KARUYAG mo ba kumadto ha mga panagtawo?— Makalilipay gud ito. Ha hunahuna mo, maruruyag ba an Bantogan nga Magturutdo nga kumadto kita ha mga panagtawo?— Aw, kinadto hiya ha matatawag nga panagtawo han may-ada ginkasal, ngan kaupod niya an iba han iya mga disipulo. Hi Jehova ‘an malipayon nga Dios,’ salit nalilipay hiya kon nagpapahimulos kita han mag-opay nga mga panagtawo.​—1 Timoteo 1:11; Juan 2:1-11.

An pahina 29 hini nga libro nagsusumat ha aton nga ginbahin ni Jehova an Dagat nga Pula basi makatabok an mga Israelita. Nahinunumdoman mo ba nga nabasa mo ito?— Katapos, an katawohan nagkanta ngan nagsayaw ngan nagpasalamat kan Jehova. Pariho ito hin panagtawo. An katawohan maglipayon hinduro, ngan sigurado kita nga an Dios malipayon liwat.​—Eksodo 15:​1, 20, 21.

Paglabay hin haros 40 ka tuig, an mga Israelita kinadto ha usa pa nga daku nga panagtawo. Hini nga panahon an mga tawo nga nagdapit ha ira diri ngani nagsisingba kan Jehova. Ha pagkamatuod, an mga tawo nga nagdapit ha ira nagyukbo pa ngani ha pagsingba ha iba nga mga dios ngan batasan nira nga makighilawas ha mga tawo nga diri nira asawa. Ha hunahuna mo, husto ba an pagkadto ha sugad hito nga panagtawo?— Aw, waray malipay hi Jehova, ngan iya ginsirotan an mga Israelita.​—Numeros 25:1-9; 1 Korinto 10:8.

 An Biblia nagsusumat liwat mahitungod han duha nga panagtawo han kompleanyo. An usa ba hito nagselebrar han kompleanyo han Bantogan nga Magturutdo?— Waray. Ini nga duha nga panagtawo han kompleanyo para ha kalalakin-an nga diri nag-aalagad kan Jehova. An usa amo an panagtawo han kompleanyo ni Hadi Herodes Antipas. Hiya an magmarando han distrito han Galilea han nag-ukoy didto hi Jesus.

Hi Hadi Herodes nagbuhat hin damu nga maraot. Iya ginkuha an asawa han iya bugto nga lalaki para ha iya kalugaringon. Herodias an iya ngaran. An surugoon han Dios nga hi Juan Bawtista nagsiring kan Herodes nga sayop an iya ginbuhat. Nasina hi Herodes ha ginsiring ni Juan ha iya. Salit iya iginpapriso hi Juan.​—Lukas 3:​19, 20.

Samtang priso hi Juan, inabot an adlaw ha pagselebrar han kompleanyo ni Herodes. Naghikay hi Herodes hin daku nga panagtawo. Iya gindapit an damu nga prominente nga mga tawo. Hira ngatanan nangaon ngan nag-irignom ngan nagrayhak. Katapos, inabot an anak nga babaye ni Herodias ngan sinayaw para ha ira. Nalipay hinduro an ngatanan ha iya pagsayaw salit karuyag ni Hadi Herodes nga ihatag ha iya an espesyal nga regalo. Hiya nagsiring ha iya: “Bisan ano nga butang nga imo pangaroon ha akon, ihahatag ko ha imo, bisan pa an katunga han akon ginhadian.”

 Ano an iya pangangaroon? Kwarta ba? mag-opay nga mga bado? palasyo nga iya kalugaringon? Diri maaram an daraga kon ano an sisidngon. Salit kinadto hiya ha iya iroy, hi Herodias, ngan nagsiring: “Ano an akon pangangaroon?”

Hi Herodias nangangalas hinduro kan Juan Bawtista. Salit hiya nagsiring ha iya anak nga pangaroon an ulo ni Juan. An daraga binalik ha hadi ngan nagsiring: “Buot ko nga ha gilayon ihatag mo ha akon, ha usa nga pinggan an ulo ni Juan nga Parabaptis.”

