NOOSHANGA kyorobi okuheereza Yehova?— Omwegyesa Mukuru taragizire ngu kikaba nikiija kworoba. Ekiro ekyakurateirwe eki Yesu yaafeereireho, akagambira abeegi be ati: “Ensi ku eribanga, mumanye ngu ekabanza kuunyanga etakabangire.”—Yohaana 15:18.

Petero akaragaanisa Yesu ngu tarikubaasa kumuhungaho, kwonka Yesu akagira ngu Petero akaba naija kumwehakana emirundi eshatu ekiro ekyo. Kandi ekyo kyenyine nikyo Petero yaakozire. (Matayo 26:31-35, 69-75) Ekintu nk’ekyo kikaba nikibaasa kita kubaho?— Kikabaho ahabw’okugira ngu Petero n’entumwa ezindi bakatiina.

Noomanya ahabw’enki entumwa ezindi zaatiinire?— Bakaba baremirwe kukora ekintu ekyabaire kiri kikuru munonga. Okumanya ekyo nikibaasa kutuhwera kuheereza Yehova, n’obu omuntu yaakutugambira ki nari yaakutukora ki. Kwonka twine kubanza kumanya ekyabaireho omu kiro eki Yesu yaahererukireyo kuba n’entumwa ze.

Eky’okubanza, bakakuza Okuhingurwaho bari hamwe. Okuhingurwaho kikaba kiri ekiihuro ky’omutaano ekyabaire kibaho buri mwaka okwijutsya abantu ba Ruhanga okucungurwa kwabo kuruga omu buhuuku omuri Misri. Yesu ari n’entumwa aha mukoro ogwo akatandikaho ekiihuro ekindi eky’omutaano. Nitwija kukireeba omu Shuura 37 kandi tureebe oku ekiihuro ekyo kirikutuhwera okwijuka Yesu. Bwanyima y’ekiihuro ekyo hamwe n’ebigambo ebindi ebyagarweiremu entumwa ze amaani, Yesu akabatwara omu musiri gwa Gesesemaani. Ogu nigwo mwanya ogu baabaire bakunda kutaayaayamu.

 Bari omu musiri ogwo, Yesu akeehereera kushaba. Kandi Yesu akagambira Petero, Yakobo na Yohaana kushaba. Kwonka bakagwejegyera. Yesu akeehereera emirundi eshatu kushaba, kandi akagaruka emirundi eshatu arikushanga Petero n’abandi bagwejegyeire. (Matayo 26:36-47) Noomanya enshonga ahabw’enki baabaire baine kuguma nibareeba barikushaba?— Ka tureebe enshonga ahabw’enki.

Yuda Iskaryota akaba ari aha Bugyenyi bw’Okuhingurwaho ari na Yesu hamwe n’entumwa ezindi enyimaho omu mwabazyo ogwo. Nk’oku orikwijuka, Yuda akaba ahindukire omushuma. Hati akaba ariyo naaza kureebya Yesu. Akaba naamanya omwanya omu musiri gwa Gesesemaani ahu Yesu yaabaire akira kuba ari n’entumwa ze. N’ahabw’ekyo Yuda akatwarayo abaserukare kukwata Yesu. Ku baahikireyo, Yesu yaababuuza ati: “Nimusherura oha?”

Abaserukare baamugarukamu bati: “Yesu.” Yesu atarikutiina akabagarukamu ati: “Niinye.” Abaserukare bakatangaarira obumanzi bwa Yesu baagarura ebigyere enyima baagwa ahansi. Reero Yesu yaagira ati: “Ku muraabe nimunsherura, murekye aba bagyende.”​—Yohaana 18:1-9.

Abaserukare ku baakwatsire Yesu bakamukoma, entumwa ze bakatiina baahunga. Kwonka Petero na Yohaana bakaba nibenda kumanya ekiraabeho, n’ahabw’ekyo bakagyenda babakuratiire. Bwanyima, Yesu yaatwarwa omu nju ya Kayaafa, omunyamurwa omukuru. Ahabw’okugira ngu Yohaana akaba naamanywa omunyamurwa omukuru, omurinzi w’eirembo akamwikiriza na Petero bataahamu.

Abanyamurwa bakaba baaheza kwerundanira omu ka ya Kayaafa kucwera Yesu orubanja. Bakaba nibenda kuhayo Yesu ngu aitwe. N’ahabw’ekyo bakareeta abantu abaamuhaireho obujurizi butahikire. Abantu bakateera Yesu entomi n’empi. Ebyo byona obu byabaire nibibaho Petero akaba ari haihi.

