DIMODIMO bikalanga bikomo kuyuka i ani otufwaninwe kukōkela. Shobe nansha inobe ukokeja kukunena kulonga kintu kampanda. Ino kupwa padi mwadimu nansha mpulushi nandi wakunena kulonga kintu kingi. Shi nobe kibakufikila namino, le i ani umo pa abo okakōkela?—

Ku ngalwilo kwa dino dibuku, mu Shapita wa 7, twatangile Efisesa 6:1-3 mu Bible. Banena’mo amba bana bafwaninwe kukōkela bambutwile babo. “Kōkelai bakwimubutula monka mudi Mfumwetu,” ye munenena kisonekwa kine. Le uyukile kwikala “mudi Mfumwetu” kushintulula namani?—Bambutwile badi mudi Mfumwetu bafundijanga babo bana kukōkela ku bijila bya Leza.

Ino bantu bakwabo batame kebetabijepo mudi Yehova. Penepo, le bikekala namani shi umo wa mu abo wanena amba kudimba nansha kutentula mu ekizame ku masomo ne kusela kintu mu kibīko kwampikwa kufuta i biyampe? Lelo i biyampe shi mwana udimba nansha kwiba?—

Vuluka, Mulopwe Nebukaneza wāsoñenye bantu bonso kufukatyila nkishi wa nsahabu waāshimikile. Ino ba Shadelake, Meshake, ne Abedenengo bāpelele kufukata. Le uyukile kyobāpelele?—Mwanda Bible unena amba bantu bafwaninwe kutōta enka Yehova kasuku kandi.—Divilu 20:3; Mateo 4:10.

Kupwa kwa Yesu kufwa, bātwejeje batumibwa bandi mu Sanhedrini, kidye kikatampe kya mambo kya Bayuda. Kitobo Mukatampe Kefasa kānena’mba: “Ketwemunenepo twa’mba: Kemukikolwa kadi kufundija mu dino dijina [dya Yesu], a? Talaipo bidi, byo  mwasambakanya Yelusalema ense na kufundija kwenu.” Mwanda waka batumibwa kebakōkelepo Sanhedrini?—Petelo wālondolwele Kefasa, pa kyaba kya batumibwa bonso, amba: ‘Batwe tufwaninwe kukōkela Leza bu mulopwe, kupita’ko bantu.’—Bilongwa 5:27-29.

Mu kine kitatyi’kya, bendeji ba bipwilo bya Bayuda bādi na lupusa lukatampe lwine. Inoko, ntanda yabo yādi yendejibwa na umbikalo nansha bulopwe bwa bene Loma. Mutwe wa owa umbikalo wādi witwa bu Kesala. Nansha Bayuda byokebādipo basaka Kesala kwibabikadila, umbikalo wa bene Loma wālongēle bantu bintu biyampe bivule. Ne imbikalo ya dyalelo nayo ilongelanga bekadi bayo bintu biyampe. Le uyukile bintu bimobimo byoiloñanga?—

Imbikalo yo isebejanga bilai mwa kwendela kadi i ayo ifutanga bampulushi ne bakubula mudilo mu bibundi bikata mwanda wa kwitukinga. Kadi yubakijanga masomo a kufunda’ko banuke ne kukwatakanya banunu. Byonso bino bilomba lupeto luvule pa kusaka amba umbikalo wibilonge. Lelo uyukile kumonanga umbikalo luno lupeto?—I mu bantu. Lupeto lufutanga bantu ku umbikalo lwitwanga bu mpalata nansha musonko.

 Pādi Mufundiji Mukatampe pano pa ntanda, Bayuda bavule kebādipo basaka kusonka mpalata ku umbikalo wa bene Loma. Ebiya difuku dimo babitobo batuma bantu bende kwipangula Yesu kipangujo kya kumupija myanda. Kipangujo kine kyādi kino: ‘Le tunenwe kusonka musonko wa Kesala’ni nansha tuleke’o?’ Kino kipangujo kyādi kya kumuta dikinga. Shi wālondolwele amba: ‘Eyo, mufwaninwe kusonka musonko,’ Bayuda bavule kebādipo ba kusangela byanena. Ino Yesu nandi kādipo ukokeja kunena’mba: ‘Mhm, kemufwaninwepo kusonka musonko.’ Byādi bya kwikala bibi kunena nabya.

