MAGUSTUAM kadi ti mapan kadagiti padaya?— Mabalin a makaparagsak unay dagita. Panagkunam kayat ngata ti Naindaklan a Mannursuro a mapantayo kadagiti padaya?— Kinapudnona, timmabuno idi iti maysa a padaya ti kasar, ken simmurot kenkuana ti dadduma kadagiti adalanna. “Naragsak a Dios” ni Jehova, isu a kayatna a tagiragsakentayo dagiti nasayaat a padaya.​​—1 Timoteo 1:​11; Juan 2:​1-​11.

Iti panid 29 daytoy a libro, kunana a pinagbisngay ni Jehova ti Nalabaga a Baybay tapno makaballasiw dagiti Israelita. Malagipmo kadi dayta?— Kalpasanna, nagkakanta ken nagsasala dagiti umili ken nagyamanda ken Jehova. Kasla maysa daydi a padaya. Naragsakan unay dagiti tattao, ken masiguradotayo a naragsakan met ti Dios.​​—Exodo 15:​1, 20, 21.

Agarup 40 a tawen kalpasanna, napan dagiti Israelita iti sabali a dakkel a padaya. Saan nga agdaydayaw ken Jehova dagidiay nangawis kadakuada. Kinapudnona, dagidiay nangawis kadakuada ket agdaydayaw pay ketdi kadagiti sabali a didios ken makidendennada kadagiti dida assawa. Panagkunam, nasayaat ngata ti mapan iti kasta a padaya?— Kinapudnona, saan a naragsakan ni Jehova, ket dinusana dagiti Israelita.​​—Numeros 25:​1-9; 1 Corinto 10:8.

 Dakamaten met ti Biblia ti maipapan iti dua a padaya ti kasangay. Nainaig kadi ti maysa kadagita iti panangrambak iti kasangay ti Naindaklan a Mannursuro?— Saan. Dagidiay a padaya ti kasangay ket agpadpada a para kadagiti lallaki a saan nga agserserbi ken Jehova. Ti maysa ket padaya iti kasangay ni Ari Herodes Antipas. Isu idi ti agturay iti distrito ti Galilea idi nagnaed sadiay ni Jesus.

Adu ti dakes nga inar-aramid ni Ari Herodes. Inasawana ti asawa ti kabsatna. Herodias ti naganna. Ti adipen ti Dios a ni Juan a Mammautisar imbagana ken Herodes a dakes ti inaramidna. Kinagura dayta ni Herodes. Gapuna, impaibaludna ni Juan.​​—Lucas 3:​19, 20.

Bayat a sibabalud ni Juan, dimteng ti panangrambak ni Herodes iti kasangayna. Nangaramid ni Herodes iti dakkel a padaya. Inawisna ti adu a natan-ok a tattao. Nangan ken imminum ken nagragragsakda amin. Kalpasanna, dimteng ti anak a babai ni Herodias ken nagsala. Naragsakanda unay iti panagsalana isu a kayat ni Ari Herodes nga ipaayan iti naisangsangayan a regalo. Kinunana kenkuana: “Uray aniaman ti dawatem kaniak, itedkonto kenka dayta, agingga iti gudua ti pagariak.”

 Ania ngay ti dawatenna? Kuarta kadi? napipintas a kawes? bukodna a palasio? Saan nga ammo ti balasitang no ania ti dawatenna. Gapuna, napan ken ni nanangna a Herodias, ket kinunana: “Ania ti rebbeng a dawatek?”

Napalalo idi ti gura ni Herodias ken ni Juan a Mammautisar. Gapuna, binilinna ti balasangna a dawatenna ti ulo ni Juan. Nagsubli ti balasitang iti ari ket kinunana: “Kayatko nga itedmo kaniak ita met laeng iti maysa a bandeha ti ulo ni Juan a Mammautisar.”

Di kayat ni Ari Herodes a papatayen ni Juan gapu ta ammona a nasayaat a tao ni Juan. Ngem nagkari ni Herodes, ket maamak no ania ti kunaen dagidiay timmabuno iti padaya no dina tungpalen ti karina. Nangibaon ngarud iti lalaki idiay pagbaludan tapno pugotanna ni Juan. Di nagbayag nagsubli ti lalaki. Inyegna ti ulo ni Juan nga adda iti bandehado, ket intedna dayta iti balasitang. Kalpasanna inted met ti balasitang ken ni nanangna.​​—Marcos 6:​17-​29.

