NGALETINYE TIKHATSI kulukhuni kubona kutsi ngubani lokufanele simlalele. Make nobe babe wakho angase akutjele kutsi wente lokutsite. Kodvwa thishela wakho nobe liphoyisa lingase likutjele kutsi wente intfo leyehlukile. Nangabe loko kwenteka, utawulalela bani?—

Ekucaleni kwalencwadzi, eSehlukweni 7, sifundze Efesu 6:1-3 eBhayibhelini. LomBhalo utjela bantfwana kutsi kufanele balalele batali babo. LomBhalo utsi: “Lalelani batali benu eNkhosini.” Ucabanga kutsi kusho kutsini kuba ‘seNkhosini’?— Batali labaseNkhosini bafundzisa bantfwababo kutsi balalele umtsetfo waNkulunkulu.

Kodvwa labanye bantfu labadzala abakholwa kuJehova. Ngako utawenta njani nangabe bakutjela kutsi kuyintfo lelungile kukopa nawubhala luhlolo esikolweni nobe kutsatsa intfo letsite esitolo ungakayibhadali? Ucabanga kutsi kufanele yini kutsi umntfwana akope nobe ebe lokutsite?—

Khumbula kutsi iNkhosi Nebukhadnezari yake yatjela bonkhe bantfu kutsi bakhotsamele sitfombe seligolide lebeyisibekile. Kodvwa boShadraki, Meshaki kanye na-Abednego abazange basikhotsamele. Uyati kutsi bentiwa yini?— Kungobe liBhayibheli litsi bantfu kufanele bakhonte Jehova kuphela.​—Eksodusi 20:3; Matewu 4:10.

Ngemuva kwekufa kwaJesu, baphostoli bakhe bayiswa eSanhedrini, lobekuyinkantolo lenkhulu yenkholo yemaJuda.  UmPhristi Lomkhulu Khayafase watsi: ‘Siniyalisise kahle kutsi ningachubeki nekufundzisa ngalelibito [laJesu], kodvwa asenibuke, senigcwalise iJerusalema ngalemfundziso yenu.’ Kungani labaphostoli bangazange bayilalele iSanhedrini?— Akhulumela bonkhe baphostoli, Phetro waphendvula Khayafase watsi: “Kufanele silalele Nkulunkulu njengobe angumbusi kunekutsi silalele bantfu.”​—Imisebenti 5:27-29.

Ngaleso sikhatsi, baholi benkholo yemaJuda bebanemandla latsite ekubusa. Nanobe kunjalo, live labo belibuswa nguhulumende wemaRoma. Umuntfu lonesikhundla lesikhulu kulohulumende bekunguKhesari. Ngisho nobe emaJuda abengafuni kutsi Khesari awabuse, hulumende wemaRoma bekentela bantfu tintfo letinyenti letinhle. Nalamuhla bohulumende batentela tintfo letinhle takhamuti tabo. Uyatati yini letinye taletintfo?—

Bohulumende bakha imigwaco yekuhamba baphindze babhadale emaphoyisa nebeticishamlilo kute basivikele. Bangaphindze balungiselele bantfwana kutsi batfole imfundvo futsi banakekele nemphilo yebantfu labakhulile. Hulumende kudzingeka abenemali kute akhone kwenta konkhe loko. Ucabanga kutsi hulumende uyitsatsaphi lemali? — Uyitsatsa kubantfu. Leyomali bantfu labayibhadala hulumende ibitwa ngekutsi ngumtselo.

Ngesikhatsi Umfundzisi Lomuhle Kakhulu alapha emhlabeni, emaJuda lamanyenti abengafuni kubhadala umtselo kuhulumende wemaRoma. Ngako ngalelinye lilanga baphristi bacasha lamanye emadvodza kutsi abute Jesu umbuto ngenjongo yekumfaka enkingeni. Lombuto bewutsi: ‘Kufanele yini sibhadale umtselo kuKhesari?’ Bambuta lombuto ngobe bebafuna kumlinga. Kube Jesu waphendvula watsi: ‘Yebo, kufanele nibhadale umtselo,’ emaJuda lamanyenti bewangeke akutsandze loko . Kodvwa Jesu abengeke atsi: ‘Cha, akukafaneli nibhadale umtselo.’ Bekutawuba yintfo lembi kusho njalo.

