¿KUSIKUNKICHU ima fiestamanpas rispayki?... ¿Jesusqa kusikunmanchu ima fiestamanpas riptinchik?... Paypas wakin qatiqninkunawanmi huk kutipi casamientoman rirqa. Jehova Diospas ‘kusikuq Dios’ kaspanmi kusikun munasqanman hina kusirikuykunaman riptinchikqa (1 Timoteo 1:11; Juan 2:1-11).

Kay qillqapa 29 kaq paginanpim yachamurqanchik Israel llaqtanta chimpachinanpaq puka lamar quchata Jehova Dios kichasqanmanta. ¿Yuyachkanki?... Israel runakunaqa chimparuspankum kusikuymanta takirqaku, tusurqaku hinaspa Diostapas hatuncharqaku. Jehova Diospas kusikurqachá (Exodo 15:1, 20, 21).

Chaymanta yaqa 40 wata pasaytañataqmi Moab llaqtapi runakunawan kusirikuq Israel runakunaqa rirqaku. Chay runakunaqa taytacha-mamacha yupaychaqkuna hinaspa huchapakuqkunam karqaku. Paykunaqa manam Jehova Diostaqa yupaychaqkuchu. ¿Allinchu karqa chayna runakunawan kusirikuy?... Jehova Diospaqqa manam allinchu karqa, chaymi Israel runakunapaq  sinchita piñakurqa (Numeros 25:1-9; 1 Corintios 10:8).

Bibliapiqa willakuntaqmi santokuq iskay runakunamanta. ¿Jesuspa santokusqanchu huk kaqnin kanman karqa?... Manam. Chay santokuq runakunaqa Diosta mana yupaychaq runakunam karqaku. Huk kaqninmi karqa Jesuspa tiemponpi Galilea llaqtata kamachiq Herodes runapa santon.

Herodesqa llumpay mana allinkunata ruwaq kaspanmi wawqinpa Herodias sutiyuq warmintapas qichururqa. Chayna mana allin ruwasqanmantam Herodestaqa bautizaq Juan qaqcharqa, hinaptinmi Herodesqa rabiaspan carcelpi wichqarachirqa (Lucas 3:19, 20).

Chayna carcelpi bautizaq Juan kachkaptinmi Herodespa santon chayaramurqa. Hinaspanmi riqsisqa runakunata qayachispan santokurqa. Llapanku mikuchkaptinku hinaspa kusikuchkaptinkum Herodiaspa warmi wawan yaykuruspan paykunapaq tusurqa. Chay tususqan llapankupaq sumaqllaña kaptinmi Herodesqa kusikuymanta chay sipasta nirqa: ‘Imataña mañakuwaptikipas  qusqaykim, kamachisqay llaqtakunapa partentapas qusqaykim’, nispa.

¿Imatam mañakunman karqa? ¿Qullqita, kuyayllapaq pachata utaq hatun wasita? Sipasqa mana ima mañakuytapas yachaspanmi mamanta tapukurqa: “¿Imatataq mañakuyman?”, nispa.

Herodiasñataqmi bautizaq Juanta llumpayta chiqnisqanrayku nirqa Juanpa umanta mañakunanpaq. Chaymi sipasqa Herodespa chayman rispan nirqa: “Kunallan quykuway huk platopi bautizaq Juanpa umanta”, nispa.

Herodesñataqmi Juanqa allin runa kasqanta yachaspan llakirikurqa. Chayna kaptinpas uyariqnin runakunawan pinqaypi kayta mana munaspanmi mañakusqanta quykurqa. Chaymi huk kaqnin soldadonta kamachirqa Juanpa umanta qururamunanpaq. Soldadoñataqmi Juanpa umanta qururamuspan sipasman quykuptin sipasqa mamanman quykurqa (Marcos 6:17-29).

Huk kaqnin santokuq runañataqmi karqa Egipto nacionta kamachiq runa. Kay runapas santokusqan punchawpim tanta  ruwapuqnin runapa umanta qururachirqa, hinaspapas warkunankupaqmi kamachirqa alton pawaq animalkunawan mikuchinanpaq (Genesis 40:19-22). ¿Allinchu karqa Jehova Diospaq kay iskay santokuna?... ¿Munawaqchu karqa chaykunapi kayta?...

Bibliapi tarikuq willakuykunaqa manam yanqapaqchu kachkan. Kay iskay runakunapa santokusqanku punchawpiqa mana allinkunatam ruwarqaku. Hinaptinqa, ¿ima niytataq Jehova Dios munachkanman kaykunata willawaspanchik? ¿Santokunanchiktachu munachkanman?...

Manamá kay tiempopi santokunapiqa pitapas umantaqa qurunkuchu. Ichaqa kay santokuykuna qallarichiq runakunaqa manam Jehova Dios serviqchu karqaku. Chaykunamanta rimaq qillqam nin: “Huchasapa runakunallam [...] tukuyta ruwaspa santokuqku”, nispa (The Catholic Encyclopedia). ¿Paykuna hina kaytachu munachwan?...

¿Jesusqa santokuqchu?... Manam, bibliapiqa manam chaymantaqa imatapas willakunchu. Manataqmi qatiqninkunapas santokurqakuchu. Hinaptinqa, ¿imanasqataq runakunaqa 25 diciembre killapiqa Jesuspa santonta yuyarinku?...

Chay punchawta runakuna imanasqa akllasqankumantam huk qillqa nin: “Roma nacionpi runakunaqa chay punchawmi saturno sutiyuq taytachapaq fiestata ruwaspa intitapas santochiqku”, nispa (The World Book Encyclopedia). Chaynaqa, Jesuspa nacesqan punchawtam Diosta mana serviq runakunapa fiestankuwan tuparachirqaku.

Jesusqa, ¿diciembre killapichu nacenman karqa?... Manam. Bibliapiqa ninmi Jesus naceptinqa oveja michiqkuna chakrankupi puñusqankuta (Lucas 2:8-12). Diciembre killapim ichaqa oveja michiqkunaqa mana chakrankupiqa puñuqkuchu llumpayta parakusqanrayku hinaspa chirikusqanrayku.

 Achka runakunam yachanku Jesusqa 25 diciembre killapi mana nacesqanta hinaspa Diosta mana serviq runakunapa fiestan kasqantapas. Chaywanpas kusirikuyllapi umayuq kaspankum navidad fiestataqa hinalla ruwanku, paykunataqa manam imapas qukunchu chay fiestamanta bibliapa ima nisqanqa. Ñuqanchikmi ichaqa Jehova Diospa munasqanta ruwayta munanchik ¿aw?...

Chaymi ima kusirikuy ruwasqanchikpas Jehova Diospa munasqanman hina kanan. Ima punchawpas chaytaqa ruwachwanmi, manam runakuna hinaraqchu watantinraq chaypaqqa suyananchik. Ima mikuyllatapas yanukuspam hinaspa pukllarispam kusirikuchwan. ¿Chaykuna ruwayta munawaqchu?... Ichapas tayta mamaykiwan tanteaspa imallatapas ruwawaqchik ¿aw?... Ichaqa Jehova Diospa munasqanman hinam kanan.