Ibuot 29

Ndi Kpukpru Usọrọ Ẹnem Abasi Esịt?

NTE afo emesima ndika mme usọrọ?— Mmọ ẹkeme ndiyọhọ ye inemesịt. Nte afo emekere ke Akwa Andikpep okpoyom nnyịn ika mme usọrọ?— Ọfọn, enye ama aka usọrọ ke ini owo ọkọdọde ndọ, ndien ndusụk mbet esie ẹma ẹsan̄a ye enye. Jehovah edi ‘Abasi inemesịt,’ ntre enye esinem esịt ndikụt nte nnyịn idatde esịt ke ini idụkde nti usọrọ.—1 Timothy 1:11; John 2:1-11.

Page 29 ke n̄wed emi asian nnyịn ete ke Jehovah ama abahade Ididuot Inyan̄ man anam nditọ Israel ẹsan̄a ẹbe. Nte afo emeti nte okotde n̄kpọ ntre?— Ke oro ebede, mme owo ẹma ẹkwọ ikwọ ẹnyụn̄ ẹnek unek ẹnyụn̄ ẹkọm Jehovah. Enye eketie nte usọrọ. Mme owo oro ẹma ẹnem esịt etieti, ndien nnyịn imekeme ndinịm ke akpanikọ nte ke Abasi ama enem esịt n̄ko.—Exodus 15:1, 20, 21.

Ke ekperede ndisịm isua 40 ke oro ebede, nditọ Israel ẹma ẹka akamba usọrọ efen. Isan̄ enye emi mme owo oro ẹkekotde mmọ usọrọ ikakam ituakke ibuot inọ Jehovah. Ke nditịm ntịn̄, mme owo oro ẹkekotde mmọ usọrọ ẹkekam ẹtuak ibuot ẹnọ mme abasi efen, ẹma ẹsinyụn̄ ẹnam idan̄ ye mme owo oro mîkedịghe nsan̄a ndọ mmọ. Nte afo emekere ke ama ọfọn ndika utọ usọrọ oro?— Jehovah  ikenemke esịt, ndien enye ama amia nditọ Israel ufen.—Numbers 25:1-9; 1 Corinth 10:8.

Bible n̄ko etịn̄ aban̄a usọrọ usen emana iba. Ndi kiet ke otu mmọ ekedi usọrọ usen emana Akwa Andikpep?— Baba. Mme usọrọ usen emana emi ẹkedi eke mme owo oro mîkanamke n̄kpọ Jehovah. Kiet ekedi usọrọ usen emana Edidem Herod Antipas. Enye ekedi andikara ikpehe Galilee ke ini Jesus okodụn̄de do.

Edidem Herod ama anam ediwak ndiọi n̄kpọ. Enye ama emen n̄wan eyeneka esie ọdọ. Enyịn̄ esie ekedi Herodias. Asan̄autom Abasi oro John Baptist ama ọdọhọ Herod ete ke ifọnke enye ndinam ntre. Herod ikamaha ikọ oro. Ntre enye ama anam ẹkọbi John ke ufọk-n̄kpọkọbi.—Luke 3:19, 20.

Ke adan̄aemi John okodude ke ufọk-n̄kpọkọbi, usen ama ekem ndinịm usọrọ emana Herod. Herod ama enịm akamba usọrọ. Enye ama okot ediwak ikpọ owo. Kpukpru mmọ ẹma ẹdia udia ẹnyụn̄ ẹn̄wọn̄ n̄kpọ ẹnyụn̄ ẹnem idem mmọ esịt. Ekem eyen Herodias an̄wan ama odụk edinek unek ọnọ mmọ. Kpukpru owo ẹma ẹnem esịt etieti ẹban̄a unek esie tutu Edidem Herod oyom ndinọ enye san̄asan̄a enọ.  Herod ama ọdọhọ enye ete: ‘N̄kpọ ekededi eke ediben̄ede mi, nyọnọ fi, ekpedi idem ubak ubọn̄ mi.’

Nso ke enye ekpeben̄e? Nte ekpeben̄e okụk? ndiye ọfọn̄? ufọkubọn̄ eke idemesie? Eyenan̄wan oro ikọfiọkke se ekpeben̄ede. Ntre enye ama aka ebịne eka esie, Herodias, ọkọdọhọ ete: “Nso ke n̄kpeben̄e?”

Idahaemi Herodias ama asua John Baptist ata etieti. Ntre enye ama ọdọhọ adiaha esie eben̄e ibuot John. Adiaha esie ama afiak ebịne edidem ọkọdọhọ ete: “Nyom afo ọnọ mi ibuot John Baptist idahaemi ke usan.”

Edidem Herod ikoyomke ndiwot John koro enye ama ọfiọk ete ke John ekedi eti owo. Edi Herod ama anam un̄wọn̄ọ, ndien enye ama okop ndịk aban̄a se mbon en̄wen ke itie usọrọ oro ẹdikerede edieke imọ ikpụhọde ekikere. Ntre enye ama ọdọn̄ owo aka ufọk-n̄kpọkọbi ekebịghi John ibuot. Ibịghike owo oro ama afiak edi. Enye ama akama ibuot John ke usan, onyụn̄ ayak ọnọ eyenan̄wan emi. Ekem eyenan̄wan emi ama ayak enye ọnọ eka esie.—Mark 6:17-29.

