Kauhanyo 29

Kana Mikiti Kaufela Ya Tabisa Mulimu?

KANA wa lata ku yanga kwa mikiti?— Ya kona ku ba ye tabisa. Kana u hupula kuli Muluti yo Mutuna n’a ka tabela kuli lu yange kwa mikiti?— Yena n’a ile ku o konwa ku bizwa kuli mukiti, mutu yo muñwi ha n’a nyala, mi balutiwa ba hae ba bañwi ne ba ile ni yena. Jehova ki “Mulimu ya tabile,” kacwalo wa tabela ha lu ikola kwa mikiti ye minde.—1 Timotea 1:11, NW; Joani 2:1-11.

Fa likepe 29 la buka ye, lu bulelelwa ka za nako f’o Jehova n’a kauhanyize mezi a Liwate le Lifubelu ilikuli Maisilaele ba kone ku sila. Kana wa hupula ku bala taba yeo?— Hasamulaho, batu bao ne ba opezi ni ku bina ni ku lumbeka Jehova. Ne ku swana inge ne ba eza mukiti. Batu ne ba tabile hahulu, mi lwa kona ku kolwa kuli Mulimu ni yena n’a tabile.—Exoda 15:1, 20, 21.

Hamulaho wa lilimo ze bat’o ba ze 40, Maisilaele ne ba ile kwa mukiti o muñwi o mutuna. Kono cwale, batu be ne ba ba memile kwa mukiti w’o ne ba sa lapeli Jehova. Mane, batu be ne ba ba memile bao ne ba kubamelanga milimu ye miñwi mi mane ni ku eza buhule ni batu be ba si ka nyalana ni bona. Kana u bona kuli ne ku lukile ku ya kwa mukiti o cwalo?— Jehova n’a si ka tabela, mi n’a file Maisilaele bao koto.—Numere 25:1-9; 1 Makorinte 10:8.

 Bibele hape i bulela za mikiti ye mibeli ya ku tabela ku pepwa kwa batu. Kana o muñwi ku yona n’e li mukiti wa ku tabela lizazi la ku pepwa kwa Muluti yo Mutuna?— Kutokwa. Sibeli sa mikiti yeo ne i li ya banna be ne ba sa sebelezi Jehova. O muñwi n’e li mukiti wa ku tabela lizazi la ku pepwa kwa Mulena Heroda Antipasi. N’a li mubusi wa sikiliti sa Galilea ka nako ya n’a pilile teñi Jesu.

Mulena Heroda n’a ezize lika ze maswe ze ñata. N’a ikungezi musal’a munyan’a hae. Libizo la musali y’o ne li Herodiasi. Joani Mukolobezi, mutang’a Mulimu, n’a bulelezi Heroda kuli n’a fosize ha n’a ezize nto ye cwalo. Heroda n’a si ka tabela ku bulelelwa cwalo. Kacwalo, a kenya Joani mwa tolongo.—Luka 3:19, 20.

Joani ha n’a sa li mwa tolongo, lizazi la ku eza mukiti wa ku tabela lizazi la ku pepwa kwa Heroda la fita. Heroda a eza mukiti o mutuna. N’a memile batu ba bañata ba ba kutekeha. Kaufel’a bona ne ba cile, ne ba nwile, mi ne ba ikozi. Cwale mwan’a Herodiasi wa musizana kih’a taha mi a t’o ba binela. Batu kaufela ne ba tabile bakeñisa mwa n’a binezi kuli mane Mulena Heroda a bata ku mu fa mpo ye tuna. A mu bulelela a li: “S’o ka kupa kaufela, nihaiba ku ku pumela mubuso wa ka fahali, ni ka ku fa.”

 N’a ka kupañi? Kana n’a ka ikupela masheleñi, liapalo ze nde, kamba muleneñi? Musizana y’o n’a sa zibi sa ku bulela. Kacwalo kih’a ya ku m’ahe, yena Herodiasi, mi a y’o li: “Ni kupe sika mañi?”

Cwale, Herodiasi n’a toile hahulu Joani Mukolobezi. Kacwalo, a bulelela mwan’a hae ku y’o kupa toho ya Joani Mukolobezi. Musizana y’o a kutela ku mulena, mi a y’o li: “Ni lata kuli u ni fe honacwale, mwa mukeke, toho ya Joani Mukolobezi.”

Mulena Heroda n’a sa lati ku bulaya Joani, kakuli n’a ziba kuli Joani n’a li mutu yo munde. Kono Heroda n’a s’a konkile kale, mi n’a saba kuli ha n’a ka cinca, be ne ba tile kwa mukiti ne ba si ke ba mu nga hande. Kacwalo, a luma munna cwana ku y’o puma toho ya Joani mwa tolongo. Hamulahonyana, munna y’o a kuta. N’a shimbile toho ya Joani fa mukeke, mi a i fa musizana y’o. Mi musizana y’o a yo i fa m’ahe.—Mareka 6:17-29.

