LELO uswele kutanwa ku masobo nansha ku mafetyi?—Kubwanya kwikala nsangaji ne tusepo mpata. Le molangila Mufundiji Mukatampe ukokeja kwitusakila kwenda ku masobo?—I amo, mwanda nandi wāendele ku masobo a muntu wādi utundaila mukaji, ne bandi bana ba bwanga bamobamo bāendele pamo nandi. Yehova i ‘Leza wa nsangaji,’ o mwanda usangalanga potutanwa ku masobo nansha fetyi miyampe.—1 Temote 1:11; Yoano 2:1-11.

Paje wa 29 wa dino dibuku witusapwila amba Yehova wākalañenye Kalunga Katyila mwanda wa bene Isalela babuke. Le ukivulukile motwatangile’po?—Kupwa kwabuka, bantu bāimbile kadi bājile luja ne kufwija’ko Yehova. Kyādi’nka pamo bu masobo. Bantu bāsangele mpata, kadi tubwanya kunena amba ne Leza mwine wāsangele.—Divilu 15:1, 20, 21.

Kubwipi kwa myaka 40 pa kupita’po, bene Isalela bākatenwe ku masobo makwabo makatampe. Inoko luno lwendo, bantu bēbetyile kebādipo nansha batōta Yehova. Na bubine, bano bantu bēbetyile bādi bafukatyila ne kutōta baleza bakwabo kadi bādi bebidile kulāla busekese na bantu bokebesongelepo nabo. Lelo ulanga amba byādi biyampe kwenda ku masobo a uno muswelo?—Na bubine, Yehova kāsangelepo, o mwanda wāpele bene Isalela mfuto.—Umbadilo 25:1-9; 1 Kodinda 10:8.

 Kadi Bible wisambila pa masobo abidi a mafuku a kubutulwa. Lelo masobo amo ādi a kuvuluka difuku dya kubutulwa kwa Mufundiji Mukatampe?—Ehe. Ano masobo a mafuku a kubutulwa onso abidi ādi a bantu bādi kebengidilapo Yehova. Amo ādi masobo a difuku dya kubutulwa kwa Mulopwe Heloda Antipese. Wādi mbikavu wa ntanda ya Ngadilea kitatyi kyādi’ko Yesu.

Mulopwe Heloda wālongele bintu bibi bivule. Wāyete mukaja mwanabo ke wandi. Dijina dya mwana-mukaji’wa i Helodyasa. Yoano Mubatyiji, mwingidi wa Leza, wāsapwidile Heloda amba i bibi kulonga nabya. Kino kyāfityije Heloda ku mutyima. O mwanda wāelele Yoano mu kifungo.—Luka 3:19, 20.

Difuku dya kuvuluka kubutulwa kwa Heloda pa kufika, Yoano wākidi mu kifungo. Heloda wāsobele masobo nansha fetyi mikatampe. Wāityile’ko bantu ba ntumbo bavule. Bonso bādya, bātoma ne kwisangaja. Penepo mwanā Helodyasa mwana-mukaji wāiya’mo kaebajīla luja. Bonso bāsangedile luja lwandi byamwiko, penepo Mulopwe Heloda kāsake amupe kyabuntu kikatampe mpata. Kāmunena’mba: ‘Kyonso kyowakalomba, shi kika, shi kika, nkupa’kyo, nansha ke kipindi kya bulopwe bwami.’

 Le wālombele kika? Lelo i lupeto’ni? i bivwalwa binengele’ni? nansha i njibo yandi miyampe shē? Nsongwakaji’wa wākomenwe ne kya kulomba kine. Penepo wāenda kudi inandi Helodyasa, kaipangula’mba: ‘Le nkalombe kika le?’

Helodyasa nandi wādi ushikilwe bikatampe Yoano Mubatyiji. Penepa wāsapwila wandi mwana akalombe mutwe wa Yoano. Nsongwakaji’wa nandi wāalukila mudi mulopwe kanena’mba: ‘Nsaka nanshi bampe mutwe wa Yoano Mubatyiji mu nsāni.’

Mulopwe Heloda kādipo usaka kwipaya Yoano mwanda wādi uyukile amba Yoano i muntu muyampe. Inoko Heloda wātyipile mutyipo, ne wādi katyina bikamulangila bantu badi ku masobo shi ashinte mulangwe wandi. O mwanda mwine wātumine mwana-mulume umo ku kifungo amba ende akatyibe Yoano mutwe. Kepāijijepo mulumyana’wa wājoka ne kujoka. Wāiya na mutwe wa Yoano mu nsāni, wāpa’o nsongwakaji’wa. Kupwa nsongwakaji’wa nandi wākapa’o inandi.—Mako 6:17-29.

