OBUMWE kigumire kumanya ou twine kworobera. Nyoko nari sho naabaasa kukugambira kugira eki wakora. Kwonka kandi omwegyesa w’eishomero nari omuporiisi naabaasa kukugambira ekirikutaana n’ekyo. Ekyo kyabaho, n’oha ou oraayorobere aharibo?—

Omu Shuura 7 ey’ekitabo eki, tushomire Abaefeso 6:1-3 omu Baibuli. Nihagira ngu abaana baine kworobera abazaire baabo. Ekyahandiikirwe ekyo nikigira kiti: ‘Mworobere abazaire baanyu omuri Mukama.’ Noomanya eki kirikumanyisa kuba “omuri Mukama.”?— Abazaire abari omuri Mukama nibeegyesa abaana baabo kworobera ebiragiro bya Ruhanga.

Kwonka abantu bakuru abamwe tibarikwikiririza omuri Yehova. Mbwenu shi, omwe aharibo ku yaakukugira ngu kihikire kwiba ebigyezo ah’eishomero nari okwiha ekintu omu duuka otashashwire? Mbwenu shi nikiba kihikire omwana kwiba?—

Ijuka, eizooba rimwe omugabe Nebukadeneeza akaragiira buri muntu kwinamira ekishushani ky’ezaabu eki yaakozire. Kwonka Seduraaka, Mesaaki na Abedeneego tibarakinamiire. Noomanya ahabw’enki?— N’ahabw’okugira ngu Baibuli neegira ngu abantu baine kuramya Yehova wenka.​—Okuruga 20:3; Matayo 4:10.

Yesu aherize kufa, entumwa ze zikatwarwa omu Ishengyero eryabaire riri eicwero ry’emanja erikuru ry’ediini ery’Abayudaaya. Omunyamurwa Omukuru Kayaafa yaabagira ati: “Titurabeehanangiririize kimwe kutagaruka kwegyesa omu iziina eryo? Mbwenu reeba mwijwize Yerusaalemu okwegyesa kwanyu.” Ahabw’enki  entumwa zitarorobaire abakuru b’omu Ishengyero?— Petero, arikujwekyera entumwa ezindi, akagarukamu Kayaafa ati: “Tushemereire kworobera Ruhanga okukira abantu.”​—Ebyakozirwe 5:27-29.

Omu bwire obwo, abeebembezi b’ediini y’Abayudaaya bakaba baine obushoboorozi bwingi aha bantu. Kwonka, eihanga ryabo rikaba niritegyekwa Abarooma. Omwebembezi wa gavumenti egyo akaba naayetwa Kaisaari. N’obu Abayudaaya baraabe baabaire batarikwenda ngu Kaisaari abategyekye, gavumenti y’Abarooma ekakorera abantu ebirungi bingi. Kandi n’omu bwire obu zaagavumenti nazo nizikorera abantu ebirungi. Noomanya bimwe aharibyo?—

Zaagavumenti nizikora enguuto kandi nizishashura abaporiisi n’abarikuraaza omuriro okubaasa kuturinda. Nizibaasa n’okushashurira abaana omu mashomero kandi zihwere n’abakuzire. Gavumenti neekoresa esente kukora ebintu ebyo. Noomanya ahu gavumenti erikwiha esente ezo?— Niziruga omu bantu. Esente ezi abantu barikuha gavumenti nizeetwa omushoro.

Obu Omwegyesa Mukuru yaabaire ari omu nsi, Abayudaaya baingi bakaba batarikwenda kuha gavumenti y’Abarooma omushoro. Eizooba  rimwe omunyamurwa akoohereza abantu kubuuza Yesu ekibuuzo okwenda kumutega. Bakamubuuza bati: ‘Twine kuha Kaisaari omushoro nari ngaaha?’ Bakamubuuza batyo kumutega. Yesu kuri yaabagizire ngu, ‘Eego, mwine kuha omushoro,’ Abayudaaya baingi bakaba batarikwija kukunda eki yaagamba. Kwonka nabwo Yesu tarabagizire ngu, ‘ngaaha, mutaha omushoro.’ Ekyo kikaabaire kigwire.

