Uzou Avọ 29

Kọ Ehaa Kpobi E Rẹ Were Ọghẹnẹ?

KỌ EHAA e rẹ were owhẹ?— E rẹ sae were oma gaga. Kọ who roro nnọ Owuhrẹ Ologbo na ọ gwọlọ re ma kpohọ ehaa?— O kpohọ oware nọ a rẹ sai se ehaa evaọ okenọ ohwo jọ ọ jẹ rọo, yọ ilele riẹ jọ a lele i rie nya re. Jihova yọ ‘Ọghẹnẹ evawere,’ fikiere o rẹ were iẹe ma tẹ be were eva evaọ etoke emamọ ehaa.—1 Timoti 1:11; Jọn 2:1-11.

Ẹwẹ-obe avọ 29 ọrọ obe nana o ta kẹ omai nnọ Jihova ọ hẹriẹ Abade Ọwawae na re o ru emọ Izrẹl nya otọ oyaya vrẹ. Kọ whọ kareghẹhọ nọ who se kpahe oyena?— Kẹsena, ahwo na a tẹ so je gbe ile je yere Jihova. O jọ wọhọ ehaa. Eva e were ahwo na gaga, yọ u mu omai ẹro nnọ eva e were Ọghẹnẹ re.—Ọnyano 15:1, 20, 21.

Oware wọhọ ikpe 40 e vrẹ no, emọ Izrẹl a te kpohọ ehaa ilogbo efa jọ. Ahwo nọ a zizie i rai kpohọ ehaa nana a be tubẹ gọ Jihova ha. Evaọ uzẹme, ahwo nọ a zizie i rai na a jẹ gọ eghẹnẹ efa yọ a jẹ wezẹ kugbe ahwo nọ a rrọ ezae hayo eyae rai hi. Kọ who roro nọ u kiehọ re a kpohọ ehaa itieye na?— Eva e were Jihova ha, fikiere  ọ tẹ kẹ emọ Izrẹl na uye.—Ikelakele 25:1-9; 1 Ahwo Kọrint 10:8.

Ebaibol na e ta kpahe ehaa ẹdẹ-eyẹ ivẹ jọ re. Kọ ọvo rai jọ ọ jọ orọ ẹdẹ-eyẹ Owuhrẹ Ologbo na?— Ijo. Ehaa ẹdẹ-eyẹ nana yọ erọ ezae nọ e gọ Jihova ha. Ọjọ yọ ehaa ẹdẹ-eyẹ kẹ Herọd Antipas Ovie na. Ọye ọ jọ osu ẹkwotọ Galili evaọ okenọ Jesu ọ jẹ rria ẹkwotọ ọyena.

Herọd Ovie na o ru eware iyoma buobu. O mi oniọvo obọ riẹ aye. Odẹ aye na họ Herọdias. Jọn Ọhọahwo-Ame na, odibo Ọghẹnẹ, ọ ta kẹ Herọd nnọ o thọ re o mi oniọvo riẹ aye. Oyena o dha Herọd eva. Fikiere ọ tẹ kare Jọn fihọ uwou-odi.—Luk 3:19, 20.

Okenọ Jọn ọ jọ uwou-odi na, oke ehaa ẹdẹ-eyẹ Herọd u te te. Herọd o te se ehaa ilogbo. O zizie ikpahwo buobu. Aikpobi a jẹ re jẹ da jẹ re akpọ ku oma. Kẹsena ọmọtẹ Herọdias ọ tẹ lahwe je gbe ile kẹ ae. Ile-igbe riẹ e were ahwo kpobi te epanọ Herọd Ovie na ọ rọ gwọlọ kẹe obọdẹ okẹ jọ. Ọ ta kẹ e nọ: “Koware koware nọ whọ rẹ yare omẹ, mẹ rẹ kẹ owhẹ, makọ abọvo uvie mẹ dede.”

 Eme ọ rẹ yare? Kọ ọ te yare ugho? emamọ iwu? ẹkẹ uwou-ovie riẹ? Ọmọtẹ na ọ riẹ oware nọ ọ rẹ ta ha. Fikiere ọ tẹ nya bru oni riẹ, Herọdias, ọ tẹ ta nọ: ‘Eme mẹ rẹ yare?’

Whaọ Herọdias o mukpahe Jọn Ọhọahwo-Ame na gaga. Fikiere ọ tẹ ta kẹ ọmọtẹ riẹ re ọ yare uzou Jọn. Ọmọtẹ na o te zihe bru ovie na ọ tẹ ta nọ: ‘Mẹ gwọlọ nọ who fi uzou Jọn Ọhọahwo-Ame na họ omodhe kẹ omẹ vẹrẹ.’

Herọd Ovie na ọ gwọlọ kpe Jọn he keme ọ riẹ nọ Jọn yọ emamọ ohwo. Rekọ Herọd ọ yaa eyaa no, yọ ozọ oghẹrẹ nọ amọfa nọ a rrọ ehaa na a ti rri rie u bi mu ei otẹrọnọ o nwene iroro. Fikiere o te vi ohwo kpohọ uwou-odi na re o bru uzou Jọn no. U kri hi ọzae na o te zihe ze. Uzou Jọn o rrọ omodhe evaọ obọ riẹ, ọ tẹ rehọ iẹe kẹ ọmọtẹ na. Ọmọtẹ na ọ tẹ rehọ iẹe se oni riẹ.—Mak 6:17-29.

