KAPU 28

Mutindu Beto Lenda Zaba Muntu ya Beto Fwete Lemfukila

BANTANGU yankaka yo kevandaka mpasi na kuzaba muntu ya beto fwe lemfukila. Mama to tata na nge le songa nge na kusala kima mosi. Kansi, na nima, longi ya nzo-nkanda to polisi le songa nge na kusala kima yina kewakana ve ti yina ya bibuti na nge kusongaka nge. Kana yo mekumina nge, nge talemfukila nani na kati na bo?—

Na luyantiku ya mukanda yai, na Kapu 7, beto tangaka Efezo 6:1-3, NW. Kuna, Biblia ketuba nde bana fwe lemfukaka na bibuti na bo. Verse yango ketuba nde: “Beno lemfuka na bibuti na beno, na kuwakana ti Mfumu.” Keti nge mezaba kana kuvanda “na kuwakana ti Mfumu” ketendula inki?— Bibuti yina kele na kuwakana ti Mfumu kelongaka bana na bo nde bo fwe lemfukaka na bansiku ya Nzambi.

Kansi bambuta mingi kekwikilaka ve na Yehowa. Yo yina, inki nge tasala kana mbuta mosi kutubila nge nde kuyiba bamvutu na ekzame ya nzo-nkanda to kubaka kima mosi na magazini kukonda kupesila yo mbongo kele mbote? Keti kuyiba bamvutu na nzo-nkanda to kuyiba bima kele mbote sambu na mwana?—

Yibuka nde kilumbu mosi, Ntotila Nabukodonozore kulombaka bantu yonso na kufukimina kiteki ya wolo ya yandi tedimisaka. Kansi Shadraki, Meshaki, mpi Abedi-Nego kubuyaka kufukimina yo. Keti nge kezaba sambu na inki?— Sambu Biblia ketuba nde bantu fwete samba kaka Yehowa.—Kubasika 20:3; Matayo 4:10.

Na nima ya lufwa ya Yezu, bo nataka bantumwa na yandi na ntwala ya Sanedreni yina kuvandaka tribinale ya nene ya dibundu ya Bayuda. Mfumu ya banganga-Nzambi Kaifa kutubaka nde:  “Beto pesaka nsiku ya ngolo nde muntu lenda longa diaka ve na zina ya [Yezu]. Kansi beno tala mambu yina ya beno me sala: beno me mwangisa malongi na beno na bwala Yeruzalemi ya mvimba.” Sambu na nki bantumwa kulemfukilaka ve kimvuka ya Sanedreni?— Piere kutubilaka Kaifa, na zina ya bantumwa yonso, nde: “Beto fweti lemfuka ntete na Nzambi, kansi na bantu ve.”—Bisalu 5:27-29.

Na ntangu yina, bamfumu ya dibundu ya Bayuda kuvandaka na kiyeka mingi. Kansi, insi na bo kuvandaka na nsi ya luyalu ya Roma. Bo vandaka kubinga mfumu ya luyalu yina nde Kaisali. Ata Bayuda vandaka kuzola ve nde Kaisali kuyala bo, guvernema ya Roma vandaka kusadila bantu mambu mingi ya kitoko. Bubu yai mpi baguvernema kesadilaka bantu na bo mambu ya mbote. Keti nge mezaba mwa mambu yango?—

Baguvernema ketungaka banzila mpi bo kefutaka bapolisi ti bantu yina kefwaka tiya (bapompie) sambu na kutanina beto. Bo le kotisa bana ya baleke nzo-nkanda ya ofele mpi kusansa minunu ya ofele. Guvernema kebasisaka mbongo mingi sambu na kusala mambu yai. Keti nge mezaba kisika guvernema kebakaka mbongo yango?— Na bantu. Mbongo yina bantu kefutaka na guvernema bo kebingaka yo mpaku.

 Ntangu Longi ya Nene kuvandaka na ntoto, Bayuda mingi vandaka kuzola ve kufuta mpaku na guvernema ya Roma. Yo yina, kilumbu mosi, sambu na kusosa mutindu ya kukanga Yezu na mutambu, banganga-Nzambi kufutaka ndambu ya bantu mbongo sambu bo kwenda kuyula Yezu ngyufula mosi. Ngyufula ya bo yulaka kuvandaka yai: ‘Keti beto fwete futa mpaku na Kaisali to ve?’ Ngyufula yai kuvandaka mutambu. Kana Yezu kuvutulaka nde, ‘Ee, beno fwete futa mpaku,’ Bayuda mingi zolaka kusepela ve. Kansi Yezu lendaka kutuba ve nde, ‘Beno fwete futa ve mpaku.’ Yo zolaka kuvanda ve mbote kana yandi tubaka mpidina.

