KASIN mainomay so manlingkor ed si Jehova?— Ag-imbaga na Sankamaongan a Managbangat a mainomay itan a gawaen. Diad samay labi antis na impatey nen Jesus, inkuan to ed saray apostol to: “No say mundo busolen to kayo, amta yo a binusol to ak ya akauna nen sikayo.”—Juan 15:18.

Intangsit nen Pedro ya agton balot ikaindan si Jesus, balet inkuan nen Jesus a sikatoy iburi nen Pedro a mamitlo ed saman a labi. Tan onman so ginawa nen Pedro! (Mateo 26:31-35, 69-75) Panon a nagawa so ontan?— Agawa itan lapud tinmakot si Pedro, pati saray arum ya apostol.

Antam no akin a tinmakot iray apostol?— Agda agawaan so importantin maong a bengatla. Say panaral nipaakar ed saya so makatulong ed sikatayo a manlingkor ed si Jehova, anggan antoy ibaga odino gawaen na arum ed sikatayo. Sakbay to balet, kaukolan ta nin repasoen no antoy agawa diad samay unor lan labi a kaiba nen Jesus iray apostol to.

Unona, naniiba iran nanselebra ed Paskua. Saya so nikaduman panangan a gagawaen kada taon pian panonotan so totoo na Dios ed inkibulos da manlapud inkaaripen ed Ehipto. Insan inggapo nen Jesus so sananey a nikaduman panangan a kaiba ira. Singbaten ta itan ed banda’d unor a kapitulo tan ipaliwawa no panon a say panangan so ontulong ed sikatayon mannonot ed si Jesus. Kayari na saman a panangan tan kayari na panamaseseg to ed saray apostol to, sikaray intagar nen Jesus ed hardin na Getsemani. Saya so paboriton pasen a mabetbet dan lalaen.

 Inmarawi na daiset si Jesus diad hardin pian manpikasi. Imbaga to met ed si Pedro, Santiago, tan Juan a manpikasi ira. Balet ta akaugip ira. Amitlon inmarawi si Jesus pian manpikasi, tan amitlon pinmawil et asabian toy Pedro tan arum ni a nauugip! (Mateo 26:36-47) Antam no akin a nepeg da komon so abangon pian manpikasi?— Pantongtongan ta iya.

Si Judas Iscariote so presente ed Paskua kaibay Jesus tan arum ya apostol ed asasakbay na saman a labi. Nayarin nanonotan mo ni, si Judas so nagmaliw a matakew. Natan et sikatoy nagmaliw a manangitapat. Amta to so pasen na hardin na Getsemani a mabetbet a pandudumogan di Jesus tan saray apostol to. Kanian angitagar si Judas diman na saray sundalo a mangerel ed si Jesus. Sanen akasabi ira diman, sikaray tinepetan nen Jesus: “Siopa so aanapen yo?”

Inmebat iray sundalo: “Si Jesus.” Agtinmakot si Jesus, kanian sikatoy inmebat: “Siak itan.” Nikelawan iray sundalo ed tepel nen Jesus kanian sikaray sinmener tan atumba. Insan inkuan nen Jesus: ‘No siak so aanapen yo, abuloyan yon onalis iray apostol ko.’—Juan 18:1-9.

Sanen siningkat na saray sundalo si Jesus tan tinaker daray lima to, tinmakot iray apostol tan kibatiktik ira. Balet si Pedro tan Juan et labay dan amtaen no antoy nagagawa, kanian sikaray tumbotumbok. Insan, si Jesus so inawit ed abung nen Caifas, say atagey a saserdote. Lapud si Juan et kabkabat na atagey a saserdote, sikato tan si Pedro so pinaloob na managsaray puerta.

Saray saserdote so nandudumog la ed abung nen Caifas parad bista. Labay dan ipapatey si Jesus. Kanian angawit iray testigo da a mangibagay katilaan nipaakar ed sikato. Pinuponiti tan tinatampal na totoo si Jesus. Legan a nagagawa iyan amin, walad asingger si Pedro.

