NUANNARAAJUK allat festeqatigissallugit? — Nuannersorujussuusinnaavoq. Isumaqarpit Ajoqersuisorsuup ajorissanngikkaa festerutta? — Ilaanni nammineq katittorsiortunut nalliuttorsioqataavoq, ajoqersugaasalu ilaasa ilagaat. Jehova ‘Guutiuvoq pilluartoq’, taamaattumik akuerisinnaasaminik katerisimaartarnerput nuannisartarnerpullu iluarisarpaa. — 1 Timotheusi 1:11; Johannesi 2:1-11.

Atuakkami matumani qupperneq 29-mi atuarparput Jehovap Imaq Aappalaartoq avissaartikkaa Israelikkut ikaarsinnaaniassammata. Eqqaamaviuk? — Israelikkut ikaareeramik nalliuttorsiorput. Erinarsorlutik qitillutillu Jehova qutsavigaat. Nuannaangaaramik taamaaliorput. Qularinngilluinnarsinnaavarput Jehovap aamma nuannaarsimanissaa. — 2 Mosesi 15:1, 20, 21.

Ukiut 40-ngajaat tamatuma kingorna Israelikkut nalliuttorsiornersuarmut allamut peqataapput. Tamatumuunali Jehovamut pallorfiginninngitsut nalliuttorsioqatigaat. Israelikkunnik qaaqqusisut guutinut allanut allaat pallorfiginnittarput, katissimanngisaminnillu atoqateqartarlutik. Isumaqarpit Jehovap nalliuttorsiorneq tamanna nuannarigaa? — Naamerluinnaq,  Israelikkut nalliuttorsioqataammata pillarpai. — 4 Mosesi 25:1-9; 1 Korinthimiut 10:8.

Biibilimi inuuissiornerit marluk eqqartorneqarput. Taakku arlaat Jiisusimik inuuissiortoorneruppat? — Naamik. Inuuissiortoornerit marluk taakku Jehovamut kiffartortuunngitsunik inuuissiortoornerupput. Aappaa kunngi Herodesi Antipasi inuuissiormat pivoq. Taanna Jiisusip najugaani Galilæami naalakkersuisuuvoq.

Kunngi Herodesi ajortorpassuarnik iliuuseqartarpoq. Qatanngummi nulianut, Herodiasimut, katippoq. Guutip kiffaata Johannesip Kuisisup Herodesi oqarfigaa taamaaliorneq qanoq eqqunngitsigisoq. Herodesip tamanna tusaramiuk nuannarinngilaa, taamaattumillu Johannesi parnaarussaatillugu. — Lukasi 3:19, 20.

Johannesi parnaarussivimmiitillugu Herodesi inuuissiorpoq. Inuppassuarnik nuimasunik qaaqqusivoq. Neripput erngullutik nuannisarlutillu. Taava Herodiasip pania iserpoq qitilerlunilu. Qitinnera tamarmik qiimmatsaatigaat, kunngilu Herodesi aalajangerpoq immikkut ittumik tunissuteqarfiginiarlugu. Ima oqarpoq: ‘Piumasannik sumilluunniit qinnuiginnga, taava tuniumaarpakkit, naalagaaffimmaluunniit affarigaluarpagu!’

 Sunamitaava piumassavaa? Aningaasat? Atisat kusanartut? Illussaarsuaq? Niviarsissap naluaa suna toqqassanerlugu. Taamaattumik anaanaminukarpoq, Herodiasimut, aperalunilu: “Suna qinnutigissavara?”

Herodiasip Johannesi Kuisisoq uumigaa. Panini oqarfigaa Johannesip niaqua piumassagaa. Niviarsiarlu kunngimut uterasuarpoq oqarlunilu: “Kissaatigaara Johannesip Kuisisup niaqua puugutarsuarmiitillugu erniinnaq uannut tunniutissagit.”

Kunngip Herodesip Johannesi toqukkusunngikkaluarpaa nalunnginnamiuk Johannesi angutaasoq ajunngitsoq. Neriorsuutinili eqquutitinngikkuniuk qaaqqusami qanoq oqarnissaat siooragaa. Taamaattumik paarsisoq parnaarussivimmukartippaa Johannesi Kuisisoq niaquersikkiartortillugu. Paarsisoq uterasuarpoq Johannesip niaqua puugutarsuarmiittoq nassarlugu. Niviarsissamut tunniuppaa, niviarsissallu anaanaminut tunniuppaa. — Markusi 6:17-29.

