ជំពូកទី២៩
តើព្រះពេញចិត្តពិធីជប់លៀងទាំងអស់ឬ?
ហេតុអ្វីព្រះពេញចិត្តពិធីជប់លៀងនេះ?
តើកូនចូលចិត្តទៅពិធីជប់លៀងទេ?— ពិធីជប់លៀងធ្វើឲ្យយើងសប្បាយណាស់! តើកូនគិតថាគ្រូដ៏ល្អប្រសើរចង់ឲ្យយើងចូលរួមពិធីជប់លៀងទេ?— តាមពិតលោកធ្លាប់ចូលរួមពិធីជប់លៀងរៀបការមួយ ហើយអ្នកកាន់តាមខ្លះរបស់លោកក៏បានទៅជាមួយនឹងលោកដែរ។ ចំណែកព្រះយេហូវ៉ាវិញ លោកជា«ព្រះដែលមានសេចក្ដីសប្បាយ» ដូច្នេះលោកពេញចិត្តពេលដែលយើងសប្បាយចូលរួមក្នុងពិធីជប់លៀងដ៏ល្អ។—ធីម៉ូថេទី១ ១:១១; យ៉ូហាន ២:១-១១
នៅទំព័រ២៩ក្នុងសៀវភៅនេះរៀបរាប់អំពីពេលដែលព្រះយេហូវ៉ាបានញែកសមុទ្រក្រហម ដើម្បីឲ្យជនជាតិអ៊ីស្រាអែលអាចដើរឆ្លងកាត់បាតសមុទ្រនោះ។ តើកូនចាំរឿងនោះទេ?— ក្រោយមកពួកគេបានច្រៀងរាំនិងអរគុណព្រះយេហូវ៉ា។ នោះដូចជាពិធីជប់លៀងមួយដែរ។ ពួកគេសប្បាយរីករាយណាស់ ហើយនៅពេលនោះព្រះយេហូវ៉ាច្បាស់ជាសប្បាយរីករាយដែរ។—និក្ខមនំ ១៥:១, ២០, ២១
ប្រហែលជា៤០ឆ្នាំក្រោយមក ជនជាតិអ៊ីស្រាអែលបានទៅពិធីជប់លៀងធំមួយទៀត។ នៅពេលនោះ អ្នកដែលបានអញ្ជើញពួកគេមិនមែនជាអ្នកគោរពប្រណិប័តន៍ព្រះយេហូវ៉ាទេ ហើយពួកគេថែមទាំងក្រាបគោរពព្រះផ្សេងៗទៀតផង។ មិនត្រឹមតែប៉ុណ្ណោះ អ្នកទាំងនោះក៏រួមដំណេកជាមួយអ្នកដែលមិនមែនជាគូអាពាហ៍ពិពាហ៍ នៅពិធីជប់លៀងនោះដែរ។ តើកូនគិតថាការចូលរួមពិធីជប់លៀងដូចនោះជាការសមរម្យឬទេ?— ព្រះយេហូវ៉ាមិនពេញចិត្តទេ ហើយលោកបានដាក់ទោសជនជាតិអ៊ីស្រាអែល។—ជនគណនា ២៥:១-៩; កូរិនថូសទី១ ១០:៨
គម្ពីរក៏បានប្រាប់អំពីពិធីជប់លៀងខួបកំណើតពីរដែរ។ តើពិធីមួយក្នុងនោះជាពិធីខួបកំណើតរបស់គ្រូដ៏ល្អប្រសើរឬទេ?— មិនមែនទេ។ ពិធីជប់លៀងទាំងពីរនោះគឺធ្វើឡើងដោយអ្នកដែលមិនបម្រើព្រះយេហូវ៉ា។ ពិធីមួយគឺពិធីជប់លៀងខួបកំណើតរបស់ស្ដេចហេរ៉ូឌអាន់ទីប៉ាស។ គាត់ជាអ្នកគ្រប់គ្រងស្រុកកាលីឡេពេលដែលលោកយេស៊ូរស់នៅទីនោះ។
ស្ដេចហេរ៉ូឌបានធ្វើអំពើអាក្រក់ជាច្រើន។ គាត់បានយកប្រពន្ធរបស់បងប្រុសគាត់។ នាងឈ្មោះហេរ៉ូឌាស។ ដូច្នេះ អ្នកបម្រើរបស់ព្រះឈ្មោះយ៉ូហានដែលជាអ្នកជ្រមុជទឹកបានប្រាប់ហេរ៉ូឌថា គាត់ធ្វើដូច្នោះគឺខុសហើយ។ ហេរ៉ូឌមិនចូលចិត្តអ្វីដែលយ៉ូហានប្រាប់ទេ។ ដូច្នេះហើយហេរ៉ូឌបានចាប់យ៉ូហានដាក់គុក។—លូកា ៣:១៩, ២០
