ETE fiafia e te alu i pātī?— E mafai ona tele mea e fiafia ai i se pātī. O le ā sou manatu, faamata e manaʻo le Faiaʻoga Sili e tatou te ō i pātī?— Na auai Iesu ma nisi o ona soo i se faatasiga e tai pei o se pātī, ina ua faaipoipo se tasi tagata. O Ieova o le ʻAtua fiafia,’ o lea la, e fiafia Ieova pe a tatou fiafia i pātī lelei.​—1 Timoteo 1:11; Ioane 2:1-11.

O loo faamatalaina i le itulau e 29 o le tusi lenei, le taimi na vaelua ai e Ieova le Sami Ulaula ina ia savavali ai tagata Isaraelu. E te manatua le taimi na e faitau ai i le tala lenā?— Mulimuli ane, na pepese ma sisiva tagata e faafetai ai iā Ieova. E pei lava na fai sa latou pātī. Na matuā fiafia tagata, ma e tatou te mautinoa na fiafia foʻi le Atua.​—Esoto 15:1, 20, 21.

Ina ua mavae tausaga e 40, na toe auai foʻi tagata Isaraelu i se isi pātī telē lava. Peitaʻi, o tagata na valaauliaina i latou, e lē tapuaʻi iā Ieova. O nei tagata, e tapuaʻi i isi atua ma e masani ona latou faia feusuaʻiga ma tagata latou te leʻi faaipoipo i ai. O le ā sou manatu, faamata e lelei le auai i se pātī faapena?— E leʻi fiafia Ieova i le pātī lenā, ma na ia faasalaina tagata Isaraelu.​—Numera 25:1-9; 1 Korinito 10:8.

 O loo faamatala foʻi e le Tusi Paia pātī o ni aso fanau se lua. Pe sa faamanatu le aso fanau o le Faiaʻoga Sili i se tasi o pātī na?— E leai. O pātī o aso fanau nei e lua, na faia mo ni tagata e lē auauna iā Ieova. O se tasi pātī, na faia mo le aso fanau o le tupu o Herota Anetipa. Na pulea e Herota le itumalo o Kalilaia i le taimi a o nofo ai Iesu.

O le tele ia o mea leaga na faia e le tupu o Herota. Na fao e le tupu le avā a lona uso. O Herotia le igoa o le fafine lenā. Na taʻu atu e le auauna a le Atua o Ioane le Papatiso iā Herota, e sesē lana mea na fai. E leʻi fiafia Herota i lenā tala ma o le māfuaaga lenā na falepuipui ai Ioane.​—Luka 3:19, 20.

A o falepuipui Ioane, na faamanatu ai le aso fanau o Herota. Na faia e Herota se pātī telē lava. Na valaaulia e Herota le toʻatele o tagata e maualuga o latou tulaga. Na latou aai ma feinu, ma fiafia. Ona alu atu lea o le tama teine a Herotia, ua siva i o latou luma. Na fiafia tele tagata i lana siva, ma na manaʻo le tupu o Herota e ave i ai se meaalofa faapitoa. Na fai atu Herota: ʻSo o se mea e te fai mai ai, ou te avatu lava iā te oe, e oo lava i le ʻafa o loʻu malo.’

 O le ā le mea e manaʻo i ai le teine? Po o le a manaʻo i tupe, ofu mananaia, po o sona fale telē? E leʻi iloa e le teine se tala e fai. O lea na alu atu ai i lona tinā o Herotia ma fai atu: “Se ā se mea ou te fai atu i ai?”

O le ita ia o Herotia iā Ioane le Papatiso. O lea na fai atu ai i lana tama, e talosaga atu mo le ulu o Ioane. Na alu atu loa le teine i le tupu ma faapea atu: “Ou te manaʻo ina ia e au mai nei lava le ulu o Ioane le papatiso i se tanoa.”

E leʻi manaʻo le tupu o Herota e fasioti Ioane, ona e iloa e le tupu, o Ioane o se tagata lelei. Peitaʻi, ua uma ona fai le folafolaga a Herota, ma na popole i le vaaiga a tagata sa iai i le pātī pe afai e sui lona manatu. O lea na ia auina ai se tagata i le falepuipui e tipi ese le ulu o Ioane. E leʻi umi ae toe foʻi mai le tamāloa. Ua sau ma le ulu o Ioane i totonu o se tanoa ma tuuina atu i le teine. Ona alu atu lea o le teine ma ave i lona tinā.​—Mareko 6:17-29.

