Cibalo 29

Sena Mapobwe Oonse Alamukkomanisya Leza?

SENA ulacikkomanina kujanika kumapobwe?— Alakonzya kaakondelezya kapati. Sena uyeeya kuti Mwiiyi Mupati inga waciyanda kuti katujanika kumapobwe?— Walo wakajanika kupobwe lyabwiinga lyamuntu umwi wakali kukwata, alimwi abasikwiiya bakwe bamwi bakajanika. Jehova ngu “Leza uukkomene,” aboobo ulakondwa eelyo natubona katusekelela ciindi camapobwe aali kabotu.—1 Timoteo 1:11, NW; Johane 2:1-11.

Apeeji 29 mubbuku lino twaambilwa kuti Jehova wakaandula Lwizi Lusalala kutegwa bana Israyeli bainde. Sena uciyeeyede kuti wakaabala makani aaya?— Kuzwa waawo, bantu bakaimba akuzyana alimwi akulumba Jehova. Cakali mbuli kuti ndipobwe. Ibantu aabo bakalikkomene kapati, alimwi tulakonzya kusyoma kuti awalo Leza wakalikkomene.—Kulonga 15:1, 20, 21.

Kakwiindide myaka iitandila ku 40, bana Israyeli bakajanika kupobwe limbi lipati. Aciindi eeci ibantu bakabatambide tiibakali bakombi ba Jehova pe. Bwini mbwakuti, ibantu bakabatambide bakali kukotamina akukomba baleza bambi alimwi bakali aacilengwa cakoonana lyoonse abantu mbobatakakwetene ambabo. Sena uyeeya kuti cakali buyo kabotu kujanika kupobwe lili boobo?— Jehova wakabanyemena, aboobo wakabasubula bana Israyeli.—Myeelwe 25:1-9; 1 Ba-Korinto 10:8.

 Ibbaibbele alimwi lilijisi makani aajatikizya mapobwe obile aakusekelela buzuba bwakuzyalwa. Sena limwi lyakali lyakusekelela buzuba mbwaakazyalwa Mwiiyi Mupati?— Peepe. Imapobwe oonse obile aaya akali akusekelela buzuba bwakuzyalwa kwabantu batakali kubelekela Jehova. Lyomwe lyakali lyakusekelela buzuba bwakuzyalwa kwa Mwami Heroda Antipa. Ngowakali mweendelezi wacooko ca Galilaya aciindi Jesu naakali kukkala nkuko.

Mwami Heroda wakacita zintu zibyaabi zinji. Wakakwata mukaintu wamwanookwabo. Izina lyakwe wakali Herodiya. Imubelesi wa Leza, Johane Mubapatizi wakaambila Heroda kuti tiicakaluzi pe kucita boobo. Imakani aayo akamunyemya Heroda. Aboobo wakabikka Johane muntolongo.—Luka 3:19, 20.

Johane kacili muntolongo, buzuba bwakusekelela kuzyalwa kwa Heroda bwakasika. Heroda wakabamba pobwe lipati. Wakatamba bantu balemekwa banji. Boonse bakalya akunywa akusekelela kapati. Mpoonya mwana musimbi wa Herodiya wakaboola akubazyanina. Bantu boonse bakakukkomanina kapati kuzyana kwakwe cakuti Mwami Heroda wakayanda kuti amupe cipego cilibedelede. Wakamwaambila kuti: ‘Coonse ncotindikumbile ndakupa ncico, niciba cisela cabwami bwangu.’

Ino ncinzi ncaakali kunga wakumbila? Sena  mmali, zisani zibotu naa munzi uukkalwa mwami iwakwe mwini? Imusimbi ooyo wakabula cakulomba. Aboobo wakaunka kuli banyina ba Herodiya akubabuzya kuti: “Ino nkakumbilenzi?”

Ono koyeeya kuti Herodiya wakali musulide kapati Johane Mubapatizi. Aboobo wakaambila mwanaakwe musimbi kuti akakumbile mutwe wa Johane. Imusimbi ooyo wakapiluka kumwami akumwaambila kuti: “Ndayanda kuti undipe ndilyonya lino mutwe wa-Johane Mubapatizi mumutiba.”

Mwami Heroda tanaakali kuyanda kumujaya pe Johane akaambo kakuti wakalizyi kuti Johane wakali muntu uuli kabotu. Pele Heroda wakalisyomezyezye, alimwi wakali kuyoowa ncobakali kunga bayeeya bambi bakali kupobwe ikuti naatakazuzikizya eeco ncaakaambide. Aboobo wakatuma muntu kuunka kuntolongo kuyookosola mutwe wa Johane. Mukaindi kaniini buyo, imwaalumi ooyo wakapiluka. Wakaboola amutwe wa Johane mumutiba, eelyo wakaupa musimbi ooyo. Mpoonya musimbi ooyo wakaupa banyina.—Marko 6:17-29.

