LUYAG mo bala magkadto sa mga party?— Makalilipay gid ini. Sa banta mo ayhan luyag sang Daku nga Manunudlo nga magkadto kita sa mga party?— Bueno, nagkadto sia anay sa sarang matawag nga isa ka party sang may nagpakasal sadto, kag nag-upod sa iya ang pila sang iya mga disipulo. Si Jehova “malipayon nga Dios,” gani nahamuot sia kon maglipaylipay kita sa maayo nga mga party.—1 Timoteo 1:11; Juan 2:1-11.

Ang pahina 29 sini nga libro nagasugid sa aton nga ginpihak ni Jehova ang Dagat nga Mapula agod patabukon ang mga Israelinhon. Nadumduman mo bala nga nabasa mo ini?— Pagkatapos sadto, ang katawhan nag-amba kag nagsaot kag nagpasalamat kay Jehova. Daw isa yadto ka party. Malipayon gid ang katawhan sadto, kag pat-od gid nga nalipay man ang Dios.—Exodo 15:1, 20, 21.

Halos 40 ka tuig sang ulihi, nagkadto ang mga Israelinhon sa isa pa ka daku nga party. Sini nga tion ang mga tawo nga nag-agda sa ila wala gani nagasimba kay Jehova. Sa katunayan, ang mga tawo nga nag-agda sa ila nagayaub pa gani sa iban nga mga dios kag kustombre nila nga maghilawas sa indi nila tiayon. Sa banta mo ayhan wala sing malain nga magkadto sa isa ka party nga kaangay sini?— Ti, wala mahamuot si Jehova sadto, kag ginsilutan niya ang mga Israelinhon.—Numeros 25:1-9; 1 Corinto 10:8.

 Ang Biblia nagasugid man sa aton tuhoy sa duha ka birthday party. Isa bala sini ang pagsaulog sa birthday sang Daku nga Manunudlo?— Indi. Ining duha ka birthday party ginhiwat para sa mga tawo nga wala nagaalagad kay Jehova. Ang isa amo ang birthday party para kay Hari Herodes Antipas. Sia ang manuggahom sang distrito sang Galilea sang nagapuyo si Jesus didto.

Naghimo si Hari Herodes sing madamo nga kalainan. Gin-agaw niya ang asawa sang iya utod. Ang iya ngalan amo si Herodias. Ginsugiran si Herodes sang alagad sang Dios nga si Juan Bautista nga malain ang iya ginhimo. Wala ini maluyagi ni Herodes. Gani ginpabilanggo niya si Juan.—Lucas 3:19, 20.

Samtang bilanggo si Juan, nag-abot ang adlaw nga ginsaulog ang birthday ni Herodes. Naghiwat si Herodes sing isa ka daku nga party. Gin-agda niya ang madamo nga kilala nga mga tawo. Nagkinaon sila tanan kag nag-ininom kag nagsinadya gid. Nian nagsulod ang anak nga babayi ni Herodias kag ginsautan sila. Naluyagan gid sang tanan ang iya pagsaot amo nga luyag ni Hari Herodes nga hatagan sia sing isa ka pinasahi nga regalo. Nagsiling sia sa iya: “Bisan ano ang imo pangayuon sa akon, ihatag ko sa imo, tubtob sa katunga sang akon ginharian.”

 Ano ang pangayuon niya? Kuwarta bala? matahom nga mga bayo? isa ka palasyo para sa iya kaugalingon? Indi mahibal-an sang lin-ay kon ano ang isiling. Gani nagkadto sia sa iya iloy, nga si Herodias, kag nagsiling: “Ano ang pangayuon ko?”

Ginakaugtan gid ni Herodias si Juan Bautista. Gani ginsingganan niya ang iya anak nga pangayuon ang ulo ni Juan. Nagbalik ang lin-ay sa hari kag nagsiling: “Luyag ko nga ihatag mo sa akon sa gilayon ang ulo ni Juan Bautista sa isa ka bandihado.”

