chupe. Péicha Jesús ohechauka japaga vaʼerãha impuésto pe goviérnope umi mbaʼe ojapóvare.

 Nemitã rupi nderepagáiti impuésto, upéicharõ jepe oĩ peteĩ mbaʼe ikatúva rejapo. ¿Ndépa reikuaa mbaʼépa?... Rekumpli umi léi omoĩva pe goviérno. La Biblia heʼi: “Opavave oñemoĩ vaʼerã mburuvichakuéra poguýpe”. Koʼã mburuvicha ningo hína umi tapicha ogovernáva ñane retãme, ha Jehová voi oipota ñakumpli umi léi haʼekuéra omoĩva (Romanos 13:1, 2).

Ikatu oĩ peteĩ léi heʼíva ndovaleiha ñamombo yty kállepe, ¿rekumpli vaʼerãpa pe léi?... Ñandejára oipota rekumpli. Ha, ¿rejapo vaʼerãpa umi polisía heʼíva?... Pe goviérno opaga chupekuéra oñangareko hag̃ua hentekuérare, upévare rejapóramo umi polisía heʼíva neñeʼẽrendu hína avei pe goviérnope.

Upéicharõ, rehasáta jave rrúta ha peteĩ polisía heʼíramo ndéve: “¡Ehaʼarõke!, ¿mbaʼépa rejapóta?... ¿Rediparátapa rehasa umi ótro nde rapicha ojapo rupi upéicha?... Nde rehaʼarõ vaʼerã, umi ótro nopenáiramo jepe hese. Nemanduʼákena Ñandejára oipotaha neñeʼẽrendu.

Sapyʼánte ikatu oiko sarambi nde róga ypýpe, ha upévare peteĩ polisía heʼi: “Aníke pesẽ kállepe, pepytáke pende rógape”. Péro ikatu rehendu umi osapukáiva ha reikuaase mbaʼépa la oikóva. ¿Iporãtapa resẽramo remaña?... Ha resẽramo, ¿rehechaukátapa neñeʼẽrenduha “mburuvichakuérape”?...

Pe goviérno ojapoka avei eskuéla ha opaga umi profesórpe. ¿Oipotánepa Ñandejára rejapo umi profesór heʼíva?... Epensamína ko mbaʼére: pe goviérno opaga chupekuéra omboʼe hag̃ua mitãnguérape, opagaháicha avei umi polisíape oñangareko hag̃ua hentekuérare. Upéicha rupi, rejapóramo umi polisía térã umi profesór heʼíva, rehechauka hína neñeʼẽrenduha pe goviérnope.

 Péro peteĩ profesór heʼíramo ndéve readora hag̃ua peteĩ taʼangápe, ¿mbaʼépa rejapóta?... Umi mbohapy isrraelíta noñesũi vaʼekue pe taʼanga renondépe, rréi Nabucodonosor heʼíramo jepe chupekuéra ojapo hag̃ua. ¿Nemanduʼápa mbaʼérepa noñesũi?... Iñeʼẽrendu rupi Ñandejárape.

Peteĩ karai ohaíva lívro, hérava Will Durant, oskrivi vaʼekue umi disípulo ‘ndojapói hague opaite mbaʼe César heʼíva’. ¿Mbaʼérepa? Pórke Jehovápe añoite ñaneñeʼẽrendu vaʼerã opa mbaʼépe. Upévare, aníke nderesarái ñamotenonde vaʼerãha Jehovápe opa mbaʼégui.

Ñande ñakumpli umi goviérno heʼíva, Ñandejára omanda rupi ñandéve. Péro umi mburuvicha heʼíramo jajapo hag̃ua Jehová ndoipotáiva, ¿mbaʼépa jaʼéta chupekuéra?... Jaʼéta avei umi apóstol heʼi haguéicha pe saserdóte guasúpe: “Ore oreñeʼẽrendu vaʼerã Ñandejárape ore ruvicháramo yvyporakuérape rangue” (Hechos 5:29).