¿FIESTASMAN riy gustasunkichu?... Fiestaspeqa mayta kusirikusunman. ¿Jesús munanmanchu fiestasman rinanchejta?... Pay, wakin yachachisqasnin ima, uj casarakuman rerqanku. Chantapis Jehovaqa “kusikuyniyoj Dios”. Payqa allinpaj qhawasqan fiestaspi kusirikojtinchej, kusikullantaj (1 Timoteo 1:11, NM; Juan 2:1-11).

Kay libroj 29 paginanpi yachakorqanchej, Puka Qochata Jehová iskayman tʼaqarparisqanta, israelitas chimpanankupaj. ¿Yuyarikunkichu?... Chimpasqankutawan israelitasqa takerqanku, tusorqanku, Jehovamantaj agradecekorqanku. Uj fiesta jinapuni karqa. May kusisqa kasharqanku, Diospis kusikullarqatajchá (Éxodo 15:1, 20, 21).

Israelitasqa 40 watanman jina, waj fiestamanñataj rerqanku. Chay fiestata ruwajkunaqa waj dioskunata yupaychaj kanku, nitaj Jehovatachu. Chantapis mana casaraspalla qhariwarmi jina puñuykoj kanku. ¿Allinchu karqa chayman rinanku?... Jehovaqa israelitaspaj maytapuni  phiñakorqa, castigarqataj (Números 25:1-9; 1 Corintios 10:8).

Bibliaqa iskay runas cumpleañosninkuta ruwasqankuta nin. ¿Mayqellanpis chay iskaymanta Jesuschu karqa?... Mana. Iskaynin cumpleañosqa Jehovata mana yupaychajkunajta karqa. Ujnenqa Herodes Antipaspata karqa. Payqa Jesuspa tiemponpi Galileaj japʼiyninpi kaj llajtasta kamachisharqa.

Kamachej Herodesqa ashkha sajra imasta ruwarqa. Cuñadan Herodiastapis warminpaj japʼikaporqa. Juan Bautistaqa chayta ruwasqanmanta Herodesta kʼamerqa. Herodestaj chaymanta phiñakuspa, Juanta carcelman wisqʼacherqa (Lucas 3:19, 20).

Juan wisqʼasqa kashajtin, Herodesqa cumpleañosninta ruwananpaj uj jatun fiestata ruwarqa, may rejsisqa runastataj wajyarikorqa. Chay fiestapeqa mikhorqanku, ujyarqanku, kusirikorqankutaj. Chantá Herodiaspa warmi wawan tusorqa. Tususqantaj paykunaman mayta gustarqa, chayrayku Herodes chay sipasman nerqa: “Imatachá mañawasqaykita qosqayki, reinoypa khuskanninkamapis”, nispa.

 ¿Imatataj mañakunman karqa? ¿Qolqetachu? ¿Kʼachitu ropatachu? ¿Uj sumaj jatun wasitachu? Chay sipasqa mana yacharqachu imatachus mañakunanta. Chayrayku maman Herodiasta tapumorqa: “Imatataj mañakuymanri?”, nispa.

Herodiasqa Juan Bautistata mayta chejnikusqanrayku, wawanman nerqa: “Juan Bautistaj umanta mañay”, nispa. Chantá sipasqa kutiykuspa, Herodesman nerqa: ‘Kunanpacha qoway uj charolapi Juan Bautistaj umanta’, nispa.

Herodesqa Juanta sumaj runapaj qhawarqa, nitaj wañuchiyta munarqachu. Jinapis jurasqanta mana juntʼajtin, imatachus runas ninankumanta llakikorqa. Chayrayku uj soldadota kacharqa Juanpa umanta qholurparimunanpaj. Chay soldadotaj chay rato kutimuspa, Juanpa umanta charolapi sipasman jaywarqa. Sipastaj mamanman chayta jaywarqa (Marcos 6:17-29).

Bibliaqa Egiptomanta reypa cumpleañosninmanta parlallantaj. Chaypis nillataj allinchu karqa. Imajtinchus reyqa, chay fiestapi  uj runaj umanta qholuchillarqataj. Chantá chay runaj ayanta warkhuchimorqa, pʼesqos aychasninta mikhukapunankupaj (Génesis 40:18-22). ¿Allinpajchu Dios chay iskay fiestasta qhawarqa?... ¿Chay fiestaspi kayta munawajchu karqa?...

Bibliapi tukuy qhelqasqaqa mana qhasillachu kashan. Bibliataj iskay cumpleañosllamanta parlan. Iskayninpitaj sajra imasta ruwakorqa. ¿Imatá Dios chaywan yachachiyta munashawanchej? ¿Munanchu cumpleañosta ruwanata?...

Kay tiempopeqa cumpleañospi mana pejpa umantapis qholunkuchu. Jinapis cumpleañostaqa Diosta mana yupaychajkuna qallaricherqanku. Biblia parlan chay cumpleañosmanta, uj libro nin: “Juchasapaslla [...] nacekusqanku diata yuyarinapaj fiestata ruwanku”, nispa (The Catholic Encyclopedia). ¿Paykuna jinachu kayta munanchej?...

¿Jesús cumpleañosninta ruwajchu?... Mana. Bibliaqa mana ninchu Jesús cumpleañosta ruwasqanta. Yachachisqasninpis manallataj ruwajchu kanku. Chantá, ¿imaraykú runas Jesuspa cumpleañosninta 25 de diciembrepi ruwayta qallarerqanku?...

Chaymanta uj libro nin: “Romapi tiyakojkunaqa Saturno nisqa diospaj fiestata ruwajña kanku. Chay diataj intita diachaj kanku”, nispa (The World Book Encyclopedia). Diosta mana yupaychajkunaqa intita diachaj kanku chay diallatataj Jesuspa cumpleañosninta ruwanankupaj ajllarqanku.

Chantapis Jesusqa mana diciembrepichu nacekorqa. ¿Yachankichu imaraykuchus?... Biblia nin jina, Jesús nacekushajtin michejkunaqa ovejasta tutantin qhawaspa kasharqanku (Lucas 2:8-12). Diciembrepeqa mana tutantin jawapi kayta atinkumanchu karqa. Imaraykuchus chay killa, jaqay lugarpi chirin, parantaj.

 Ashkha runasqa yachanku Jesús mana Navidad diapichu nacekusqanta. Chantapis yachallankutaj chay día, Diosta mana yupaychajkuna uj fiestata ruwajña kasqankuta, Diostaj chay fiestata mana allinpajchu qhawasqanta. Jinapis ashkha runasqa Navidadta ruwallankupuni. Paykunaqa kusirikuyllapi yuyanku, nitaj Dios imatachus chaymanta yuyasqanpi tʼukurinkuchu. Noqanchejtajrí Jehovata kusichiyta munanchej, ¿icharí?...

Chayrayku, uj fiestitata ruwaspaqa Jehovata kusichinanpaj jina ruwana. Chay fiestatataj maykʼajllapis ruwayta atisunman. Chay diapi sumaj mikhunata waykʼurikusunman, pujllarispataj kusirikusunman. ¿Chayta ruwayta munawajchu?... Tatasniykiwan parlariwaj, paykuna wakichiyta yanapasunankupaj. ¿Sumajcharí kanman?... Niraj uj fiestitata wakichishaspataj, Diosta kusichinapaj jina kananpi tʼukurina.