ШӘНЛИКДӘ олмағы хошлајырсан? ~ Шәнликләр чох мараглы олур. Бәс сәнҹә, Бөјүк Мүәллим бизим шәнликләрә ҝетмәјимизи истәјир? ~ О, өзү дә бәзи достлары илә бирликдә тој шәнлијинә ҝетмишди. Јеһова хошбәхт Аллаһдыр, буна ҝөрә дә биз шәнликләрдә јахшы вахт кечирәндә О севинир (Јәһја 2:1—11).

Бу китабын 29-ҹу сәһифәсиндә јазылыб ки, Јеһова Гырмызы дәнизи ајырыб исраиллиләри орадан кечирди. Бунлар сәнин јадындадыр? ~ Бу һадисәдән сонра ҹамаат маһны охујуб ојнамагла Јеһоваја миннәтдарлығыны билдирди. Бу, шәнлијә бәнзәјирди. Һамы чох севинирди. Биз әмин ола биләрик ки, Аллаһ да чох севинирди (Чыхыш 15:1, 20, 21).

Тәхминән 40 ил сонра исраиллиләр башга бөјүк бир шәнлијә ҝетдиләр. Бу дәфә онлары дәвәт едән адамлар Јеһоваја ибадәт етмирдиләр. Онлар башга аллаһлара ситајиш едир вә евли олмадыглары адамларла ҹинси әлагәјә ҝирирдиләр. Неҹә фикирләширсән, белә шәнлијә ҝетмәк дүзҝүн иди? ~ Бу, Јеһованын хошуна ҝәлмәди вә О, исраиллиләри ҹәзаландырды (Сајлар 25:1—9; 1 Коринфлиләрә 10:8).

 Мүгәддәс Китабда һәмчинин ики ад ҝүнү шәнлијиндән сөһбәт ачылыр. Бәлкә, онлардан бириндә Бөјүк Мүәллимин ад ҝүнүнү гејд едибләр? ~ Хејр. Онларын һәр икисиндә Јеһоваја хидмәт етмәјән адамларын ад ҝүнүнү гејд едирдиләр. Бири Һирод Антипанын ад ҝүнү иди. Иса јер үзүндә јашајанда о, Галилеја әјаләтини идарә едирди.

Һирод падшаһ чохлу пис ишләр ҝөрүрдү. О, гардашынын арвады илә евләнмишди. Онун ады Һиродиас иди. Аллаһын хидмәтчиси олан Вәфтизчи Јәһја Һирода дејирди ки, онун бу һәрәкәти дүзҝүн дејил. Бу да Һиродун аҹығына ҝәлирди. Буна ҝөрә о, Јәһјаны зиндана салды (Лука 3:19, 20).

Бир ҝүн Јәһја зинданда оланда Һиродун ад ҝүнүнү гејд едирдиләр. Бу мүнасибәтлә Һирод бөјүк шәнлик гурду. О, шәнлијә чохлу адлы-санлы адамлары чағырды. Онларын һамысы јејиб-ичир, кеф чәкирдиләр. Сонра исә Һиродиасын гызы ҝәлиб гонаглар үчүн рәгс етди. Онун рәгси һамынын о гәдәр хошуна ҝәлди ки, Һирод падшаһ она хүсуси һәдијјә вермәк истәди. О, гыза деди: «Мәндән нә истәсән, һәтта һөкмдарлығымын јарысыны белә истәсән верәҹәјәм».

 Ҝөрәсән, о, нә истәјәҹәк? Пул, ҝөзәл-ҝөзәл палтарлар, јохса өзү үчүн сарај? Гыз нә дејәҹәјини билмәјиб анасы Һиродиасын јанына ҝетди вә ондан сорушду: «Нә истәјим?»

Инди Һиродиасын әлинә фүрсәт дүшмүшдү. Онун да Вәфтизчи Јәһјадан зәһләси ҝедирди. Буна ҝөрә дә гызына деди ки, онун башыны истәсин. Гыз ҝери гајыдыб падшаһа деди: ‘Истәјирәм ки, вәфтиз едән Јәһјанын башыны бир сини ичиндә инди мәнә верәсән’.

Һирод падшаһ Јәһјаны өлдүрмәк истәмирди, чүнки онун јахшы адам олдуғуну билирди. Амма горхурду ки, бирдән шәнликдәки гонаглар онун сөз вериб сөзүнүн үстүндә дурмадығыны дүшүнәр. Буна ҝөрә дә Јәһјанын бојнуну вурмаг үчүн зиндана адам ҝөндәрди. Тезликлә һәмин адам ҝери гајытды. О, Јәһјанын башыны сининин ичиндә ҝәтириб гыза верди. Гыз да ону анасына апарды (Марк 6:17—29).

