SON leisi a muilek fu sabi na suma yu musu gi yesi. Yu mama noso papa kan taigi yu wan sani. Ma baka dati, wan skoromeester noso wan skowtu kan taigi yu fu du wan heri tra sani. Efu dati pasa, dan na suma yu o gi yesi?—

Na ini kapitel 7 fu a buku disi, wi ben leisi Efeisesma 6:1-3 na ini a Bijbel. Drape skrifi taki pikin musu gi yesi na den papa nanga mama. A tekst e taki so: „Gi yesi na un papa nanga mama na ini wánfasi nanga Masra.” Yu sabi san a wani taki fu de „na ini wánfasi nanga Masra”?— Papa nanga mama di de na ini wánfasi nanga Masra e leri den pikin fu den fu gi yesi na den wet fu Gado.

Ma sonwan fu den moro owru sma no e bribi na ini Yehovah. Sobun, san yu o du te wan fu den e taki dati a bun fu spiek te yu e meki repetisi na skoro, noso fu fufuru wan sani na ini wan wenkri? A bun te wan pikin e spiek, noso e fufuru?—

Memre taki wan leisi Kownu Nebukadnesar ben gi ala sma a komando fu boigi gi a gowtu popki di a ben meki. Ma Sadrak, Meisak, nanga Abedneikow no ben wani boigi. Yu sabi fu san ede?— Fu di Bijbel e taki dati sma musu anbegi Yehovah wawan.​—Exodus 20:3; Mateyus 4:10.

Baka di Yesus dede, dan sma tyari den apostel fu en kon na fesi a Sanhedrin, a presi pe den Dyu kerki fesiman ben e krutu den afersi fu a pipel. Granpriester Kayafas ben taki: ’Wi taigi  unu krin taki un no musu gi sma leri moro na ini a nen fu Yesus, ma toku unu meki heri Yerusalem kon sabi a leri fu unu.’ Fu san ede den apostel no ben gi yesi na a Sanhedrin?— Petrus di ben e taki gi ala den apostel, piki Kayafas: „Wi musu gi yesi na Gado leki tiriman, moro leki na libisma.”​—Tori fu den Apostel 5:27-29.

Na a ten dati, den kerki fesiman fu den Dyu ben abi bun furu makti. Ma a kondre fu den ben de na ondro a tiri fu Rome. A fesiman fu a tirimakti dati ben nen Caesar. Aladi den Dyu no ben wani a Caesar fu tiri den, toku a tirimakti fu Rome ben du furu bun sani gi a pipel. Èn den tirimakti na ini a ten disi e du bun sani tu gi den borgu fu den. Yu sabi san na wan tu fu den sani disi?—

Den tirimakti e meki strati so taki sma kan go na tra presi, èn den e pai skowtu nanga brandweerman fu sorgu taki ogri no e miti wi. Den kan sorgu sosrefi taki yonguwan e kisi skoro, èn taki owruwan e kisi datrayepi. Ma a tirimakti abi moni fanowdu fu man du den sani disi. Yu sabi pe a tirimakti e feni a moni?—  Den e kisi en fu sma. A moni di sma e pai a tirimakti na lantimoni.

Di a Bigi Leriman ben e libi na grontapu, dan furu Dyu no ben wani pai lantimoni na a tirimakti fu Rome. Sobun, wan dei den priester yuru wan tu man fu aksi Yesus wan sani di ben musu tyari en kon na ini problema. Na aksi ben de: ’A tru taki wi musu pai Caesar lantimoni?’ Den ben wani kisi Yesus nanga na aksi disi. Efu Yesus ben o piki: ’Iya, yu musu pai lantimoni’, dan furu fu den Dyu no ben o lobi san a ben taki. Ma Yesus no ben man taki: ’Nôno, yu no abi fu pai lantimoni.’ A no ben o bun fu taki dati.

Sobun, san Yesus du? We, a taki: ’Sori mi wan sensi.’ Di den tyari wan kon gi Yesus, dan a aksi den: ’Suma nen nanga prenki de na en tapu?’ Den man taki: „A di fu Caesar.” Sobun Yesus taki: „We, dan pai Caesar den sani di de fu Caesar, ma pai Gado den sani di de fu Gado.”​—Lukas 20:19-26.

We, nowan sma ben kan taki dati a piki dati no ben bun. Efu Caesar e du sani gi sma, dan a bun srefisrefi taki den e gebroiki  a moni di Caesar meki, fu pai en gi den sani dati. Sobun, na a fasi disi, Yesus ben sori taki a bun fu pai lantimoni gi den sani di wi e kisi fu a tirimakti.

We, kande yu no owru nofo fu pai lantimoni. Ma wan sani de di yu musu gi a tirimakti. Yu sabi san na dati?— Yu musu gi yesi na den wet fu a tirimakti. Bijbel e taki: ’Gi yesi na den hei tiriman.’ Den tiriman disi na den sma di abi a makti fu tiri a kondre. Sobun, Gado na a sma di e taki dati wi musu gi yesi na den wet fu a tirimakti.​—Romesma 13:1, 2.

Kande wan wet de di e taki dati wi no musu trowe papira noso tra sani na strati. Yu musu gi yesi na a wet dati?— Iya, Gado wani taki yu musu gi yesi na a wet dati. Yu musu gi yesi tu na skowtu?— A tirimakti e pai skowtu fu sorgu taki ogri no e miti sma. Te yu e gi yesi na den, dan na so fasi yu e gi yesi na a tirimakti.

Sobun, te yu o abra wan strati èn wan skowtu e taki: „Wakti!”, dan san yu musu du?— Ma te trawan no e gi yesi, èn e lon go na abrasei, dan yu musu du dati tu?— Yu musu wakti, awansi yu na a wan-enkri sma di e wakti. Gado e taki dati yu musu gi yesi.

Kande wan problema de na ini a birti, èn wan skowtu ben kan taki: „No go na strati. No go na dorosei.” Ma a kan taki yu e yere sma e bari èn yu e aksi yusrefi san e pasa. Yu musu go na dorosei fu luku?— Yu ben o gi yesi na ’den hei tiriman’ te yu e du dati?—

Na furu presi, tirimakti e bow skoro sosrefi, èn a e pai leriman. Sobun, yu denki taki Gado wani yu fu gi yesi na a skoromeester?— Denki a sani disi pikinso. A tirimakti e pai a skoromeester fu gi yu leri, neleki fa a e pai a skowtu fu sorgu taki ogri no e miti sma. Sobun, te yu e gi yesi na wan skowtu noso na wan skoromeester, dan na so fasi yu e gi yesi na a tirimakti.

 Ma kon meki wi taki dati wan skoromeester e taigi yu fu anbegi wan prenki noso wan popki. San yu ben o du dan?— Den dri Hebrewsma no ben boigi gi a popki. Den no ben du dati srefi di Kownu Nebukadnesar ben taigi den fu du so. Yu sabi ete fu san ede?— Fu di den no ben wani trangayesi Gado.

Wan historia skrifiman di nen Will Durant ben taki ’a Caesar no ben de a moro prenspari sma di den fosi Kresten ben de getrow na en’. Nôno, den ben de getrow na Yehovah! Sobun, memre taki Gado musu kisi a fosi presi na ini wi libi.

Wi e gi yesi na a tirimakti fu di dati na san Gado wani wi fu du. Ma efu sma e taigi wi fu du wan sani di Gado no feni bun, dan san wi musu taki?— Wi musu taki san den apostel ben taigi a granpriester: „Fu di Gado na Tiriman, meki wi musu gi yesi na en na presi fu gi yesi na libisma.”​—Tori fu den Apostel 5:29.