ក្នុងពេលដែលយ៉ូហានជាប់គុក ថ្ងៃខួបកំណើតហេរ៉ូឌក៏មកដល់។ ហេរ៉ូឌបានធ្វើពិធីជប់លៀងដ៏ធំមួយ ហើយបានអញ្ជើញអ្នកធំជាច្រើន។ ពួកគេទាំងអស់គ្នាពិសាស្រានិងអាហារយ៉ាងសប្បាយរីករាយ។ ពេលនោះកូនស្រីរបស់ហេរ៉ូឌាសបានចូលមករាំឲ្យពួកគេមើល។ អ្នកគ្រប់គ្នានៅទីនោះពេញចិត្តនឹងការរាំរបស់នាងណាស់ ដូច្នេះហើយស្ដេចហេរ៉ូឌចង់ឲ្យរង្វាន់ពិសេសដល់នាង។ គាត់ប្រាប់នាងថា៖ «អ្វីក៏ដោយដែលនាងសុំពីខ្ញុំ ខ្ញុំនឹងឲ្យ ទោះជាសុំរាជាណាចក្រខ្ញុំមួយចំហៀងក៏ដោយ»។
តើនាងនឹងសុំអ្វី? តើនាងនឹងសុំមាសប្រាក់ សម្លៀកបំពាក់ស្អាតៗ ឬវាំងផ្ទាល់ខ្លួនមួយឬ? តាមពិតនាងមិនដឹងថាត្រូវសុំអ្វីទេ។ ដូច្នេះនាងបានចេញទៅសួរហេរ៉ូឌាសដែលជាម្ដាយនាងថា៖ «តើខ្ញុំគួរសុំអ្វី?»។
ដោយសារហេរ៉ូឌាសស្អប់យ៉ូហានខ្លាំងណាស់ នាងបានប្រាប់កូនស្រីឲ្យសុំក្បាលយ៉ូហាន។ កូនស្រីបានទៅជួបស្ដេចវិញហើយប្រាប់ថា៖ «ខ្ញុំចង់បានក្បាលរបស់យ៉ូហាន ជាអ្នកជ្រមុជទឹក ដាក់លើថាសភ្លាម»។
ស្ដេចហេរ៉ូឌមិនចង់សម្លាប់យ៉ូហានទេ ព្រោះគាត់ដឹងថាយ៉ូហានជាមនុស្សល្អ។ ប៉ុន្តែហេរ៉ូឌបានសន្យាហើយ ម្យ៉ាងទៀតគាត់ខ្លាចថាអ្នកឯទៀតក្នុងពិធីជប់លៀងនោះនឹងមើលងាយគាត់ បើគាត់មិនធ្វើតាមពាក្យសន្យា។ ដូច្នេះ គាត់បានចាត់បុរសម្នាក់ឲ្យទៅកាត់ក្បាលយ៉ូហាននៅក្នុងគុក។ មិនយូរប៉ុន្មានបុរសនោះមកវិញទាំងមានក្បាលយ៉ូហានដាក់លើថាសមកជាមួយផង ហើយគាត់បានឲ្យទៅនាង។ រួចមកនាងក៏ឲ្យដល់ម្ដាយនាង។—ម៉ាកុស ៦:១៧-២៩
ចំណែកឯពិធីជប់លៀងខួបកំណើតមួយទៀតដែលគម្ពីរប្រាប់ក៏មិនល្អជាងពិធីមុនដែរ។ នោះគឺពិធីជប់លៀងរបស់ស្ដេចអេស៊ីប។ ក្នុងពិធីជប់លៀងនោះ ស្ដេចក៏បានឲ្យគេកាត់ក្បាលបុរសម្នាក់ដែរ។ បន្ទាប់មក គាត់បានព្យួរបុរសនោះឲ្យសត្វស្លាបចឹកស៊ី! (លោកុប្បត្តិ ៤០:១៩-២២) តើកូនគិតថាព្រះពេញចិត្តនឹងពិធីជប់លៀងទាំងពីរនោះទេ?— បើកូននៅទីនោះ តើកូនចង់ចូលរួមពិធីជប់លៀងទាំងនោះទេ?—
នៅពិធីជប់លៀងខួបកំណើតរបស់ហេរ៉ូឌ តើមានអ្វីកើតឡើង?
