IMUE misangu bitu bikole bua kumanya muntu utudi ne bua kutumikila. Mamuebe anyi tatuebe udi mua kukuambila bua kuenza bualu kampanda. Kadi mulongeshi wenu anyi mpulushi udi mua kukuambila bua kubenga kuenza bualu abu. Biobi mua kuenzeka nanku, nnganyi wa kudibu uwatumikila?​—

Mu nshapita wa 7 wa mukanda eu tuvua babale mukanda wa mu Bible wa Efeso 6:1-3. Mukanda eu udi wamba ne: bana badi ne bua kutumikila baledi babu. Udi wamba ne: ‘Tumikilayi baledi benu mu Mukalenge.’ Udi mumanye tshidi kuenza bualu kampanda mu Mukalenge kumvuija anyi?​— Baledi badi benza malu mu Mukalenge badi balongesha bana babu bua kutumikila mikenji ya Nzambi.

Kadi kudi bantu bakole bakuabu badi kabayi bitabuja Yehowa to. Nunku, newenze tshinyi bikala umue wa kudibu wamba ne: kuibila mu mateta a mu kalasa anyi kuangata tshintu kampanda mu tshisalu kuyi ufuta makuta ki nkubi to? Mbimpe bua muana kuibila mu mateta a mu kalasa anyi kuiba tshintu kampanda anyi?​—

Vuluka ne: Mukalenge Nebukadenesâ wakatumina bantu bonso dîyi musangu mukuabu bua bakukuile lupingu lua or luvuaye muenzeje. Kadi Shadalaka, Meshaka ne Abedenego kabakaluinamina to. Udi mumanye tshivuabu babengele kuluinamina anyi?​— Bualu Bible udi wamba ne: bantu badi ne bua kutendelela anu Yehowa.​—Ekesode 20:3; Matayo 4:10.

Kunyima kua lufu lua Yezu, bakaya ne bapostolo bende kumpala kua Sanedren, tshilumbuluidi tshinene tshia tshitendelelu tshia bena Yuda. Muakuidi Munene Kayifa wakamba ne: ‘Tudi  banukandike bikole bua kanuyishi mu dîna dia [Yezu]; kadi tangilayi, nuenu nudi buwuje Yelushalema tente ne diyisha dienu.’ Bua tshinyi bapostolo kabakalonda mêyi a bena ku Sanedren?​— Petelo wakambila Kayifa mu dîna dia bapostolo bonso ne: ‘Butudi nabu mbua kutumikila mêyi a Nzambi kumpala kua mêyi a bantu.’​—Bienzedi 5:27-29.

Mu tshine tshikondo atshi, bamfumu ba bitendelelu ba bena Yuda bavua ne bukokeshi bua bungi be. Kadi ditunga diabu divua ku bukokeshi bua mbulamatadi wa bena Lomo. Muntu uvua ku mutu kua mbulamatadi au bavua bamubikila ne: Kaisa. Nansha muvua bena Yuda kabayi basue bukokeshi bua Kaisa, mbulamatadi wa bena Lomo wakenzela bantu malu a bungi mimpe. Lelu’eu kabidi, mbulamadi itu yenzela bantu malu mimpe. Udiku mumanye amue a ku malu au anyi?​—

Mbulamatadi idi yenza njila bua tuetu kuendelamu ne ifuta bampulushi bua kutulamabu. Idi kabidi ilongoluela bana tulasa ne itabalela makanda a mubidi a banunu. Bua kukumbaja malu onso aa, mbulamatadi udi utula makuta a bungi. Udi mumanye kudi mbulamatadi upetela makuta onso aa anyi?​— Udi uapetela kudi bantu. Makuta adi bantu bafuta mbulamatadi badi baabikila ne: bitadi.

 Pavua Mulongeshi Munene muikale pa buloba, bena Yuda ba bungi kabavua basue kufuta mbulamatadi wa bena Lomo bitadi to. Nunku dituku dikuabu bakuidi bakafuta bantu bakuabu makuta bua kuelabu Yezu lukonko lua kumuteya nalu. Lukonko luvua nunku: ‘Mbimpe tuetu kufuta Kaisa [tshitadi] anyi?’ Alu luvua lukonko lua kumuteya nalu. Bu Yezu muandamune ne: ‘Eyowa, nudi ne bua kufuta bitadi,’ bena Yuda ba bungi kabavua mua kuanyisha tshivuaye muambe to. Kadi Yezu kavua mua kuamba ne: ‘Tòo, kanuena ne bua kufuta bitadi’ nansha. Kabivua mua kuikala bimpe bua kuamba nanku to.

