I NISI taimi se mea faigata ke iloa me ko oi e ‵tau o faka‵logo tatou ki ei. E mafai o fai atu tou mātua io me ko tou tamana ke fai ne koe se mea. Kae e mafai foki o fai ne se faiakoga io me se pulisimani ke fai ne koe se mea telā e ‵kese. Kafai e tupu te mea tenā, ko oi ka fakalogo koe ki ei?—

I te kamataga o te tusi tenei, i te Mataupu e 7, e fai‵tau tatou ki te Efeso 6:1-3 mai i te Tusi Tapu. I konā e fai mai i ei me e ‵tau mo tama‵liki o faka‵logo ki olotou mātua. E fai mai te tusi siki: “Ke faka‵logo koutou ki otou mātua i te ‵kau fakatasi mo te Aliki.” E iloa ne koe me se a te uiga o te “‵kau fakatasi mo te Aliki”?— Mātua kolā e ‵kau fakatasi mo te Aliki e akoako ne latou olotou tama‵liki ke faka‵logo ki tulafono a te Atua.

Kae e se tali‵tonu a nisi tino ma‵tua ki a Ieova. Tela la, e a māfai e fai atu se tino tokotasi i a latou me se mea ‵lei ke kaisoa tali i te taimi o te sukega i te akoga io me ke puke se mea mai i se sitoa e aunoa mo te ‵togi? E mata, se mea ‵lei mō se tamaliki ke kaisoa?—

Masaua, i te taimi e tasi ne fakatonu atu te Tupu ko Nepukanesa ki tino katoa ke ifo o tapuaki atu ki te tupua aulo telā ne fakatu aka ne ia. Kae ne seki ifo atu ki ei a Satalaka, Mesako, mo Apeteniko. E iloa ne koe me kaia?— Ona ko te mea e fai mai te Tusi Tapu me e ‵tau fua mo tino o tapuaki atu ki a Ieova.—Esoto 20:3; Mataio 4:10.

Mai tua o te mate o Iesu, ne avatu ana apositolo ki mua o te Sanetulini, ko te fono fakamasino fakalotu a te kau Iutaia. Ne fai atu a te Faitaulaga Sili ko Kaiafa: “Ne fakatonu atu matou ke se toe  fakavae otou akoakoga ki luga i te igoa tenei, kae kiloke! ko oti ne faka‵fonu ne koutou a Ielusalema ki otou akoakoga.” Kaia ne seki faka‵logo ei a te kau apositolo ki te Sanetulini?— Ne tali atu a Petelu, telā ne sui ne ia a apositolo katoa, ki a Kaiafa, penei: “E ‵tau mo matou o faka‵logo ki te Atua e pelā me ko te pule i lō tāgata.”—Galuega 5:27-29.

I aso konā, ne lasi ‵ki te fakamalosiga a takitaki lotu o te kau Iutaia. Kae ne nofo atu te lotou fenua mai lalo i te pulega a te kau Loma. A te ulu o te malo tenā ko Kaisala. E tiga eiloa e se ma‵nako a te kau Iutaia ke pule atu a Kaisala ki a latou, ne uke ‵ki eiloa a mea ‵lei ne fai ne te pulega a Loma mō tino. Kae e uke foki a mea ‵lei e fai ne malo i aso nei mō olotou tino. E iloa ne koe me ne a nisi mea ‵lei konei?—

E faite ne malo a auala ke faima‵laga atu i ei kae ‵togi ne latou a pulisimani mo tāgata ta afi ke puipui ei tatou. E mafai foki o fakatoka ne latou a akoga mō tama‵liki mo fa‵kaimasaki mō tino ma‵tua. E ‵togi ‵mafa ki malo ke fai ne latou a mea konei. E iloa ne koe te koga e maua mai ei ne malo a tupe?— Mai i tino. A tupe kolā e ‵togi atu ne tino ki te malo e taku ki lafoga.

 I te taimi ne ola ei te Faiakoga Sili i te lalolagi, e tokouke a tino Iutaia ne seki ma‵nako ke ‵togi atu olotou lafoga ki te malo o Loma. Tela la, i te aso e tasi, ne ‵togi ei ne faitaulaga a nisi tāgata ke ‵sili atu ki a Iesu se fesili ko te mea ke mafai o fakatogafiti ne latou a ia. Tenei la te fesili, ‘E mata, e ‵tau o ‵togi atu ne tatou a lafoga ki te Kaisala io me ikai?’ A te mea tenei se fesili fai togafiti. Kafai e fai atu a Iesu, ‘Ao, e ‵tau o ‵togi atu,’ ka se fia‵fia eiloa a tino Iutaia e tokouke ki a ia. Kae ne seki mafai o fai atu a Iesu, ‘Ikai, e se ‵tau o ‵togi atu a lafoga.’ Se mea ‵se ke fai atu penā.