Мүгәддәс Китабда јазылан башга ад ҝүнү шәнлијиндә дә буна охшар шејләр баш вермишди. Һәмин шәнлик Мисир падшаһы үчүн гурулмушду. Бу шәнликдә дә падшаһ бир нәфәрин бојнуну  вурдурду. Сонра да асмағы әмр етди ки, гушлар ҝәлиб ону дидсин! (Јарадылыш 40:19—22). Неҹә фикирләширсән, бу ики шәнлик Аллаһа хош ҝәлмишди? ~ Сән һәмин шәнликләрдә олмаг истәјәрдин? ~

Биз билирик ки, Мүгәддәс Китабда јазыланларын һеч бири бош јерә јазылмајыб. Орада ҹәми ики ад ҝүнү шәнлијиндән данышылыр. Онларын да һәр икисиндә пис ишләр ҝөрүлмүшдү. Инди неҹә изаһ едәрдин, Аллаһ ад ҝүнү шәнликләри илә бағлы бизә нә демәк истәјир? О, бизим ад ҝүнүнү гејд етмәјимизи истәјир? ~

Дүздүр, бу ҝүн белә шәнликләрдә һеч кимин бојнуну вурмурлар. Амма ән биринҹи ад ҝүнүнү һәгиги Аллаһа ибадәт етмәјән инсанлар гејд етмәјә башламышдылар. Мүгәддәс Китабда хатырланан ад ҝүнләри һагда бир дини енсиклопедијада белә дејилир: «Јалныз аллаһсызлар... доғулдуглары ҝүнү бөјүк бајрам кими гејд едирдиләр» («The Catholic Encyclopedia»). Биз онлара охшамаг истәјирик? ~

Бәс Бөјүк Мүәллим һагда нә демәк олар? О, өз ад ҝүнүнү гејд едирди? ~ Хејр, Мүгәддәс Китабда Исанын өз ад ҝүнүнү кечирмәси илә бағлы һеч нә јазылмајыб. Әслиндә, һеч Исанын еркән давамчылары да ад ҝүнләрини гејд етмирдиләр. Билирсән, нәјә ҝөрә сонралар Исанын ад ҝүнүнү декабрын 25-дә гејд етмәк гәрарына ҝәлдиләр? ~

Бир енсиклопедијаја әсасән, бу ҝүнү она ҝөрә сечмишдиләр ки, «ромалылар һәмин ҝүн ҝүнәшин ад ҝүнүнә һәср олунмуш Сатурн бајрамыны гејд едирдиләр» («The World Book Encyclopedia»). Беләликлә, бүтпәрәстләрин бајрам ҝүнү Исанын ад ҝүнүнү гејд етмәк үчүн сечилди!

Билирсән, Иса нәјә ҝөрә декабрда доғула билмәзди? ~ Чүнки Мүгәддәс Китаба әсасән, Иса доғуланда ҝеҹә чөлдә чобанлар вар иди (Лука 2:8—12). Сојуг, јағышлы декабр ајында исә онлар орада ола билмәздиләр.

 Чохлары билир ки, Милад Исанын анадан олдуғу ҝүн дејил. Онларын һәтта хәбәри дә вар ки, һәмин ҝүнү бүтпәрәстләр Аллаһын хошуна ҝәлмәјән бајрамы гејд едирдиләр. Бунунла белә, чохлары Милад бајрамыны гејд етмәјә давам едир. Онлары Аллаһын бу бајрама мүнасибәтини өјрәнмәкдән чох шәнлик марагландырыр. Амма биз Јеһованы разы салмаг истәјирик, елә дејил? ~

Буна ҝөрә дә шәнлик кечирәндә онун Јеһованын хошуна ҝәлиб-ҝәлмәдијини дәгигләшдирмәјә чалышмалыјыг. Биз ил әрзиндә үрәјимиз истәјән вахт шәнлик кечирә биләрик. Бунун үчүн хүсуси бир ҝүнү ҝөзләмәк лазым дејил. Истәдијимиз вахт ләзиз јемәк јејиб, шән ојунлар ојнаја биләрик. Сән белә етмәк истәјәрдин? ~ Бәлкә, валидејнләриндән хаһиш едиб онларын көмәји илә шәнлик гурасан? Бу, чох јахшы оларды, елә дејил? ~ Амма шәнлик гурмаға һазырлашмаздан өнҹә әмин ол ки, о, Аллаһын хошуна ҝәләҹәк.