ABO gusta fiesta?— Fiesta por ta hopi dushi. Bo ta kere ku e Gran Maestro ke pa nos bai fiesta?— Wèl, e mes a yega di bai un fiesta riba un dia ku dos hende a kasa, i un par di su disipelnan a bai kuné. Yehova ta e Dios felis, i e gusta pa nos pasa dushi na fiesta, basta ku e fiesta ta bon.—1 Timoteo 1:11; Juan 2:1-11.

Na página 29 di e buki aki nos a mira kon Yehova a habri Laman Kòrá pa laga e israelitanan pasa dor di dje. Bo ta kòrda ku nos a les’é?— Despues e pueblo a kanta, balia i gradisí Yehova. Tabata manera un fiesta. E pueblo tabata hopi kontentu, i nos por tin sigur ku Dios tambe tabata kontentu.—Eksodo 15:1, 20, 21.

Kasi 40 aña despues, e israelitanan a bai un otro fiesta grandi. Pero e biaha aki e hendenan ku a invitá nan no tabata adorá Yehova mes. E hendenan ku a invitá nan tabata asta bùig pa adorá otro dios, i nan tabata tene relashon seksual ku hende ku no ta nan kasá. Bo ta kere ku e israelitanan a hasi bon di bai un fiesta asina?— Wèl, Yehova no a keda kontentu, anto el a kastigá e israelitanan.—Numbernan 25:1-9; 1 Korintionan 10:8.

Beibel ta konta nos di dos fiesta di hasimentu  di aña tambe. Bo ta kere ku un di nan tabata pa selebrá e dia ku e Gran Maestro a hasi aña?— Nò. Tur dos fiesta di hasimentu di aña tabata pa hòmbernan ku no ta sirbi Yehova. Un di nan tabata fiesta di hasimentu di aña di Rei Herodes Antipas. E tabata goberná e distrito di Galilea tempu ku Hesus tabata biba einan.

Rei Herodes a hasi hopi kos malu. El a kuminsá biba ku e kasá di su ruman hòmber. E kasá tabata yama Herodias. Juan Boutista, un sirbidó di Dios, a bisa Herodes ku loke el a hasi ta malu. Herodes no a gusta ku Juan a bis’é e kos ei, anto p’esei el a laga nan sera Juan den prizon.—Lukas 3:19, 20.

Ora Juan tabata den prizon, a yega dia pa selebrá hasimentu di aña di Herodes. Herodes a pone un fiesta grandi. El a invitá hopi hende importante. Nan tur a kome, bebe i pasa bon. E ora ei e yu muhé di Herodias a bin balia pa nan. Tur hende a gusta su baliamentu asina tantu ku Rei Herodes kier a dun’é un regalo spesial. El a bis’é: “Kiko ku bo pidi mi lo mi duna bo, asta mitar di mi reino.”

Kiko bo ta kere ku el a pidi? Plaka, paña bunita òf un palasio  pa su mes? E mucha muhé no tabata sa kiko pa bisa. P’esei el a bai serka su mama Herodias i a bis’é: “Kiko lo mi pidi?”

Awor, dor ku Herodias tabatin hopi rabia riba Juan Boutista, el a bisa su yu muhé p’e pidi kabes di Juan. E mucha muhé a bai bèk serka e rei, anto a bis’é: “Mi kier pa awor aki mes bo duna mi kabes di Juan Boutista riba un teblachi.”

Rei Herodes no kier a mata Juan, pasobra e tabata sa ku Juan ta bon hende. Pero ya Herodes a primintí e mucha muhé ku e ta dun’é kiko ku e pidié, i e tabatin miedu di loke e otro hendenan lo pensa si e kambia di idea. P’esei, el a manda un hòmber bai den prizon i kap Juan su kabes afó. E hòmber a bolbe den un ratu di ora. E tabatin Juan su kabes riba un teblachi. El a duna e mucha muhé e teblachi, anto e mucha muhé a duna su mama.—Marko 6:17-29.

E otro hasimentu di aña ku Beibel ta papia di dje no tabata mas mihó tampoko. E fiesta aki tabata pa un rei di Egipto. Durante e fiesta aki tambe e rei a laga kap kabes di un hende afó. Anto despues el a kologá e hòmber na un palu pa paranan  kom’é! (Génesis 40:19-22) Bo ta kere ku Dios a keda kontentu ku e dos fiestanan ei?— Abo lo tabatin gana di bai e fiestanan ei?—

Nos sa ku tur kos ku tin skirbí den Beibel ta skirbí ku un motibu. Beibel ta konta di dos hasimentu di aña so. Anto tur dos biaha, kos malu a sosodé komo parti di e selebrashon. P’esei, kiko bo ta kere ku Dios ta bisando nos tokante fiesta di hasimentu di aña? Dios ke pa nos selebrá hasimentu di aña?—

Ta bèrdat ku awendia nan no ta kap kabes di hende afó na fiestanan asina. Pero ta hende ku no ta adorá e Dios berdadero a bin ku e idea di selebrá hasimentu di aña. Wak kiko un ensiklopedia tokante religion ta bisa di e selebrashonnan di hasimentu di aña ku Beibel ta papia di dje: “Ta pekadónan so . . . ta hasi fiesta grandi pa selebrá e dia ku nan a nase.” (The Catholic Encyclopedia) Nos ke ta manera nan?—

Kiko di e Gran Maestro? E tabata selebrá su hasimentu di aña?— Nò, Beibel no ta papia di niun fiesta di hasimentu di aña pa Hesus. I e promé siguidónan di Hesus tampoko no tabata selebrá su hasimentu di aña. Bo sa dikon despues hende a disidí di selebrá Hesus su nasementu riba dia 25 di desèmber?—

Un ensiklopedia ta bisa ku nan a skohe e fecha ei dor ku ‘e hendenan na Roma tabata selebrá e dia ei kaba komo fiesta di Saturno. Nan tabata selebrá nasementu di solo.’ (The World Book Encyclopedia) Kier men, e hendenan a disidí di selebrá nasementu di Hesus riba un fecha ku e paganonan tabatin un fiesta kaba!

Bo sa pakiko no por ta ku Hesus a nase den desèmber?— Pasobra Beibel ta bisa ku ora Hesus a nase, ainda e kuidadónan di karné tabata pafó, maske a bira anochi. (Lukas 2:8-12) I nan lo no a keda pafó den desèmber, pasobra kaminda Hesus a nase ta hasi friu i awa ta kai hopi den e luna ei.

 Hopi hende sa ku Hesus no a nase riba dia di Pasku. Asta nan sa ku riba e dia ei, paganonan tabata selebrá un fiesta ku Dios no ta gusta. Pero hopi hende ta selebrá Pasku tòg. Nan tin mas gana di hasi fiesta ku di haña sa si Dios gusta e fiesta ei òf nò. Pero nos sí ke hasi Yehova kontentu, no?—

P’esei, ora nos hasi un fiesta, nos mester hasi sigur ku Yehova ta haña ku e ta bon. Nos por hasi fiesta riba kualkier dia. Nos no tin nodi warda te ora un dia spesial yega. Nos por kome kuminda spesial, hunga wega i pasa prèt. Bo tin gana di hasi esei?— Kisas bo por papia ku bo mama i bo tata, pa huntu boso plania un fiesta. Lo ta dushi, no?— Pero promé ku boso kuminsá plania e fiesta, ta bon pa boso hasi sigur ku Dios ta haña ku e ta bon.