Tela la, ne a mea ne fai ne Iesu? Ia, ne fai mai a ia: ‘Fakaasi mai ki a au se tenali.’ I te taimi ne avatu ei ne latou se mea e tasi ki a ia, ne fesili atu a Iesu ki a latou: ‘I oi te ata mo te igoa i ei?’ Ne fai atu a tāgata: “I o Kaisala.” Telā ne fai atu a Iesu: “Tela la, ke toe ‵togi atu a mea a Kaisala ki a Kaisala a ko mea a te Atua ki te Atua.”—Luka 20:19-26.

Ia, e seai eiloa se tino e mafai o maua ne ia se mea ‵se i te tali tenā. Kafai e fai ne te Kaisala a mea ‵lei mō tino, se mea ‵lei ke fakaaoga a tupe ne faite ne te Kaisala ke ‵togi atu ki a ia mō mea ne fai ne ia. Tela la, i te auala tenei, ne fakaasi atu ne Iesu me se mea ‵lei ke ‵togi atu a lafoga ki te malo mō mea e maua ne tatou.

 Kāti koi foliki nei koe ke ‵togi atu a lafoga. Kae e isi se mea e ‵tau o tuku atu ne koe ki te malo. E iloa ne koe me se a?— Ko te fakalogo ki tulafono a te malo. E fai mai te Tusi Tapu: ‘Ke faka‵logo ki pule o malo.’ A pule konei ko tino kolā e pule mai i te malo. Tela la, ko te Atua telā e fai mai me e ‵tau mo tatou o faka‵logo ki tulafono o te malo.—Loma 13:1, 2.

E mafai o isi se tulafono ke mo a ma ‵pei a pepa io me ko nisi mea aka i te auala. E mata, e ‵tau o fakalogo koe ki te tulafono tenā?— Ao, e manako te Atua ke fakalogo koe ki ei. E mata, e ‵tau o fakalogo foki koe ki pulisimani?— E ‵togi ne te malo a pulisimani ke puipui ei a tino. A te fakalogo ki a latou e ‵pau eiloa mo te fakalogo ki te malo.

Tela la, kafai e fanatu koe ki te suā feitu o te auala kae fai atu se pulisimani “Faka‵tali!” ne a au mea e ‵tau o fai?— Kafai e ‵tele atu a nisi tino ki te suā feitu, e a, e ‵tau foki mo koe o fai penā?— E ‵tau eiloa mo koe o faka‵tali, faitalia me ko koe fua tokotasi telā e faka‵tali. E fai atu te Atua ki a koe ke fakalogo.

E mafai o isi ne fakalavelave i te koga e nofo ei koe, kae e mafai o fai atu se pulisimani: “Faka‵mao mai i te auala. Sa fano ki tua.” Kae kāti e lagona ne koe a tino e paka‵laga kae mafaufau koe me se a te mea ko tupu. E mata, e ‵tau o fanatu koe ki tua ke onoono ki ei?— E mata, a te faiga penā ko te fakalogo ki “pule o malo”?—

I te ukega o koga, e faite foki ne malo a akoga, kae e ‵togi ne latou a faiakoga. Tela la, e mafaufau koe me e manako te Atua ke fakalogo koe ki te faiakoga?— Mafaufau e uiga ki ei. E ‵togi ne te malo a te faiakoga ke akoako atu, e pelā eiloa mo te ‵togi o pulisimani ke puipui a tino. Tela la, a te fakalogo ki te pulisimani io me ko te faiakoga e ‵pau eiloa mo te fakalogo ki te malo.

Kae e a māfai ko fai atu se faiakoga me e ‵tau o fai ne koe se mea telā e fai ei ke tapuaki atu ki se fakatusa? Ne a au mea ka fai?— Ne seki ifo atu a tamataene Epelu e tokotolu ki te fakatusa, faitalia eiloa me ne  fakatonu atu a te Tupu ko Nepukanesa ke fai latou penā. E masaua ne koe me kaia?— Ona ko te mea ne seki ma‵nako latou ke ‵teke atu ki te Atua.

Ne tusi mai se tagata tusitala mua ko Will Durant e uiga ki Kelisiano mua kae ne fai mai me i te ‘toe fakaasiga sili o te lotou fakamaoni [io me ko te, alofa fakamaoni] e se fakaasi atu ki te Kaisala.’ Kae e ‵tau o fakaasi atu ki a Ieova! Tela la, masaua me e ‵tau o fakamuamua a te Atua i ‵tou olaga.

E faka‵logo tatou ki malo ona ko te mea e manako a te Atua ke fai tatou penā. Kae kafai e fakatonu mai ke fai ne tatou se mea telā e fai mai te Atua me e se ‵tau o fai, ne a ‵tou pati e ‵tau o fai atu?— E ‵tau o fai atu ne tatou a pati a te kau apositolo kolā ne fai atu ki te faitaulaga sili: “E ‵tau mo matou o faka‵logo ki te Atua e pelā me ko te pule i lō tāgata.”—Galuega 5:29.