Indi luyag ni Hari Herodes nga patyon si Juan bangod nahibal-an niya nga si Juan isa ka maayo nga tawo. Apang nanaad si Herodes, kag nahangawa sia kon ano ang hunahunaon sang iban nga mga tawo sa party kon bag-uhon niya ang iya pensar. Gani nagpadala sia sing isa ka tinawo sa bilangguan agod pugutan si Juan. Wala madugay nagbalik ini nga tinawo. Dala niya ang ulo ni Juan sa isa ka bandihado, kag ginhatag niya ini sa lin-ay. Nian ginhatag man ini sang lin-ay sa iya iloy.—Marcos 6:17-29.

Indi man maayo ang isa pa ka birthday party nga ginasugid sang Biblia. Ginhiwat ini para sa hari sang Egipto. Sa tion sini man nga party, ginpapugot sang hari ang ulo sang isa ka tawo. Pagkatapos sini,  ginpabitay niya ang tawo agod kaunon sang mga pispis! (Genesis 40:19-22) Sa banta mo ayhan ginkahamut-an sang Dios ining duha ka party?— Luyag mo bala nga didto ka kuntani?—

Nahibaluan naton nga may katuyuan ang tanan nga nasulat sa Biblia. Duha lamang ka birthday party ang ginasugid sini. Kag sa sining duha ka party, may malain nga mga butang nga ginhimo subong bahin sang selebrasyon. Gani, ano sa banta mo ang ginasiling sang Dios sa aton tuhoy sa mga birthday party? Luyag bala sang Dios nga saulugon naton ang aton birthday?—

Matuod nga sa subong sini nga mga party karon, wala sing ginapugutan sing ulo. Apang ini nga pagsaulog sing birthday ginsugdan sang mga tawo nga wala nagasimba sa matuod nga Dios. Ang The Catholic Encyclopedia nagasiling tuhoy sa mga pagsaulog sing birthday nga ginasambit sa Biblia: “Mga makasasala lamang . . . ang nagasinadya sa ila birthday.” Luyag bala naton nga mangin kaangay nila?—

Kamusta naman ang Daku nga Manunudlo? Ginsaulog bala niya ang iya birthday?— Wala, wala sing ginasambit ang Biblia tuhoy sa birthday party para kay Jesus. Sa katunayan, ang una nga mga sumulunod ni Jesus wala magsaulog sang iya birthday. Nahibaluan mo bala kon ngaa nagdesisyon sang ulihi ang mga tawo nga saulugon ang birthday ni Jesus sa Disiembre 25?—

Ginpili ini nga petsa bangod, suno sa ginasiling sang The World Book Encyclopedia, “ginasaulog na ini nga daan sang mga taga-Roma subong Piesta ni Saturn, bilang pagsaulog sa birthday sang adlaw.” Gani ginpili sang mga tawo nga saulugon ang birthday ni Jesus sa petsa nga ginasaulog na nga daan sang mga pagano!

Nahibaluan mo bala kon ngaa indi mahimo nga natawo si Jesus sa Disiembre?— Bangod nagasiling ang Biblia nga sang matawo si Jesus, yara pa sa latagon ang mga manugbantay sing karnero kon gab-i. (Lucas 2:8-12) Kag indi mahimo nga didto sila sa guwa sa matugnaw kag maulan nga bulan sang Disiembre.

 Madamo nga tawo ang nakahibalo nga ang Krismas indi ang birthday ni Jesus. Nahibaluan pa gani nila nga sa sini nga adlaw may ginasaulog ang mga pagano nga indi kalahamut-an sa Dios. Apang madamo gihapon ang nagasaulog sang Krismas. Mas interesado sila nga maghiwat sing party sangsa hibaluon kon ano gid ang ginahunahuna sang Dios sa sini. Apang luyag naton pahamut-an si Jehova, indi bala?—

Gani kon maghiwat kita sing party, pat-uron naton nga maayo ini sa panulok ni Jehova. Mahimo kita maghiwat sini sa bisan ano nga tion sang tuig. Indi na kinahanglan nga hulaton pa naton ang isa ka pinasahi nga adlaw. Mahimo kita magkaon sing espesyal nga mga pagkaon kag maghinampang. Luyag mo bala himuon ini?— Mahimo mo hambalon ang imo mga ginikanan kag magplano sing isa ka party sa bulig nila. Mangin makalilipay ini, indi bala?— Apang antes ka magplano, pat-ura nga nahamut-an ini sang Dios.