 Omuzaana owaabaire naarinda aha irembo owaikiriize Petero na Yohaana kutaahamu, akamanya Petero. Yaamugira ati: “Naiwe obaire ori hamwe na Yesu.” Kwonka Petero yaayehakana ngu tarikumanya Yesu. Bwanyima y’omwanya mukye omwishiki ondiijo akamanya Petero reero yaagambira abo abaabaire bamwemereire haihi ati: “Omushaija ogu nawe abaire ari hamwe na Yesu owa Nazareesi.” Petero agaruka ayeehakana ngu tarikumanya Yesu. Ku haahingwireho akaanya kakye abantu abandi bareeba Petero reero bamugira bati: “Buzimazima naiwe ori omwe aharibo.” Omurundi gwa kashatu Petero ayeehakana arikugira ati: “Omushaija ogwo tindikumumanya.” Petero araahira ngu naagamba amazima, Yesu ahinduka amureeba.​—Matayo 26:57-75; Luka 22:54-62; Yohaana 18:15-27.

Noomanya ahabw’enki Petero yaabeihire?— Ahabw’okuba akaba atiinire. Kwonka shi ahabw’enki yaabaire atiinire? Akaremwa kukora ki ekyakumuhwereire kugira obumanzi? Kiteekateekyeho. Yesu akakora ki okubaasa kugira obumanzi?— Akashaba Ruhanga, yaamuhwera kugira obumanzi. Kandi ijuka ngu Yesu emirundi eshatu  akagambira Petero kushaba kandi kuguma naareeba. Kwonka niki ekyabaireho?—

Emirundi yoona eshatu, Petero akaba aba agwejegyeire. Ahabw’okutashaba, taragumire naareeba. N’ahabw’ekyo akaba ateteekateekire obu baakwata Yesu. Obu baacwera Yesu orubanja, bakamuteera kandi bakacuma n’enaama y’okumwita, Petero akatiina munonga. Kwonka enyimaho, niki eki Yesu yaagambiire entumwa ze ngu nikiija kubaho?— Yesu akabagira ngu nk’oku ensi yaamwangire, nabo ekaba neija kubanga.

Hati ka tuteekateekye aha kirikubaasa  kutubaho ekiri nk’ekyo ekyabaire ahari Petero. Ka tugire ngu ori omu kibiina reero abandi batandika kugamba kubi aha bantu abatarikukuza Noiri. Reero omuntu yaakubuuza ati: “N’eky’amazima ngu torikukuza Noiri?” Nari abandi bakubuuza bati: “Torikukuza mazaarwa?” Noija kutiina kubagambira amazima?— Nari noija kugyezibwa obeihe nka Petero?—

Bwanyima, Petero akashaasha okureeba ngu akeehakana Yesu. Ku yaamanyire eki yaakozire, akaza aheeru yaarira. Buzima akagaruka yaaba entumwa ya Yesu. (Luka 22:32) Hati kiteekateekyeho. Niki ekirikubaasa kutuhwera kutatiina tukahika n’aha kugamba nk’eki Petero yaagambire?— Ijuka, Petero akaremwa kushaba n’okuguma naareeba. Hati noogira ngu niki eki turikwetenga kukora okuba abakuratsi b’Omwegyesa Mukuru?—

Buzima nitwetenga kushaba Yehova kutuhwera. Yesu ku yaashabire, noomanya eki Ruhanga yaamukoreire?— Akoohereza maraika kumugumya. (Luka 22:43) Baamaraika ba Ruhanga nibabaasa kutuhwera?— Baibuli neegira eti: “Maraika wa MUKAMA ateera amahema okwehinguririza abarikumutiina, kandi abajuna.” (Zaaburi 34:7) Kwonka okutunga obuhwezi bwa Ruhanga, haine ekindi eki tushemereire kukora oyihireho okubushaba. Noomanya ekindi eki tushemereire kukora?— Yesu akagambira abakuratsi be kuguma nibareeba. Noogira ngu niki ekirikubaasa kutuhwera okukora ekyo?—

Nitwetenga kuta omutima aha bi turikwegyesibwa omu nteerane z’Ekikristaayo n’aha bi turikushoma omu Baibuli. Kwonka twine n’okushaba Yehova obutoosha kandi tukamushaba kutuhwera kumuheereza. Twakora ekyo naija kutuhwera kusingura okutiina. Obwo nitwija kushemererwa twagira omugisha gw’okugambira abandi ebirikukwata aha Mwegyesa Mukuru hamwe n’Ishe.