UTU musue kuya mu mafesto anyi?​— Mafesto adi mua kusankisha muntu bikole. Udi wela meji ne: Mulongeshi Munene utu musue bua tuikala tuya mu mafesto anyi?​— Dimue dituku wakaya mu tshitudi mua kubikila ne: difesto, pavua muntu mukuabu musele, ne bamue ba ku bayidi bende bakaya nende mu difesto adi. Bu mudi Yehowa muikale “Nzambi wa disanka,” udi umvua disanka patudi tubuela mu mafesto mimpe.​—1 Timote 1:11, NW; Yone 2:1-11.

Mu dibeji dia 29 dia mukanda eu, badi batuambila muvua Yehowa mukose Mbuu Mukunze mu bitupa bibidi bua bena Isalele bamusabuke. Utshidi muvuluke ne: uvua mubale bualu abu anyi?​— Panyima pa bualu abu, bantu bakimba misambu, bakaja maja ne bakela Yehowa tuasakidila. Tshivua anu bu difesto. Bantu bavua ne disanka dia bungi. Tudi kabidi mua kuamba ne: Nzambi uvua pende ne disanka.​—Ekesode 15:1, 20, 21.

Kunyima kua bidimu bitue ku 40, bena Isalele bakaya ku difesto dikuabu dinene. Kadi bua musangu eu, bantu bavua bababikile kabavua nansha batendelela Yehowa to. Bantu bavua bababikile abu bavua binamina nzambi mikuabu bua kuyitendelela ne bavua ne tshilele tshibi tshia kuangatangana ne bantu bavua kabayi bena dibaka nabu. Udi wela meji ne: bivua bimpe bua  kuya mu difesto dia mushindu eu anyi?​— Yehowa kakasanka to, wakapesha bena Isalele abu dinyoka.​—Nomba 25:1-9; 1 Kolinto 10:8.

Bible udi kabidi wakula bua mafesto abidi a mifikilu ya diledibua. Dimue dia ku mafesto aa divua dia kusekelela dituku dia diledibua dia Mulongeshi Munene anyi?​— Tòo. Mafesto a mufikilu wa diledibua onso abidi aa avua a bantu bavua kabayi benzela Yehowa mudimu. Dimue divua difesto dia mufikilu wa diledibua dia Mukalenge Helode Antipa. Uvua mfumu wa tshitupa tshia buloba tshia Galela pavua Yezu musombelamu.

Mukalenge Helode wakenza malu mabi a bungi. Wakangata mukaji wa muanabu kuluaye mukajende. Dîna dia mukaji eu divua Helodia. Musadidi wa Nzambi Yone Mubatiji wakambila Helode ne: tshivuaye muenze atshi tshivua tshibi. Helode kavua musue tshivua Yone mumuambile to. Ke bualu kayi wakelesha Yone mu buloko.​—Luka 3:19, 20.

Dituku dia kusekelela diledibua dia Helode diakafika pavua Yone muikale mu buloko. Helode wakenzeja difesto dinene. Wakabikila bantu banene ba bungi. Bonso bakadia, bakanua ne bakasanka. Ke muana wa Helodia wa bakaji kubuela mu tshialu e kuja maja muaba au. Bantu bonso kusanka bikole bua maja avuaye muje au, Mukalenge Helode e kujinga kumupesha tshintu tshia pa buatshi. Wakamuambila ne:  “Tshionso tshiwandomba, nenkupetshio, nansha tshia-bibidi tshia bukalenge buanyi!”

Uvua mua kulomba tshinyi? Makuta anyi? bilamba bilenga anyi? dibalasa dia nzubu buende yeye nkayende anyi? Nsongakaji wakapangila tshia kulomba. Ke kuyaye kudi mamuende Helodia e kumuebeja ne: “Ndombe tshinyi?”

Bu muvua Helodia mukine Yone Mubatiji bikole, wakambila muanende bua kulombaye mutu wa Yone. Nsongakaji kupingana kudi mukalenge e kuamba ne: ‘Ndi musue umpeshe mutu wa Yone Mubatiji pa dilonga anu mpindieu.’

Mukalenge Helode kavua musue kushipa Yone to, bualu uvua mumanye ne: Yone uvua muntu muimpe. Kadi bu mukavuaye mulaye, uvua utshina bua mushindu uvua bakuabu bavua mu difesto adi mua kuela meji bu yeye mua kupanga kukumbaja tshivuaye mulaye. Nanku wakatuma muntu mu buloko bua kukosa Yone mutu. Katantshi aka muntu wakalukila muambule mutu wa Yone pa dilonga, ne kuupeshaye nsongakaji au. Nsongakaji pende kuupesha mamuende.​—Mâko 6:17-29, MMM.

