XANA wa swi rhandza swinkhubyana?— U nga ha tiphina swinene loko u ri eka swona. Xana u anakanya leswaku Mudyondzisi Lonkulu a nga swi tsakela leswaku hi ya eswinkhubyanini?— Phela, u tshame a ya enkhubyeni wa vukati naswona van’wana va vadyondzisiwa va yena va fambe na yena. Yehovha i “Xikwembu lexi tsakeke,” naswona wa tsaka loko hi tiphina eswinkhubyanini leswinene.—1 Timotiya 1:11; Yohane 2:1-11.

Eka tluka 29 ra buku leyi, hi twe leswaku Yehovha u avanyise Lwandle ro Tshwuka leswaku Vaisrayele va kota ku hundza. Xana wa ha yi tsundzuka mhaka leyi?— Endzhaku ka sweswo, vanhu va yimbelerile va tlhela va cina, va nkhensa Yehovha. Lowu a wu ri nkhuvo. Vanhu a va tsakile swinene naswona hi nga tiyiseka leswaku Xikwembu na xona a xi tsakile.—Eksoda 15:1, 20, 21.

Endzhaku ka malembe ya kwalomu ka 40, Vaisrayele va ye enkhubyeni wun’wana lowukulu. Kambe vanhu lava va va rhambeke a va nga n’wi gandzeli Yehovha. Kahle-kahle, vanhu lava va va rhambeke a va nkhinsama va gandzela swikwembu swin’wana naswona a va endla vuxaka bya rimbewu ni vanhu lava va nga tekanangiki na vona. Xana u anakanya leswaku a swi lulamile ku ya enkhubyeni wo tano?— Leswi a  swi n’wi tsakisanga Yehovha naswona u xupule Vaisrayele hikwalaho ka swona.—Tinhlayo 25:1-9; 1 Vakorinto 10:8.

Bibele yi tlhela yi hi hlamusela hi minkhuvo yimbirhi yo tlangela siku ra ku velekiwa. Xana wun’wana wa yona a wu ri wa ku tlangela siku ra ku velekiwa ka Mudyondzisi Lonkulu?— Doo! Minkhuvo leyi hayimbirhi a yi ri ya vanhu lava a va nga tirheli Yehovha. Wun’wana a ku ri nkhuvo wo tlangela siku ra ku velekiwa ka Hosi Heroda Antipasi. A a ri mufumi wa xifundzha xa Galeliya loko Yesu a ha tshama endhawini leyi.

Hosi Heroda u endle swilo swo tala swo biha. U teke nsati wa makwavo a n’wi endla nsati wakwe. Vito ra yena a ku ri Herodiya. Yohane Mukhuvuri loyi a nga nandza wa Xikwembu u byele Heroda leswaku leswi a nga swi endla swi hoxile. Heroda a swi n’wi tsakisanga leswi a byeriweke swona. Hiloko a lerisa leswaku Yohane a pfaleriwa ekhotsweni.—Luka 3:19, 20.

Loko Yohane a ha ri ekhotsweni, siku ro tlangela ku velekiwa ka Heroda ri fikile. Hiloko Heroda a endla nkhuvo lowukulu. U rhambe vanhu vo tala va swiyimo swa le henhla. Vanhu hinkwavo a va dya, va nwa va tlhela va tiphina. Hiloko n’wana wa Herodiya wa nhwanyana a ta a ta va cinela. Ndlela leyi a cineke ha yona yi tsakise un’wana ni un’wana lerova Hosi Heroda a navela ku n’wi nyika nyiko yo hlawuleka. U te eka yena:  “Xin’wana ni xin’wana lexi u xi kombelaka eka mina, ndzi ta ku nyika xona, ku fikela eka hafu ya mfumo wa mina.”

Xana a a ta kombela yini? Xana a a ta kombela mali? swiambalo swo saseka? yindlu ya vuhosi leyi nga ya yena? Nhwanyana loyi a a nga xi tivi lexi a nga xi kombelaka. Hiloko a ya eka mana wakwe Herodiya, kutani a ku: “Xana ndzi fanele ndzi kombela yini?”

Tsundzuka leswaku Herodiya a a venga Yohane Mukhuvuri swinene. Hiloko a byela n’wana wakwe wa nhwanyana leswaku a kombela nhloko yakwe. Nhwanyana loyi u tlhelele eka hosi kutani a ku: “Ndzi lava u ndzi nyika nhloko ya Yohane Mukhuvuri yi ri enkambaneni sweswi.”

Hosi Heroda a a nga swi lavi ku dlaya Yohane hikuva a a swi tiva leswaku Yohane i munhu lonene. Leswi Heroda a a hlambanyile, a a chava ku cinca mianakanyo yakwe hikuva a a nga swi tivi leswaku lava a va ri enkhubyeni a va ta n’wi languta njhani. Hiloko a lerisa wanuna un’wana leswaku a ya ekhotsweni a ya tsema nhloko ya Yohane. Hi ku hatlisa wanuna u vuyile. A a khome nhloko ya Yohane hi nkambana kutani a yi nyika nhwanyana loyi. Hiloko nhwanyana loyi a ya yi nyika mana wakwe.—Marka 6:17-29.

