OU KONTAN al parti ou?— I gou dan parti. Ou krwar sa Gran Ansennyan ti pou dakor ki nou al parti?— Be li osi i ti al parti. Sa ti alokazyon en maryaz e serten son bann disip ti al avek li. Zeova i en ‘Bondye ki zwaye.’ Alors i kontan ler nou anmize dan bann parti ki byen pour ale.—1 Timote 1:11, NW; Zan 2:1-11.

Paz 29 dan sa liv i dir nou ki Zeova ti ouver Lanmer Rouz pour fer bann Izraelit pase. Ou rapel sa?— Ler zot ti’n ariv lot kote, bann dimoun ti sante, danse, e remersye Zeova. Ti parey en parti. Bann dimoun ti vreman kontan, e byensir Zeova ti kontan li osi.—Egzod 15:1, 20, 21.

Apepre 40 an plitar, bann Izraelit ti al ankor en lot gro parti. Me sa voyaz, bann dimoun ki ti envit zot pa ti ador Zeova. Zot ti ador lezot bondye e zot ti menm annan relasyon seksyel avek bann dimoun ki zot pa ti’n marye avek. Ou krwar i byen pour al en parti koumsa?— Zeova pa ti dakor avek sa e i ti pini bann Izraelit pour sa.—Nonm 25:1-9; 1 Korentyen 10:8.

 Labib i koz osi lo de parti lanniverser nesans. Eski sa bann dimoun ti pe selebre lanniverser sa Gran Ansennyan?— Non. Tou le de parti ti pour selebre lanniverser bann zonm ki pa ti servi Zeova. Enn ti lanniverser Lerwa Erod Antipas. Erod ti sef distrik Galile sa letan ki Zezi ti lo later.

Lerwa Erod ti fer bokou move keksoz. I ti pran madanm son frer, ki ti apel Erodyad. Zan-Batis ki ti en serviter Bondye ti dir Erod ki i mal pour fer sa. Erod pa ti kontan sa ki Zan-Batis ti dir li. Alors i ti fer met Zan-Batis dan prizon.—Lik 3:19, 20.

Letan Zan-Batis ti dan prizon, Erod ti pe fet son lanniverser. I ti fer en gro parti. I ti envit bokou dimoun enportan. Zot ti manze, bwar, e anmize. Apre fiy Erodyad ti vin danse devan bann envite. I ti dans telman byen, ki tou dimoun ti byen kontan. Alors Lerwa Erod ti anvi donn li en kado spesyal. I ti dir avek li: “Tou sa ki ou a demann mwan mon ava donn ou, menm lanmwatye mon rwayonm.”

 Ki i ti demande? Larzan? Bann zoli lenz? En pale pour li tousel? I pa ti konnen ki pour demande. Alors i ti al kot son manman, Erodyad, e demann li: “Ki mon ava demande?”

Erodyad li, i ti ay Zan-Batis en kantite. Alors i ti dir son fiy demann latet Zan-Batis. Sa pti fiy ti al kot lerwa e demann li: “Mon oule ki ou donn mwan konmela menm latet Zan-Batis lo en pla.”

Lerwa Erod pa ti oule touy Zan-Batis akoz i ti konnen ki Zan-Batis ti en bon dimoun. Me akoz Erod ti’n fer en promes devan tou dimoun, i ti per zot a mal koz li si i sanz son lide. Alors i ti anvoy en zonm koup latet Zan-Batis dan prizon. Sa zonm ti retournen avek latet Zan-Batis lo en pla e donn sa fiy. Sa fiy ti pran e donn avek son manman.—Mark 6:17-29.

Sa lot parti lanniverser ki Labib i koz lo la ti parey menm. Ti lanniverser en lerwa Lezip. Dan sa parti osi, lerwa ti fer koup latet en zonm. Apre, i ti met lekor sa zonm anpandan pour  zwazo manze! (Zenez 40:19-22) Ou krwar Bondye ti dakor avek sa de parti?— Ou ti pou kontan al sa de parti ou?—

Nou konnen ki tou keksoz dan Labib i la pour en rezon. Labib i koz lo zis de parti lanniverser. E dan tou le de parti, ti ariv bann move keksoz. Ki ou krwar Bondye pe sey dir nou la? Eski i anvi nou fet lanniverser nesans?—

I vre ki personn pa ganny koup latet konmela dan bann parti lanniverser. Me pa bliye lekel ki ti konmans fet lanniverser nesans. I bann dimoun ki pa ti ador sa vre Bondye. En ansiklopedi lo larelizyon in koz lo sa de lanniverser ki annan dan Labib. I dir: “Zis bann dimoun ki ti fer bokou pese . . . ki ti fer bann gro lafet zour ki zot ti ne.” (The Catholic Encyclopedia) Eski nou anvi vin parey zot?—

Be sa Gran Ansennyan, i ti fet son lanniverser li?— Non, Labib pa dir Zezi ti fet son lanniverser. Menm bann premye disip Zezi pa ti fet son lanniverser. Ou konnen akoz bann dimoun ti deside fet lanniverser Zezi le 25 Desanm?—

En ansiklopedi i dir ki zot ti swazir sa dat akoz ‘bann dimoun an Ronm ti pe deza fet en Lafet sa zour. Zot ti pe fet lanniverser soley.’ (The World Book Encyclopedia) Alors zot ti swazir pour fet lanniverser Zezi menm zour ki zot ti fer lafet pour zot fo bondye!

Zezi pa’n kapab ne an Desanm. Ou konnen akoz?— Akoz Labib i dir ki ler Zezi ti ne, bann berze ti deor aswar pe vey zot mouton. (Lik 2:8-12) An Desanm, i tonm bokou lapli e i fer fre dan sa pei kot Zezi ti ne. Alors bann berze pa ti pou reste deor aswar pandan sa letan.

Bokou dimoun i konnen ki Zezi pa ti ne zour Nwel. Zot osi  konnen ki sa zour bann dimoun ki pa ti servi Bondye ti fer en lafet ki Bondye pa kontan. Me kantmenm sa, bokou dimoun i kontinyen fet Nwel. Zot pli kontan fete ki rode si Bondye i dakor avek sa lafet. Me nou nou anvi fer plezir Zeova, pa i vre?—

Alors ler nou fer en parti, nou oule fer sir ki Zeova i dakor avek sa parti. Nou kapab fer parti nenport zour. Pa bezwen nou esper en zour spesyal pour fer li. Petet nou kapab fer en repa spesyal e zwe bann zwe ki gou. Ou ti a kontan fer sa?— Akoz ou pa koz avek manmi ek dadi e ansanm zot a organiz en parti? En bon lide, non?— Me fer sir Bondye i dakor avek sa kalite parti avan ou konmans fer okenn preparasyon.