NALAKA kadi kenka ti agserbi ken Jehova?— Saan nga imbaga ti Naindaklan a Mannursuro a nalaka dayta. Iti daydi rabii sakbay ti pannakapapatay ni Jesus, kinunana kadagiti apostolna: “No guraennakayo ti lubong, ammoyo a ginuranak dayta sakbay a ginuranakayo.”​​—Juan 15:18.

Impannakkel ni Pedro a dina pulos panawan ni Jesus, ngem kinuna ni Jesus a mamitlonto nga ilibak ni Pedro iti dayta met la a rabii. Ket kasta nga agpayso ti inaramid ni Pedro! (Mateo 26:31-​35, 69-​75) Kasano a napasamak dayta?— Napasamak agsipud ta nagbuteng ni Pedro, ken uray dagiti dadduma pay nga apostol.

Ammom kadi no apay a nagbuteng dagiti apostol?— Adda napateg unay a banag a saanda nga inaramid. Ti panangammo iti dayta matulongannatayo nga agserbi ken Jehova uray pay ania ti ibaga wenno aramiden kadatayo dagiti dadduma. Ngem repasuenta nga umuna ti napasamak iti daydi maudi a rabii a panagkakadua da Jesus ken dagiti apostolna.

Umuna, rinambakanda ti Paskua. Naisangsangayan daytoy a pannangan a tinawen a maar-aramid a mangipalagip iti pannakaispal ti ili ti Dios idiay Egipto a nakaadipenanda. Kalpasanna, adda sabali a naisangsangayan a pannangan nga inangay ni Jesus a kaduana dagiti apostolna. Pagsaritaantanto dayta iti maud-udi a kapitulo ken ammuenta no kasano a matulongannatayo dayta a pannangan a manglaglagip ken Jesus. Kalpasan dayta a pannangan ken kalpasan ti panangparegtana kadagiti apostolna, inkuyog ida ni Jesus a napan iti minuyongan ti Getsemani. Maysa daytoy a disso a kaay-ayoda a papanan.

 Idi addadan iti minuyongan, immadayo bassit ni Jesus tapno agkararag. Imbagana met kada Pedro, Santiago, ken Juan nga agkararagda. Ngem nakaturogda. Namitlo nga immadayo ni Jesus tapno mapan agkararag, ket namitlo met a nadanonanna da Pedro a matmaturog! (Mateo 26:36-​47) Ammom kadi no apay a rumbeng koma nga agsalukag ken agkararagda?— Pagsaritaanta daytoy.

Nakipagrambak met iti Paskua ni Judas Iscariote kada Jesus ken dagiti dadduma pay nga apostol iti daydi a rabii. No malagipmo, nagbalin idin a mannanakaw ni Judas. Ket ita agbalinen a traidor. Ammona no sadino idiay minuyongan ti Getsemani ti masansan a paguummongan da Jesus ken dagiti apostolna. Isu a nangikuyog ni Judas kadagiti soldado a mangtiliw ken Jesus. Idi simmangpetda, insaludsod ni Jesus kadakuada: “Siasino ti sapsapulenyo?”

“Ni Jesus,” insungbat dagiti soldado. Saan a nagbuteng ni Jesus, isu a kinunana: ‘Siak ni Jesus.’ Nagsiddaaw dagiti soldado iti kinatured ni Jesus nga urayda la napasanud ken natuang. Kalpasanna, kinuna ni Jesus: ‘No siak ti sapsapulenyo, bay-anyo a pumanaw dagiti apostolko.’​​—Juan 18:​1-9.

Idi a ni Jesus ket kinemmeg ken pinarautan dagiti soldado, nagbuteng dagiti apostol ket nagtatarayda. Ngem kayat da Pedro ken Juan a kitaen no ania ti mapasamak, isu a simmarunoda iti saan unay nga adayo. Di nagbayag, naipan ni Jesus iti balay ni Caifas a nangato a padi. Gapu ta ni Juan ket am-ammo ti nangato a padi, ti agbambantay iti ruangan pinastrekna da Juan ken Pedro iti paraangan.

Naguurnong idin dagiti papadi iti balay ni Caifas tapno agpalutpotda. Kayatda a mapapatay ni Jesus. Nangisangoda kadagiti saksi nga agsao iti saan a pudno maipapan kenkuana. Kinabkabil ken tinungtungpada ni Jesus. Adda idi ni Pedro iti asideg bayat a mapaspasamak amin dagitoy.