Kasta met laeng ti kadakes ti sabali pay a padaya ti kasangay a nadakamat iti Biblia. Isu dayta ti kasangay ti ari ti Egipto. Iti daytoy met a padaya, pinapugotan ti ari ti ulo ti maysa a tao. Kalpasanna,  impaibitinna iti kayo ti bangkay ti lalaki tapno kanen dagiti tumatayab! (Genesis 40:19-​22) Panagkunam, inanamongan ngata ti Dios dagita a dua a padaya?— Kayatmo ngata koma ti dumar-ay kadagita?—

Ammotayo nga adda panggepna no apay a naisurat dagiti amin a masarakan iti Biblia. Dua laeng ti dinakamatna a padaya ti kasangay. Ket kadagita a padaya, agpadpada nga adda dakes a napasamak kas paset ti selebrasion. No kasta, ania ngata ti ibagbaga ti Dios kadatayo maipapan kadagiti padaya ti kasangay? Kayat kadi ti Dios a rambakantayo dagiti kasangay?—

Agpayso nga awanen ti mapugotan iti ulo kadagiti kakasta a padaya itatta. Ngem ti panangrambak iti kasangay ket nangrugi kadagiti tattao a di agdaydayaw iti pudno a Dios. Kuna ti The Catholic Encyclopedia maipapan kadagiti panagkasangay a nadakamat iti Biblia: “Dagidiay laeng managbasol . . . ti napalalo a mangtagtagiragsak iti panagkasangayda.” Kayattayo kadi ti agbalin a kas kadakuada?—

Ti met ngay Naindaklan a Mannursuro? Rinambakanna kadi ti kasangayna?— Saan, awan ti dinakamat ti Biblia a padaya ti kasangay ni Jesus. Kinapudnona, dagiti immuna a pasurot ni Jesus saanda a rinambakan ti kasangayna. Ammom kadi no apay nga inkeddeng dagiti tattao a rambakan ti kasangay ni Jesus iti Disiembre 25?—

Kas kuna ti The World Book Encyclopedia, pinilida dayta a petsa gapu ta “dagiti umili ti Roma ramrambakanda idin dayta kas ti Piesta ni Saturno, a panangrambak iti kasangay ti init.” No kasta, pinili dagiti tattao a rambakan ti kasangay ni Jesus iti petsa a datin a ramrambakan dagiti pagano!

Ammom kadi no apay a saan a mabalin a Disiembre ti pannakaipasngay ni Jesus?— Gapu ta kuna ti Biblia nga idi mayanak ni Jesus, adda pay laeng dagiti pastor idiay tay-ak iti rabii. (Lucas 2:​8-​12) Ket awanda koma sadiay gapu ta nalam-ek ken matutudo iti bulan ti Disiembre.

 Ammo ti adu a tattao a ti Krismas ket saan nga isu ti aldaw a pannakayanak ni Jesus. Ammoda pay ketdi nga iti dayta nga aldaw, adda piesta dagiti pagano a saan a makaay-ayo iti Dios. Ngem adu latta ti mangramrambak iti Krismas. Ad-adda a paginteresanda ti padaya imbes nga ammuenda no ania a talaga ti panangmatmat ti Dios iti dayta. Ngem kayattayo a paragsaken ni Jehova, di ngamin?​​—

Isu a no adda rambakantayo a padaya, siguraduentayo koma nga anamongan ni Jehova dagita. Mabalintayo a rambakan dagita iti aniaman a tiempo ti tawen. Saan a kasapulan nga aguraytayo iti naisangsangayan nga aldaw. Mabalintayo ti mangan kadagiti naisangsangayan a taraon ken agay-ayam a siraragsak. Kayatmo kadi dayta?— Mabalinmo a kasarita dagiti nagannak kenka ket agpatulongka kadakuada a mangiplano iti padaya. Makaparagsak dayta, di ngamin?— Ngem sakbay nga agplanoka iti padaya, siguraduem nga anamongan dayta ti Dios.