YU LOBI fu go na fesa?— Den kan de wan prisiri sani srefisrefi. Yu denki taki a Bigi Leriman wani taki wi e go na fesa?— We, a ben go na wan fesa di ben hori gi wan sma di trow, èn wan tu disipel fu en ben go nanga en. Yehovah na „a koloku Gado”, èn fu dati ede a e prisiri te wi e abi wan switi ten na fesa di fiti.​—1 Timoteyus 1:11; Yohanes 2:1-11.

Bladzijde 29 fu a buku disi e fruteri wi taki Yehovah ben prati a Redi Se na tu, fu meki den Israelsma koti abra. Yu e memre a sani dati ete?— Bakaten, den sma ben e singi èn dansi, èn den ben e taki Yehovah tangi. A ben de leki wan fesa. Den sma ben e prisiri trutru, èn wi kan de seiker taki Yehovah ben e prisiri tu.​—Exodus 15:1, 20, 21.

Pikinmoro 40 yari baka dati, den Israelsma go na wan tra bigi fesa. Disi leisi, den sma di ben gi den wan kari no ben de anbegiman fu Yehovah srefi. Fu taki en leti, den sma di ben gi den wan kari ben boigi srefi fu anbegi tra gado, èn den ben gwenti fu abi seks demakandra nanga sma di no ben de a trowpatna fu den. Yu denki taki a ben fiti fu go na so wan fesa?— We, Yehovah no ben feni en bun, èn a strafu den Israelsma.​—Numeri 25:1-9; 1 Korentesma 10:8.

 Bijbel e taki sosrefi fu tu friyari-oso. A ben de so taki wan fu den ben de fu memre a dei di a Bigi Leriman gebore?— Nôno. Ala den tu friyari-oso disi ben hori gi sma di no ben e dini Yehovah. Wan fu den friyari-oso ben hori gi Kownu Herodes Antipas. A ben de a tiriman fu a distrikt Galilea na a ten di Yesus ben e libi drape.

Kownu Herodes ben du furu takru sani. A ben teki a wefi fu en brada gi ensrefi. Na uma disi ben nen Herodias. Yohanes a Dopuman di ben de wan futuboi fu Gado, ben taigi Herodes taki a sani di a ben du no ben bun kwetikweti. Herodes no ben lobi san Yohanes ben taigi en. Fu dati ede a meki sma poti Yohanes na strafu-oso.​—Lukas 3:19, 20.

Yohanes ben de na strafu-oso, di a friyaridei fu Herodes doro. Herodes hori wan bigi fesa. A kari furu heihei sma kon. Den alamala nyan èn dringi èn den prisiri. Ne na umapikin fu Herodias kon èn a dansi gi den. Fu di ala sma ben prisiri so te nanga a fasi fa a ben dansi, meki Kownu Herodes ben wani gi en wan spesrutu kado. A taigi en: „Iniwan sani di yu e aksi mi, mi sa gi yu, awansi na afu fu a kownukondre fu mi.”

 San na umapikin disi ben o aksi fu kisi? A ben o aksi moni? Moi krosi? En eigi kownu-oso? A meisje no ben sabi san a ben musu aksi. Fu dati ede a go na en mama, Herodias, èn a taki: „San mi musu aksi?”

Now a ben de so taki Herodias ben teige Yohanes a Dopuman srefisrefi. Fu dati ede a taigi en umapikin fu aksi a kownu na ede fu a man disi. A meisje go baka na a kownu èn a taki: „Mi wani taki wantewante yu musu gi mi na ede fu Yohanes a Dopuman na tapu wan plata preti.”

Kownu Herodes no ben wani kiri Yohanes fu di a ben sabi taki Yohanes ben de wan bun man. Ma Herodes ben meki wan pramisi, èn a ben frede san den tra sma na a fesa ben o denki efu a ben kenki en prakseri. Sobun a seni wan man go na a strafu-oso fu koti na ede fu Yohanes puru. Heri esi a man kon baka. A ben abi na ede fu Yohanes na tapu wan plata preti, èn a gi en na a meisje. Baka dati a meisje gi en na en mama.​—Markus 6:17-29.

A tra friyari-oso di Bijbel e taki fu en, no ben de tra fasi kwetikweti. A ben hori gi wan kownu fu Egepte. Na a  fesa disi sosrefi, a kownu meki sma koti wan man en ede puru. Èn baka dati, a anga a man meki fowru nyan en! (Genesis 40:19-22) Yu denki taki Gado ben feni den tu fesa disi bun?— Yu ben o wani de na den fesa dati?—

Wi sabi taki iniwan sani na ini Bijbel skrifi fu leri wi wan sani. Bijbel e taki fu tu friyari-oso nomo. Èn na ala tu fu den, sma du takru sani. Sobun, san yu denki Gado wani leri wi fu friyari-oso? Gado wani taki wi e hori friyari-oso?—

A tru taki na ini a ten disi, sma no e koti trawan ede puru na den sortu fesa dati. Ma na sma di no ben e anbegi a tru Gado bigin nanga a gwenti fu hori friyari-oso. Disi na san wan buku e taki fu den friyari-oso di kari na ini Bijbel: „Na sondari wawan . . . e prisiri srefisrefi nanga a dei di den gebore” (The Catholic Encyclopedia). Yu wani de leki den sma dati?—

Fa a ben de nanga a Bigi Leriman? A ben e hori fesa fu memre a dei di a gebore?— Nôno, Bijbel no e taki dati sma ben e hori friyari-oso gi Yesus. Fu taki en leti, den fosi bakaman fu Yesus no ben e hori fesa fu memre en a dei di a gebore. Yu sabi fu san ede sma bosroiti bakaten fu memre a friyaridei fu Yesus tapu 25 december?—

Den teki a dei dati, bika soleki fa wan buku e taki, „den sma fu Rome ben e hori wan fesa kaba tapu a dei disi, ma a fesa dati ben nen a Fesa fu Saturnus. A fesa disi ben de fu memre a friyaridei fu a son” (The World Book Encyclopedia). Sobun, sma bosroiti fu memre a friyaridei fu Yesus tapu wan dei di ben de wan heiden fesadei kaba!

Yu sabi fu san ede a no kan taki Yesus gebore na ini december?— Fu di Bijbel e taki dati di Yesus ben gebore, dan skapuman ben de na ini den gron ete na netiyuru (Lukas 2:8-12). Èn den no ben o de na dorosei na ini a mun december, bika a pisi ten dati kowru èn furu alen e fadon.

 Furu sma sabi taki Kresneti no de a friyaridei fu Yesus. Den sabi srefi taki na a dei dati, den heiden ben e hori wan fesa di Gado no ben feni bun. Ma toku furu sma e hori Kresneti. Den feni taki a moro prenspari fu hori wan fesa, leki fu kon sabi san Gado e denki trutru fu a fesa dati. Ma wi wani du san Yehovah feni bun, a no so?—

Sobun, te wi e hori fesa, dan wi wani sorgu taki Yehovah feni den fesa disi bun. Wi kan hori den na iniwan ten fu a yari. Wi no abi fu wakti wan spesrutu dei. Wi kan meki wan tu spesrutu sani fu nyan, èn wi kan kisi prisiri fu di wi e prei difrenti sani nanga makandra. Yu ben o wani dati?— Kande yu kan aksi yu papa nanga mama fu yepi yu sreka wan fesa. Dati ben o de wan prisiri sani, a no so?— Ma bifo yu e sreka sani fu hori wan fesa, yu musu sabi seiker taki Gado feni a fesa dati bun.