Nunku, ntshinyi tshiakenza Yezu? Wakamba ne: ‘Ndejayi dikuta dia tshiamu.’ Pakamutuadilabu dikuta adi, Yezu wakebeja ne: ‘Tshimfuanyi ne dîna bidipu mbia nganyi?’ Bantu bakamba ne: ‘Mbia Kaisa.’ Ke Yezu kuamba ne: ‘Nupe Kaisa bintu bia Kaisa, nupe Nzambi bintu bia Nzambi.’​—Luka 20:19-26.

Bushuwa, muntu nansha umue kavua mua kumona diandamuna adi dibi to. Bu mudi Kaisa wenzela bantu bintu, mbiakanyine kuangata makuta adi Kaisa wenza bua kumufuta bua bintu abi. Nunku, Yezu  wakaleja ne: mbimpe kufuta mbulamatadi bitadi bua bintu bitudi tupeta.

Mpindieu pamuapa wewe kuena muanji kukola bua kufuta bitadi. Kadi kudi tshintu tshiudi mua kupesha mbulamatadi. Udi mutshimanye anyi?​— Kutumikila mikenji yende. Bible udi wamba ne: ‘Tumikilayi bakokeshi badi ku mutu kuenu.’ Bakokeshi ng’aba badi ne bukokeshi mu mbulamatadi. Nunku Nzambi ke udi wamba bua ne: tudi ne bua kutumikila mikenji ya mbulamatadi.​—Lomo 13:1, 2.

Kudi mua kuikala mukenji wa kubenga kuimansha mabeji anyi bintu bikuabu mu njila. Udi ne bua kutumikila mukenji au anyi?​— Eyowa, Nzambi mmusue bua uutumikile. Udi ne bua kutumikila kabidi bampulushi anyi?​— Mbulamatadi utu ufuta bampulushi bua kulamabu bantu. Kubatumikila kudi mumue ne kutumikila mbulamatadi.

Nunku wewe musue kusambuka mu njila eku mpulushi umue ukuambila ne: “Indila!” ntshinyi tshiudi ne bua kuenza?​— Bikala bantu bakuabu basambuka lubilu nansha mudibu bambe nanku, wewe udi ne bua kubalonda anyi?​— Udi ne bua kuindila, nansha wewe muindile nkayebe. Nzambi udi ukuambila bua kutumikila.

Tshimvundu tshidi mua kuikala tshienzeka pabuipi nenu, mpulushi umue kuamba ne: “Kanupatuki mu njila to. Kanuyi pambelu to.” Kadi udi mua kumvua bantu bela mbila ne udiebeja tshidi tshipitakana. Udi ne bua kuya pambelu bua kumona anyi?​— Kuenza nunku nkutumikila “bakokeshi badi ku mutu” anyi?​—

Miaba ya bungi, mbulamatadi udi wibaka kabidi tulasa ne ufuta balongeshi. Nunku udiku wela meji ne: Nzambi mmusue bua utumikile mulongeshi anyi?​— Ela meji pa bualu ebu. Mbulamatadi udi ufuta mulongeshi bua alongeshe anu bu mudiye ufuta mpulushi bua kukubaye bantu. Nunku kutumikila nansha mpulushi anyi mulongeshi kudi anu bu kutumikila mbulamatadi.

Kadi newenze tshinyi bikala mulongeshi ukuambila bua kutendelela tshimfuanyi kampanda? Newenze tshinyi?​— Bena Ebelu basatu  abu kabakinamina lupingu to, nansha pakabambila Mukalenge Nebukadenesâ bua kuluinamina. Udi muvuluke tshivuabu babengele bualu ebu anyi?​— Bualu bavua basue kutumikila Nzambi.

Mufundi wa miyuki ya kale mukuabu (Will Durant) wakafunda pa bidi bitangila bena Kristo ba kumpala e kuambaye ne: ‘ki n’Kaisa uvuabu balamate bikole to.’ Tòo, Yehowa ke uvuabu balamate bikole! Nunku vuluka ne: Nzambi udi ne bua kuikala pa muaba wa kumpala mu nsombelu wetu.

Tudi tutumikila mbulamatadi bualu ke tshidi Nzambi musue ne: tuenze. Kadi buobu batuambile bua kuenza tshintu tshidi Nzambi muambe ne: katuena ne bua kuenza, netuambe tshinyi?​— Tudi ne bua kuamba tshivua bapostolo bambile muakuidi munene ne: ‘Butudi nabu mbua kutumikila mêyi a Nzambi kumpala kua mêyi a bantu.’​—Bienzedi 5:29.