KAPU 29

Keti Bafete Yonso Kesepedisaka Nzambi?

KETI nge kezolaka kukwenda na bafete?— Yo le vanda kitoko mpenza. Keti nge keyindula nde Longi ya Nene kezolaka nde beto kwenda na bafete?— Yandi kwendaka na yina beto le binga nde fete ntangu muntu mosi kukwelaka, balongoki na yandi mpi kukwendaka ti yandi. Yehowa ke ‘Nzambi ya kyese,’ mpi yandi kevandaka na kyese ntangu beto kesalaka bafete ya mbote.—1 Timoteo 1:11; Yoane 2:1-11.

Lutiti 29 ya mukanda yai ketubila beto nde Yehowa kukabulaka Nzadi-Mungwa ya Mbwaki na bandambu zole sambu bantu ya Izraele kuluta. Keti nge keyibuka nde beto memonaka dezia mambu yai?— Na nima, bantu kuyimbaka, bo kinaka mpi bo pesaka Yehowa mersi. Yo vandaka bonso fete. Bantu kuvandaka na kyese mpenza, mpi beto kendima nde Nzambi mpi kuvandaka na kyese.—Kubasika 15:1, 20, 21.

Bamvula kiteso ya 40 na nima, bantu ya Izraele kukwendaka na fete yankaka ya nene. Bantu yina kubingisaka bo na mbala yai vandaka kusambila ve Yehowa. Bantu yina kubingisaka bo vandaka nkutu kufukama sambu na kusambila banzambi yankaka mpi bo vandaka kuvukisa nitu ti bantu yina kuvandaka ve bankwelani na bo. Keti nge keyindula nde yo vandaka mbote na kukwenda na fete ya mutindu yina?— Yehowa kusepelaka ve, mpi yandi pesaka bantu ya Izraele ndola.—Kutanga 25:1-9; 1 Korinto 10:8.

 Biblia ketubila dyaka bafete zole ya aniversere ya kilumbu ya kubutuka. Keti mosi na kati ya bafete yango kuvandaka ya kilumbu ya kubutuka ya Longi ya Nene?— Ve. Bafete zole yina ya aniversere ya kilumbu ya kubutuka kuvandaka ya bantu yina vandaka kusadila ve Yehowa. Mosi na kati ya bafete yina ya aniversere ya kilumbu ya kubutuka kuvandaka ya Ntotila Erode Antipasi. Yandi vandaka mfumu ya distrike ya Galilea ntangu Yezu vandaka kuzinga kuna.

Ntotila Erode vandaka kusala mambu mingi ya mbi. Yandi bakaka nkento ya mpangi na yandi ebuna yandi kumisaka yandi nkento na yandi. Zina ya nkento yango kuvandaka Erodiade. Yoane Mbotiki, yina kuvandaka nsadi ya Nzambi, kuzabisaka Erode nde mambu ya yandi salaka kuvandaka ya mbi. Erode kusepelaka ve na dyambu yina Yoane kusongaka yandi. Yo yina yandi tulaka Yoane na boloko.—Luka 3:19, 20.

Ntangu Yoane kuvandaka na boloko, kilumbu ya kusala fete ya kilumbu ya kubutuka ya Erode kulungaka. Erode kusadisaka fete mosi ya nene. Yandi bingisaka bantu mingi ya nene. Bo yonso kudyaka, bo nwaka mpi bo sepelaka mpenza. Na nima, mwana-nkento ya Erodiade kubasikaka na kati ya bantu ebuna yandi kininaka bo. Bantu yonso kusepelaka mingi mpenza na makinu na yandi na mpila nde Ntotila Erode zolaka kupesa yandi dikabu mosi ya kuluta nene. Yandi tubilaka mwana-nkento yango nde: “Konso kima yina ya nge ta lomba mono, mono ta pesa nge yo; ata ntoto yai ya mono  ke yalaka, mono ta kaba yo na ndambu zole, ebuna mono ta pesa nge ndambu mosi.”

Inki yandi zolaka kulomba? Keti yandi zolaka kulomba mbongo? bilele ya kitoko? nzo ya kitoko? Mwana-nkento yina kumonaka ve nki yandi le lomba. Yo yina yandi kwendaka na mama na yandi, Erodiade, ebuna yandi tubaka nde: “Nki kima mono fweti lomba?”

Erodiade vandaka kumenga Yoane Mbotiki mingi mpenza. Yo yina yandi tubilaka mwana na yandi nde lomba ntu ya Yoane. Mwana-nkento yai kuvutukaka na ntotila mpi yandi tubaka nde: “Mono zola nde nge pesa mono sesepi yai kaka ntu ya Yoane-Batiste na zulu ya dilonga.”

Ntotila Erode kuvandaka ve na mpusa ya kufwa Yoane sambu yandi zabaka nde Yoane kuvandaka muntu ya mbote. Kansi, sambu Erode kupesaka mwana-nkento yina lusilu, yandi waka boma ya mambu yina bantu yankaka ya vandaka na fete yango zolaka kuyindula kana yandi sobaka mabanza na yandi. Yo yina yandi tindaka muntu mosi na boloko sambu na kuzenga ntu ya Yoane. Ntama mingi ve, muntu yango kwisaka kuvutuka. Yandi vandaka ti ntu ya Yoane na dilonga, mpi yandi pesaka yo na mwana-nkento yina. Ebuna mwana-nkento yai kupesaka yo na mama na yandi.—Marko 6:17-29.