Yo yina, inki Yezu kusalaka? Yandi tubaka nde: ‘Beno songa mono kibende mosi ya mbongo.’ Ntangu bo natilaka yandi yo, Yezu kuyulaka bo nde: ‘Ilungi yai ti zina yai na zulu na yo ke ya nani?’ Bantu yango kutubaka nde: ‘Ya Kaisali.’ Ebuna Yezu kutubaka nde: ‘Ya Kaisali, beno pesa na Kaisali; ya Nzambi, beno pesa na Nzambi.’—Luka 20:19-26.

Ata muntu mosi ve kukaka kutuba nde mvutu yina kuvandaka ya mbi. Sambu Kaisali kesadilaka bantu bima, yo kele mpenza mbote na kufuta Kaisali mbongo ya yandi mesalaka na mpila nde yandi sadila yo na bima yina yandi kesadilaka bantu. Na mutindu yina, Yezu  kusongaka nde yo kele mbote na kufuta mpaku na guvernema sambu na bima yina ya beto kebakaka.

Kansi, ziku nge mekuma ntete ve mbuta sambu na kufuta mpaku. Kansi, kele ti kima ya nge fwete pesa na guvernema. Keti nge mezaba kima yango?— Bulemfu na bansiku ya guvernema. Biblia ketuba nde: ‘Nge fweti lemfuka na bamfumu ya leta.’ Bamfumu yango kele bayina kele ti kiyeka na guvernema. Nzambi muntu ketuba nde beto fwete lemfuka na bansiku ya luyalu.—Roma 13:1, 2.

Bo le tula nsiku nde muntu kulosa ve bapapie to bima yankaka na balabala. Keti nge fwete lemfuka na nsiku yina?— Ee, Nzambi kezola nde nge lemfuka na yo. Keti nge fwete lemfukila mpi bapolisi?— Guvernema kefutaka bapolisi sambu bo tanina bantu. Kana beto kelemfukila bo pana yo ketendula nde beto kelemfukila guvernema.

Kana nge kezola kusabuka balabala, ebuna polisi mosi kusonga nge nde “Kinga!” inki nge fwe sala?— Kana bankaka kesabuka ntinu ata polisi mebuyisa bo, keti nge mpi fwe sala bonso bo?— Nge fwe kinga, ata nge mebikala kaka nge mosi na kukinga. Nzambi kesonga nge nde nge fwe lemfuka.

Mubulu le vanda na kartie, mpi polisi mosi le tuba nde: “Beno kwenda ve na babalabala. Beno basika ve na nganda.” Kansi nge le wa makelele mpi nge le kudiyula nde nki mambu ke na kusalama. Keti nge tabasika na nganda sambu na kutala?— Kana nge sala mpidina, keti yo tasonga nde nge melemfukila “bamfumu ya leta”?—

Na bisika mingi, guvernema ketungaka mpi banzo-nkanda, mpi yo kefutaka balongi. Keti nge keyindula nde Nzambi kezola nde nge lemfukila longi?— Yindula fyoti. Guvernema kefutaka longi sambu na kisalu na yandi ya kulonga, kaka mutindu yo kefutaka polisi sambu yandi kutanina bantu. Yo yina, kana nge kelemfukila polisi to longi pana yo kesonga nde nge kelemfukila guvernema.

Kansi, inki nge tasala kana longi kusonga nge nde nge fwete fukimina kifwanisu mosi? Inki nge tasala?— Baebreo yina tatu kufukiminaka  ve kifwanisu, ata ntangu Ntotila Nabukodonozore kutubilaka bo na kusala yo. Keti nge keyibuka sambu na inki?— Sambu bo zolaka ve kukolama na Nzambi.

Will Durant, nsoniki mosi ya mambu yina vandaka kusalama na ntangu ya ntama, kusonikaka mambu ya metala Bakristu ya ntete mpi yandi tubaka nde ‘kwikama na bo ya kuluta nene bo vandaka kupesa yo ve na Kaisali.’ Ve, bo vandaka kupesa yo na Yehowa! Yo yina, beto fwe yibukaka nde Nzambi fwete baka kisika ya ntete na luzingu na beto.

Beto kelemfukaka na guvernema sambu Nzambi kezola nde beto sala mutindu yina. Kansi, kana bo lomba beto na kusala kima mosi yina Nzambi ketuba nde beto fwete sala yo ve, inki beto fwe tuba?— Beto fwe tuba mambu yai ya bantumwa kutubaka na mfumu ya banganga-Nzambi nde: “Beto fweti lemfuka ntete na Nzambi, kansi na bantu ve.”—Bisalu 5:29.

Biblia kelonga malongi ya kemonisa nde beto fwe zitisa nsiku ya leta. Tanga mambu ya kele na Matayo 5:41; Tito 3:1; mpi 1 Piere 2:12-14.

[Kifwanisu ya kele na lutiti 148]

Inki mambu Piere ketubila Kaifa?

[Kifwanisu ya kele na lutiti 149]

Inki mutindu Yezu kupesaka mvutu na ngyufula ya mutambu ya bantu yai?

[Kifwanisu ya kele na lutiti 151]

Sambu na nki beto fwe lemfukila polisi?