Diri karuyag ni Hadi Herodes nga patayon hi Juan tungod kay maaram hiya nga maopay nga tawo hi Juan. Kondi nakagsaad na hi Herodes, ngan nahadlok hiya ha huhunahunaon han iba dida ha panagtawo kon bag-ohon niya an iya hunahuna. Salit ginsugo niya an usa nga lalaki ngadto ha prisohan basi pugotan hi Juan. Waray pag-iha binalik an lalaki. Dara niya an ulo ni Juan dida ha pinggan, ngan iya iginhatag ito ha daraga. Ngan iginhatag ito han daraga ha iya iroy.​—Markos 6:17-29.

Diri liwat maopay an usa pa nga panagtawo han kompleanyo nga gin-uunabi ha Biblia. Para ito han hadi ha Ehipto. Durante liwat hini nga panagtawo, an hadi nagsugo nga pugotan an usa nga lalaki. Ngan, katapos hito, iya ginbitay an lalaki basi kaunon han katamsihan! (Genesis 40:19-22)  Ha hunahuna mo, inuyonan ba han Dios iton duha nga panagtawo?— Maruruyag ka ba nga aadto ka didto?—

Maaram kita nga an ngatanan nga iginrekord ha Biblia may-ada katuyoan. Duha la nga panagtawo han kompleanyo an gin-uunabi hito. Ngan hito nga duha, may-ada maraot nga ginbuhat sugad nga bahin han selebrasyon. Salit, ano an masisiring mo nga iginsusumat han Dios ha aton mahitungod han mga panagtawo han kompleanyo? Karuyag ba han Dios nga magselebrar kita han mga kompleanyo?—

Totoo nga ha sugad nga mga panagtawo yana nga panahon, an mga tawo diri nagpupugot han iba nga tawo. Kondi an bug-os nga ideya han pagselebrar han mga kompleanyo nagtikang ha mga tawo nga diri nagsisingba ha totoo nga Dios. An The Catholic Encyclopedia nasiring mahitungod han mga selebrasyon han kompleanyo nga gin-unabi ha Biblia: “Mga magpakasasala la . . . an nagrarayhak gud ha adlaw nga ira natawohan.” Karuyag ba naton magin pariho ha ira?—

Kumusta man an Bantogan nga Magturutdo? Nagselebrar ba hiya han iya kompleanyo?— Waray, an Biblia diri nag-uunabi hin bisan ano mahitungod han panagtawo han kompleanyo ni Jesus. Ha pagkamatuod, an siyahan nga mga sumurunod ni Jesus waray magselebrar han iya kompleanyo. Maaram ka ba kon kay ano nga an mga tawo ha urhi nagpili nga magselebrar han kompleanyo ni Jesus ha Disyembre 25?—

Ginpili iton nga petsa tungod kay, sugad han gin-uunabi han The World Book Encyclopedia, “an mga tawo ha Roma nagselebrar na hito sugad nga Piyesta ni Saturno, ha pagselebrar han kompleanyo han adlaw.” Salit ginpili han mga tawo an pagselebrar han kompleanyo ni Jesus ha petsa nga an mga pagano may-ada na piyesta!

Maaram ka ba kon kay ano nga diri posible nga natawo hi Jesus ha Disyembre?— Tungod kay an Biblia nasiring nga han natawo hi Jesus, an mga magbarantay han kakarnerohan nakadto pa ha mga kapatagan ha gab-i. (Lukas 2:8-12) Ngan diri hira magpapabilin didto ha gawas ha matugnaw, mauran nga bulan han Disyembre.

 Damu nga mga tawo an maaram nga an Pasko diri kompleanyo ni Jesus. Maaram pa ngani hira nga hiton nga adlaw an mga pagano may-ada selebrasyon nga diri nakakalipay ha Dios. Kondi damu an nagsiselebrar han Pasko. Mas interesado hira ha pagkaada panagtawo kay ha paghibaro kon ano gud an ginhuhunahuna han Dios mahitungod hito. Kondi karuyag naton lipayon hi Jehova, diri ba?—

Salit kon may-ada kita mga panagtawo, karuyag naton siguruhon nga inuuyonan ito ni Jehova. Mahimo kita magkaada hito ha bisan san-o durante han tuig. Diri kinahanglan nga maghulat kita hin usa ka espesyal nga adlaw. Mahimo kita kumaon hin espesyal nga pagkaon ngan malipay ha mga uyag. Karuyag mo ba ito?— Mahimo mo sumatan an imo mga ginikanan ngan magplano hin usa nga panagtawo pinaagi han ira bulig. Makaruruyag ito, diri ba?— Kondi antes ka magplano para hin usa nga panagtawo, karuyag mo siguruhon nga uuyonan ito han Dios.