Ehaa ẹdẹ-eyẹ ọdekọ nọ Ebaibol na e ta kpahe na o woma vi ọnana ha. Ehaa nana e jọ kẹ ovie Ijipti. Evaọ etoke ehaa nana re, ovie na o bru uzou ohwo jọ re. Ọ tẹ rehọ ọzae na hwa  ure re emevra e soro iẹe! (Emuhọ 40:19-22) Kọ who roro nnọ ehaa ivẹ yena e were Ọghẹnẹ?— Kọ o hae were owhẹ re whọ jọ ehaa yena?—

Ma riẹ nnọ eware kpobi nọ a kere fihọ Ebaibol na i wo ẹjiroro nọ a ro kere ai. Ehaa ẹdẹ-eyẹ ivẹ ọvo Ebaibol na e ta kpahe. Yọ evaọ ivẹ na, a ru eware iyoma wọhọ abọjọ ehaa na. Fikiere, eme who roro nọ Ọghẹnẹ ọ be ta kẹ omai kpahe ehaa ẹdẹ-eyẹ na? Kọ Ọghẹnẹ ọ gwọlọ re ma ru ehaa ẹdẹ-eyẹ?—

O rrọ uzẹme inọ eva ehaa itieye na nẹnẹ, a bi bru izou ahwo ho. Rekọ ahwo nọ a be gọ Ọghẹnẹ uzẹme na ha họ enọ i mu ehaa ẹdẹ-eyẹ họ. Ofeme-ulogbo egagọ nọ a re se The Catholic Encyclopedia o ta kpahe ehaa edẹ-eyẹ nọ a ta ẹme te evaọ Ebaibol na nọ: “Erahaizi ọvo . . . i re luje kpahe ẹdẹ nọ a ro yẹ ai.” Kọ whọ gwọlọ rọ aro kele erahaizi?—

Kọ ẹvẹ kpahe Owuhrẹ Ologbo na? Kọ o ru ehaa ẹdẹ-eyẹ riẹ?— Ijo, Ebaibol na e ta uvumọ ẹme kpahe ehaa ẹdẹ-eyẹ nọ a ru kẹ Jesu hu. Evaọ uzẹme, ilele ọsosuọ Jesu a ru ẹdẹ-eyẹ riẹ hẹ. Kọ whọ riẹ oware nọ o soriẹ ze nọ ahwo a rọ salọ December 25 wọhọ ẹdẹ-eyẹ Jesu?—

Wọhọ epanọ ofeme ulogbo na, The World Book Encyclopedia o ta, a salọ ẹdẹ yena keme “ahwo Rom a wo Ehaa Saturn fihọ ẹdẹ yena, ehaa ẹdẹ-eyẹ ọre na.” Fikiere ahwo a salọ nọ a re ru ehaa ẹdẹ-eyẹ Jesu evaọ ẹdẹ nọ egedhọ a salọ kẹ ehaa rai no!

Kọ whọ riẹ oware nọ o gbẹ sae jọ nnọ December a yẹ Jesu hu?— Keme Ebaibol na e ta nnọ okenọ a yẹ Jesu, ithuru-igodẹ e jọ obọ ẹwọ eva aso. (Luk 2:8-12) Yọ o lọhọ họ re a jọ obọ ẹwọ keme amara December yọ oke ekpahe nọ iso e rẹ rrọ.

 Ahwo buobu a riẹ nnọ Kresimesi yọ ẹdẹ-eyẹ Jesu hu. A tubẹ riẹ hẹ nnọ evaọ ẹdẹ yena egedhọ i wo ehaa nọ e rẹ dha Ọghẹnẹ eva. Rekọ ahwo buobu a re ru Kresimesi ghele. Ehaa e rẹ were ae oma vi ẹgwọlọ riẹ oware nọ Ọghẹnẹ o roro kpahe ehaa na. Rekọ Jihova ma gwọlọ ru eva were, ogbẹrọ ere?—

Fikiere okenọ ma te wo ehaa, ma gwọlọ nnọ ehaa na i re kiehọ evaọ aro Jihova. Ma rẹ sai ru ai evaọ oke kpobi evaọ ukpe na. Ma re du hẹrẹ obọdẹ ẹdẹ jọ họ. Ma rẹ sai there obọdẹ emu hayo zaro jọ. Kọ o te were owhẹ re who ru ere?— Ẹsejọhọ whọ sai lele ọsẹgboni ra ta ẹme re a fi obọ họ kẹ owhẹ maa omaa ehaa jọ. Oyena u ti woma gaga, ogbẹrọ ere?— Rekọ taure whọ tẹ te maa omaa ehaa, jọ u mu owhẹ ẹro nọ yọ oware nọ Ọghẹnẹ ọ te jẹ rehọ.

A dhesẹ epanọ u wo uzou te re ma ru oware nọ Ọghẹnẹ ọ rẹ jẹ rehọ ẹsikpobi eva Itẹ 12:2; Jọn 8:29; Ahwo Rom 12:2; gbe 1 Jọn 3:22.

[Uwoho nọ o rrọ ẹwẹ-obe avọ 152]

Fikieme ehaa nana e jẹ were Ọghẹnẹ?

[Uwoho nọ o rrọ ẹwẹ-obe avọ 153]

Eme ọ via eva ehaa ẹdẹ-eyẹ ọ Herọd?

[Uwoho nọ o rrọ ẹwẹ-obe avọ 154]

Fikieme o gbẹ sae rọ jọnọ a yẹ Jesu evaọ December 25 ho?

[Uwoho nọ o rrọ ẹwẹ-obe avọ 156]

Ẹvẹ o sai ro mu omai ẹro inọ ehaa mai e be were Ọghẹnẹ?