Fete yankaka ya aniversere ya kilumbu ya kubutuka yina Biblia ketubila kulutaka mpi na mutindu mosi ya mbi. Yo vandaka ya ntotila mosi  ya Ezipte. Na fete yina mpi, ntotila kuzengisaka ntu ya muntu mosi. Ebuna, na nima, yandi tulaka muntu yango na zulu ya nti sambu bandeke kudya yandi! (Kuyantika 40:19-22) Keti nge keyindula nde Nzambi kundimaka bafete yai yonso zole?— Keti nge zolaka kusepela na kuvanda na bafete yina?—

Beto mezaba nde mambu yonso yina kele na Biblia bo sonikaka yo sambu na lukanu mosi. Biblia ketubila kaka bafete ya aniversere zole ya bilumbu ya kubutuka. Mpi mambu ya mbi kusalamaka na bafete yina yonso zole. Nge keyindula nde Nzambi ketubila beto nki na yina metala bafete ya aniversere ya bilumbu ya kubutuka? Keti Nzambi kezola nde beto sala bafete ya aniversere ya bilumbu ya kubutuka?—

Yo ke ya kyeleka nde bo kezengaka ve ba ntu ya bantu na bafete ya mutindu yina ya kesalama bubu yai. Kansi, mambu yai ya kusalaka bafete ya aniversere ya bilumbu ya kubutuka kuyantikaka ti bantu yina vandaka kusambila ve Nzambi ya kyeleka. Mukanda mosi (The Catholic Encyclopedia) ketuba mutindu yai sambu na yina metala bafete ya bilumbu ya kubutuka yina Biblia ketubilaka: “Kaka bantu ya masumu . . . kesalaka bafete ya nene-nene ya bilumbu yina bo butukaka.” Keti beto kezola kuvanda bonso bo?—

Inki beto le tuba sambu na yina metala Longi ya Nene? Keti yandi salaka fete ya aniversere ya kilumbu na yandi ya kubutuka?— Ve, Biblia ketuba ve ata dyambu mosi ya metala fete mosi ya aniversere ya kilumbu ya kubutuka ya Yezu. Ya kyeleka, balongoki ya ntete ya Yezu kusalaka ve fete ya kilumbu ya kubutuka na yandi. Keti nge mezaba sambu na nki na nima bantu kuponaka nde bo tasalaka fete ya aniversere ya kilumbu ya kubutuka ya Yezu na Desembri 25?—

Mukanda mosi (The World Book Encyclopedia) ketuba nde bo ponaka dati yina sambu, “bantu ya Roma vandaka kusala dezia Fete ya Saturne na dati yina, fete ya aniversere ya kilumbu ya kubutuka ya ntangu.” Yo kemonana pwelele nde bantu kuponaka na kusala fete ya aniversere ya kilumbu ya kubutuka ya Yezu na dati yina mimpani vandaka dezia kusala fete na bo!

Keti nge kezaba sambu na nki yo le vanda ve nde Yezu kubutukaka na Desembri?— Sambu Biblia ketuba nde ntangu Yezu kubutukaka, bangungudi kuvandaka kaka na bilanga na mpimpa. (Luka 2:8-12) Mpi bo lendaka ve kuvanda na nganda kuna na kati ya madidi mpi ya mvula ya ngonda ya Desembri.

 Bantu mingi mezaba nde Yezu kubutukaka ve na kilumbu yina ya bo kesalaka fete ya Lubutuku. Nkutu bo mezaba nde yina ke kilumbu ya mimpani vandaka kusala fete mosi yina vandaka kusepedisa ve Nzambi. Kansi, ata mpidina, bantu mingi kesalaka fete ya Lubutuku. Susi na bo kevandaka kaka ya kusala bafete na kisika ya kusosa kuzaba mambu yina Nzambi keyindulaka mpenza sambu na dyambu yango. Kansi, beto kezola kusepedisa Yehowa, mpidina ve?—

Yo yina, kana beto kezola kukwenda na bafete, beto fwe sosa ntete kuzaba kana yo kele ya mbote na meso ya Yehowa. Beto le sala bafete na beto na konso nsungi yina na kati ya mvula. Yo kelomba ve nde beto kinga kaka kilumbu mosi ya mfunu mingi. Beto le dya mwa madya ya beto kemonaka kitoko mingi mpi kusala bansaka ya mbote. Keti nge tazola kusala yo?— Ziku nge le solula ti bibuti na nge sambu bo sadisa nge na kubongisa fete. Keti nge kemona ve nde yo tavanda mbote?— Kansi, na ntwala ya kusala programe ya fete mosi, nge fwe zikisa mbotembote sambu na kuzaba kana Nzambi tandima yo.

Mfunu ya kusalaka ntangu yonso mambu yina Nzambi kendimaka kele mpi na Bingana 12:2; Yoane 8:29; Roma 12:2; mpi 1 Yoane 3:22.

[Kifwanisu ya kele na lutiti 152]

Sambu na nki Nzambi kusepelaka ti fete yai?

[Kifwanisu ya kele na lutiti 153]

Inki dyambu kusalamaka na fete ya aniversere ya kilumbu ya kubutuka ya Erode?

[Kifwanisu ya kele na lutiti 154]

Sambu na nki kubutuka ya Yezu lendaka ve kuvanda na Desembri 25?

[Kifwanisu ya kele na lutiti 156]

Inki mutindu beto le zaba nde bafete na beto kesepedisa Nzambi?