¿GUSTASUNKICHU fiestaman riy?... Fiestakunaqa kusikunapaqmi. ¿Munanchu Jesús fiestaman rinanchista?... Juj kutinmi paypas qatikuqninkunawan kuska casarakuy fiestaman riranku. Jehová Diospas ‘kusisqa Diosmi’, paypas kusikunmi allin fiestakunapi kusikuqtinchis (1 Timoteo 1:11; Juan 2:1-11).

29 paginapin yacharanchis Puka lamar-qochata Jehová Dios iskayman t’aqasqanta. Chaynintan Israel llaqta pasaran salvasqa kanankupaq, ¿yuyashankichu?... Qochata pasaruspan israelitakuna Diosta agradecekuspa tusuranku takiranku ima. Juj fiestapi jinan llapa runakuna kusisqa kasharanku. Jehová Diospas kusikuranchá chayta rikuspaqa (Éxodo 15:1, 20, 21).

40 wata qhepamanmi israelitakuna juj fiestaman riranku. Chay fiestataqa Diosta mana serviq runakunan ruwaranku. Paykunaqa pantasqa dioskunatan adoraranku, jinaspapas mana casado kashaspan jujkunawan puñuranku. ¿Allinchu karan chay fiestaman riy?... Manan  allinchu karan. Chaymi Jehová Diosqa paykunata castigaran (Números 25:1-9; 1 Corintios 10:8).

Biblian willan iskay runakuna cumpleañonkupi fiestakusqankumanta. ¿Jesuspa cumpleañontachu festejaranku?... Manan. Chay fiestakunataqa Diosta mana serviq runakunan ruwaranku. Jujninpa sutinmi karan Herodes Antipas, payqa Galilea llaqtapin rey karan.

Chay reyqa mana allinkunatan ruwaran. Payqa hermanonpa warminwanmi tiyapuran, chay warmiq sutinmi karan Herodías. Bautizaq Juanmi Herodesta niran chay ruwasqan mana allin kasqanta. Chaywan phiñakuspan Herodesqa Juanta carcelpi wisq’achiran (Lucas 3:19, 20).

Chay qhepamanmi reypa cumpleañon chayamuran, jinan reyqa amigonkunata invitaspa fiestata ruwaran. Chaypin llapallanku mijusharanku machasharanku ima. Jinan Herodiaspa ususin paykunapaq tusupuran. Llapallankun kusisqa kasharanku  munay tususqanmanta. Chaymi reyqa sipasta niran: “Imapas mañakuwasqaykitaqa qosaykipunin, kamachisqay llaqtaq kuskannintaña mañakuwanki chaypas qosaykin”, nispa.

Chay sipasqa manan yacharanchu ima mañakuyta. Yaqapaschá munasharan qolqeta, munay p’achata, otaq juj sumaq palaciota. Chaymi sipasqa mamanman rispa tapuran: “¿Imatan mañakuyman?”, nispa.

Herodiasqa Bautizaq Juantan sinchita cheqnikuran. Chaymi ususinta niran: “Bautizaq Juanpa umanta mañakuy”, nispa. Jinan sipasqa reyta niran: “Bautizaq Juanpa umanta kunanpacha juj platopi qoway”, nispa.

Reyqa yacharanmi Bautizaq Juan allin runa kasqanta. Ichaqa llapa invitasqan runakunaq ñaupanpi prometesqanraykun sipaspa mañakusqanta qoran. Juj soldadotan kamachiran carcelta rispa Juanpa umanta qhorumunanpaq. Jinan soldadoqa rispa Juanpa umanta juj platopi apamuran. Chaytan reyqa sipasman qoran, sipastaq mamanman aparan (Marcos 6:17-29).

 Juj runan cumpleañonpi fiestata ruwallarantaq. Payqa karan Egipto llaqtapi reymi. Chay reypas fiestakusqan p’unchaypin juj runaq umanta qhoruchiran. Chay qhepamanmi chay runaq cuerponta campopi warkuchimuran animalkuna mijupunanpaq (Génesis 40:19-22). ¿Allinpaqchu Dios qhawariran chay iskay fiestakunata?... Qanri, ¿riwaqchu karan chay fiestakunaman?...

Bibliaqa chay iskay cumpleañokunallamantan willashan. Chay iskay fiestakunapiqa mana allinkunatan ruwaranku. ¿Imatan chaywan Jehová Dios yachachiwanchis? ¿Munanchu cumpleañonchis chayamuqtin fiesta ruwananchista?...

Kay tiempopiqa manan pipas cumpleaño fiestanpi runakunata wañuchinchu. Ichaqa yuyariy, Diosta mana adoraq runakunan chay fiestataqa qallarichiranku. Bibliaq willasqan cumpleañokunamanta rimaspan juj qelqa nin: “Juchasapakunallan [...] nacesqanku p’unchaypi jatun fiestata ruwanku”, nispa (The Catholic Encyclopedia). ¿Munasunmanchu chay runakuna jina kayta?...

¿Festejaranchu Jesús cumpleañonta?... Manan, Bibliaqa manan willanchu chay ruwasqanta. Jesuspa apostolninkunapas manan jayk’aqpas Jesuspa cumpleañontaqa festejarankuchu. Chhaynaqa, ¿imaynapin 25 diciembre p’unchaypi Jesuspa nacesqanta festejayta qallariranku?...

Juj libron nin: ‘Chay p’unchaypin Roma runakuna Saturno diosta festejaqku, “intiq cumpleañonmi”’, nispa (The World Book Encyclopedia). Chay fiestaq rantinpin Jesuspa nacesqan p’unchayta festejanankupaq ajllaranku.

Jesusqa manan diciembre killapichu naceran. ¿Imaraykun chayta ninchis?... Biblian willan Jesuspa nacesqan p’unchayta michiqkuna tutantin campopi ovejankuta qhawaspa kasqankuta (Lucas 2:8-12). Diciembre killapiqa nishutan chay  llaqtakunapi chirinpas paranpas. Chaymi mana pipas tutataqa campopi qhepakuqchu.

Askha runakunan yachanku Jesusqa mana 25 diciembre p’unchaypichu nacesqanta. Yachankun pantasqa religionkunamanta paqarisqantapas. Chaywanpas kusikuyllapi piensaspan ruwashallanku navidad fiestata. Manataqmi yachayta munankuchu imaynatan Dios qhawarin chay fiestata. Noqanchismi ichaqa Diospa sonqonta kusichiyta munanchis ¿riki?...

Diosta kusichinapaqqa paypa munasqan fiestakunatan ruwananchis, manataqmi imapas kanantaraqchu suyananchis. Chaypin sumaq mijunata mijuspa amigonchiskunawan kasunman. ¿Munawaqchu chay jina fiestapi kayta?... Yaqapaschá tayta-mamaykiwan rimawaq juj fiestata ruwanaykichispaq. Munaymi kanman ¿riki?... Ichaqa Diosta kusichinapaq jinan kanan.