E faapena foʻi le isi pātī o le aso fanau lea e taʻua i le Tusi Paia. Na fai le pātī lenei mo le tupu o Aikupito. A o fai le pātī lenei, na faatonu foʻi e le tupu e tipi ese le ulu o se tagata.  Mulimuli ane, na faatautau ai le tino o le tamāloa e ʻai e manufelelei! (Kenese 40:19-22) O le ā sou manatu, na fiafia Ieova i pātī e lua na?— Pe e te fia auai i na pātī?—

E tatou te iloa, e iai māfuaaga lelei ua tusia ai tala o le Tusi Paia. E na o le lua lava pātī o aso fanau o loo taʻua ai. I pātī uma na e lua, na fai ai ni mea leaga ina ia faamanatu ai aso fanau. O le ā sou manatu, o le ā o taʻu mai e le Atua e uiga i pātī o aso fanau? Pe e finagalo le Atua tatou te faamanatuina aso fanau?—

E moni, e lē tipieseina se ulu o se tagata i pātī o aso fanau i aso nei. Peitaʻi, o le faamanatuina o aso fanau, na amata mai i tagata e leʻi tapuaʻi i le Atua moni. Ua faapea mai se tusi faalotu: “E na o tagata agasala . . . e matuā fiafia i aso na latou fananau mai ai.” (The Catholic Encyclopedia) Pe tatou te mananaʻo ia pei o na tagata?—

Ae ā le Faiaʻoga Sili? Pe na faamanatu e Iesu lona aso fanau?— E leai, e lē o taʻua mai lava i le Tusi Paia se pātī na faamanatu ai le aso fanau o Iesu. O le mea moni, e leʻi faamanatuina e uluaʻi soo o Iesu lona aso fanau. E te iloa le māfuaaga na filifili mulimuli ai tagata e faamanatu le aso fanau o Iesu, iā Tesema 25?—

E tusa ai ma se tasi tusi, na filifilia lenā aso ona “ua leva ona fai e tagata Roma i le aso lava lenā, le Faigaʻai iā Satana e faamanatu ai le aso fanau o le lā.” (The World Book Encyclopedia) O lea la, na filifili tagata e faamanatu le aso fanau o Iesu, i le aso ua leva ona fai ma aso fiafia a tagata faapaupau!

E te iloa le māfuaaga e lē fetaui ai ona fanau mai Iesu iā Tesema?— Auā o loo faapea mai le Tusi Paia, na iai leoleo mamoe i fafo i le pō i le taimi na fanau ai Iesu. (Luka 2:8-12) E lē mafai la ona latou iai pea i fafo i le masina o Tesema, auā o se masina e mālūlū ma e tetele ai timuga.

 E toʻatele tagata latou te iloa, e leʻi fanau Iesu i le aso o le Kirisimasi. E latou te iloa foʻi, na fai le faigaʻai a tagata faapaupau i le aso lava lenā, lea e lē fiafia i ai le Atua. Ae ui i lea, e faamanatu pea e le toʻatele o tagata le Kirisimasi. E sili atu lo latou naunau i le faia o se pātī na i lo le iloaina po o le ā o manatu moni i ai le Atua. Peitaʻi, tatou te mananaʻo e faafiafia Ieova, a ea?—

A faapea la e fai ni a tatou pātī, e tatau ona tatou faamautinoa e fiafia i ai Ieova. E mafai ona fai a tatou pātī i so o se aso o le tausaga. E lē moomia fua ona tatou faatali i se aso faapitoa. E mafai ona fai ni a tatou meaʻai mananaia, ma taaalo fiafia i taaloga. Pe e te fiafia i se mea faapena?— Atonu e mafai ona e talanoa i ou mātua, ma fuafua ai se pātī. O le manaia ia o lenā mea, a ea?— Peitaʻi, a o leʻi fuafuaina se pātī, e tatau ona e faamautinoa o le a fiafia i ai le Atua.