Inuuissiortoornerup aappaa Biibilimi eqqartorneqartoq pitsaanerungaanngilaq. Egyptenip kunngia nalliuttorsiortitsisuuvoq. Aamma nalliuttorsiornermi tamatumani inuk niaquerneqarpoq. Kingornalu nivinngarneqarpoq timaa timmissanit nerineqarniassammat! (1 Mosesi 40:19-22) Isumaqarpit Guutip nalliuttorsiornerit  taakku marluk akuerigai? — Arlaannut ilaarusussimassagaluarpit? —

Nalunngilarput Biibilimi allassimasut ullumikkut ilinniutissarigivut. Inuuissiornerit marluinnaat eqqartorneqarput. Nalliuttorsiornernilu taakkunani ajorluinnartunik pisoqarpoq. Guutimuna inuuissiorneq pillugu qanoq oqaluttuunniaraatigut? —

Ilumoorpoq ullumikkut inuuissiortoortuni niaquiisoqarneq ajormat. Inuuissiortoortarnerli Guutimik ilumoortumik pallorfiginnittuunngitsunit aallarnerneqarpoq. Biibilimi inuuissiortoornernut eqqartorneqartunut atatillugu qinerlerfissiami ima allassimasoqarpoq: “Ajortuliortut kisimik . . . ullormi inuuimminni nalliuttorsiorsuataartarput.” (The Catholic Encyclopedia) Taakkulu assigerusunngilavut, ilaa? —

Ajoqersuisorsuarmi? Inuuissiortarpa? — Naamik, Biibilimi Jiisusip inuuissiornera pillugu allassimasoqanngilaq. Ajoqersugaasa siulliit inuuissiornera nalliuttorsiutigineq ajorpaat. Kingusinnerusukkulli inuit aalajangerput Jiisusi decembarip 24-ani inuuissiortittalerniarlugu; ullumikkut juullimik taaneqartarpoq. Nalunngiliuk sooq taamaaliortut? —

Tassa qanga Romami inuit ullormi tassani nalliuttorsiortarmata. Inuit Jehovamik pallorfiginninngitsut ulloq taanna “seqernup inuuia nalliuttorsiutigisarpaat”. (The World Book Encyclopedia) Taamaammat inuit ilaasa aalajangerpaat ulloq taanna kristumiuunngitsut nalliuttorsiortarfigeriigaat Jiisusip inuuiatut nalliuttorsiorfigisarniarlugu!

Jiisusili decembarimi inuunngunngilluinnarpoq. Qanoq tamanna nalunngilarput? — Tamanna nalunngilarput Biibilimi allassimammat Jiisusi inunngormat unnuami savanik paarsisut narsaammiittut. (Lukasi 2:8-12) Decembarimi taamaassinnaanngillat tamatuma nalaani siallertarlunilu nillertarmat.

Inuppassuit nalunngilaat Jiisusi juullip nalaani inunngunngitsoq. Aammattaaq nalunngilaat inuit kristumiuunngitsut taamanikkut  tamatuma nalaani nalliuttorsiortartut. Nalliuttorsiorneq taanna Guutip akuerinngilaa. Taamaakkaluartorli amerlasuut juullisiortarput. Nalliuttorsiornissartik tunissutisinissartillu Guutip juulli qanoq isigineraa paasinissaanit soqutigineruaat. Uagutsinnulli pingaarneruvoq Jehovap eqqortuuneragaa malissallugu, ilaa? —

Pulaartoqaraangatta ikinngutivulluunniit pulaaraangatsigit Jehovap akuerisinnaasaanik pissuseqartariaqarpugut. Qaqugukkulluunniit katerisimaarsinnaavugut ukioq kaajallallugu. Ulloq aalajangersimasuusariaqanngilaq. Piumalleraangatta qaaqqusisinnaavugut mamartunillu nerilluta nuannisaarlutalu. Qanittukkut pulaartoqarususinnaavit? — Taamaaliorusukkuit taava ataatat anaanallu aperikkit pulaartoqarsinnaanerlutit. Taava oqaloqatigiissutigisinnaavarsi kikkut pulaartissanerlugit sulerissanerlusilu. Eqqaamaannassavat pulaartoqaraanni allanulluunniit pulaaraanni tamatigut Guutip akuerisinnaasaanik iliortariaqarmat.