Samay katulong ya ugaw a biin managsaray puerta ya amaloob ed si Pedro tan Juan, so akabidbir ed si Pedro. ‘Sika, kaibam met si Jesus!’  so inkuan to. Balet ag-inamin o imburi nen Pedro a kabat toy Jesus. Ag-abayag et sananey a bii so akabidbir ed si Pedro tan inkuan to ed saramay akaalagey: ‘Sayan laki et kaiba nen Jesus.’ Imburi lamet nen Pedro a kabat to. Insan sanen sakey a grupo na totoo so akanengneng ed si Pedro tan inkuan da ed sikato: “Sakey ka met ed sikara.” Diad mikatlo et imburi nen Pedro, a kuanto: “Agko kabat so satan a too!” Nansamba ni ingen si Pedro a tua so ibabaga to, kanian sikatoy nilingaw tan nilimgis nen Jesus.—Mateo 26:57-75; Lucas 22:54-62; Juan 18:15-27.

Antam no akin a nantila si Pedro?— On, lapud sikatoy tinmakot. Balet akin a sikatoy tinmakot? Antoy agto agawaan pian sikatoy makapanpakpel? Isipen pa. Antoy ginawa nen Jesus pian makapanpakpel?— Sikatoy nampikasi ed Dios, tan sikatoy tinulongan na Dios a manpakpel. Tan nonoten, amitlo ya inkuan nen Jesus ed si Pedro a manpikasi tan mansiansian abangon tan manbantay. Balet antoy agawa?—

Amitlo met ya asabian ton naugip si Pedro. Sikatoy agnampikasi, tan agnantultuloy a nambantay. Kanian sikatoy abigla sanen inerel si  Jesus. Diad banda’d unor ed bista, sanen kinabil day Jesus tan implano ran pateyen, ataktakot si Pedro. Balet, pigaran oras labat antis to, antoy imbaga nen Jesus ed saray apostol to ya ilaloan da?— Inkuan nen Jesus ed sikara a no panon a sikatoy binusol na mundo, sikara met so busolen na mundo.

Natan nonoten ta pay nayarin nagawa ed sikatayo a mipadpara ed agawa’d si Pedro. Bilbilang ta wala ka ed panklaklasean mo sanen saray kaklasem so mamabalaw ed saray totoo ya agmansasaludo ed bandira odino agmanseselebra ed Krismas. Insan panon to no walay nantepet ed sika: “Tua ta ya agka mansasaludo ed bandira?” Odino arum so mangibagay: “Abalitaan  min agka anggan manseselebra na Krismas!” Kasin antakot kan mangibagay katuaan?— Kasin natukso kan mantila, a singa ginawa nen Pedro?—

Ag-abayag, maer-ermen si Pedro lapud agto inamin a kabat toy Jesus. Sanen naisip toy ginawa to, sikatoy pinmaway tan inmakis. On, sikatoy pinmawil ed si Jesus. (Lucas 22:32) Nonoten pa itan natan. Antoy makatulong ed sikatayo pian ag-ontakot a singa si Pedro?— Nonoten, agnampikasi si Pedro tan agnansiansian nambantay. Kanian, antoy nibagam a kaukolan tayon gawaen pian magmaliw a patumbok na Sankamaongan a Managbangat?—

Seguradon nakaukolan tayoy manpikasi pian tulongan nen Jehova. Sanen nampikasi si Jesus, antam no antoy ginawa na Dios ed sikato?— Angibaki na anghel pian mamabiskeg ed sikato. (Lucas 22:43) Kasin natulongan itayo na saray anghel na Dios?— Ibabaga na Biblia: “Say anghel nen Jehova mankampamento ed liberliber na saray ontakot ed sikato, tan iliktar tora.” (Salmo 34:7) Balet pian naawat so tulong na Dios, kaukolan ya agtayo labat ipikasi itan. Antam no antoy kaukolan tayon gawaen ni?— Inkuan nen Jesus ed saray patumbok to a mansiansian aliing tan manbantay. Antoy nikuan mo a makatulong ed sikatayo pian nagawaan itan?—

Kaukolan tayoy ontalineng a maong ed ibabaga diad saray panagaral na saray Kristiano tan manimano a maong ed babasaen tayo ed Biblia. Balet kaukolan tayo met so manpikasi a regular ed si Jehova tan patulongan tayo ed sikato a manlingkor ed sikato. No gawaen tayo, naawat tayoy tulong pian nadaeg tayoray katatakotan tayo. Diad ontan et magmaliw itayon maliket sano nawalaan itayo na pankanawnawan mangibaga ed arum nipaakar ed Sankamaongan a Managbangat tan ed say Ama to.