IN MONO imaro cito i ka kwero kwer?— Meno twero kelo yomcwiny madwong. Itamo ni Lapwony Madit-ti mito ni wacit i ka kwero kwer?— En bene ocito ka mo ma kitwero lwongone ni kwero kwer i kare ma ngat mo onongo tye ka nyom, dok lukwenane mukene bene guwoto kacel kwede. Jehovah obedo “Lubanga ma layom cwiny,” pi meno en bedo ki yomcwiny ka wacito i ka kwero kwer ma miyo wawinyo maber.—1 Temceo 1:11, NW; Jon 2:1-11.

Pot karatac 29 me buk man titiwa ni Jehovah opoko pii me Nam Makwar wek Luicarel gukat loka tungcel. Mono wi po ni ikwano lok meno?— Lacen dano guwero, gumyelo kun gipako Jehovah. Meno onongo rom ki kwero kwer. Dano onongo cwinygi yom matek, dok wangeyo ni Lubanga bene onongo cwinye yom.—Nia 15:1, 20, 21.

I kine ma romo mwaki 40 angec, Luicrael gucito i kwero kwer mo madit mukene. Ento jo ma olwongogi-ni onongo pe giworo Jehovah. Ki lok ada, jo meno onongo giryebbe i nyim lubange mukene dok onongo gidonyo i tim me buto ki jo ma pe gunyomme kwedgi. Mono itamo ni onongo pore me cito  i kwero kwer ma kit meno?— Jehovah cwinye ocwer omiyo opwodo Luicarel.—Wel 25:1-9; 1 Jo Korint 10:8.

Baibul bene loko i kom kwero nino me nywal aryo. Acel mono obedo kwero nino me nywal pa Lapwony Madit-ti?— Pe. Gin aryo-ni ducu gubedo kwero nino me nywal pa co ma onongo pe gitiyo pi Jehovah. Acel obedo kwero nino me nywal pa Kabaka Kerode Antipac. En onongo obedo laloc me distrik me Galilaya i kare ma Yecu okwo kunnu.

Kabaka Kerode otimo jami mapol maraco. En okwanyo dako pa ominne wek odok dakone. Nyinge onongo kilwongo ni Kerodia. Latic pa Lubanga Jon Labatija owaco bot Kerode ni timme-ni rac. Kerode pe omaro gin ma Jon owacce. Pi meno en oweko kitweyo Jon i buc.—Luka 3:19, 20.

I kare ma Jon onongo tye i buc, nino me kwero nywal pa Kerode oromo. Kerode oyubo kwer mo madit. En olwongo dano mapol ma pigi tego. Gucamo, gumato dok gubedo ki yomcwiny madwong. I ngeye nya pa Kerodia obino omyelo i nyimgi. Dano ducu cwinygi obedo yom i kit ma en omyelo kwede ma oweko Kabaka Kerode omito ni  emine mic mo mamwonya adada. En owacce ni: “Gin ducu ma ibilegga abimiyi, kadi bed nucu kerra.”

Ngo ma en openyo pire? Mono openyo pi cente? bongi mabeco? ot ma bedo mege? Anyaka meno onongo pe ngeyo gin ma myero epeny. Pi meno, en ocito bot mine Kerodia, ci openye ni: ‘Aleg gin ango?’

Omyero inge ni Kerodia onongo dag Jon Labatija matek. Pi meno en owaco bot nyare ni myero openy pi wi Jon Labatija. Nyako-ni odok cen bot kabaka ka owacce ni: “Amito imiya wi Jon Labatija i weer kombeddi.”

Kabaka Kerode onongo pe mito neko Jon pien onongo ngeyo ni en obedo laco ma kite ber. Ento Kerode onongo ocikke woko, dok en obedo kilworo i kom gin ma jo ma gitye i ka kwer meno gubitamo i kome ka ce eloko tamme. Pi meno en ocwalo laco mo i buc wek ongol ngut Jon ci okel wiye. Cutcut laco meno ocito ci odwogo cen. En onongo tye ki wi Jon i weer, ci omiyo bot nyako-ni. I ngeye nyako-ni omiyo bot minne.—Marako 6:17-29.