Ngako wenta njani Jesu? Watsi: ‘Aseningikhombise luhlavu lwemali.’ Ngesikhatsi lamadvodza aluletsa, wawabuta: ‘Sabani lesitfombe naleligama lelilapha?’ Lamadvodza atsi: “KwaKhesari.” Ngako Jesu watsi: “Ngako-ke, nikani Khesari lokukwakhe, kodvwa ninike Nkulunkulu lokukwakhe.”​—Lukha 20:19-26.

Ngako kute umuntfu lowatfola liphutsa kulemphendvulo. Nangabe Khesari entela bantfu tintfo, kufanele kutsi asebentise leyo mali  layentile kute abhadalele loko labentela kona. Ngako ngaleyondlela, Jesu waveta kutsi kubalulekile kubhadala kuhulumende umtselo wato tonkhe letintfo lesititfolako.

Kungenteka kutsi nyalo usengakabi mdzala kutsi ungabhadala umtselo. Kodvwa kukhona intfo longayentela hulumende. Ucabanga kutsi yini leyo?— Kufanele ulalele imitsetfo yahulumende. LiBhayibheli litsi: ‘Asitfobele tiphatsimandla.’ Tiphatsimandla ngulabo lababusako kuhulumende. Ngako nguNkulunkulu lotsi kufanele silalele imitsetfo yahulumende.​—Roma 13:1, 2.

Kungenteka kutsi kunemtsetfo lotsi ungalahli emaphepha nobe letinye tintfo emgwacweni. Kufanele yini uwulalele?— Nkulunkulu ufuna kutsi uwulalele. Kufanele yini uwalalele nemaphoyisa?— Hulumende uyawabhadala kute avikele bantfu. Nasiwalalela kutawufanana nekutsi silalela hulumende.

Ase sitsi ufuna kuwela umgwaco, bese kuchamuka liphoyisa litsi: “Mani!” Yini lokufanele uyente?— Nangabe labanye bewela, kufanele ubalandzele yini?— Kufanele ulindze ngisho nobe kunguwe kuphela lomile. Nkulunkulu utsi lalela.

Kungenteka kutsi kunenkinga endzaweni yakini futsi emaphoyisa angase atsi: “Hlalani endlini ningaphumeli ngephandle.” Kodvwa ungase uve bantfu bamemeta futsi utibute kutsi kwentekani. Kufanele yini uphumele ngephandle kuyobona kutsi kwentekani?— Nawenta njalo utawube ‘uyatilalela yini tiphatsimandla’?—

Etindzaweni letinyenti, bohulumende baphindze bakhe tikolwa futsi babhadale bothishela. Ucabanga kutsi Nkulunkulu uyafuna yini ulalele bothishela?— Ase ucabange ngaloko. Hulumende uyababhadala kuze bafundzise, njengobe abhadala nemaphoyisa kutsi avikele bantfu. Ngako kulalela liphoyisa nobe thishela kufanana nekulalela hulumende.

 Kutsiwani nangabe thishela atsi kufanele ukhonte sitfombe? Utawenta njani lapho?— EmaHebheru lamatsatfu awazange asikhotsamele sitfombe, ngisho nobe iNkhosi Nebukhadnezari iwatjela kutsi ente njalo. Usakhumbula kutsi lamaHebheru akakwentanga leni loko?— Kungenca yekutsi abefuna kulalela Nkulunkulu.

Umbhali wemlandvo Will Durant wabhala ngemaKhristu angesikhatsi sebaphostoli, futsi watsi ‘bewangakatinikeli ngalokuphelele [nobe acotfo] kuKhesari.’ Kodvwa, bewatinikele ngalokuphelele kuJehova. Ngako khumbula kutsi Nkulunkulu kufanele ete kucala ekuphileni kwetfu.

Silalela hulumende ngobe nguloko Nkulunkulu lafuna sikwente. Kodvwa nangabe sitjelwa kutsi sente intfo Nkulunkulu latsi singayenti, kufanele sitsini?— Kufanele sisho loko baphostoli labakusho kumphristi lomkhulu: “Kufanele silalele Nkulunkulu njengobe angumbusi kunekutsi silalele bantfu.”​—Imisebenti 5:29.