E FIAFIA koe o fano sāle ki ‵kaiga?— E mafai eiloa o fakafiafia ‵ki. Se a tau faka‵tau, e manako te Faiakoga Sili ke olo atu tatou ki ‵kaiga?— Ia, ne fanatu eiloa a ia ki se mea telā e mafai o taku ki te ‵kaiga māfai ko avaga se tino, kae ne olo fakatasi atu a ia mo nisi o ana soko. A Ieova se “Atua fiafia,” kae ko oko eiloa i te ‵lei ki a ia māfai e fia‵fia tatou i ‵kaiga ‵lei.—1 Timoteo 1:11; Ioane 2:1-11.

I te itulau e 29 o te tusi tenei, ne fai mai i ei ki a tatou me ne ‵vaelua ne Ieova a te Tai ‵Kula ke olo atu a te kau Isalaelu ki te suā feitu. E mata, e masaua ne koe tau faitauga ki ei?— Mai tua ifo, ne usu pese kae ‵saka a tino kae fakafetai atu ki a Ieova. Ne fai eiloa te mea tenā pelā me se ‵kaiga. Ne fia‵fia malosi a tino, kae e mautinoa i a tatou me ne fiafia foki te Atua.—Esoto 15:1, 20, 21.

Mai tua malie ifo o tausaga kāti e 40, ne ‵kau atu a te kau Isalaelu ki te suā ‵kaiga. Ne ‵kami latou i te taimi tenei ne tino kolā ne seki tapuaki atu ki a Ieova. A te ‵tonuga loa, a tino kolā ne ‵kami ne latou ne tino e tapuaki atu ki nisi atua kae aofia sāle foki i faifaiga fakatauavaga mo tino kolā e se a‵vaga mo latou. E mata, e mafaufau koe me se mea ‵lei ke fanatu ki se vaegā ‵kaiga penā?— Ia, ne seki fiafia a Ieova, kae ne fakasala ne ia te kau Isalaelu.—Numela 25:1-9; 1 Kolinito 10:8.

 E fai mai foki te Tusi Tapu e uiga ki ‵kaiga o aso fanau e lua. E mata, e aofia i ei a te fakamanatuga o te aso fanau o te Faiakoga Sili?— Ikai. A ‵kaiga o aso fanau e lua konei ne fai mō tāgata kolā e se tavini atu ki a Ieova. E tasi mai i ei ko te aso fanau o te Tupu ko Helota Anitipa. A ia ko te pule o te kogā koga o Kalilaia i te taimi ne nofo atu ei a Iesu i konā.

Ne fai ne te tupu ko Helota a mea ma‵sei e uke. Ne puke ne ia a te avaga a tena taina mo fai tena avaga. Tena igoa ko Helotia. Ne fai atu te tavini a te Atua ko Ioane te Papatiso ki a Helota me se mea ‵se ke fai ne ia te mea tenā. Ne seki fiafia a Helota ki ei. Telā ne fai ei ne ia ke ‵loka a Ioane i te falepuipui.—Luka 3:19, 20.

I te taimi ne nofo atu ei a Ioane i te falepuipui, ne oko atu ei ki te taimi ke fakamanatu te aso fanau o Helota. Ne fai ne Helota se ‵kaiga lasi ‵ki. Ne ‵kami ne ia a tino ma‵luga e tokouke. Ne ‵kai kae inu kae ne fia‵fia malosi latou. Ne fanatu ei a te tamaliki fafine a Helotia o saka i olotou mua. Ne fia‵fia a tino katoa ki tena saka telā ne manako ei a te tupu ko Helota o tuku atu se meaalofa fakapito. Ne fai atu a ia ki tou fafine: “So se mea e manako koe ki ei mai i a au, ka tuku atu eiloa ne au ki a koe, ke oko ki te āfa o toku malo.”

 Se a te mea ka manako tou fafine ki ei? E mata, ne tupe? gatu ‵gali? se palesi mō ia aka eiloa? Ne seki iloa ne te tamaliki fafine ana pati ka fai atu. Telā ne fanatu ei a ia ki tena mātua, ko Helotia, kae fai atu: “Se a te mea ka taku atu ne au?”

Masaua la me ne takalialia malosi a Helotia ki a Ioane te Papatiso. Tela la, ne fai atu ei tou fafine ki tena tama ke tuku mai te ulu o Ioane. Ne fanatu te tamaliki fafine ki te tupu kae fai atu: “Au e manako ke tuku mai ne koe ki a au nei eiloa te ulu o Ioane te Papatiso i luga i se telē.”