Kwero nino me nywal mukene ma Baibul loko iye-ni bene pe obedo ber. Meno obedo pa kabaka me lobo Ejipt. I kare me  kwero nino me nywal man bene, kabaka oweko kingolo ngut dano mo acel. I ngeye en ongabo kom laco man malo wek winyi gucam! (Acakki 40:19-22) Mono itamo ni Lubanga obedo ki cwak mo i kom kwero nino me nywal aryo magi?— Tika onongo cwinyi biteri me bedo tye kunnu?—

Wangeyo ni jami ducu ma tye i Baibul kicoyo ki tyen lok-ke. Baibul oloko i kom kwero nino me nywal aryo keken. I kom gin aryo-ni ducu, jami maraco otimme iye macalo but kwer man. Pi meno, ngo ma itwero waco ni Lubanga tye ka titiwa i kom kwero nino me nywal? Lubanga mono mito ni wakwer nino me nywal?—

Tye lok ada ni i ka kwero kwer ma kit meno i kare-ni, pe kingolo ngut ngat mo gire. Ento lok me kwero nino me nywal ocakke ki bot jo ma pe giworo Lubanga me ada. The Catholic Encyclopedia waco kuman i kom kwero nino me nywal ma kiloko pigi i Baibul-li: “Lutim bal keken . . . aye gibedo ki twon yomcwiny pi nino ma kinywalogi iye.” Tika wan wamito bedo calo lutim bal magi?—

Ento lapwony Madit kono? En mono okwero nino me nywalle?— Pe, Baibul pe loko gin mo matwal i kom kwero nino me nywal pa Yecu. Ki lok ada, lulub kor Yecu me kare macon pe gukwero nino me nywalo en. Tika ingeyo pingo lacen dano guyero me cako kwero nino me nywal pa Yecu i nino dwe  25 me Decemba?—

Nino dwe meno kiyero pien The World Book Encyclopedia waco ni, “jo Roma onongo giworo nino meno calo Feast of Saturn, kwero nino me nywal pa ceng.” Pi meno dano guyero me kwero nino me nywal pa Yecu i nino ma lukamfiri onongo dong gikwero calo nino madit!

Tika ingeyo gin ma nyuto ni Yecu pe kinywalo i Decemba?— Pien Baibul waco ni i kare ma kinywalo Yecu, lukwat onongo gitye i tim i dyewor meno. (Luka 2:8-12) Man onongo pe twere botgi me bedo woko i kare me kot ki ngico ma bedo i Decemba i but lobo meno.

 Pol pa dano gingeyo ni Karama pe obedo nino ma kinywalo iye Yecu. Gingeyo bene ni lukamfiri onongo gikwero kwer mo ma pe yomo cwiny Lubanga i nino meno. Kadi bed kumeno, dano mapol gire gikwero Karama. Giketo cwinygi mere i kwero kwer keken labongo paro pi gin ma Lubanga tamo i kom nino man. Ento wan giwa wamito yomo cwiny Jehovah, pe kumeno?—

Pi meno ka wakwero kwer, wamito ni myero obed ma nongo Jehovah cwako. Dok bene waromo timone i cawa mo keken i mwaka. Pe bene wakuro nino mo madok pat. Watwero camo cam mo mapat dok wabedo ki yomcwiny kun nongo watuku tuku mapol. Tika imito timo meno?— Ci itwero lok ki lunyodoni wek gukonyi ki goyo pulan me kwero kwer ma kit-tu. Meno bibedo ber, pe kumeno?— Ento ma peya i cako goyo pulan me kwero kwer moni myero kong inen ni obedo gin ma Jehovah cwako.