យើងដឹងថាអ្វីដែលកត់ទុកក្នុងគម្ពីរសុទ្ធតែមានមូលហេតុ។ គម្ពីរមិនគ្រាន់តែប្រាប់អំពីពិធីជប់លៀងខួបកំណើតពីរប៉ុណ្ណោះទេ តែក៏ប្រាប់ដែរថាមានគេធ្វើអំពើអាក្រក់ក្នុងពិធីទាំងពីរនោះ។ ដូច្នេះ តើកូនគិតថាព្រះចង់ប្រាប់យើងយ៉ាងណា អំពីពិធីជប់លៀងខួបកំណើត? តើព្រះចង់ឲ្យយើងធ្វើខួបកំណើតឬទេ?—
ពិតណាស់នៅសព្វថ្ងៃនេះក្នុងពិធីជប់លៀងខួបកំណើត គេមិនកាត់ក្បាលអ្នកណាម្នាក់ទេ។ ប៉ុន្តែ ការធ្វើខួបកំណើតបានផ្ដើមឡើងដោយអ្នកដែលមិនគោរពប្រណិប័តន៍ព្រះពិត។ ស្ដីអំពីពិធីជប់លៀងខួបកំណើតដែលមានចែងក្នុងគម្ពីរ សៀវភៅមួយបានប្រាប់ថា៖ «មានតែអ្នកធ្វើអំពើខុសឆ្គងប៉ុណ្ណោះ . . . ធ្វើពិធីអបអរដ៏អធិកអធមនៅថ្ងៃកំណើតរបស់ពួកគេ» (The Catholic Encyclopedia)។ តើយើងចង់ធ្វើដូចជាពួកគេទេ?—
ចុះគ្រូដ៏ល្អប្រសើរវិញ? តើលោកបានធ្វើខួបកំណើតរបស់ខ្លួនទេ?— អត់ទេ។ គម្ពីរមិនបានប្រាប់អ្វីសោះអំពីពិធីជប់លៀងខួបកំណើតរបស់លោកយេស៊ូ។ តាមពិត អ្នកកាន់តាមដំបូងរបស់លោកយេស៊ូមិនបានធ្វើខួបកំណើតរបស់លោកទេ។ ប៉ុន្តែ ហេតុអ្វីក្រោយមកគេបានសម្រេចធ្វើខួបកំណើតរបស់លោកយេស៊ូនៅថ្ងៃទី២៥ ខែធ្នូ? តើកូនដឹងទេ?—
យោងតាមសៀវភៅមួយបានប្រាប់អំពីមូលហេតុដែលគេបានជ្រើសយកថ្ងៃនោះ ដោយសារ«ពួករ៉ូមធ្លាប់ធ្វើបុណ្យមួយដែលហៅថាបុណ្យព្រះសៅរ៍។ នេះជាពិធីខួបកំណើតនៃព្រះអាទិត្យ» (The World Book Encyclopedia)។ ដូច្នេះ គេបានសម្រេចចិត្តធ្វើខួបកំណើតរបស់លោកយេស៊ូនៅចំថ្ងៃបុណ្យខួបកំណើតនៃព្រះអាទិត្យរបស់អ្នកដែលមិនមែនជាគ្រិស្ដសាសនិក!