Ipobwe limbi lyakusekelela buzuba bwakuzyalwa ilyaambwa mu Bbaibbele tiilyakali libotu pe alyalo. Lyakali lyamwami waku Egepita. Mbubwenya buyo, nolyakali kucitwa alyalo pobwe eeli, imwami  wakalailila kuti kukosolwe mutwe wamuntu umwi. Kuzwa waawo, wakaanzika mutumba wamuntu ooyo mucisamu kutegwa uligwe bayuni! (Matalikilo 40:19-22) Sena uyeeya kuti Leza wakaakkomanina mapobwe aayo obile?— Sena yebo nowakayanda kujanika kumapobwe aayo?—

Tulizyi kuti coonse cilembedwe mu Bbaibbele kuli mulimo ngocijisi. Ibbaibbele lyaamba buyo mapobwe obile aakusekelela buzuba bwakuzyalwa. Alimwi kumapobwe obile oonse kwakacitwa zintu zibyaabi. Aboobo, uyeeya kuti ncinzi Leza ncali mukutwaambila kujatikizya mapobwe aakusekelela mazuba aakuzyalwa? Sena Leza ulayanda kuti katwaasekelela?—

Ee, mazubaano kumapobwe aali boobo bantu tabakosoli mutwe wamuntu pe. Pele imakani aaya aakusekelela mazuba aakuzyalwa akatalika abantu ibatakali kukomba Leza wakasimpe. Ikujatikizya mapobwe aaya aambwa mu Bbaibbele, ibbuku lyabukombi limwi lyaamba kuti: “Balikke basizibi . . . mbabaakkomanina kapati mazuba nobaazyalwa.” (The Catholic Encyclopedia) Sena aswebo tuyanda kuba mbuli basizibi?—

Ino mbuti kujatikizya Mwiiyi Mupati? Sena wakabusekelela buzuba bwakuzyalwa kwakwe?— Peepe, kunyina Bbaibbele nolyaamba makani aajatikizya pobwe lyakusekelela buzuba bwakuzyalwa kwa Jesu. Mubwini, basikutobela ba Jesu bakusaanguna kunyina nobakabusekelela buzuba bwakuzyalwa kwakwe. Sena ulizyi ibantu ncobakazi kusala buzuba bwa December 25 kuti bube buzuba bwakusekelela kuzyalwa kwa Jesu?—

Ibuzuba oobo bwakasalwa akaambo kakuti, mbubwenya mbolyaamba bbuku limwi, “bana Roma bakali kubusekelela kale buzuba oobo kabuli bwa Pobwe lya Saturn (inyenyeezi), kabasekelela buzuba bwakuzyalwa kwazuba.” (The World Book Encyclopedia) Aboobo bantu bakasala kunoosekelela buzuba bwakuzyalwa kwa Jesu mubuzuba bantu batakombi Leza nobakali kulyookezya kumilimo yabo!

Sena ulikazyi kaambo katondezya kuti tiicakali kukonzyeka kuti Jesu azyalwe mumwezi wa Nalupale?— Nkaambo Ibbaibbele lyaamba kuti ciindi Jesu naakazyalwa, beembeli bakali musyokwe imasiku. (Luka 2:8-12) Alimwi kunyina nobakali kunga baba musyokwe mumwezi wa Nalupale nokutontola kapati alimwi nokuwa mvwula.

 Ibantu banji balizyi kuti Kkilisimusi tabuli mbobuzuba mbwaakazyalwa Jesu pe. Alimwi mane balizyi kuti ibuzuba oobo bantu batakombi Leza bakasekelela pobwe lyatakali kumukkomanisya Leza. Nokuba boobo, ibanji balazumanana kusekelela Kkilisimusi. Babikkila maanu kapati kukubaa pobwe muciindi cakubikkila maanu kukuzyiba bwini mbwailanga Kkilisimusi Leza. Pele swebo tuyanda kumukkomanisya Jehova, tee kayi?—

Aboobo eelyo notubaa mapobwe, tuyanda kusinizya kuti alamukkomanisya Jehova. Tulakonzya kubaa mapobwe aaya aciindi cili coonse mumwaka. Tatweelede kulindila buzuba bumwi buya bwaalubazu kutegwa tucite pobwe. Tulakonzya kulya zyakulya zilibedelede alimwi akukondwa kwiinda mukusobana zisobano zimwi. Sena ulayanda kucita boobo?— Ambweni ulakonzya kubandika abazyali bako kutegwa bakugwasye kulibambila kubaa pobwe aciindi cimwi. Eeco inga cabota, tee kayi?— Pele kotana kutalika kucita bubambe bwakubaa pobwe, weelede kubona kwaamba kuti liyooba leelyo ndyayookkomanina Leza.

Mbokuyandika kucita zintu nzyakkomanina lyoonse Leza cilatondezyegwa ku Tusimpi 12:2; Johane 8:29; Ba-Roma 12:2; alimwi a 1 Johane 3:22.

[Cifwanikiso icili apeeji 152]

Ino nkaambo nzi Leza ncaakalikkomanina pobwe eeli?

[Cifwanikiso icili apeeji 153]

Ncinzi cakacitika kupobwe lyakusekelela buzuba bwakuzyalwa kwa Heroda?

[Cifwanikiso icili apeeji 154]

Nkaambo nzi ibuzuba bwakuzyalwa kwa Jesu ncobwatakali kunga bwaba mu December 25?

[Cifwanikiso icili apeeji 156]

Mbuti mbotunga twasinizya kuti mapobwe ngotucita alamukkomanisya Leza?