Difesto dikuabu dia mufikilu wa diledibua didi Bible wakula bualu buadi kadivua padi dimpe nansha. Difesto edi divua dia mukalenge wa mu Ejipitu. Mu difesto adi kabidi, mukalenge wakakosesha  mutu wa muntu mukuabu. Ne pashishe, wakakudika muntu au kuulu bua nyunyu kudiayi tshitalu tshiende! (Genese 40:19-22) Udi wela meji ne: Nzambi uvua muanyishe mafesto abidi aa anyi?​— Wewe uvua mua kuitaba bua kuikalamu pebe anyi?​—

Tudi bamanye ne: malu onso adibu bafunde mu Bible mbaafunde bua bualu kampanda. Bible udi wakula anu bua mafesto abidi patupu a mifikilu ya diledibua. Ne mu onso abidi aa, malu mabi akenzeka. Nunku, newambe bishi: Nzambi udi utuambila tshinyi bua mafesto a mifikilu ya diledibua? Nzambi mmusue bua ne: tuenze fete bua mifikilu ya diledibua anyi?​—

Mbulelela se: mu mafesto a nunku lelu bantu kabatu bakosa mutu wa muntu kampanda to. Kadi tshidibi, bualu bua kuenza fete bua mifikilu ya diledibua buakatuadija kudi bantu bavua kabayi batendelela Nzambi mulelela. Mukanda mukuabu udi wamba bua misekelelu ya mifikilu ya diledibua ne: “Anu benji ba mpekatu . . . ke bavua benza mafesto manene bua dituku divuabu babalele.” (The Catholic Encyclopedia) Tudi basue kubafuana anyi?​—

Netuambe tshinyi bua Mulongeshi Munene? Wakenzejaku fete bua kusekelela dituku dia diledibua diende anyi?​— Tòo, Bible kêna uleja muaba nansha umue ne: Yezu wakenza fete bua mufikilu wa diledibua diende to. Bushuwa, bayidi ba kumpala ba Yezu kabavua basekelela mufikilu wa diledibua diende to. Udi mumanye bua tshinyi bantu bakalua kusungula bua kuikala kusekelela mufikilu wa diledibua dia Yezu mu dia matuku 25 a ngondo wa dikumi ne muibidi anyi?​—

Mukanda mukuabu udi wamba ne: bakasungula dituku adi bualu “bantu ba mu Lomo bakavua badisekelela bu Difesto dia Saturne, basekelela diledibua dia dîba.” (The World Book Encyclopedia) Ke bualu kayi bantu bakasungula bua kusekelela diledibua dia Yezu mu dituku dia difesto dia bampangano!

Udi mumanye bua tshinyi Yezu kavua mua kuikala muledibue mu ngondo wa dikumi ne muibidi anyi?​— Bualu Bible udi wamba ne: pavuabu balele Yezu, balami ba mikoko bavua pambelu butuku. (Luka 2:8-12) Kabavua mua kuikala pambelu mu ngondo wa dikumi ne muibidi mutu mashika makole ne mvula to.

 Bantu ba bungi mbamanye ne Nowele ki ndituku dia diledibua dia Yezu to. Mbamanye kabidi ne: mu dituku adi bampangano bavua ne difesto divua Nzambi kayi musue to. Kadi nansha nanku, ba bungi badi anu basekelela Nowele. Tshidibu batamba kukeba buobu nkuikala ne difesto kampanda pamutu pa kujinga bua kumanya tshidi Nzambi wela meji menemene bua difesto adi. Kadi tuetu tudi basue kusankisha Yehowa, ki mmuomu anyi?​—

Nunku patudi tuenza mafesto, tudi basue kujadika ni adi mimpe ku mêsu kua Yehowa. Tudi mua kuenza mafesto dîba dionso ditudi basue munkatshi mua tshidimu. Kabiena bikengela kuindila anu dituku dia pa buadi to. Tudi mua kulongolola didia dia pa buadi ne kuenza manaya adi asankisha. Udi musue kuenza nanku anyi?​— Udi pamuapa mua kuyikila ne baledi bebe ne kulongolola difesto ne diambuluisha diabu. Abi nebikale bimpe, ki mmuomu anyi?​— Kadi kumpala kua kulongolola difesto, anji kuikala mujadike ne: ntshintu tshikala Nzambi mua kuanyisha.