Masobo makwabo a difuku dya kubutulwa esambila’po Bible nao kēadipo mayampe. Ādi a mulopwe wa Edipito. Mu ano masobo namo, mulopwe wātyibile’mo muntu mutwe. Kupwa kumutyiba’o,  wāyeyeka muntu’wa amba adibwe na byoni! (Ngalwilo 40:19-22) Lelo ulanga Leza wāitabije oa masobo abidi’a?—Lelo nobe wādi ukokeja kwenda’ko?—

Tuyukile amba kyonso kidi mu Bible kidi ne kyokilembelwe. I munenene enka pa masobo abidi kete a mafuku a kubutulwa. Kadi mu onso abidi, mutelwa bintu bibi byālongelwe’mo. Pa kino, le ubwanya kunena amba i kika kitusapwila Leza pangala pa masobo a mafuku a kubutulwa? Lelo Leza witusakila tuvuluke mafuku a kubutulwa kwetu?

Shako dyalelo mu masobo a uno muswelo, bantu kebatyibanga’mopo muntu mutwe. Inoko mulangwe mwine wa kulonga fetyi ya mafuku a kubutulwa wāshilwilwe na bantu kebādipo batōta Leza wa bine. Dibuku dimo dya kipwilo dinenena pa mafetyi a mafuku a kubutulwa alombwelwe mu Bible amba: “Enka banonga-bibi kete . . . bo bādi basangela difuku dyobābutwilwe.” (The Catholic Encyclopedia) Lelo netu tusaka kwibefwana?—

Lelo mufundiji mukatampe nandi? Lelo wālongele fetyi ya difuku dya kubutulwa kwandi?—Ehe, Bible kanenepo amba Yesu wāsobele masobo a difuku dyandi dya kubutulwa. Na bubine, balondi babajinji ba Yesu kebālongelepo fetyi ya difuku dya kubutulwa kwandi. Le uyukile bantu kyobātongele ke mungya kala kulonga fetyi ya difuku dya kubutulwa kwa Yesu mu mafuku 25 Kweji wa 12?—

Enka munene’kyo dibuku dimo, dino difuku dyātongelwe mwanda “bene Loma bādi kala balama’dyo bu Masobo a Saturne, dyo bādi balonga fetyi ya difuku dya kubutulwa kwa dyuba.” (The World Book Encyclopedia) Nanshi bantu bātongele kulonga fetyi ya difuku dya kubutulwa kwa Yesu mu difuku dyādi kala Bajentaila na fetyi!

Lelo uyukile kine kinenenwa amba Yesu kābutwilwepo mu Kweji wa 12?—Mwanda Bible unena amba pābutwilwe Yesu, bakumbi bādi bakesha bufuku mu ntanda. (Luka 2:8-12) Bine, kebādipo mwa kwikadila panja mu mashika makomo, ne mu mvula wa mu Kweji wa 12.

 Bantu bavule bayukile amba Noele ke difukupo dya kubutulwa kwa Yesu. I bayuke kadi amba mu dyadyo difuku Bajentaila bādi balonga fetyi keisangajapo Leza. Ino nansha nankyo, bavule baloñanga fetyi dya Noele. Batele mutyima mpata ku kusoba masobo pa kyaba kya kuyuka kine kilanga’po Leza. Inoko batwe tusakanga kusangaja Yehova, mwene i amo?—

Nanshi shi ketusoba masobo, i biyampe tutadije shi i mayampe ku meso a Yehova. Tubwanya kwiasoba kitatyi kyo-kyonso kyotusaka mu mwaka. Ketukakungilapo enka difuku kampanda ditongwe kala. Tubwanya kudya bidibwa kampanda biyampe kutabuka ne kukaya makayo mayampe. Lelo nobe usakanga kulonga namino?—Nabya ukokeja kwisambila’po na bambutwile bobe bakukwashe mwa kulongolwela masobo. Kino kikekala kiyampe mpata, mwene i amo?—Inoko kubajinji kwa abe kulongolola masobo, bikusakila bidi kuyuka shi akokeja kwitabijibwa na Leza.