Mukiti o muñwi wa ku tabela lizazi la ku pepwa o i kandeka Bibele ni ona n’e si o munde. N’e li mukiti wa mulena wa Egepita. Niheba fa mukiti w’o, mulena n’a bulelezi batu ku puma mutu yo muñwi toho. Cwale kihona a paheka situpu sa mutu y’o kuli si ciwe ki linyunywani! (Genese 40:19-22) Kana u bona kuli Mulimu  n’a tabezi mikiti ye mibeli yeo?— Kana n’o ka be u tabezi ku fumaneha kwateñi?—

Lwa ziba kuli ku na ni libaka le i ñolezwi taba kaufela ye mwa Biblele. I lu bulelela ka za mikiti ye mibeli fela ya ku tabela ku pepwa kwa batu. Mi kwa sibeli sa mikiti yeo, ne ku ezizwe lika ze maswe. Kacwalo, ki sifi s’o bona wena kuli ki sona s’a lu bulelela Mulimu ka za mikiti ya ku tabela mazazi a ku pepwa kwa batu? Kana Mulimu u bata kuli lu eze mikiti ya lizazi la ku pepwa kwa luna?—

Ki niti kuli kwa mikiti ye cwalo kacenu, batu ha ba pumangi toho ya yo muñwi. Kono mikiti ya ku tabela mazazi a ku pepwa kwa batu ne i kalisizwe ki batu be ne ba sa lapeli Mulimu wa niti. Buka ye bizwa The Catholic Encyclopedia i bulela cwana ka za mikiti ye bulezwi mwa Biblele ya ku tabela ku pepwa kwa mutu, i li: “Baezalibi ki bona fela . . . ba ba nyakalala hahulu ka za lizazi la ku pepwa kwa bona.” Kana lwa bata ku ba sina bona?—

Muluti yo Mutuna bo? Kana n’a ezize mukiti wa ku tabela lizazi la ku pepwa kwa hae?— Awa, Bibele ha i buleli niheba nto ye kana ka za ku ezwa kwa mukiti wa ku tabela lizazi la ku pepwa kwa Jesu. Mane, balutiwa ba pili ba Jesu ne ba si ka eza mukiti wa ku tabela lizazi la ku pepwa kwa hae. Kana wa ziba libaka batu ha ne ba til’o keta ku eza mukiti wa ku tabela lizazi la ku pepwa kwa Jesu la December 25?—

Lizazi leo ne li ketilwe kakuli, ka mo i taluseza buka ya The World Book Encyclopedia, “ne li lizazi leo batu ba mwa Roma ne ba ezanga Mukiti wa Saturn, ili ku eza mukiti wa ku tabela ku pepwa kwa lizazi.” Kacwalo, batu ne ba ketile ku eza mukiti wa ku tabela lizazi la ku pepwa kwa Jesu fa lizazi leo bahedeni ne ba banga ni pumulo!

Kana wa ziba libaka ha ku sa konwi ku bulelwa kuli Jesu n’a pepilwe mwa December?— Kakuli Bibele i li Jesu ha n’a pepilwe, balisana ne ba sa li mwa mafulisezo busihu. (Luka 2:8-12) Mi ne ba sa koni ku ba mwa mafulisezo mwa December ha ne ku bata ni ku nela pula.

 Batu ba bañata ba ziba kuli lizazi la Ngilisimusi haki lona lizazi la n’a pepilwe Jesu. Mane ba ziba kuli ku lona lizazi leo, bahedeni ne ba na ni mukiti o n’o sa tabisi ku Mulimu. Kono ba bañata ba sa eza mukiti wa Ngilisimusi. Ba iyakatwa hahulu ku eza mukiti ku fita ku iyakatwa ku ziba mw’a hupulela luli Mulimu ka za teñi. Kono lu bata ku tabisa Jehova, nji cwañi?—

Kacwalo, ha lu ba ni mikiti, lu bata ku bona teñi kuli ki ye minde ku Jehova. Lwa kona ku i eza nako ifi kamba ifi mwa silimo. Ha lu swaneli ku libelela lizazi le liñwi le li ipitezi. Lwa kona ku ca lico ze nde ni ku ikola ku eza lipapali. Kana n’o ka tabela ku eza cwalo?— Mwendi wa kona ku ambola ni bashemi ba hao ni ku lukisa ku eza kakiti ka tuso ya bona. Ku eza cwalo ne ku ka ba ko kunde, nji cwañi?— Kono u si ka eza kale milelo ya kakiti, u bata ku bona teñi kuli ikaba kakiti ka ka tabisa Mulimu.

Butokwa bwa ku ezanga z’a amuhela Mulimu hape bu boniswa kwa Liproverbia 12:2; Joani 8:29; Maroma 12:2; ni 1 Joani 3:22.

[Siswaniso se si fa likepe 152]

Ki kabakalañi Mulimu ha n’a tabezi mukiti w’o?

[Siswaniso se si fa likepe 153]

Ne ku ezaheziñi kwa mukiti wa lizazi la ku pepwa kwa Heroda?

[Siswaniso se si fa likepe 154]

Ki kabakalañi Jesu ha n’a si ka pepwa la December 25?

[Siswaniso se si fa likepe 156]

Lu kona ku ikolwisa cwañi kuli mikiti ya luna ki ye tabisa Mulimu?