Nkhuvo lowun’wana wo tlangela siku ra ku velekiwa lowu Bibele  yi hi byelaka ha wona, a wu nga antswi ku tlula lowun’wana. Wona a wu ri wa hosi ya le Egipta. Hambi ku ri enkhubyeni lowu, hosi yi lerise leswaku nhloko ya munhu un’wana yi tsemiwa. Kutani, endzhaku ka sweswo, yi hayeka munhu wa kona leswaku a dyiwa hi swinyenyana! (Genesa 40:19-22) Xana u anakanya leswaku Xikwembu xi yi tsakerile minkhuvo leyimbirhi?— Xana a wu ta va u swi naverile ku ya eka yona?—

Ha swi tiva leswaku xin’wana ni xin’wana lexi tsariweke eBibeleni xi ni xikongomelo. Yi hi byela hi minkhuvo yimbirhi ntsena ya ku tlangela masiku ya ku velekiwa. Naswona eka yona hayimbirhi, ku endliwe swilo swo biha. Kutani, u anakanya leswaku Xikwembu xi hi byela yini malunghana ni minkhuvo ya ku tlangela masiku yo velekiwa? Xana Xikwembu xi lava leswaku hi tlangela masiku ya ku velekiwa?—

I ntiyiso leswaku eka minkhuvo yo tano namuntlha, vanhu a va tsemi tinhloko ta vanhu van’wana. Kambe mhaka leyi ya ku tlangela masiku yo velekiwa yi sungule hi vanhu lava a va nga gandzeli Xikwembu xa ntiyiso. The Catholic Encyclopedia yi vula leswi malunghana ni minkhuvo ya ku tlangela masiku ya ku velekiwa, leyi ku vulavuriweke ha yona eBibeleni: “I vadyohi ntsena . . . lava endlaka minkhuvo leyikulu va tlangela siku leri va velekiweke ha rona.” Xana ha swi lava ku fana na vona?—

Ku vuriwa yini hi Mudyondzisi Lonkulu? Xana u ri tlangerile siku leri a velekiweke ha rona?— Nikatsongo, Bibele a yi vuli nchumu malunghana ni ku tlangela siku ra ku velekiwa ka Yesu. Kahle-kahle, valandzeri va Yesu vo sungula a va ri tlangelanga siku ra ku velekiwa kakwe. Xana wa swi tiva leswaku ha yini hi ku famba ka nkarhi vanhu va hlawule December 25 tanihi siku ra ku tlangela ku velekiwa ka Yesu?—

Hi ku ya hi The World Book Encyclopedia, lexi endleke ku hlawuriwa siku leri, “hi leswi vanhu va Rhoma ana se a va ri tlangela, a ri ri siku ra Nkhuvo wa Saturn, ku nga siku ra ku tlangela ku velekiwa ka dyambu.” Kutani vanhu va hlawule ku tlangela siku ra ku velekiwa ka Yesu hi siku leri ana se a ri ri holideyi ya vahedeni!

Xana wa swi tiva leswaku ha yini swi nga twali ku vula leswaku Yesu u velekiwe hi December?— Hikuva Bibele yi vula leswaku loko Yesu a velekiwa, varisi a va ha ri enhoveni nivusiku. (Luka 2:8-12) Naswona a va nga  ta tshama enhoveni exirhamini, hi December, ku nga n’hweti ya timpfula.

Vanhu vo tala va swi tiva leswaku Yesu a nga velekiwanga hi siku ra Khisimusi. Nakambe va swi tiva leswaku hi siku rero, vahedeni a va ri ni nkhuvo lowu Xikwembu xi nga wu tsakeliki. Kambe vo tala va ya emahlweni va tlangela Khisimusi hambiloko va swi tiva leswi. Lexi va xi lavaka i nkhuvo, a va na mhaka ni ku kumisisa ndlela leyi Xikwembu xi ti twaka ha yona. Kambe hi lava ku tsakisa Yehovha, a swi tano ke?—

Xisweswo, loko hi endla swinkhubyana hi fanele hi tiyiseka leswaku swa amukeleka eka Yehovha. Hi nga ha endla swinkhubyana hi nkarhi wihi ni wihi elembeni. A swi kali swi lava leswaku hi rindzela siku ro karhi ro hlawuleka. Hi nga ha dya swakudya swo hlawuleka hi tlhela hi tiphina hi ku tlanga mintlango. Xana u nga swi tsakela ku endla sweswo?— Kumbexana u nga ha burisana ni vatswari va wena leswaku va ku pfuna ku endla xinkhubyana. Sweswo swi ta tsakisa, a swi tano ke?— Kambe u nga si endla malunghiselelo ya xinkhubyana, rhanga u tiyiseka leswaku nchumu lowu u nga ta wu endla wa amukeleka eka Xikwembu.