Mbwenu shi, Yesu akakora ki? Akabagira ati: ‘Muunyorekye ekinushu.’ Ku baakimuhaire, Yesu yaababuuza ati: ‘Ekishushani n’eiziina ebihandiikirweho n’eby’oha?’ Abashaija baagira bati: “N’ebya Kaisaari.” Yaabagira ati: “Mbwenu nu ebya Kaisaari mubihe Kaisaari, n’ebya Ruhanga mubihe Ruhanga.”​—Luka 20:19-26.

N’ahabw’ekyo, tihariho n’omwe owaabaire naabaasa kuhakanisa ebigambo ebyo. Kaisaari yaaba naakorera abantu ebintu, nikiba kihikire kukoresa esente ezi akozire kumushashura ahabw’ebintu ebyo. Omu muringo ogwo, Yesu akooreka ngu kihikire kuha omushoro gavumenti ahabw’ebintu ebi turikutunga.

 Hati, noobaasa kuba otakahikize emyaka y’okuha omushoro. Kwonka hariho eki oine kuha gavumenti. Nookimanya?— Okworobera ebiragiro bya gavumenti. Baibuli neegira eti: ‘Mworobere abarikutegyeka.’ Abo abarikutegyeka n’abo abaine obushoboorozi omuri gavumenti. N’ahabw’ekyo, Ruhanga niwe arikugira ngu tworobere ebiragiro bya gavumenti.​—Abarooma 13:1, 2.

Nihabaasa kuba hariho ekiragiro ekirikuzibira okunaganaga empapura nari ebisasiro omu nguuto. Mbwenu shi ohikire kworobera ekiragiro ekyo?— Eego, Ruhanga naayenda ngu okyorobere. Mbwenu shi oshemereire kworobera n’abaporiisi?— Gavumenti neeshashura abaporiisi kurinda abantu. Okuborobera nikishushana n’okworobera gavumenti.

Mbwenu waaba nooza kucwekanisa oruguuto kandi omuporiisi akagira ati: “Ba orekire!” okaakora ki?— Abandi baafa kwiruka kucwekanisa oruguuto, naiwe oshemereire kucwekanisa?— Oine kutegyereza, n’obu waakuba waaguma wenka. Ruhanga naakugambira kworoba.

Nihabaasa kuba hariho oburemeezi omu kicweka, kandi omuporiisi agire ati: “Mutaza aha nguuto. Mutaza aheeru.” Kwonka noobaasa kuhurira orwari oyebuuze ekiriyo nikibaho. Kwonka shi oshemereire kuza aheeru kureeba ekyabayo?— Okwo shi nikuba kuri okworobera ‘abarikutegyeka’?—

Omu myanya mingi, zaagavumenti nizombeka amashomero, kandi zishashura abashomesa. Mbwenu shi nooteekateeka ngu Ruhanga naayenda oyorobere omushomesa?— Kiteekateekeho. Gavumenti neeshashura abashomesa kushomesa, nk’oku erikushashura abaporiisi kurinda abantu. N’ahabw’ekyo, okworobera omuporiisi nari omushomesa nooba ori nk’orikworobera gavumenti.

Kwonka shi omushomesa ku yaakukugira ngu oine kuramya ekishushani? Aho okaakora ki?— Abaheburaayo bashatu tibarainamiire  kishushani, n’obu omugabe Nebukadeneeza araabe yaabagambiire kukiinamira. Noijuka ahabw’enki?— N’ahabw’okugira ngu bakaba batarikwenda kugomera Ruhanga.

Omuhandiiki w’ebyafaayo orikwetwa William Durant akahandiika aha bikwatiraine n’Abakristaayo aba ira arikugira ngu bakaba ‘batarikuha Kaisaari ekitiinisa ekirengyesereize.’ Ekitiinisa nk’ekyo kikaba kiine kuheebwa Yehova. N’ahabw’ekyo ijuka ngu Ruhanga aine kuba ow’okubanza omu magara gaitu.

Nitworobera gavumenti ahabw’okuba Ruhanga naayenda ngu tukikore. Kwonka shi ku twakugambirwa kukora ekintu eki Ruhanga arikugira ngu tutakora, twine kugamba ki?— Twine kugamba nk’eki entumwa zaagambiire omunyamurwa omukuru: “Tushemereire kworobera Ruhanga okukira abantu.”​—Ebyakozirwe 5:29.