Penepo, Yesu wālongele’po namani? Ebiya wānena’mba: ‘Nombolei’po kityele kimo kya lupeto.’ Pobāmuletele’ko kimo, Yesu wēbepangula’mba: ‘Lelo ino mpala ne dijina bidi’po i bya ani?’ Bantu’ba amba: “I bya Kesala.” Penepo Yesu amba: “Ino penepo kadi lubulai kudi Kesala bya Kesala, bya Leza nabyo mulubule kudi Leza.”—Luka 20:19-26.

Bine, mu ano malondololo kekudipo nansha umo wādi ubwanya kuboya’mo kantu kabi nansha kamo. Shi kudi bintu Kesala byalongelanga bantu, i biyampe nanshi kufuta Kesala lupeto  lwapungile’lwa pa mwanda wa bino bintu byalonga. Pa kino, Yesu wālombwele amba i biyampe kusonka mpalata ku umbikalo pa mwanda wa bintu byotutambulanga.

Pano’ko, abe shobe kwafikile pa myaka ya kusonka mpalata. Inoko kudi kintu kampanda kyokokeja kulubwila umbikalo. Lelo wikiyukile?—I kikōkeji ku bijila bya Leta. Bible unena’mba: ‘Kōkelai bakatampe balupusa.’ Bano balupusa i boba badi na bitenta mu umbikalo. Nanshi i Leza unene amba tufwaninwe kukōkela ku bijila bya Leta.—Loma 13:1, 2.

Padi kudi kijila kipeleja kwela mapapye nansha bintu bikwabo bya busala mu kipito. Lelo ufwaninwe kulama kino kijila?—Eyo, Leza ukusakila kwikilama. Lelo ufwaninwe kukōkela ne bampulushi?—Umbikalo o ufutanga bampulushi mwanda wa kulama bantu. Kwibakōkela kudi pamo’nka na kukōkela umbikalo.

Penepa shi wenda abe amba utyibuluke kipito mpulushi nandi wakunena amba “Kungila bidi!” le ukalonga’po namani?—Ino shi bakwabo abatyibuluka lubilo, lelo nobe ukatyibuluka?—Abe ufwaninwe kukungila, nansha shi ubashala ukungila bunka bobe. Leza ukunena kukōkela.

Padi kudi tuvutakanya mu mukenza wenu, padi kudi mpulushi wanena’amba: “Kemukilupukilai mu bipito. Kemukitambai panja.” Inoko abe amba wivwane kyungwe kibatūta, kowiipangula shi i kika kyalongeka. Lelo ukalupukila panja kukabandila?—Shi utambe, le kwako ko kukōkela “bakatampe balupusa”?—

Mu byaba bivule, umbikalo o ūbakijanga masomo, ne kufuta badimu. Ino le ulanga amba Leza ukusakila kukōkela mwadimu?—Langa’po bidi. Umbikalo o ufutanga mwadimu mwanda wa kufundija, enka moufutyilanga ne mpulushi mwanda wa kukinga bantu. Nanshi kukōkela shi mpulushi, shi mwadimu, kudi pamo’nka na kukōkela umbikalo.

 Ino le bikekala namani shi mwadimu kanena amba ufwaninwe kutōta kyelekejo kampanda? Le penepo ukalonga namani?—Boba Bahebelu basatu kebāfukatyilepo kyelekejo, nansha Mulopwe Nebukaneza byaēbanene kwikifukatyila. Le ukivulukile kyobāpelele?—Mwanda kebāsakilepo kuleka kukōkela Leza.

Mulembi wa mānga William Durant wālembele myanda ya bene Kidishitu babajinji, amba ‘kikōkeji kyabo kipityile kyonso kekyādipo kya kukōkela Kesala, ehe.’ Bine, kyādi kya kukōkela Yehova! Nanshi vuluka amba tufwaninwe kutangidija Leza kumeso mu būmi bwetu.

Tukōkelanga umbikalo mwanda i Leza witusakila tukōkele. Ino shi abetunena kulonga kintu kitupeleja Leza kulonga, le tukanena namani?—Nabya tufwaninwe kunena byobya byānene batumibwa kudi kitobo mukatampe amba: ‘Tufwaninwe kukokela Leza bu mulopwe kupita’ko bantu.’—Bilongwa 5:29.