Usọrọ usen emana enye eken oro Bible etịn̄de aban̄a ikọfọnke n̄ko. Usọrọ emi ekedi eke edidem Egypt. Ke ini usọrọ emi  n̄ko, edidem ama anam ebịghi owo ibuot. Ekem, ke oro ebede, enye ama emen okpo esie ọkọn̄ ke eto ọnọ mme inuen ẹta! (Genesis 40:19-22) Nte afo emekere ke Abasi ama enyịme usọrọ iba oro?— Ndi afo akpakama ndidụk mmọ?—

Nnyịn imọfiọk ite ke kpukpru se ẹkewetde ke Bible ke ẹkewet ye ntak. Enye etịn̄ aban̄a usọrọ usen emana iba kpọt. Ndien ke mbiba oro, ẹma ẹnam ndiọi n̄kpọ nte ubak usọrọ oro. Ntre, afo ọkpọdọhọ ke nso ke Abasi etịn̄ ọnọ nnyịn aban̄a usọrọ usen emana? Nte Abasi oyom nnyịn inịm usọrọ usen emana?—

Edi akpanikọ nte ke mme owo isibịghike owo ibuot ke mme utọ usọrọ oro mfịn. Edi ofụri se iban̄ade edinịm usọrọ usen emana ọkọtọn̄ọ ye mme owo oro mîkatuakke ibuot inọ Abasi akpanikọ. The Catholic Encyclopedia etịn̄ aban̄a mme usọrọ usen emana oro ẹsiakde ke Bible ete: “Mme anamidiọk kpọt . . . ẹsidara usen oro mmọ ẹkemanade.” Nte nnyịn imoyom nditie nte mmọ?—

Nso kaban̄a Akwa Andikpep? Ndi enye ama enịm usọrọ usen emana esie?— Baba, Bible itịn̄ke n̄kpọ ndomokiet iban̄a usọrọ usen emana Jesus. Ke akpanikọ, akpa mme anditiene Jesus ikenịmke usọrọ usen emana esie. Nte afo ọmọfiọk ntak emi mme owo ke ukperedem ẹkemekde ndinịm usọrọ usen emana Jesus ke December 25?—

Nte The World Book Encyclopedia ọdọhọde, ẹkemek usenọfiọn̄ oro koro “mbon Rome ẹma ẹnenịm enye nte Usọrọ Saturn, ẹnịmde usọrọ usen emana utịn.” Ntre mme owo ẹma ẹmek ndinịm usọrọ usen emana Jesus ke usenọfiọn̄ emi mme okpono ndem ẹma ẹkememek nte usen nduọkodudu!

Nte afo ọmọfiọk ntak emi mîkpekemeke ndidi ẹkeman Jesus ke December?— Koro Bible ọdọhọ ete ke ini Jesus akamanade, mme ekpemerọn̄ ẹkesụk ẹdu ke an̄wa ke okoneyo. (Luke 2:8-12) Ndien mmọ ikpokodụhe do ke ọfiọn̄ December emi esidide ini etuep ye edịm ke idụt oro Jesus akamanade.

 Ediwak owo ẹfiọk ẹte ke Christmas idịghe usen emana Jesus. Mmọ ẹkam ẹfiọk ẹte ke usen oro ke mme okpono ndem ẹma ẹsinịm usọrọ oro mîkenemke Abasi esịt. Edi ediwak owo ẹsidia usọrọ Christmas. Mmọ ẹnen̄ede ẹkere ẹban̄a edidia usọrọ ẹkan ndifiọk se Abasi ekerede aban̄a usọrọ oro. Edi nnyịn iyom ndinem Jehovah esịt, nte nnyịn iyomke?—

Ntre ke ini nnyịn inịmde mme usọrọ, oyom nnyịn itịm ikụt ite ke mmọ ẹfọn ke enyịn Jehovah. Nnyịn imekeme ndinịm usọrọ ini ekededi ke isua. Nnyịn inyeneke nditie mbet akpan usen. Nnyịn imekeme ndidia ndusụk akpan udia inyụn̄ ikop inemesịt ke ndibre mme mbre. Ndi afo akpama ndinam oro?— Ndusụk afo emekeme nditịn̄ ye ete ye eka fo onyụn̄ ayak mmọ ẹn̄wam fi ndidiomi usọrọ. Oro ọkpọfọn, nte ikpọfọnke?— Edi mbemiso afo anamde mme ndutịm aban̄a usọrọ, oyom afo etịm okụt ete ke enye edi usọrọ oro Abasi edinyịmede.

Ẹwụt n̄ko nte edinam se Abasi enyịmede kpukpru ini edide akpan n̄kpọ ke Mme N̄ke 12:2; John 8:29; Rome 12:2; ye 1 John 3:22.

[Ndise ke page 152]

Ntak emi Abasi ekenemde esịt aban̄a usọrọ emi?

[Ndise ke page 153]

Nso iketịbe ke usọrọ usen emana Herod?

[Ndise ke page 154]

Ntak emi emana Jesus mîkekemeke ndidi ke December 25?

[Ndise ke page 156]

Didie ke nnyịn ikeme nditịm n̄kụt nte ke usọrọ nnyịn enem Abasi esịt?