Ne seki manako a te tupu ko Helota ke tamate a Ioane me ne iloa ne ia i a Ioane se tagata ‵lei. Kae ne fai ne Helota se tautoga, kae ne mataku a ia i mafaufauga o nisi tino i te ‵kaiga māfai ko ‵fuli tena mafaufau. Tela la, ne uga atu ei ne ia se tagata ki te falepuipui ke ‵kati te ua o Ioane. E seki leva kae ne foki mai te tagata. Ne vau mo te ulu o Ioane i luga i se telē, kae ne tuku atu ne ia ki te tamaliki fafine. Kae ne tuku atu ne te tamaliki fafine ki tena mātua.—Maleko 6:17-29.

Ko oko foki eiloa i te masei a te suā ‵kaiga o te aso fanau telā ne taku  mai i te Tusi Tapu. Ko te aso fanau o te tupu o Aikupito. I te taimi tenei o te ‵kaiga, ne ‵kati foki i ei a te ua o se tino. Kae mai tua ifo i ei, ne fakatāutāu a te tagata ki luga ke kai ne manu! (Kenese 40:19-22) Se a tau faka‵tau, ne fiafia a te Atua ki te avā ‵kaiga konā?— E mata, ka fia fanatu eiloa koe ki ei?—

E iloa ne tatou me e isi eiloa se pogai mō mea katoa i loto i te Tusi Tapu. E taku mai i ei a aso fanau fua e lua. Kae i te avā aso fanau konā, ne fai eiloa i ei a mea ma‵sei e pelā me ne vaega o te fakamanatuga. Tela la, se a tau faka‵tau me se a te mea ko fakaasi mai ne te Atua ki a tatou e uiga ki ‵kaiga o aso fanau? E mata, e manako te Atua ke fakamanatu ne tatou a aso fa‵nau?—

Se mea tonu me i vaegā ‵kaiga penā i aso nei, e se ‵kati i ei a te ua o se tino. Kae ko te manatu tāua i ei me ne kamata ne tino kolā e se tapuaki ki te Atua tonu a te fakamanatuga o aso fanau. E fai mai penei The Catholic Encyclopedia: “Ko tino agasala fua . . . e fia‵fia ma‵losi ki te aso ne fa‵nau mai ei latou.” E a, e fia fai koe pelā mo latou?—

Kae e a te Faiakoga Sili? E mata, ne fakamanatu ne ia tena aso fanau?— Ikai, e seai ne pati i te Tusi Tapu e uiga ki se ‵kaiga o te aso fanau o Iesu. A te ‵tonuga loa, ne seki fakamanatu foki ne soko mua o Iesu tena aso fanau. E iloa ne koe me se a te pogai ne fakamanatu fakamuli ei ne tino a te aso fanau o Iesu i te po 25 o Tesema?—

E pelā mo pati i The World Book Encyclopedia, ne filifili aka te po masina tenā ona “ko te mea ko leva ne fakamanatu ne tino Loma a te aso tenā e pelā me ko te ‵Kaiga o te Satunalia, telā ko te fakamanatuga o te aso fanau o te la.” Tela la, ne filifili ne tino ke fakamanatu a te aso fanau o Iesu i te po masina telā ko leva ne fai ne tino fapaupau mo fai se aso malōlō!

E iloa ne koe a te pogai ne seki fanau ei a Iesu i a Tesema?— Ona ko te mea e fai mai te Tusi Tapu me i te taimi ne fanau ei a Iesu, ne ‵nofo atu a tausi mamoe i te vao i te po. (Luka 2:8-12) Kae ne seki mafai o ‵nofo atu latou i konā i te masina o Tesema telā ne ‵moko kae ‵to vaiua.

 E iloa ne tino e tokouke me i te Kilisimasi e se ko te aso fanau o Iesu. E iloa foki ne latou me ne fai ne tino fapaupau i te aso tenā se fakamanatuga telā ne seki fakafiafia atu ki te Atua. Kae ne fakamanatu eiloa ne tino e tokouke a te Kilisimasi. E sili atu te fakatāua ne latou te ‵kaiga i lō te taumafai ke iloa aka me ne a mafaufauga o te Atua e uiga ki ei. Kae e ma‵nako tatou ke fakafiafia atu ki a Ieova, ne?—

Tela la, kafai e fai ‵tou ‵kaiga, e fia fakamautinoa aka ne tatou me se mea ‵lei i te kilokiloga a Ieova. E mafai o fai ne tatou i so se taimi i te tausaga. E se ‵tau o faka‵tali tatou ki se aso fakapito. E mafai o ‵kai tatou ki mea‵kai fakapito kae ta‵fao i tafaoga fakafia‵fia. E manako koe o fai te mea tenā?— Kāti e mafai o faipati atu koe ki ou mātua kae fakatoka se ‵kaiga fakatasi mo te fesoasoani o lāua. Ka gali eiloa te mea tenā, ne?— Kae koi tuai o fai ne koe a fakatokaga mō se ‵kaiga, e fia fakamautinoa aka ne koe me se mea telā ka fiafia ki ei te Atua.