Adda maysa nga adipen a babai a nakailasin ken Pedro, daydiay agbambantay iti ruangan a nangpastrek kada Pedro ken Juan. ‘Uray sika,  nakikadkaduaka met ken ni Jesus!’ kinunana. Ngem imbaga ni Pedro a dina am-ammo ni Jesus. Madamdama pay, adda manen sabali a babai a nakabigbig ken Pedro ket kinunana kadagiti tattao nga agtaktakder sadiay: ‘Nakikuykuyog met daytoy a tao ken ni Jesus.’ Naglibak manen ni Pedro. Iti saan a mabayag, adda maysa a grupo dagiti tattao a nakakita ken Pedro ket kinunada kenkuana: “Pudno a maysaka met kadakuada.” Iti maikatlo a gundaway, naglibak manen ni Pedro. ‘Diak am-ammo dayta a tao!’ kinunana. Insapata pay ni Pedro a pudno ti ibagbagana. Timmaliaw ni Jesus sana pinerreng ni Pedro.​​—Mateo 26:57-​75; Lucas 22:54-​62; Juan 18:15-​27.

Ammom kadi no apay a nagulbod ni Pedro?— Wen, mabuteng ngamin. Ngem apay a mabuteng? Ania koma ti inaramidna tapno saan a nagbuteng? Panunotem daytoy. Ania ti inaramid ni Jesus tapno tumured?— Nagkararag iti Dios, ket tinulongan ti Dios a maaddaan iti tured. Ken laglagipem, namitlo nga imbaga ni Jesus ken Pedro nga agkararag ken agsalukag ken agpuyat. Ngem ania ti napasamak?—

Iti tunggal gundaway, nakaturog ni Pedro. Saan a nagkararag, ken saan a nagsalukag. Dayta ti gapuna a saan a nakasagana idi tiniliwda ni  Jesus. Di nagbayag idi kinabkabilda ni Jesus ken implanoda ti pannakapapatayna, nagbuteng ni Pedro. Ngem sumagmamano laeng nga oras sakbayna, ania ti imbaga ni Jesus a namnamaen dagiti apostolna?— Kinuna ni Jesus kadakuada a guraen ida ti lubong no kasano a ginurana met ni Jesus.

Ita, mangpanunotta iti mabalin a mapasamak kadatayo a kas iti napasamak ken Pedro. Ipapanta nga addaka iti klaseyo ket saan a nasayaat ti ibagbaga dagiti dadduma a kaklasem maipapan kadagiti tattao a saan nga agsalsaludo iti bandera wenno saan a mangramrambak iti Krismas. Kasanon no adda agsaludsod kenka iti kastoy: “Pudno kadi a saankayo nga agsalsaludo iti bandera?” Wenno  kuna dagiti dadduma: “Nadamagmi a saanyo a ramrambakan ti Krismas!” Mabutengka aya a mangibaga iti pudno?— Agulbodka kadi a kas ken Pedro?—

Pinagbabawyan unay ni Pedro ti panangilibakna ken Jesus. Idi naamirisna ti inaramidna, rimmuar ket nagsangit. Wen, nagsubli ken Jesus. (Lucas 22:32) Panunotem daytoy. Ania ti makatulong kadatayo tapno saantayo nga agbuteng ken makaisao iti kas iti imbaga ni Pedro?— Laglagipem a saan a nagkararag ken nagsalukag ni Pedro. No kasta, ania ti panagkunam a masapul nga aramidentayo tapno agbalintayo a pasurot ti Naindaklan a Mannursuro?—

Masapul nga ikararagtayo ti tulong ni Jehova. Idi nagkararag ni Jesus, ammom kadi ti inaramid ti Dios maipaay kenkuana?— Nangibaon iti anghel a mangpakired kenkuana. (Lucas 22:43) Matulongandatayo kadi dagiti anghel ti Dios?— Kuna ti Biblia: “Ti anghel ni Jehova agpakpakarso iti intero nga aglikmut dagidiay agbuteng kenkuana, ket alawenna ida.” (Salmo 34:7) Ngem tapno tulongannatayo ti Dios, saantay a basta ikararag dayta. Ammom kadi no ania pay ti masapul nga aramidentayo?— Kinuna ni Jesus kadagiti pasurotna nga agsalukag ken agpuotda. Iti panagkunam, ania ti makatulong kadatayo a mangaramid iti kasta?—

Masapul nga agimdengtayo a naimbag iti maibagbaga kadagiti Nakristianuan a gimong ken panangipangag iti mabasbasatayo iti Biblia. Ngem masapul met a kanayon nga agkararagtayo ken ni Jehova ken idawattayo a tulongannatayo nga agserbi kenkuana. No aramidentayo ti kasta, tulongannatayo a mangparmek iti butengtayo. Iti kasta, maragsakantayto no addaantayo iti gundaway a mangisarita kadagiti dadduma iti maipapan iti Naindaklan a Mannursuro ken iti Amana.