MAYNINQA manan yachanchischu pitan kasukunanchis kasqanta. Yaqapaschá papayki otaq mamayki imatapas kamachisunki. Escuelaman riqtiykitaq profesor otaq policía jujta kamachisunki. ¿Imatan ruwawaq chhaynapi tarikuspa?...

Qanchis capitulopin leeranchis Efesios 6:1-3 textota. Chaypin yacharanchis llapa wawakuna tayta-mamankuta kasukunanku kasqanta. Qallariypin nin: “Señorpa munasqanman jina”, nispa. ¿Imaraykun chayta niran?... Chaytaqa nisharan ‘Señorpi’ iñiq llapa tayta-mamakuna wawankuman Jehová Diosmanta yachachinanku kasqantan.

Ichaqa askha wayna-sipaskunan mana Jehová Diospi iñinkuchu. Paykunan nisunkikuman: “Copiakuy examenta” otaq “tiendamanta ch’inlla imatapas apakuy”, nispa. ¿Allinchu kanman chaykunata ruway?...

Rey Nabucodonosor llapa runakunata kamachiran qorimanta idolota adoranankupaq, ¿yuyashankichu? Ichaqa Sadracpas, Mesacpas, Abednegopas manan adorarankuchu chay idolota. ¿Imarayku?... Jehová Diosmi paykunata kamachiran payllata adoranankupaq (Éxodo 20:3; Mateo 4:10).

Jesuspa wañupusqan qhepamanmi enemigonkuna Sanedrín nisqaman apostolkunata aparanku. Chaypiqa religionpi jefekunan juñukuqku. Sacerdotekunaq jefen Caifasmi niran: ‘¿Manachu kamachiraykichis amaña Jesuspa sutinpi yachachinaykichispaq? Chhaynaqa, ¿imaraykutaq Jerusalén llaqtapi  yachachishankichis?’, nispa. ¿Imaraykun apostolkuna mana kasurankuchu?... Pedron paykunata niran: “Noqaykuqa kamachikuq Diostan ñaupaqtaqa kasukunayku, runakunata kasukunaykumantaqa”, nispa (Hechos 5:27-29).

Chay tiempopi sacerdotekunaqa munayniyoqmi karanku. Ichaqa Roma reymi llaqtankuta kamachisharan. Chaymi paykunaqa Roma nacionpaq phiñasqa kasharanku. Chaywanpas reyqa allinkunatan llaqtankupaq ruwaran. Kay tiempopi kamachikuqkunapas allinkunatan llaqtanchispaq ruwanku. ¿Imakunatan ruwanku?...

Paykunan carreterakunata ruwachinku viajanapaq. Policiakunaman bomberokunaman iman paganku cuidawananchispaq. Escuelakunatan ruwachinku wawakuna estudiananpaq. Chaymantapas hospitalkunatan ruwachinku onqosqakunapaq. Chaykunaqa askha qolqepaqmi. ¿Maymantan gobiernokuna qolqeta orqonku?... Llaqtapi tiyaq runakunan qonku. Chaytan nikun: “Impuesto”, nispa.

Jesuspa tiemponpiqa askha judiokunan mana munarankuchu impuesto pagayta. Juj kutinmi sacerdotekuna juj runakunata  Jesusman kacharanku rimasqanpi pantachinankupaq. Chay runakunan tapuranku: ‘¿Allinchu Roma reyman impuesto pagay, icha manachu?’, nispa. Sichus Jesús “arí” ninman chayqa, llapa judiokunan phiñakunkuman karan. “Manan” niqtintaq gobiernoq contranpi rimashanman karan.

¿Ima nispan Jesús paykunaman kutichiran? Niranmi: ‘Qhawachiwaychis juj qolqeta. ¿Piqpa uyanmi kaypi kashan? ¿Piqpan kay sutipas?’, nispa. Paykunataq niranku: “Roma reypan”, nispa. Jinan Jesusqa niran: ‘Chhaynaqa, Roma reypa kaqta Roma reyman qopuychis, Diospa kaqtataq Diosman qopuychis’, nispa (Lucas 20:19-26).

Chayta niqtinmi tapuqnin runakuna ch’in kapuranku. Reymi chay qolqetapas llaqtapaq tukuy imatapas ruwachiran. Chaymi reyman impuestota pagananku karan. Kunanpas tukuy ima chaskisqanchismantan impuestota pagananchis.

Qanpas kuraq runa kaspan impuestota paganayki kanqa. Ichaqa, ¿imaynatan kunan rikuchiwaq autoridadkuna  kasukusqaykita?... Leykunata kasukuspa. Biblian nin: ‘Autoridadkunataqa lliu runan kasukunan’, nispa. Chay autoridadkunaqa atiyniyoqmi kanku leykunata churanankupaq. Chaymi Diospuni kamachiwanchis leykunata kasukunapaq (Romanos 13:1, 2).

Yaqapaschá tiyasqayki llaqtaykipi autoridadkuna kamachinku q’opata callekunapi ama wijch’unapaq. ¿Kasukunaykichu?... Arí, kasukunaykin. Policiakunatari, ¿kasukunaykichu?... Arí, paykunatapas kasukunaykin. Paykunataqa autoridadkunan churan cuidawananchispaq. Chaymi paykunata kasukuspaqa autoridadkunata kasukushanchis.

Sichus pistata pasanayki kashaqtin juj policía nisunki: “Chayllapi sayay”, nispa chayri, ¿imatan ruwanayki?... Yaqapaschá wakinqa mana kasukuspa phawaylla pasanqaku. ¿Chayta rikuspachu qanpas phawaylla pasanayki?... Manan ¿riki? Sapallayki kashawaq chaypas, policiatan kasukunayki. Chaytan Jehová Diospas munan ruwanaykita.

Yaqapaschá tiyasqayki callepi imapas pasaqtin juj policía nisunkichis: “Wasi ukhullapi kaychis, aman lloqsimunkichischu”, nispa. Ichaqa runakunaq qaparisqanta uyarispan niwaq: “Imachá pasashan, juj ratolla lloqsirusaq”, nispa. ¿Allintachu chayta ruwashawaq?... Sichus juj ratollapas lloqsiruwaq chayri, ¿kasukushawaqchu?...

Wakin llaqtakunapiqa gobiernokunan escuelakunata ruwachin profesorkunatapas churan. ¿Kasukunachu profesorkunata?... Paykunamanqa gobiernon pagan yachachisqankumanta, imaynan policiamanpas pagan jinata. Chaymi policiakunata profesorkunatapas kasukunanchis. Chaypin rikuchisun autoridadkuna kasukusqanchista.

 Sichus escuelaykipi juj profesor kamachisunkiman juj idolota adoranaykipaq chayri, ¿kasukunaykichu?... Yuyariy kinsa waynakunata, rey Nabucodonosorña kamachiran juj idolota adoranankupaq chaypas, paykunaqa manan kasurankuchu. ¿Imarayku?... Diosta kasukusqankurayku.

Historiamanta willaq runan nin: ‘Ñaupa tiempopi cristianokunaqa manan tukuypichu reyta kasukuranku’, nispa (Will Durant). Paykunaqa Diosllatan tukuypi kasukuranku. Chaytan noqanchispas ruwananchis.

Diosta kasukusqanchisraykun autoridadkunata kasukunanchis. Mana allinkunata ruwanapaq kamachiwasun chayri, ¿ima nisunmi?... Apostolkuna jinan ninanchis: “Diostan ñaupaqtaqa kasukunayku”, nispa (Hechos 5:29).