TIN biaha ta difísil pa bo sa ta ken bo mester obedesé. Kisas bo mama òf bo tata ta bisa bo hasi un kos, ma bo maestro di skol òf un polis ta bisa bo hasi un otro kos. Si un kos asina pasa, kua di nan lo bo obedesé?—

Mas dilanti den e buki aki, na Kapítulo 7, nos a lesa Efesionan 6:1-3 for di Beibel. Ei tin skirbí ku yunan mester tende di nan mama ku nan tata. E teksto ta bisa: “Obedesé boso mayornan den Señor.” Bo sa kiko kier men “den Señor”?— Mayornan den Señor ta siña nan yunan obedesé e leinan di Dios.

Pero tin hende grandi ku no ta kere den Yehova. Kiko bo mester hasi antó, si un di nan bisa bo ku no ta nada pa ‘kijk af’ ora bo tin prufwèrk na skol, òf kohe kos den tienda sin paga? Esei kier men ku mucha tin mag di ‘kijk af’ òf hòrta?—

Kòrda ku un biaha Rei Nabukodonosor a manda tur hende bùig pa e imágen di oro ku el a traha. Pero Sadrak, Mesak ku Abed-nego a nenga di bùig. Bo sa dikon?— Dor ku Beibel ta bisa ku ta Yehova so hende mester adorá.—Eksodo 20:3; Mateo 4:10.

Despues ku Hesus a muri, hende a hiba su apòstelnan dilanti Sanedrin, e korte religioso mas importante di e hudiunan. Sumo Saserdote Kaifas a bisa nan: “Nos a taha boso estriktamente pa no sigui siña den e nòmber [di Hesus], i mira, boso a yena Yerusalèm ku boso siñansa.” Dikon e apòstelnan no a  obedesé Sanedrin?— Pedro a kontestá Kaifas na nòmber di tur e apòstelnan. El a bis’é: “Nos mester obedesé Dios mas ku hende.”—Echonan 5:27-29.

E tempu ei, e lidernan religioso di e hudiunan tabatin hopi poder. Pero ta gobièrnu romano tabata manda den nan pais. Esun na kabes di e gobièrnu ei tabata yama Cesar. E hudiunan no tabata gusta pa Cesar manda riba nan, pero e gobièrnu romano a hasi hopi kos bon pa nan pueblo. E gobièrnunan ku tin awe tambe ta hasi kos bon pa nan siudadanonan. Bo sa kiko asina nan ta hasi?—

Gobièrnu ta traha kaminda pa nos kore ariba, i nan ta paga polis i bombero pa nan protehá nos. Tin pais kaminda ku gobièrnu ta pèrkurá skol pa mucha i dòkter ku remedi pa hende grandi tambe. E kosnan aki ta kosta gobièrnu plaka. Bo sa di unda gobièrnu ta haña plaka?— For di pueblo. E plaka ku hende ta paga gobièrnu yama belasting.

Tempu ku e Gran Maestro tabata biba na tera, hopi hudiu no kier a paga belasting na e gobièrnu romano. P’esei, un dia e  saserdotenan a paga un par di hende pa nan bai hasi Hesus un pregunta, pa purba hink’é den problema. Loke nan a puntr’é ta esaki: ‘Nos tin ku paga Cesar belasting òf nò?’ Ta pa purba nèk Hesus nan a puntr’é e kos ei. Si Hesus a kontestá: ‘Sí, boso tin ku paga belasting,’ hopi hudiu lo no a keda kontentu ku loke el a bisa. Pero Hesus no por a bisa: ‘Nò, boso no tin nodi paga belasting,’ pasobra esei no ta bèrdat.

Kiko Hesus a hasi antó? Wèl, el a bisa: ‘Mustra mi un moneda.’ Ora nan a trese unu p’e, Hesus a puntra nan: ‘Ken su kara i nòmber ta riba e moneda?’ E hòmbernan a bisa: “Di Cesar.” E ora ei Hesus a bisa: “Anto duna Cesar loke ta di Cesar, i Dios loke ta di Dios.”—Lukas 20:19-26.

Wèl, niun hende no por a bisa nada malu di e kos ku el a kontestá. Si Cesar ta hasi kos pa nos, anto ta klaru ku nos por usa e sèn ku Cesar a traha, pa pag’é pa loke el a hasi pa nos. Asina Hesus a mustra ku ta bon pa paga gobièrnu belasting pa e kosnan ku nan ta hasi pa nos.

 Awor, kisas bo ta muchu chikitu ainda pa paga belasting. Pero tin un otro kos ku gobièrnu mester haña for di bo. Bo sa ta kiko?— Obedensia na e leinan di gobièrnu. Beibel ta bisa: ‘Obedesé e outoridatnan ku ta goberná.’ E outoridatnan ku e ta papia di dje ta e hendenan ku ta na poder den gobièrnu. Kier men, ta Dios mes ta bisa nos ku nos mester obedesé lei di gobièrnu.—Romanonan 13:1, 2.

Kisas tin un lei ku ta bisa ku bo no mag tira papel ni otro kos riba kaya. Bo mester obedesé e lei ei?— Sí, Dios ke pa bo obedes’é. Bo mester obedesé polis tambe?— Ta gobièrnu ta paga polis pa nan protehá hende. Ora bo obedesé nan, ta gobièrnu bo ta obedesé.

P’esei, si bo ta bai krusa kaya, anto un polis bisa bo “Warda!,” kiko bo mester hasi?— Si otro hende kore krusa tòg, kiko abo mester hasi?— Bo mester warda, asta si ta abo so ta keda para. Dios ta bisa bo ku bo mester obedesé.

Si tin problema den bo bario, polis lo por bisa: “Keda den kas. No bai riba kaya.” Pero kisas bo ta tende hende ta grita, anto bo ta haña gana di sa ta kiko ta pasa. Bo mester bai wak pafó?— Si bo hasié tòg, bo a obedesé “e outoridatnan ku ta goberná”?—

Na hopi lugá, gobièrnu ta traha skol i paga maestro di skol tambe. Awèl, bo ta kere ku Dios ke pa bo obedesé bo maestro?— Pensa un ratu. Ta gobièrnu ta paga bo maestro pa e duna lès, meskos ku e ta paga polis pa protehá hende. P’esei, ora bo obedesé sea polis òf un maestro, ta gobièrnu bo ta obedesé.

Pero kiko awor si un maestro bisa bo ku bo mester hasi un akto di adorashon na un imágen òf un kos asina? Kiko bo ta  hasi e ora ei?— E tres hebreonan no a bùig pa e imágen, ni ora Rei Nabukodonosor a manda nan hasi esei. Bo ta kòrda dikon?— Pasobra nan no kier a desobedesé Dios.

Un mener ku yama Will Durant, ku ta skirbi tokante historia, a skirbi tokante e promé kristiannan, anto el a bisa ku ‘nan lealtat prinsipal no tabata na Cesar.’ Asina mes. Nan tabata mas leal na Yehova ku na kualkier otro kos! Awèl, kòrda ku ta Dios mester ta na promé lugá den nos bida.

Nos ta obedesé gobièrnu pasobra Dios ke pa nos obedesé nan. Pero si nan bisa nos hasi un kos ku Dios a bisa nos no hasi, kiko nos mester bisa?— Nos mester bisa meskos ku e apòstelnan a bisa e sumo saserdote: “Nos mester obedesé Dios mas ku hende.”—Echonan 5:29.