ហេតុអ្វីខែធ្នូមិនមែនជាខែដែលលោកយេស៊ូកើត? តើកូនដឹងទេ?— ពីព្រោះគម្ពីរប្រាប់ថា ពេលលោកយេស៊ូកើតមក ពួកអ្នកគង្វាលកំពុងនៅឯវាលក្នុងយប់នោះ។ (លូកា ២:៨-១២) ម្យ៉ាងទៀត ពួកគេមិនអាចនៅខាងក្រៅក្នុងខែធ្នូបានទេ ព្រោះនៅខែនោះត្រជាក់ ហើយមានភ្លៀងធ្លាក់។
ហេតុអ្វីលោកយេស៊ូមិនអាចកើតនៅថ្ងៃទី២៥ ខែធ្នូ?
មនុស្សជាច្រើនដឹងថាបុណ្យណូអែលមិនមែនជាថ្ងៃកំណើតរបស់លោកយេស៊ូទេ។ ម្យ៉ាងទៀត ពួកគេក៏ដឹងដែរថាថ្ងៃនោះជាថ្ងៃបុណ្យរបស់ពួកអ្នកដែលមិនមែនជាគ្រិស្ដសាសនិក ថែមទាំងដឹងថាព្រះមិនពេញចិត្តនឹងពិធីបែបនោះទេ។ ទោះជាយ៉ាងនោះក្ដី មនុស្សជាច្រើននៅតែធ្វើបុណ្យណូអែល។ ពួកគេគិតតែអំពីការជប់លៀងសប្បាយជាជាងគិតថាតើព្រះពិតជាមានអារម្មណ៍យ៉ាងណាអំពីបុណ្យនោះ។ ប៉ុន្តែយើងខុសពីពួកគេ យើងចង់ឲ្យព្រះយេហូវ៉ាពេញចិត្ត មែនទេ?—
ដូច្នេះ ពេលយើងធ្វើជប់លៀង យើងចង់ប្រាកដថា នោះជាពិធីជប់លៀងល្អដែលព្រះយេហូវ៉ាពេញចិត្ត។ យើងអាចមានពិធីជប់លៀងនៅពេលណាក៏បានក្នុងឆ្នាំនោះ មិនចាំបាច់ចាំទាល់តែមានថ្ងៃពិសេសណាមួយទេ។ ជាឧទាហរណ៍ យើងអាចបរិភោគអាហារពិសេសៗ ហើយលេងល្បែងកម្សាន្តផ្សេងៗ។ តើកូនចង់ធ្វើដូច្នោះទេ?— ប្រហែលជាកូនអាចប្រាប់ឪពុកម្ដាយរបស់កូន ហើយសុំពួកគាត់ជួយកូនរៀបចំពិធីជប់លៀងមួយ។ នោះពិតជាសប្បាយណាស់ មែនទេ?— ប៉ុន្តែ មុននឹងកូនរៀបចំពិធីជប់លៀងណាមួយ កូនចង់ប្រាកដថានោះជាពិធីជប់លៀងល្អដែលព្រះយេហូវ៉ាពេញចិត្ត។
តើតាមរបៀបណាយើងអាចដឹងប្រាកដថា ព្រះពេញចិត្តពិធីជប់លៀងរបស់យើង?
ការធ្វើឲ្យព្រះយេហូវ៉ាពេញចិត្តជានិច្ចគឺជាការសំខាន់ ដូចមានរៀបរាប់នៅ សុភាសិត ១២:២ យ៉ូហាន ៨:២៩ រ៉ូម ១២:២ និងយ៉ូហានទី១ ៣:២២។
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
ហេតុអ្វីសាក្សីព្រះយេហូវ៉ាមិនធ្វើបុណ្យខួបកំណើត?
សូមពិចារណាចំណុចបួនយ៉ាងស្តីអំពីបុណ្យខួបកំណើត និងអំពីមូលហេតុដែលព្រះមិនពេញចិត្ត
លោកយេស៊ូ ជាផ្លូវ ជាសេចក្ដីពិត ជាជីវិត
ការប្រហារជីវិតក្នុងពិធីខួបកំណើត
ការសម្ដែងរាំរបស់សាឡូមេបានធ្វើឲ្យហេរ៉ូឌពេញចិត្តយ៉ាងខ្លាំង ហើយគាត់សន្យាថានឹងឲ្យអ្វីក៏ដោយដល់នាង។ តើសំណូមពរដ៏សាហាវឃោរឃៅរបស់នាងគឺជាអ្វី?
